1. Dahaka dainai ita ibounai ese hagoadaia hereva ita abia be namo?

Ita ibounai ita ura ta ese ita ia hagoadaia. Reana iseda mauri lalonai lalohekwarahi, lalohisihisi, bona hisihisi ita davaria. Reana ita buruka, gorere, eiava iseda lalokau tauna ta ia mase dainai ita lalohisihisi bada. Ita haida be dagedage ita davaria bona unai bamona kara be ia bada ia lao noho. Unai ese ia hahedinaraia ita be “nega aukadia” lalonai ita noho, unai ‘dina gabedia’ ese danu ia hahedinaraia tanobada matamatana be kahirakahira do ia ginidae. (2 Tim. 3:1) To, reana Iehova ena gwauhamata ia guguru totona ita naria daudau vadaeni, bona ita davaria hekwakwanai be ia bada ia lao noho. Unai dainai edeseni amo hagoadaia hereva do ita abia?

2, 3. (a) Habakuku be daika? (b) Dahaka dainai Habakuku bukana do ita herevalaia?

² Unai henanadai ena haere ita diba totona, namona be Habakuku bukana ita herevalaia. Ena be Baibel ese Habakuku ena mauri lalonai idia vara gaudia ibounai ia herevalaia lasi, to unai buka ai ena ladana idia atoa karana ese ita ia hagoadaia. Iena ladana ena anina be “Mai Hebogahisi ida Rosia.” Unai ese Iehova ena hebogahisi karana eiava ia idia abidadama henia taudia be ia dekenai idia tabekau karana ia  herevalaia. Habakuku ese Dirava ia hereva henia neganai, henanadai momo ia henia. Ita gwau diba ia gwauraia henanadaidia be ita ibounai ese ita laloa gaudia, badina Iehova ese ena lauma helaga amo Habakuku ia durua idia herevalaia gaudia ia torea totona.​—Hab. 2:2.

³ Iehova bona ia lalometau tauna Habakuku edia herevahereva karana be Baibel lalonai ia noho. Iena buka be “Toretore Helagadia dekenai idia torea herevadia ibounai” ena kahana ta bona Dirava ena Hereva, Baibel, lalonai ia noho dainai “ita idia durua ita haheauka totona, bona . . . ita dekenai goada ia henia, unai amo helaro ita abia.” (Roma 15:4) Edena dala ai Habakuku bukana amo heduru ita abia diba? Ita ia durua Iehova abidadama henia karana ena anina ita lalopararalaia totona. Danu, Habakuku ena peroveta herevadia ese ia hahedinaraia, hisihisi bona hekwakwanai negadia ai lalomaino ita abia diba. Unai ita laloa noho lalonai, mani Habakuku bukana ai idia noho gaudia ma haida ita herevalaia.

4. Dahaka dainai Habakuku ia lalohisihisi?

⁴ Habakuku 1:2, 3 duahia. Habakuku be nega aukadia bona hekwakwanai idauidau idia vara negana lalonai ia noho. Ia lalohisihisi bada badina kara dika bona dagedage karadia idia ura henia taudia huanai ia noho. Edena nega ai edia kara dika do ia ore? Dahaka dainai Iehova ese nega daudau murinai kara ta ia karaia? Habakuku ia itaia ena tano taudia idia kara gageva bona ma haida idia dagedage henia. Danu ia mamia gau ta ia karaia diba lasi. Unai dainai Iehova ia guriguri henia bona ia noinoi kara ta ia karaia totona. Reana Habakuku ia laloa matamaia Iehova be ia vara gauna ia laloa bada lasi bona Dirava ese kara ta do ia karaia haraga lasi. Nega ta oi danu be unai bamona oi laloa, a?

5. Habakuku bukana amo dahaka mai anina bada gauna ta ita dibaia? (Laulau ginigunana herevalaia.)

⁵ Habakuku ese Iehova ia abidadama henia lasi, a? Ia ese Dirava ia gwauhamatalaia gaudia ia laloaboio, a? Lasi! Habakuku ese Iehova ena heduru ia tahua, bona ena hekwakwanai bona ia lalohekwarahilaia gaudia be Ia dekenai ia gurigurilaia, to taunimanima dekenai heduru ia tahua lasi, unai ese ia hahedinaraia Habakuku be Iehova ia abidadama henia. Habakuku ia daradara badina ia laloparara lasi dahaka dainai Iehova be kara ta ia karaia haraga lasi eiava ia davaria hisihisi ia koua lasi. Dirava ena lauma helaga ena heduru dainai Habakuku ese ia lalohekwarahilaia gaudia be Baibel lalonai ia torea, badina Iehova ia ura inai mai anina bada gauna ta ita dekenai ia hadibaia: Namona be ita gari lasi Ia dekenai iseda lalohekwarahi eiava daradara gaudia ita herevalaia totona. Oibe, ita ia boiria iseda kudouna ena ura gaudia be guriguri amo ia dekenai ita gwauraia. (Sal. 50:15; 62:8) Aonega Herevadia 3:5 ese ita ia hagoadaia Iehova “do [ita] abidadama henia, mai [iseda] kudouna ibounai” bona sibona iseda “diba do [ita] abidadama henia lasi.” Habakuku be unai sisiba herevana ia diba bona ena mauri lalonai unai ia badinaia.

