1-2. Petero Ginigunana 4:7, 8 ena hereva bamona, dahaka ese ita ia durua diba nega aukadia ai ita haheauka totona?

INAI “dina gabediai” ita be hahetoho aukadia do ita davaria. (2 Tim. 3:1) Hegeregere, western Africa dekenai eleksen kempein idia karaia murinai, dagedage karana be ia bada. Hua siks lalonai, iseda tadikaka bona taihu idia loaloa diba lasi badina gabu ibounai ai taunimanima be idia heatu noho. Dahaka ese idia ia durua unai hekwakwanai idia haheaukalaia totona? Idia haida be tadikaka edia ruma dekenai idia noho badina unuseniai dagedage be lasi. Tadikaka ta ia gwau: “Unai bamona negadiai egu tadikaka ida lau noho dainai lau moale, badina ta ta ai hagoadaia heheni diba.”

² “Hisihisi badana” ia matamaia neganai, ita idia lalokau henia tura namodia be ita ida idia noho dainai do ita moale. (Apok. 7:14) Unai dainai gau badana be hari ma haida ida iseda hetura karana ita hagoadaia be namo. (1 Petero 4:7, 8 duahia.) Ieremia ena haheitalai amo gau momo ita dibaia diba, ena turadia be ia idia durua Ierusalema idia do hadikaia lasi neganai ia roho mauri totona. * Edena dala ai Ieremia ita tohotohoa diba?

3. (a) Ieremia dekenai dahaka ia vara? (b) Ieremia be ena seketere Baruku dekenai dahaka gaudia ia gwauraia, bona dahaka ia vara?

³ Lagani 40 bamona lalonai, Ieremia be kamonai lasi taudia  huanai ia noho, idia haida be ena neiba taudia bona ena varavara Anatoto taudia. (Ier. 11:21; 12:6) To, ia be sibona ia noho lasi. Ia lalohekwarahilaia gaudia be ena seketere Baruku dekenai ia gwauraia, bona Baibel ai unai sivarai ia torea. (Ier. 8:21; 9:1; 20:14-18; 45:1) Baruku ese Ieremia ena sivarai ia torea dalana amo ita itaia diba, idia ruaosi huanai lalokau bona hemataurai karana ia noho.​—Ier. 20:1, 2; 26:7-11.

4. Iehova ese Ieremia ia hamaoroa dahaka ia karaia totona, bona edena dala ai unai gaukara ese Ieremia bona Baruku edia hetura karana ia hagoadaia?

⁴ Lagani momo lalonai, Ieremia be mai gari lasi ida Ierusalema dekenai do idia vara gaudia be Israela taudia dekenai ia hadibaia. (Ier. 25:3) Iehova ia ura taunimanima do idia helalo-kerehai dainai, Ieremia ia hamaoroa lokua toretore ai Iena hadibaia herevadia ia torea totona. (Ier. 36:1-4) Ieremia bona Baruku be hua haida lalonai idia karaia hebou Dirava ese ia henia gaukara idia karaia totona, bona edia herevahereva karana ese edia abidadama ia hagoadaia.

5. Edena bamona ita diba Baruku be Ieremia ena turana namona?

⁵ Lokua toretorena ai hereva ibounai idia torea ore murinai, Ieremia be ena turana Baruku ia hadibaia taunimanima dekenai unai hadibaia hereva do ia gwauraia. (Ier. 36:5, 6) Baruku be mai gari lasi ida unai asainmen aukana ia karaia. Baruku ese dubu helaga vairanai taunimanima dekenai unai lokua toretore ia duahia neganai, Ieremia ena hemami mani oi laloa! (Ier. 36:8-10) Iuda ena lohia taudia be Baruku ia karaia karana idia kamonai, bona ia idia hamaoroa unai lokua toretore be idia dekenai do ia duahia badabada! (Ier. 36:14, 15) Unai lohia taudia idia ura Ieremia ese ia gwauraia herevadia be King Iehoiakimi dekenai do idia hadibaia. Unai dainai, Baruku idia hamaoroa: “Oi lao, gabu ta dekenai do oi  hunia, oi bona Ieremia danu. Bona umui hunia gabuna be tau ta do umui hamaoroa lasi.” (Ier. 36:16-19) Unai be sisiba namona!

