1. Dahaka dainai ita moale be namo?

ITA MOALE badina ita be Iehova ena Witnes taudia bona unai be hahenamo badana! Haroro bona hadibaia gaukara amo ita hahedinaraia ita be Iehova ena taunimanima bona ena hereva hamomokania taudia. ‘Mauri hanaihanai ia ura kudou maoro tauna’ ta ita durua abidadama tauna ai ia lao neganai ita moale. (Kara 13:48) Iesu ese ia abia hemamina ita abia danu. Ena hahediba taudia be haroro gaukara ai idia davaria ekspiriens idia gwauraia neganai, ia “moale bada.”​—Luka 10:1, 17, 21.

2. Dahaka dainai haroro gaukara be mai anina bada?

² Haroro gaukara be mai anina bada. Aposetolo Paulo be Timoteo ia hamaoroa: “Oi sibona bona emu hadibaia hereva dekenai oi naria namonamo.” Ma ia gwau: “Unai bamona oi karaia neganai, oi sibona bona oi idia kamonai henia taudia do oi hamauria.” (1 Tim. 4:16) Oibe haroro gaukara ese ta ia hamauria diba. Ita be Dirava ena Basileia ena taunimanima dainai, nega ibounai iseda kara amo ita hahedinaraia Iehova ita hanamoa bona ita harorolaia sivaraina ita badinaia. (Fili. 1:27) Haroro gaukara totona ita hegaegae namonamo bona ma haida haroro henia totona Iehova ena heduru ita noia, unai amo ita hahedinaraia iseda ‘hadibaia hereva dekenai ita naria namonamo.’

3. Momo ese Basileia sivarai namona idia kamonai, a? Haheitalai gwauraia.

³ Ena be ita gaukara goada ma haida ita haroro henia, to momo idia ura lasi Basileia sivaraina idia kamonai. Mani Tadikaka Georg Lindal ita laloa, ia be lagani 1929 ia lao 1947 ai, Iceland dekenai sibona ia haroro. Ia ese pablikeisen tausen momo ia hariharilaia, to ta be hereva momokani ia abia dae lasi. Ia gwau: “Haida be mai dagedage ida hereva momokani idia dadaraia, to momo be idia ura lasi kamonai.” Ena be gabeai misinari  taudia be unuseniai lagani momo idia haroro, to kamonai taudia idia davaria lasi. Lagani 9 murinai, Iceland taudia haida be Iehova dekena edia mauri idia gwauhamatalaia bona idia bapatiso. *

4. Haida be sivarai namona idia kamonai lasi neganai, iseda hemami be edena bamona?

⁴ Ta ia ura lasi Baibel ia stadilaia neganai ita lalohisihisi. Reana Paulo ese ia abia hemami ita abia danu. Iuda taudia momo be idia abia dae lasi Iesu be gwauhamata Mesiana dainai, ia ‘lalometau bada bona ena kudouna ia hisihisi noho.’ (Roma 9:1-3) Ena be oi gaukara goada emu stiuden oi hadibaia namonamo bona ia totona oi guriguri, to ia dibaia gaudia ia badinaia lasi bona ena stadi oi hadokoa be edena bamona? Eiava oi stadi henia tauna ta be bapatiso ia abia lasi be edena bamona? Do oi laloa hahediba taudia halaoa gaukarana oi karaia namonamo lasi, a? Inai atikol ai, henanadai rua do ita haerelaia: (1) Dahaka ese ia hamomokania haroro gaukara ita karaia namonamo? (2) Haida ita haroro henia neganai, dahaka do ia vara?

5. Dahaka dainai nega haida Iehova ena gaukara ita hagugurua lasi?

⁵ Baibel ese Dirava ena ura ia karaia tauna ia herevalaia, ia gwau: “Unai tauna be ia karaia gaudia ibounai lalonai do ia kwalimu.” (Sal. 1:3) To, unai ese ia hahedinaraia lasi Iehova totona ita ura karaia gaudia ibounai ita hagugurua diba. Ita be goevadae lasi taudia dainai iseda mauri be “hekwakwanai amo ia honu.” (Iobu 14:1) Danu, ita idia dagedage henia taudia be nega haida ruma-ta-ruma-ta haroro gaukara idia koua. (1 Kor. 16:9; 1 Tes. 2:18) To, Iehova ese iseda gaukara be edena bamona ia laloa? Baibel ena hakaua herevadia haida ese ita do ia durua, unai henanadai ena haere ita diba totona.