6. Dahaka dainai guriguri karana be mai anina bada?

⁶ Habakuku be ia gaukara goada ena Turana bona Tamana Iehova kahirakahira ia lao totona. Habakuku be ia davaria hekwakwanai dainai, sibona ena diba dekenai ia tabekau lasi. To ia lalohekwarahilaia gaudia be Dirava dekenai gurigurilaia, unai amo haheitalai namona ia hahedinaraia. Danu guriguri ia Kamonai Henia Diravana, Iehova, ese ita ia hagoadaia iseda lalohekwarahi gaudia be ia dekenai ita gurigurilaia unai amo ita hahedinaraia ia ita abidadama henia. (Sal. 65:2) Unai ita karaia neganai, Iehova ese iseda guriguri ia haerelaia dalana do ita itaia bona ita ia hakaua dalana amo iena hebogahisi karana do ita mamia. (Sal. 73:23, 24) Ena be ita davaria hahetoho be ita ia hahisia, Ia ese ita do ia durua ena lalohadai, unai hekwakwanai dekenai ita lalopararalaia totona. Mai kudouna ibounai ida Dirava ita guriguri henia karana ese iseda abidadama karana ia dekenai ia hahedinaraia.

7. Habakuku ese ena lalohekwarahi gaudia ia gwauraia neganai, Iehova be dahaka ia karaia?

⁷ Habakuku 1:5-7 duahia. Habakuku ese ena lalohekwarahi gaudia be Iehova dekenai ia gwauraia murinai, reana ia laloa Iehova be kara ta do ia karaia. Iehova be hebogahisi Diravana dainai, Habakuku ena lalohisihisi herevana ia kamonai neganai ia gwau henia lasi. Dirava ia diba Habakuku be ia hisihisi bona lalometau dainai heduru totona ia noinoi. Unai dainai Iehova ese abidadama lasi Iuda taudia dekenai, do ia karaia gaudia be ia dekenai ia hadibaia. Iehova ese Habakuku ia hamaoroa, ena nega ai idia vara dagedage karadia be kahirakahira do ia haorea, bona reana Habakuku be unai sivarai ia kamonai tauna ginigunana.

8. Dahaka dainai Iehova ese ia gwauraia gauna be Habakuku ese ia laloa gauna hegeregerena lasi?

⁸ Iehova be Habakuku dekenai ia hahedinaraia ia noho hegaegae kara ta ia karaia totona. Unai gwau-edeede besena edia dagedage bona kara dikadia dainai Dirava ese idia do ia panisia. Iehova ese inai hereva “emui nega ai” ia gaukaralaia unai amo ia hahedinaraia iena hahemaoro karana be peroveta tauna Habakuku eiava ia ida peroveta gaukara idia karaia taudia ma haida edia nega ai do ia vara. Iehova ese ia gwauraia gauna be Habakuku ese ia laloa gauna hegeregerena lasi. Iena noinoi ena haere ia abia, a? Oibe, badina Iehova ese ia hamaoroa Iudea * ai idia noho taudia ibounai dekenai hisihisi do ia bada herea. Kaldea taudia (Babulonia taudia) be idia hebogahisi lasi, bona edia dagedage karana ese Habakuku ena hanua taudia​—Iehova ena taravatu idia diba​—edia dagedage karana ia hereaia. Dahaka dainai Iehova ese dirava koikoi idia tomadiho henia basileia ia gaukaralaia iena taunimanima ia hahemaoro henidia totona? Dirava ese ia gwauraia herevana oi kamonai neganai, dahaka do oi karaia?

9. Habakuku be sibona dekenai dahaka henanadai ia laloa?

⁹ Habakuku 1:12-14, 17 duahia. * Habakuku ia laloparara Iehova ese Babulonia taudia do ia gaukaralaia kara dika taudia ia hahemaoro henia bona panisia totona, to Habakuku be unai ia do daradaralaia noho. To, mai manau ida ia gwau, Iehova be ena “Nadi goadana.” (Deu. 32:4; Isa. 26:4) Habakuku be mai haheauka ida Iehova ena lalokau bona hebogahisi karana ia abidadama henia. Unai dainai ia gari lasi Iehova dekenai ia henanadai lou totona. Dahaka dainai Dirava ese Iudea ai idia vara kara dikadia ia koua lasi? Dahaka dainai kara ta ia karaia haraga lasi? Dahaka dainai Siahu Ibounai Diravana ese idia vara dika ma haida ia koua lasi? Ena be kara dika ia bada ia lao noho, dahaka dainai ‘hereva ta ia gwauraia lasi’? Ia be “Dirava Helagana” bona ita diba iena “matana be ia helaga momokani dainai kara dika do [ia] raraia noho lasi.”

