Lagani 1948 ai, Netherlands dekenai lau vara. Lagani ta murinai, egu famili be São Paulo, Brazil, dekenai ai lao. Egu tama sina be hanaihanai dubu idia lao, bona adorahi ibounai aniani murinai, Baibel ai duahia. Lagani 1959 ai, United States dekenai ai lao bona Massachusetts dekenai ai noho.

Egu tamana ia gaukara goada emai famili taudia 8 ia naria totona. Ia be gaukara idauidau, hegeregere, bisinesi kohu ia hoihoilaia, dala hanamoa gaukara ia karaia, bona airline dekenai ia gaukara. Airline dekenai ia gaukara neganai, ai moale bada badina ai ibounai be gabu idauidau ai lao diba.

Haisikuli lau lao neganai, nega momo lau laloa, “Egu mauri ai dahaka do lau karaia?” Egu turadia haida idia ura iunivesiti idia lao, to ma haida be ami gaukara idia abia hidi. To lau be ami gaukara lau ura lasi , badina idia hepapahuahu bona heai. Unai dainai iunivesiti dekenai lau lao. To lau ura bada taunimanima lau durua, badina lau laloa unai ese egu mauri do ia hanamoa.

Iunivesiti dekenai, taunimanima edia mauri dalana lau stadilaia, badina lau ura mauri ia matamaia dalana lau diba. Ai dekenai evolusen idia hadibaia bona idia ura unai hereva ai abia dae. To lau daradara, badina idia herevalaia gaudia edia hamomokania gaudia be lasi, bona lau ura lasi lau abia dae kava.

Egu klas dekenai maoro bona kerere edia idau idia hadibaia lasi. To, iunivesiti dekenai do ai kwalimu daladia sibona idia hadibaia. Pati gabudia dekenai lau lao bona drag lau ania, to lau abia moalena be ia noho daudau lasi. Lau laloa, ‘Inai be mauri namona, a?’

Daudau lasi murinai, Boston siti ena iunivesiti dekenai lau lao. Egu holidei negadiai, lau gaukara unai amo sikuli davana lau karaia diba. Unuseniai nega ginigunana Iehova ena Witnes ta lau davaria, bona ia ese Daniela karoa 4 ena peroveta herevana “lagani 7” ia herevalaia, bona ia gwau ita be nega dokona ai ita noho. (Dan. 4:13-17) Lau laloparara bema ia ida Baibel ai herevalaia loulou bona lau dibaia gaudia lau abia dae, egu mauri dalana do lau haidaua diba. Unai dainai, dala idauidau lau tahua ia lau dadaraia totona.

Iunivesiti dekenai lau be kosi haida lau karaia, unai amo South America dekenai volantia gaukara lau karaia diba. Lau laloa taunimanima lau durua neganai, egu mauri do lau moalelaia. To lau laloparara unai gaukara ese egu mauri lalonai namo ia havaraia lasi. Unai dainai iunivesiti lau rakatania.

May 1970 ai, Amsterdam, Netherlands dekenai lau lao, bona guna egu tamana ia gaukara kampani airline dekenai lau gaukara. Unai gaukara dainai, gabu idauidau lau vadivadi henia diba, hegeregere Africa, America, Europe, bona Asia. Ena be tano idauidau dekenai lau lao, to lau laloparara unuseniai hekwakwanai badadia idia noho danu, bona ta ia hegeregere lasi unai ia hanamoa totona. Lau ura bada mauri namona lau davaria, unai dainai United States dekenai lau giroa bona Boston iunivesiti ai lau sikuli lou.

To lau laloparara iunivesiti dekenai henanadai badadia edia haere lau davaria lasi. Lau diba lasi dahaka do lau karaia, unai dainai egu profesa ta ena heduru lau tahua. Lau hoa badina ia gwau: “Dahaka dainai oi sikuli noho? Iunivesiti oi rakatania be namo?” Unai hereva lau badinaia, bona maoromaoro iunivesiti lau rakatania.

Lau mamia egu mauri be anina lasi, unai dainai orea ta lau bamoa, idia be kastom karadia idia dadaraia bona idia ura maino bona lalokau idia habadaia. Lau bona egu turana haida be United States amo Mexico ena siti, Acapulco, dekenai ai lao. Bona komiuniti ta dekenai ai noho, idia be taravatu idia dadaraia bona edia mauri dalana be hekwarahi lasi bamona. To lau itaia edia mauri dalana be anina lasi eiava moale korikori idia davaria lasi. Bona idia kara momokani lasi bona kara dika idauidau idia karaia.

Unai nega ai, lau mero matamata neganai lau ura karaia gauna lau laloa lou. Lau ura kapten tauna ai lau lao bona bouti lau taria loaloa. To unai lau karaia totona, sibona egu bouti ta lau hoia be namo. Egu turana, Tom,  ena ura be unai bamona danu, unai dainai ai ura bouti amo tanobada ai hagegea. Lau ura paradaiso bamona motumotu ta lau davaria bona unuseniai lau noho, unai amo hekwakwanai ibounai lau laloaboio diba.

