Lau be lagani 1934 ai lau vara. Egu Keristani tama sina, Fred bona Edna Molohan be lagani 20 Baibel Stiuden taudia (Iehova ena Witnes taudia). Lau moale bada badina idia ese lau idia durua Dirava lau lalokau henia totona. Emai ruma bese be Kansas ena sautwest kahana dekenai ia noho taoni maragina ta ladana, Parsons dekenai idia noho, bona unai gabu ena kongrigeisen ai momo be horoa Keristani taudia. Emai ruma bese be kongrigeisen heboudia lao henia karana bona ma haida dekenai Dirava ena Hereva momokani harorolaia karana idia moalelaia. Saturday adorahi momo ai, nega ai atoa strit dekenai haroro gaukara ai karaia totona, hari idia gwauraia pablik gabudiai haroro gaukara. Nega haida emai tauanina ia hesiku sisina, to ai moale haroro gaukara murinai emai tamana be ai totona ice-cream do ia hoia.

Emai kongrigeisen maragina ena teritori dekenai taoni maragidia bona fam momo idia noho. Fam dekenai idia gaukara taudia momo ai vadivadi henia bona pablikeisen ai henidia neganai, idia ese uma aniani, gatoi, eiava kokoroku idia henia. Emai moni be bada lasi bona emai tamana be unai pablikeisen totona kontribusen ia henia vadaeni dainai, unai aniani amo heduru ai abia.

Egu tama sina be rekodi masini ta idia abia, bona idia gaukaralaia haroro gaukara totona. Lau be mero maragina dainai lau hegeregere lasi unai masini lau gaukaralaia totona, to lau moale egu tama sina lau durua lou henia bona Baibel stadi taudia dekenai Tadikaka Rutherford ena tok, idia rekodia gauna, ai halasia.

Egu tamana ese emai motuka (1936 ai idia karaia Ford) ia senisia bona saun motuka ta ai ia halaoa, unai motuka ena guhi dekenai be spika badana ta ia atoa. Unai motuka ai gaukaralaia Basileia ena sivarai ai harorolaia totona. Nega momo taunimanima idia kamonai totona, miusiki ai gadaralaia guna, bona gabeai idia rekodia Baibel tok ta ai gadaralaia. Idia rekodia tok ia ore murinai, kamonai taudia dekenai pablikeisen ai hariharilaia.

Kansas ena taoni maragina ta, Cherryvale ai, pulisi ese egu tamana idia hamaoroa saun motuka be taoni ena park dekenai do ia abia vareai lasi, badina  Sunday ai momo be unuseniai idia laga-ani. Egu tamana ia kamonai sibona bona motuka be strit ena kahana ai, to park vairanai ia atoa, unai amo taunimanima be program idia kamonai diba. Egu tamana bona egu kakana Jerry ida be unai bamona nega ai moalelaia.

Lagani 1940 be kahirakahira neganai, ai be spesel haroro kempein ai karaia unai amo emai teritori ai karaia haraga, badina unai gabudia ai dagedage be bada. Ai be daba maragi ai (Joplin, Missouri dekenai ai karaia bamona) mai regerege lasi ida ruma taudia edia iduara henunai pepapepa bona buklet ai atoa. Unai murinai, taoni ena murimuri kahana dekenai do ai haboua, bona ai sekea bema pulisi ese ta idia dogoatao o lasi.

Unai lagani lalonai, ai moalelaia haroro gaukara dalana ma ta be, information march. Unai be taoni dekenai Basileia ena sivarai ai harorolaia totona laini dekenai ai raka bona saini ai huaia loaloa. Lau laloatao nega ta emai taoni ai, tadikaka taihu be saini ta, ena sinado be, “Tomadiho be Idoa Bona Kara Koikoi Gauna,” idia huaia bona laini dekenai idia raka. Idia be taoni amo kilomita 1.6 bamona idia raka ela bona edia ruma dekenai idia ginidae. Moale gauna be idia raka loaloa neganai taunimanima ese idia dagedage henidia lasi, to kamonai taudia momo idia davaria.

Emai ruma bese be hebouhebou totona, Kansas amo ai lao Texas. Egu tamana be Missouri-Kansas-Texas Railroad (M-K-T, eiava Katy, Railroad) dekenai ia gaukara dainai, iena pass ai gaukaralaia trein dekenai ai guia, unai amo emai varavara ai vadivadi henia bona hebouhebou dekenai ai lao diba. Egu sinana ena kakana, Fred Wismar bona ena adavana, Eulalie, be Temple, Texas dekenai idia noho. Lagani 1900 lalonai egu vavana Fred ia do matamata neganai, hereva momokani ia dibaia, ia bapatiso, bona ia dibaia gaudia be ena tadina ibounai, egu sinana danu, ia hadibaia. Texas dekenai tadikaka taihu momo be ia idia diba namonamo, guna unuseniai ia be zone gaukara ia karaia (hari idia gwauraia sekit naria tauna). Ia be hebogahisi, moale bona haroro goadagoada tauna dainai, ena haheitalai namona ese egu matamata negana ai lau ia durua.