10. Edena dala ai iseda hemami be Habakuku ia abia hemami bamona?

¹⁰ Nega haida iseda hemami be Habakuku ia abia hemami bamona. Iehova ita kamonai henia. Iena Hereva ita duahia bona stadilaia karana ese iseda abidadama eda helaro dekenai ia hagoadaia. Danu iena orea ese idia henia hadibaia herevadia amo ia gwauhamatalaia gaudia ita kamonai. To reana do ita laloa, ‘Edena nega ai iseda hisihisi do idia ore?’ Habakuku ese ia karaia gauna amo dahaka ita dibaia?

11. Habakuku be Iehova ena hereva ia kamonai murinai, dahaka ia karaia?

¹¹ Habakuku 2:1 duahia. Habakuku be Iehova ida ia herevahereva karana amo lalomaino ia abia. Unai dainai ena lalona ia hadaia mai haheauka ida do ia naria Iehova ese kara ta ia  karaia totona. Unai be nega kwadogina lalonai ia vara gauna lasi. To Habakuku be sibona ia hadibaia loulou, ia gwau: “To lau diba Dirava be do ia mai, ai idia hadikaia taudia do ia panisia. Unai dainai lau be unai dina do lau naria, mai egu laloa hekwarahi lasi.” (Hab. 3:16) Dirava ena abidadama hesiai taudia danu be unai haheauka karana idia hahedinaraia noho, ita idia hagoadaia ita hesiku lasi bona Iehova ita naria kara ta ia karaia totona.​—Mika 7:7; Iam. 5:7, 8.

12. Habakuku amo dahaka gau ma haida ita dibaia?

¹² Habakuku ese ia karaia karana amo dahaka ita dibaia? Gau ginigunana be, namona be Iehova guriguri henia karana ita hadokoa lasi herevana hahetoho momo ita davaria. Iharuana be, Iehova ena Hereva bona iena orea amo ia gwauraia gaudia ita kamonai namonamo be namo. Ihatoina be, mai haheauka ida Iehova ita naria bona ita abia dae momokani ia ese nega korikori ai ita davaria hisihisi ibounai do ia haorea. Bema Habakuku bamona, guriguri amo Iehova ita hereva henia bona ia ita kamonai henia lalomaino do ita abia, bona unai ese ita do ia durua ita haheauka totona. Iseda helaro ita laloa karana ese ita do ia durua ita haheauka noho totona, bona herevana dahaka hekwakwanai ita davaria do ita moale. Danu unai helaro dainai ita abia dae iseda guba Tamana be kara ta do ia karaia.​—Roma 12:12.

13. Habakuku 2:3 ai dahaka hagoadaia herevana ia noho?

¹³ Habakuku 2:3 duahia. Ita diba momokani Iehova be Habakuku dekenai ia moale badina, Habakuku be abia hidi ia karaia Iehova do ia naria totona. Siahu Ibounai Diravana be Habakuku ia davaria hisihisi ia diba. Unai dainai, Iehova be mai lalokau ida peroveta tauna Habakuku ia hagoadaia bona ia hamaoroa ia lalohekwarahilaia gaudia edia henanadai ena haere do ia henia. Daudau lasi murinai Iehova ese Habakuku ia durua. Toana be Iehova ese Habakuku ia hamaoroa: “Oi haheauka bona lau oi naria. Herevana nega daudau do ia abia, to emu guriguri do lau haerelaia!” Iehova ese Habakuku ia hamaoroa ena nega korikori ai Iena gwauhamata ibounai do ia hagugurua. Unai dainai, Iehova ese Habakuku ia hagoadaia do ia naria noho. Bona peroveta tauna be ia lalohisihisi lasi.

14. Herevana hekwakwanai o hisihisi ita davaria, iseda lalona ita hadaia dahaka ita karaia totona?

¹⁴ Namona be mai haheauka ida Iehova ita naria bona ia henia hereva ita badinaia unai ese ita do ia durua. Herevana dahaka hekwakwanai o hisihisi ita davaria, to Ia be kara ta do ia karaia dainai lalomaino ita abia diba. Iesu be ita ia hadibaia Iehova ese ia do abia hidi lasi “nega” ita laloa lasi, badina Iehova be Nega Ia Abia Hidi Tauna Badana. (Kara 1:7) Unai dainai, mai manau, abidadama bona haheauka ida ita naria bona iseda nega ita gaukaralaia namonamo Iehova ita hesiai henia totona.​—Mar. 13:35-37; Gal. 6:9.