6. Ieremia bona Baruku be hahetoho idia davaria neganai, dahaka idia karaia?

⁶ King Iehoiakimi be Ieremia ese ia torea herevadia ia kamonai neganai, ia badu dikadika dainai lokua toretoredia ia gabua bona oda ia henia Ieremia bona Baruku be dibura ruma ai do idia atoa totona. To, Ieremia be ia gari lasi. Ia ese Baruku dekenai lokua toretore ma ta ia henia, bona “king Iehoiakimi ia gabua vadaeni” lokua toretore dekenai idia noho hereva ibounai ia gwauraia, bona Baruku ese ia torea lou.​—Ier. 36:26-28, 32.

7. Ieremia bona Baruku idia gaukara hebou neganai dahaka ia vara?

⁷ Hahetoho idia haheaukalaia hebou taudia edia hetura karana be ia goada. Unai dainai ita gwau diba, Ieremia bona Baruku be King Iehoiakimi ese ia hadikaia lokua toretore idia torea lou totona idia gaukara hebou neganai, ta ta idia dibaia bona tura namodia ai idia lao. Edena dala ai unai abidadama taudia rua edia haheitalai ese ita ia durua diba?

8. Dahaka dainai nega haida ia auka ma haida ita tura henia totona, bona dahaka dainai unai bamona ita laloa lasi?

⁸ Reana ta ese guna ita ia hahisia dainai, nega haida ia auka ma haida dekenai iseda hemami ita gwauraia totona. (Aon. 18:19, 24) Eiava ita mamia nega be lasi bona ita hegeregere lasi ma haida ita tura henia totona. To, namo lasi unai bamona ita laloa. Bema ita ura iseda tadikaka be hahetoho negadiai ita idia durua, namona be hari iseda hetura karana idia ida ita hagoadaia. Dala namona ta be idia dekenai iseda hemami ita gwauraia hedinarai.​—1 Pet. 1:22.

9. (a) Edena dala ai Iesu ia hahedinaraia ena turadia ia abidadama henia? (b) Edena dala ia herevahereva karana ese emu hetura karana ma haida ida ia hagoadaia? Haheitalai gwauraia.

⁹ Iesu be ena turadia ida ia herevahereva karana amo ia hahedinaraia idia ia abidadama henia. (Ioa. 15:15) Ia ita tohotohoa diba bema ita moalelaia gaudia, iseda lalohekwarahi, bona ita lalohisihisilaia gaudia be iseda turadia dekenai ita gwauraia. Bema ta be oi ia hereva henia neganai oi kamonai namonamo, reana ena hereva amo do oi diba emui lalohadai, hemami, bona tahua gaudia be hegeregere. Mauri lagani 20 taihu ta, Cindy ena haheitalai mani ita laloa. Ia be mauri lagani 60 painia ta, ladana Marie-Louise ida tura namodia ai idia lao. Ia bona Marie-Louise be Thursday dabai ibounai haroro gaukara idia karaia, bona gau momo idia herevalaia. Cindy ia gwau: “Egu turadia ida herevahereva karana  lau moalelaia, unai ese lau ia durua idia lau dibaia namonamo totona.” Herevahereva namonamo karana ese hetura karana ia hagoadaia diba. Cindy hegeregerena, bema mai ura ida ma haida ida oi herevahereva emu hetura karana idia ida ia goada diba.​—Aon. 27:9.

10. Aonega Herevadia 27:17 ena hereva bamona, dahaka ia vara diba bema abidadama tamona taudia ida ita gaukara hebou?

¹⁰ Ieremia bona Baruku edia sivarai hegeregerena, bema abidadama tamona taudia ida ita gaukara hebou bona edia kara namodia ita dibaia, unai ese ita do ia durua edia turana ai ita lao totona. (Aonega Herevadia 27:17 duahia.) Hegeregere, haroro gaukara ai emu turana be mai gari lasi ida Iehova bona ena ura ia herevalaia neganai, emu hemami be edena bamona? Reana ia be emu turana namona ai do ia lao.