Lagani 1941 ai emai ruma bese ida be trein amo St. Louis, Missouri dekenai ai lao, hebouhebou badana ta totona. Matamata taudia ibounai idia boiria hebou gabuna ena kahana ta dekenai idia helai bona Tadikaka Rutherford ena tok ladana, “King Ena Natudia” idia kamonai totona. Unai tok ena dokona ai, Tadikaka Rutherford bona ena durua taudia ese matamata taudia ta ta dekenai buka matamata ladana, Children, idia hariharilaia. Unai nega ai matamata taudia ibounai 15,000 bamona ese unai hahenamo idia moalelaia.

Lagani 1943 ai, Coffeyville, Kansas dekenai sekit hebouhebou ta ladana, “Gaukara Goadagoada” dekenai ai lao. Unai hebouhebou ai idia hadibaia kongrigeisen ibounai dekenai Tiokratik Haroro Sikuli do idia karaia, bona unai sikuli dekenai do idia gaukaralaia buklet mai ena leseni 52 idia halasia. Unai lagani murinai, egu stiuden tok ginigunana lau henia. Lau dekenai unai hebouhebou be spesel badina, lau bona ma haida be, keru negana ai fam ta badinai ia noho gohu ta lalonai bapatiso ai abia.

Lagani 1951 ai, haisikuli lau haorea dainai namona be lau abia hidi vaira nega ai dahaka do lau karaia totona. Lau ura bada Betele dekenai lau gaukara, guna egu kakana Jerry danu be unuseniai ia gaukara, unai dainai Brooklyn ofesi dekenai egu aplikeisen lau siaia. Unai abia hidi ese lau ia durua bada. Daudau lasi murinai, egu aplikeisen idia abia dae, bona March 10, 1952 ai lau idia boiria Betele dekenai lau gaukara totona.

Lau ura iseda buka bona magasin idia printaia gabuna dekenai lau gaukara. To unai ia vara lasi badina lau idia hadibaia aniani gabuna dekenai waiter gaukara do lau karaia bona gabeai kisini dekenai lau gaukara, lau dibaia gaudia lau moalelaia. To, kisini ai emai gaukara sediual dekenai ta ta be ai senisi dainai, nega bada ia noho dina lalonai Betele ena library lau gaukaralaia Baibel lau stadilaia totona. Unai ese egu abidadama bona egu hetura karana Dirava ida ia hagoadaia. Danu unai ese lau ia durua egu lalona lau hadaia Betele dekenai Iehova ena hesiai gaukara lau karaia noho totona. Lagani 1949 ai, Jerry be betele ia rakatania bona Patricia ia adavaia, to idia be Brooklyn kahirakahira idia noho. Idia ruaosi ese lau idia durua bona hagoadaia egu Betele gaukara ena lagani ginigunadia lalonai.

Daudau lasi murinai Betele dekenai tadikaka be tok henia taudia idia tahua unai amo Betele ena lista dekenai idia atoa bema idia hegeregere kongrigeisen ma haida dekenai pablik tok idia henia totona. Unai lista dekenai edia ladana ia noho tadikakadia be lagani ta lalonai kongrigeisen haida do idia vadivadi, Brooklyn amo ena daudau be kilomita 320 bamona, bona unuseniai pablik tok do idia henia bona unai kongrigeisen ida haroro gaukara do idia karaia hebou. Egu ladana be unai lista dekenai ia noho be hahenamo ta. Mai gari ida egu pablik tok ginigunana lau henia, unai nega ai tok be hora tamona lalonai do oi henia. Nega momo trein amo unai kongrigeisen lau vadivadi henidia. Lau laloatao lagani 1954, Sunday adorahi kahana ena paraka negana ai, New York ia lao henia trein dekenai lau guia, bona hanuaboi ai Betele dekenai do lau ginidae. To, lai bada herea bona sinou bada ia diho dainai, trein ena ensini be ia gaukara namonamo lasi. To, Monday 5 o’klok dabai unai trein be New York City ena trein steiseni dekenai ia ginidae. Ena be lau leiti sisina bona hanuaboi ibounai lalonai unai trein dekenai lau helai bona egu tauanina ia hesiku bada, to Brooklyn ena trein ta dekenai lau guia bona lau ginidae neganai, maoromaoro lau lao kisini dekenai lau gaukara. To unai spesel wikeni ai, tadikaka taihu ida lau gaukara hebou bona tura matamatadia lau davaria karana ena moale ese lau ia durua unai hekwakwanai lau laloa bada lasi totona.