15, 16. (a) Edena gwauhamata herevana be Habakuku bukana ai ita davaria diba? (b) Unai gwauhamata herevadia ese ita dekenai dahaka ia hadibaia?

¹⁵ Iehova be ia idia abidadama henia kara maoromaoro taudia dekenai, ia gwauhamata: “Kara maoromaoro tauna be do ia mauri” bona “tanobada taudia ibounai ese Lohiabada ena siahu bona iena hairai do idia diba momokani. Inai diba momokani, be do ia bada.” (Hab. 2:4, 14) Oibe, Iehova ia gwauhamata mai haheauka ida idia naria bona ia idia abidadama henia taudia dekenai mauri hanaihanai do ia henia.

¹⁶ Habakuku 2:4 ai ia noho gwauhamatana mani oi laloa. Matamanai reana oi laloa ia be hereva sibona, to ia be mai anina bada dainai aposetolo Paulo ese ena revareva lalonai nega toi ia gwauraia. (Roma 1:17; Gal. 3:11; Heb. 10:38) Herevana kara maoromaoro tauna be dahaka hekwakwanai ia davaria, to Iehova ia abidadama henia dainai, ia diba momokani Dirava ena gwauhamata ibounai be do idia guguru. Iehova ia ura vaira nega ena helaro ita laloa.

17. Habakuku bukana ese ita dekenai dahaka hagoadaia herevadia ia henia?

 ¹⁷ Habakuku bukana ai idia noho herevadia be mai anina bada hari inai nega dokona lalonai. Iehova be mai momokani ida ia idia abidadama henia kara maoromaoro taudia dekenai mauri hanaihanai ena gwauhamata ia gwauraia danu. Unai dainai, herevana ita lalohekwarahi bona ita lalometau, namona be Dirava ita badinaia bona ia ita abidadama henia noho. Iehova ese Habakuku amo ia gwauraia herevana be ita ia hagoadaia, Ia ese ita do ia durua bona hamauria. Iehova be ita ia noia mai haheauka ida iena Basileia ese tanobada do ia lohiaia negana totona ita naria noho. Unai nega ai, mai moale bona mai maino ida Iehova idia tomadiho henia taudia ese tanobada do idia hahonua.​—Mat. 5:5; Heb. 10:36-39.

18. Edena dala ai Iehova ena hereva ese Habakuku ia durua?

¹⁸ Habakuku 3:16-19 duahia. Iehova ena hereva ese Habakuku ia hagoadaia bada. Habakuku be idaunegai Iehova ese ena taunimanima totona ia karaia gaudia ia laloa dobu. Unai ese ena abidadama ia hagoadaia. Ia diba Iehova be kahirakahira kara ta do ia karaia! Ena be peroveta tauna ia diba ena hisihisi do ia ore haraga lasi, to unai ese ena lalona ia hagoadaia. Habakuku ia daradara lasi, to ia abia dae momokani Iehova ese ia do ia hamauria. Baibel ai siri 18 dekenai ia herevalaia abidadama karana be tau ta ese guna unai kara ia hahedinaraia lasi. Baibel idia stadilaia taudia haida idia laloa siri 18 ena anina be inai: “Lohiabada totona lau roho giroagiroa mai moale ida.” Ita ibounai dekenai unai hereva be mai anina bada! Iehova be ita dekenai gwauhamata namodia ia henia sibona lasi, to ita ia hadibaia danu ia gaukara goada noho unai gwauhamata ibounai ia hagugurua totona.

19. Iehova ese Habakuku ia hagoadaia bamona, edena dala ai unai ese ita ia hagoadaia danu?

¹⁹ Habakuku bukana amo ita dibaia gauna badana be inai: Iehova ita abidadama henia be namo. (Hab. 2:4) Iehova ita abidadama henia noho totona, iseda hetura karana Iehova ida ita hagoadaia be gau badana. Namona be (1) Ia dekenai iseda lalohekwarahi gaudia bona ita laloa momo gaudia ita gurigurilaia; (2) Iehova ena Hereva Baibel bona iena orea amo idia halasia hakaua herevadia ita badinaia; bona (3) mai abidadama bona haheauka ida Iehova ita naria. Habakuku be unai ia karaia. Ena be Habakuku be ena buka ia hamatamaia neganai ia be mai lalometau ida Iehova ia hereva henia, to ena buka ena karoa dokonai be moale bona hagoadaia herevadia ia torea. Bema Habakuku ita tohotohoa, ita danu be iseda guba tamana ena lalokau do ita mamia. Inai tanobada dikana ai unai be hagoadaia herevana!