6. Iehova ese iseda haroro gaukara be edena bamona ia laloa?

⁶ Iehova be iseda hekwarahi bona haheauka karana ia itaia. Ena be taunimanima idia kamonai lasi, to Iehova ita lalokau henia dainai mai goada ibounai ida ita haroro neganai, Iehova ia moale. Paulo ia gwau: “Dirava ena kara be ia gageva lasi, ia ese emui gaukara bona iena ladana totona umui hahedinaraia lalokauna do ia laloaboio lasi. Inai lalokau dainai umui ese helaga taudia umui hesiai henia, bona unai bamona do umui hesiai henia noho.” (Heb. 6:10) Iehova ese ia totona ita karaia gaukarana bona ita hahedinaraia lalokauna ia laloatao, ena be ita stadi henia tauna ta ia bapatiso lasi. Unai dainai, Paulo ese Korinto taudia ia hamaoroa herevana be oi dekenai ia guguru: “Lohiabada ena gaukara lalonai emui hekwarahi be hekwarahi kava lasi.”​—1 Kor. 15:58.

7. Aposetolo Paulo be ena haroro gaukara ia herevalaia dalana amo dahaka ita dibaia?

 ⁷ Aposetolo Paulo be misinari gaukara ia karaia namonamo, bona siti momo ai kongrigeisen matamatadia ia haginia. To, haida idia gwau ia be hadibaia tauna namona lasi neganai, ia ese taunimanima hida ia durua abidadama taudia ai idia lao ia gwauraia lasi. To ia gwau: “Lau ese gaukara bada lau karaia.” (2 Kor. 11:23) Paulo hegeregerena, namona be ita laloatao Iehova be iseda hekwarahi bona haheauka karana ia laloa bada.

8. Iseda haroro gaukara ai dahaka ita laloa bada be namo?

⁸ Iehova ese iseda gaukara ia moalelaia. Iesu ese hahediba taudia 70 ia siaia Basileia sivaraina idia harorolaia murinai, “mai moale danu idia giroa.” Dahaka dainai idia moale? Idia gwau: “Emu ladana ai gaukaralaia dainai, demoni ese ai idia kamonai henia danu.” To Iesu ese edia lalohadai kererena ia hamaoromaoroa, ia gwau: “Lauma dikadia ese umui idia kamonai henia dainai umui moale lasi, to umui moale badina emui ladana be guba dekenai idia torea vadaeni.” (Luka 10:17-20) Iesu ia diba nega ibounai edia haroro gaukara ai, unai bamona ekspiriens do idia davaria lasi. Momokani, ita diba lasi unai hahediba taudia ese idia haroro henia taudia ibounai amo, hida be Keristani taudia ai idia lao. Hahediba taudia ese kamonai taudia idia davaria dainai idia moale. To idia laloa bada gauna be, Iehova ese edia gaukara goada karana ia moalelaia.

9. Galatia 6:7-9 hegeregerena, haroro gaukara dekenai ita hesiku lasi dainai, dahaka do ia vara?

⁹ Bema haroro gaukara ai ita haheauka, mauri hanaihanai do ita abia. Ita gaukara goada sivarai namona ita harorolaia bona hadibaia neganai, ita be “Dirava ena lauma hegeregerena ia hadoa” tauna bamona, badina ita ura lauma helaga ese ita ia hakaua. Ita “hesiku lasi” dainai, Iehova ia gwauhamata mauri hanaihanai do ita abia, ena be ita stadi henia tauna ta be bapatiso ia abia lasi.​—Galatia 6:7-9 duahia.