Lau bona Tom be Arenys de Mar dekenai ai lao, ia be Barcelona, Spain, kahirakahira. Unuseniai 9.4 mita bouti ladana Llygra ai hoia. Bouti ena kahana haida ai hanamoa matamaia, unai amo do ia hegeregere davara ena dobu kahanai ia heau totona. Do ai lao henia gabuna dekenai ai lao totona ai haraga lasi, unai dainai ensini ai kokia bona ena gabu ai ranu tanika ta ai atoa. Bouti edia stopu gabudia dekenai emai bouti ai atoa totona, bara rua ai hoia, edia lata be 5 mita. Dokonai, emai laolao ai hamatamaia, bona Indian Ocean amo Seychelles dekenai ai lao. Emai palani be Africa ena west kahana ena kone kahadia amo do ai lao ela bona South Africa ena gabu, Cape of Good Hope, dekenai do ai ginidae. Ai ese hisiu, mapu, buka haida, bona gau ma haida ai gaukaralaia emai laolao dala maorona ai diba totona. Lau hoa badina unai gaudia amo ai ura lao henia gabuna ai davaria diba.

Daudau lasi murinai, ai laloparara emai bouti be hegeregere lasi davara ena dobu kahanai ia heau totona. Hora tamona lalonai ranu 22 lita bamona be bouti lalonai ia vareai diba! Matamanai lau hereva bamona, lai bada ia toa neganai lau gari bona nega ginigunana lau guriguri, bona Dirava dekenai lau gwauhamata, bema ai mauri, dala do lau tahua ia lau diba totona. Lai badana ia ore, bona egu gwauhamata lau hamomokania.

Davara dekenai ai heau neganai, egu Baibel lau duahia matamaia. Mani oi laloa Mediterranean Davara huanai bouti ai lau helai bona gwarume idia roho, dolfin momo, bona ia doko diba lasi davara lau itaia diba. Hanuaboi ai, hisiu orea momo lau itaia bona lau diba momokani Dirava ia noho bona taunimanima ia laloa bada.

Wiki haida ai noho murinai, Spain ena siti, Alicante, ena bouti atoa gabudia dekenai ai ginidae, bona ai ura unuseniai emai bouti do ai hoihoilaia bona matamatana ai abia diba. Emai bouti be gunana, mai matu bona ensini be lasi dainai ta ese ia hoia diba lasi! To, unai be nega namona egu Baibel lau duahia totona.

Baibel lau duahia momo neganai, lau laloparara unai buka ese ta ia durua diba mauri namona ia davaria totona. Baibel ena hereva dekenai lau hoa, badina ia hahedinaraia taunimanima be kara dikadia idia dadaraia diba. Danu lau laloa, dahaka dainai ai gwau ai be Keristani taudia, to Baibel ena hereva ai badinaia lasi.

Egu lalona lau hadaia egu mauri lau haidaua totona, unai dainai drag ania karana lau rakatania. Lau diba Baibel ena taravatu idia badinaia taudia haida idia noho, bona lau ura unai taudia lau hedavari henia. Nega iharuana Dirava lau guriguri henia, lau ia durua unai taudia lau davaria totona.

Lau laloa dala namona ta be, tomadiho ta ta dekenai do lau lao ela bona tomadiho momokani lau davaria. Alicante siti lalonai lau loaloa neganai, dubu idauidau lau itaia diba. To unai  dubu momo dekenai kaivakuku edia laulau idia noho dainai, lau diba idia be tomadiho momokani lasi.

Sunday adorahi ta ai, lau be ororo ataiai lau helai bona bouti atoa gabuna lau itaia diba, unai nega ai Iakobo 2:1-5 lau duahia, unai siri ia gwau taga taudia sibona ita ura henia lasi. Bouti dekenai lau giroa noho lalonai, tomadiho gabuna ta lau itaia bona ena saini ia gwau: “Iehova Ena Witnes Taudia Edia Kingdom Hall.”

Lau laloa, ‘Mani edia dubu dekenai lau lao bona lau do idia kara henia dalana lau itaia.’ Unai dainai Kingdom Hall dekenai lau vareai, tamaka be lasi, egu auki huina be bada, bona lau karaia piripou be mai ena matu. Ta ese lau ia hakaua lao bona hahine burukana ta ena badinai lau helai, bona unai hahine buruka be mai moale ida lau ia durua, hereva henia tauna ese ia gwauraia Baibel siri lau davaria totona. Hebou ia ore murinai, lau hoa badina momo idia mai lau idia hedavari henia totona. Tau ta ese lau ia boiria iena ruma ai Baibel ai herevalaia totona, to Baibel lau do duahia ore lasi dainai, ia lau hamaoroa, “Lau hegaegae neganai oi do lau hadibaia.” Unai nega amo, hebou ibounai lau lao henia matamaia.