Betele dekenai lau do matamata neganai, lau idia boiria iseda reidio steiseni WBBR dekenai heduru lau henia totona. Unai stiudio be 124 Columbia Heights ena second floor dekenai ia noho. Egu asainmen be wiki ta ta lalonai idia halasia broadcasting dekenai Baibel stadi ena program ai kahana ta lau henia totona. Betele dekenai lagani momo ia gaukara tadikaka ta ladana, A. H. Macmillan, be nega momo unai reidio program lalonai kahana momo ia karaia. Momo ese ena ladana idia gwauraia Tadikaka Mac, bona Betele dekenai ai gaukara matamata taudia dekenai ia be haheitalai namona badina mai haheauka ida lagani momo Iehova ia hesiai henia.

Lagani 1958 ai, lau idia boiria Gilead Sikuli dekenai idia lao taudia ida lau gaukara hebou totona. Egu gaukara be idia gradueit tadikaka taihu edia visa bona unai tano dekenai idia lao dalana lau hegaegaelaia. Unai negadia ai, peleini amo idia lao ena davana be bada herea, unai dainai idia haida sibona be peleini dekenai idia guia. Africa bona Asia kahana dekenai idia siaia taudia be bouti amo idia lao. Lagani haida murinai, peleini edia davana ia diho neganai, misinari momo be edia asainmen dekenai idia lao totona peleini amo idia lao.

Lagani 1960 ai, egu gaukara ia bada badina lagani 1961 ena intanesinol hebouhebou totona United States amo do idia lao Europe taudia edia dala lau hegaegaelaia. Edia laolao be New York amo do idia  lao Hamburg, Germany dekenai, hebouhebou badana totona. Hebouhebou murinai, lau bona tadikaka toi Betele amo be motuka ta ai rentaia bona Germany amo ai heau lao Italy dekenai, iseda brens ofesi Rome dekenai ai vadivadi henia totona. Unai murinai, France dekenai ai lao, Pyrenees ena ororo ai hanaia, ela bona Spain dekenai ai ginidae, unuseniai iseda haroro gaukara be gavamani ese idia taravatua. Barcelona ai idia noho tadikaka taihu dekenai iseda pablikeisen ai abia lao, to harihari gaudia bamona ai kumia bona idia ai henia. Idia ai hedavari henia neganai, ai moale bada! Unai murinai motuka amo ai lao Amsterdam bona unuseniai peleini dekenai ai guia New York dekenai ai lao totona.

Lagani ta murinai, Betele dekenai asainmen ma ta idia henia, lau ese intanesinol hebouhebou totona gabu idauidau amo idia mai tadikaka bona taihu edia laolao dalana lau hegaegaelaia. Unai be lagani 1963 ena hebouhebou ladana, “Noho Hanaihanai Sivarai Namona” totona. Dala ai karaia tadikaka taihu 583 be tanobada ena kahana momo dekenai intanesinol hebouhebou badana idia lao totona, hegeregere Europe, Asia, South Pacific, Honolulu, Hawaii, bona Pasadena, California. Unai loaloa ai idia vadivadi gabudia ma haida be Lebanon bona Jordan, unuseniai Baibel ese ia gwauraia tanodia idia itaia. Peleini dekenai do idia guia bona hotel dekenai do idia noho ena sediual sibona ai karaia lasi, to emai dipatmen Betele dekenai be unai tano ta ta dekenai do idia lao taudia edia visa ai hegaegaelaia danu.

Danu lagani 1963 ai, lau dekenai mai anina bada gauna ta ia vara. June 29 ai, Lila Rogers lau adavaia, ia be Missouri amo bona lagani toi gunanai Betele dekenai ia gaukara. Ai headava bona pura ta murinai, lau bona Lila be tanobada ena kahana haida dekenai ai loalao, hegeregere Greece, Egypt, bona Lebanon. Peleini dekenai ai guia bena Beirut amo ai lao Jordan ena airport maragina dekenai ai ginidae. Unuseniai Iehova ena Witnes taudia edia gaukara idia taravatua dainai, ai idia hamaoroa unai tano ena visa do idia henia lasi. Vadaeni ai laloa unuseniai ai ginidae dahaka do ia vara. Ai hoa bona ai moale bada badina ai ginidae neganai, ai itaia tadikaka taihu momo be airport ena guhi ta latanai idia gini bona saini ta idia dogoatao, ia gwau “Welkam Iehova Ena Witnes Taudia”! Danu ai moale badina Baibel ese ia sivarailaia gabudia ai itaia! Ai ese idaunegai abidadama taudia edia noho gabudia, Iesu bona ena aposetolo taudia idia haroro gabudia, bona edeseni ai Keristani mauri dalana ia matamaia bona tanobada ibounai dekenai idia harorolaia gabudia ai itaia.​—Kara 13:47.