11-12. Haroro gaukara ese iseda hetura karana ta ida ia hagoadaia ena haheitalai ta oi gwauraia.

¹¹ Haroro gaukara lalonai gaukara hebou karana ena namo ita diba totona, mani haheitalai rua ita herevalaia. Mauri lagani 23 taihu, Adeline be ena turana ta Candice ia noia, momo idia haroro lasi teritori ta dekenai idia haroro totona. Adeline ia gwau: “Ai ura emai haroro gaukara do ai moalelaia bona mai ura ida do ai karaia. Ai ruaosi ese hagoadaia herevadia ai abia be namo unai amo emai gaukara do ai karaia namonamo diba.” Edia gaukara hebou karana amo dahaka namo idia abia? Adeline ia gwau: “Dina ta ta ena dokonai, emai hemami, emai herevahereva karana amo ta ta ai hagoadaia karana, bona haroro gaukara ai Iehova ese ai ia durua daladia ai herevalaia. Emai herevahereva karana ai moalelaia bona ta ta ai dibaia namonamo.”

¹² France amo singul taihu rua, Laïla bona Marianne be Central African Republic ena bisi bada taoni ta Bangui dekenai idia lao, wiki faiv lalonai haroro gaukara idia karaia totona. Laïla ia gwau: “Marianne bona lau be hekwakwanai haida ai davaria, to herevahereva namonamo bona lalokau karana dainai, emai hetura karana ia goada. Marianne ena kara  lau moalelaia, ia be gabu matamata ia manadalaia haraga, unai gabu ai idia noho taudia ia laloa bada, bona mai ura ida haroro gaukara ia karaia, unai dainai ia lau matauraia bada.” Unai bamona hahenamo be dala ma haida ai oi moalelaia diba. Hegeregere, dina ta ta ai emu teritori ai tadikaka eiava taihu ta ida oi haroro neganai, unai be nega namona ia oi dibaia bona emui hetura karana ia hagoadaia diba.

13. Dahaka gaudia ita dibaia diba bema iseda turadia ida ita gaukara hebou?

¹³ Nega haida iseda turadia ida ita gaukara hebou neganai, edia kara namodia bona edia manoka gaudia danu ita dibaia. Dahaka ese ita ia durua diba edia kara ita haheaukalaia totona? Mani Ieremia ena haheitalai oi laloa lou. Dahaka ese Ieremia ia durua haida edia kara namodia ia laloa, to edia kerere ia laloa lasi totona?

14. Ieremia be Iehova amo dahaka ia dibaia, bona unai ese edena dala ai ia durua?

¹⁴ Ieremia ese Baibel bukadia 1 King Taudia bona 2 King Taudia, bona Ieremia bukana ia torea. Unai asainmen amo Iehova ese goevadae lasi taudia dekenai ena hebogahisi ia hahedinaraia karana ia itaia. Hegeregere, ia dibaia gauna ta be King Ahaba be ena kara dika amo ia helalo-kerehai neganai, Iehova ese Ahaba ena negai ena ruma bese ia ibounai ia hamasea lasi. (1 Kin. 21:27-29) Unai hegeregerena, Ieremia ia diba Manase be Iehova vairanai kerere badana ia karaia, bona iena dika ese Ahaba ena dika ia hereaia. To, Iehova ese Manase ena dika ia gwauatao badina ia helalo-kerehai. (2 Kin. 21:16, 17; 2 Siv. 33:10-13) Reana unai sivarai ese Ieremia ia durua ena turadia ida ia noho neganai, Dirava ena haheauka bona hebogahisi karana ia tohotohoa totona.​—Sal. 103:8, 9.

15. Baruku dekenai tohoa gaudia idia vara neganai, Ieremia ese edena dala ai Iehova ena haheauka karana ia tohotohoa?

¹⁵ Baruku be ia idia tohoa gaudia dainai ena asainmen ia laloa bada lasi neganai, Ieremia ese ia durua dalana mani ita laloa. Ieremia be ena turana dekenai ia hesiku haraga lasi, to Dirava ena lalokau karana bona ena hadibaia hereva be Baruku dekenai ia gwauraia. (Ier. 45:1-5) Inai sivarai amo dahaka ita dibaia?