Wiki haida murinai, unai tau ena ruma dekenai lau lao bona ia ese Baibel amo egu henanadai ia haerelaidia. Wiki ta murinai, lau dekenai dabua namodia haida ia henia. Lau ia hamaoroa unai dabua ena biaguna be dibura ruma ai ia noho, badina ia ese Baibel ena taravatu, ta ta lalokau henia karana dekenai ia badinaia bona tuari lalonai ia vareai lasi. (Isa. 2:4; Ioa. 13:34, 35) Lau diba momokani Baibel ena taravatu idia badinaia taudia lau davaria vadaeni! Lau ese egu tahua gauna gunana, paradaiso bamona motumotu tahua karana lau hadokoa, to Baibel lau stadilaia namonamo. Unai dainai Netherlands dekenai lau giroa lou.

Dina 4 murinai Netherlands ena siti, Groningen, dekenai lau ginidae. Unuseniai moni gaukara ta lau tahua be namo. Kampani ta dekenai gaukara totona lau noinoi neganai, henanadai pepana ta idia henia, bona henanadai ta be tomadiho totona. Unai pepa ai lau torea, “Iehova ena Witnes ta.” Gaukara biaguna ese unai ia duahia neganai, lau itaia ena vairana toana ia idau. Ia gwau, “Oi do lau rini henia.” To ia rini lasi.

Kapenta gabuna ma ta ai, gaukara biaguna lau nanadaia bema heduru ia ura. Ia be egu sikuli amo lau abia diploma bona referens  haida totona ia henanadai. Lau hamaoroa lau be bouti dikana ta lau hanamoa. Lau hoa, badina ia gwau, “Hari adorahi gaukara do oi hamatamaia, to egu taravatu tamona be inai: Egu gaukara gabuna ai kerere ta oi karaia lasi, badina lau be Iehova ena Witnes ta bona Baibel ena kara maoromaoro taravatudia lau badinaia.” Lau hoa dikadika bona lau gwau, “Lau danu!” Egu huina be lata bona egu auki huina dainai ia laloa lau be Witnes tauna lasi. Ia gwau: “Vadaeni Baibel amo oi do lau stadi henia.” Mai moale ida unai lau abia dae. Lau laloparara dahaka dainai unai gaukara biaguna ginigunana be lau ia rini henia lou lasi. Oibe, Iehova ese egu guriguri ia haerelaia noho. (Sal. 37:4) Unai tadikaka ena kampani dekenai lagani ta lau gaukara. Unai negai ai, lau ida Baibel ia stadilaia, unai murinai, January 1974 ai bapatiso lau abia.

Hua ta murinai, painia gaukara lau hamatamaia, bona unai ese lau dekenai moale bada ia henia. Bena hua ma ta murinai, Amsterdam dekenai lau lao, Spanish gado grup lau durua totona. Spanish bona Portuguese gado ai Baibel stadi momo lau karaia dainai, lau moale bada! May 1975 ai, spesel painia gaukara lau hamatamaia.

Dina ta, spesel painia taihu ta ladana Ineke be emai Spanish gado hebouna ta dekenai ia mai, Bolivia gado ai ia stadi henia hahinena ia mailaia totona. Bena lau bona Ineke be revareva amo ai hetura heheni, bona gabeai ai diba emai tahua gaudia be hegeregere. Lagani 1976 dekenai ai headava bona spesel painia gaukara ai karaia ela bona lagani 1982 ai Gilead ena klas namba 73 dekenai ai idia boiria. Ai hoa bona moale bada badina East Africa dekenai ai idia siaia, unuseniai Mombasa, Kenya, dekenai lagani 5 hesiai gaukara ai karaia! Lagani 1987 ai, Tanzania dekenai ai idia siaia lao, unuseniai gavamani ese haroro gaukara ia kehoa lou. Bona lagani 26 ai noho bena Kenya dekenai ai giroa lou.

Manau taudia ai durua Baibel ena hereva idia dibaia karana ese ai dekenai moale bada ia havaraia. Hegeregere, Mombasa dekenai egu Baibel stiuden ginigunana be haroro gaukara ai lau davaria. Ia dekenai magasin rua lau henia murinai, ia gwau, “Inai lau duahia ore neganai, dahaka do lau karaia?” Wiki ta murinai, Swahili gado ai idia halasia buka matamata, Mauri Hanaihanai Paradaiso Lalonai, amo Baibel stadi ai hamatamaia. Lagani ta murinai, ia bapatiso bona regula painia gaukara ia matamaia. Unai negana amo, ia bona ena adavana ese taunimanima 100 mai kahana idia durua bapatiso idia abia totona.

Mauri ena badina lau lalopararalaia neganai, lau mamia lau be loaloa hoihoi tauna bamona, dava bada pel nadi ia davaria bona ia ura lasi ia haboioa. (Mat. 13:45, 46) Lau ura egu mauri ibounai lalonai ma haida lau durua, mauri ena anina korikori idia davaria totona. Lau bona egu adavana ai itaia, Iehova ese ena taunimanima ia durua mauri namona idia moalelaia totona.