Lagani 55 lalonai, Lila be emai hesiai gaukara idauidau lalonai egu turana namona. Herevana Spain bona Portugal ai iseda gaukara idia taravatua, to nega momo unai gabudia ai lao. Iseda tadikaka taihu ai hagoadaia bona idia dekenai iseda pablikeisen bona gau ma haida ai abia lao. Danu Cádiz, Spain ena dibura ruma dekenai iseda tadikaka haida ai vadivadi henia. Lau moale bada badina Baibel ena hereva amo idia lau hagoadaia diba.

Lagani 1963 amo, lau moale badina intanesinol  hebouhebou idia abia gabudia hegeregere Africa, Australia, Central bona South America, Europe, Asia, Hawaii, New Zealand, bona Puerto Rico totona idia lao taudia edia laolao dalana hegaegaelaia gaukarana lau durua. Lau bona Lila be hebouhebou namodia momo ai moalelaia, idia ta be Warsaw dekenai, lagani 1989 ai. Tadikaka taihu momo Russia amo be edia nega ginigunana hebouhebou badana ta idia lao! Ai hedavari henidia tadikaka taihu haida be edia abidadama dainai lagani momo Soviet Union ena dibura ruma dekenai idia noho.

Tanobada hegegemadai brens ofesi momo lau vadivadi, bona Betele famili bona misinari taudia lau hagoadaia karana be hahenamo ta. South Korea ena brens vadivadi ai karaia neganai, Suwon ena dibura ruma dekenai idia noho tadikaka 50 ai vadivadi henidia. Unai tadikaka ibounai be lalohadai maorona idia dogoatao dainai, idia noho hegaegae haroro gaukara do idia karaia lou totona. Unai ese emai abidadama ia hagoadaia bada!​—Roma 1:11, 12.

Lau itaia edena bamona Iehova ese ena taunimanima ia hanamoa, lagani 1943 ai lau bapatiso negana amo pablisa ibounai be 100,000 bamona, to hari pablisa ibounai 8,000,000 mai kahana be tano 240 ai Iehova ena hesiai gaukara idia karaia noho. Unai ia vara ena badina ta be Gilead amo idia gradueit taudia ese haroro gaukara idia durua noho. Lagani haida lalonai misinari momo ida lau gaukara hebou bona idia lau durua edia asainmen totona tano ma ta dekenai idia lao karana lau moalelaia!

Lau moale bada badina egu matamata negana ai abia hidi lau karaia Betele ai lau gaukara, unai amo egu haroro gaukara lau habadaia totona. Idia hanaia laganidia lalonai Iehova ese lau ia hanamoa bada. Danu lagani momo lalonai, lau bona Lila be Brooklyn ai idia noho kongrigeisen momo ida ai haroro hebou karana ai moalelaia, bona tura namodia momo ai davaria.

Dina ta ta ai Lila ese lau ia durua Betele dekenai egu hesiai gaukara lau karaia totona. Ena be egu mauri lagani be 84, to lau moale badina branch correspondence gaukara lau karaia.

Iehova ena orea lalonai ita noho be hahenamo badana, bona Iehova idia hesiai henia taudia bona ia idia hesiai henia lasi taudia edia idau ita itaia diba. Malaki 3:18 (NWT) ena hereva ita lalopararalaia, ia gwau: “Umui ese kara maoromaoro tauna bona kara dika tauna, Dirava ia hesiai henia tauna bona ia hesiai henia lasi tauna, edia idau do umui itaia.” Hari inai negai ita itaia Satana ena tanobada be ia dika ia lao noho, taunimanima momo idia mamia helaro be lasi bona edia mauri idia moalelaia lasi. Ena be nega aukadia lalonai ita noho, to Iehova idia lalokau henia bona ia idia hesiai henia taudia ese edia mauri idia moalelaia bona idia diba vaira negana totona helaro ia noho. Gabu ibounai dekenai Basileia ena sivarai namona ita harorolaia be hahenamo badana! (Mat. 24:14) Kahirakahira Dirava ena Basileia ese inai tanobada dikana do ia haorea bona tanobada matamatana bona ena hahenamo idauidau do ia havaraia negana ita naria noho, unai nega ai gorere be lasi bona do ita mauri hanaihanai. Unai nega ai Iehova idia hesiai henia abidadama taudia be mai moale ida tanobada dekenai do idia mauri hanaihanai.