16. Aonega Herevadia 17:9 ena hereva bamona, dahaka ita karaia diba iseda hetura karana ita hagoadaia totona?

¹⁶ Momokani, iseda tadikaka taihu be goevadae lasi taudia. Unai dainai tura namona ta ai ita lao neganai, namona be ita gaukara goada iseda hetura karana ita hagoadaia totona. Bema iseda turadia be kerere ta idia karaia, namona be mai momokani ida Baibel ena sisiba amo ita durudia. (Sal. 141:5) Bona ita idia hahisia neganai, namona be edia dika ita gwauatao. Danu, edia dika ita gwauatao neganai, namo lasi gabeai idia eiava ma haida vairanai idia ita herevalaia lou. (Aonega Herevadia 17:9 duahia.) Unai dainai inai nega aukadia lalonai iseda tadikaka taihu edia manoka gaudia ita laloa lasi, to edia goada karana ita laloa bada be namo! Unai bamona ita karaia neganai, iseda hetura karana idia ida ita hagoadaia, badina hisihisi badana lalonai tura namodia ese ita do idia durua.

17. Edena dala ai Ieremia be nega aukadia lalonai tura namona ta ai ia lao?

¹⁷ Peroveta tauna Ieremia be nega aukadia lalonai tura namona ta ai ia lao. Hegeregere, opesa tauna Ebede Meleke ese ranu gurina amo Ieremia ia hamauria murinai, Ebede  Meleke ia gari badina lohia taudia ese ia do idia dagedage henia. Ieremia be unai ia kamonai neganai, ena uduna ia koua lasi to ena turana do ia durua dalana ia tahua. Herevana, Ieremia be dibura ruma ai ia noho, to Iehova ena gwauhamata namodia amo ena turana Ebede Meleke ia hagoadaia.​—Ier. 38:7-13; 39:15-18.

18. Aonega Herevadia 17:17 ena hereva bamona, iseda turana be hekwakwanai idauidau ia davaria neganai, edena dala ai ia ita durua diba?

¹⁸ Hari, iseda tadikaka taihu be hekwakwanai idauidau idia davaria. Hegeregere, momo be disasta eiava taunimanima ese idia havaraia hisihisi idauidau idia davaria noho. Iseda tadikaka taihu dekenai unai ia vara neganai, ita haida ese iseda ruma dekenai idia ita abia dae diba. Eiava ma haida be reana moni dalanai heduru ita henia diba. To, ita ibounai ese Iehova ita noia diba iseda tadikaka taihu ia durua totona. Bema ita itaia iseda tadikaka eiava taihu ta be ia lalomanoka, reana ita diba lasi dahaka do ita gwauraia eiava dahaka do ita karaia. To, ita ibounai ese heduru ita henia diba. Hegeregere, nega ita atoa iseda turana ita vadivadi henia totona. Danu, idia hereva neganai ita kamonai namonamo, bona hagoadaia Baibel siri ta ita herevalaia diba. (Isa. 50:4) Mai anina bada gauna be, emu turadia be heduru idia ura neganai, oi be idia ida oi noho.​—Aonega Herevadia 17:17 duahia.

19. Edena dala ai, hari iseda hetura karana ita hagoadaia ese vaira negai ita do ia durua?

¹⁹ Hari inai negai, tadikaka taihu ida iseda hetura karana ita hagoadaia be namo. Dahaka dainai? Badina iseda inai taudia idia ura koikoi herevadia amo iseda lalotamona karana idia hadikaia. Idia ura iseda tadikaka taihu ita durudia lasi. To, do idia kwalimu lasi. Iseda tadikaka taihu lalokau henia karana do idia koua diba lasi. Idia karaia gauna ta ese iseda hetura karana ia hadikaia diba lasi. Danu, iseda hetura karana be hari inai negai sibona lasi, to ia be do ia noho ela bona hanaihanai!