10. Dahaka dainai haroro gaukara ai haida idia kamonai to haida be lasi?

¹⁰ Ta ia ura hereva momokani ia abia dae eiava lasi be iena abia hidi. Iesu ese parabole ta amo unai ia herevalaia. Biru tauna be tano idauidau ai uhe ia hadoa, to tano namona dekenai ia hadoa gauna sibona be huahua ia havaraia. (Luka 8:5-8) Iesu ia gwau tano idauidau ese taunimanima edia kudouna ai, “Dirava ena hereva” idia abia dae dalana ia laulaulaia. (Luka 8:11-15) Biru tauna bamona, taunimanima dekenai ita harorolaia sivaraina be edia kudouna ai ita hatubua diba lasi. Iseda maduna be Basileia sivaraina ena uhe ita hadoa noho. Paulo ena hereva hegeregerena, “ta ta be edia hekwarahi hegeregerena ahuna do idia abia,” to edia gaukara ese ia havaraia anina namona dainai lasi.​—1 Kor. 3:8.

11. Dahaka dainai Iehova be Noa dekenai ia moale, ena be ta ia kamonai lasi? (Rau 1 ena laulau itaia.)

¹¹ Idaunegai, Iehova ena hesiai taudia momo be edia haroro gaukara ai, kamonai taudia idia davaria lasi. Hegeregere, “Kara maoromaoro ia harorolaia tauna” Noa be lagani 40 o 50 lalonai ia haroro. (2 Pet. 2:5) Noa ia laloa taunimanima momo be ia harorolaia sivaraina do idia kamonai, to Iehova be unai bamona ia hereva lasi. Dirava be Noa ia hamaoroa bouti do ia karaia neganai, ia gwau: “Namona be bouti lalonai do oi vareai, oi, emu natudia memero, emu adavana, bona emu natudia memero edia adavadia.” (Gen. 6:18) Bona Iehova ese Noa dekenai bouti ena  bada ia herevalaia neganai, reana Noa ia laloparara taunimanima momo be ia harorolaia sivaraina do idia kamonai lasi. (Gen. 6:15) Bona ita diba, ta be Noa ese ia harorolaia sivaraina ia abia dae lasi. (Gen. 7:7) Iehova ia laloa Noa be haroro gaukara ia karaia namonamo lasi, a? Lasi! Iehova be Noa dekenai ia moale bada, badina ia hamaoroa gaudia ibounai ia karaia.​—Gen. 6:22.

12. Dahaka ese Ieremia ia durua haroro gaukara ia moalelaia totona?

¹² Peroveta tauna Ieremia be lagani 40 mai kahana lalonai ia haroro, ena be taunimanima idia kamonai lasi bona ia idia dagedage henia. Ia idia “gwauraia dika bona kirikirilaia” dainai, ia lalomanoka bona ia ura ena asainmen ia rakatania. (Ier. 20:8, 9) To Ieremia ia hesiku lasi! Dahaka ese ia durua ia haroro noho bona ia moale totona? Ia ese mai anina bada gaudia rua ia laloa. Ginigunana be, do ia harorolaia sivaraina ese taunimanima dekenai “vaira nega ai noho namo” ena helaro do ia henia. (Ier. 29:11) Iharuana be, Iehova ese Ieremia ia abia hidi taunimanima dekenai Ia bona ena sivarai do ia harorolaia totona. (Ier. 15:16) Ita danu be taunimanima dekenai vaira nega ena helaro bona Iehova ita herevalaia. Unai mai anina bada gaudia rua ita laloa neganai, do ita moale, ena be taunimanima idia kamonai lasi.

13. Mareko 4:26-29 ai, Iesu ena parabole amo dahaka ita dibaia?

¹³ Ta be metairametaira ena abidadama do ia goada ia lao. Iesu ese unai hereva momokani be ia mahuta biru tauna ena parabole amo ia hadibaia. (Mareko 4:26-29 duahia.) Biru tauna be uhe ia hadoa murinai, metairametaira idia tubu to gau ta ia karaia diba lasi uhe ia hatubua haraga totona. Oi danu be nega daudau do oi naria emu Baibel stiuden be ia dibaia gaudia ia badinaia totona. Biru tauna be ena uhe ia hatubua haraga diba lasi hegeregerena, ita danu be eda Baibel stiuden ita doria diba lasi ena abidadama ia hagoadaia haraga totona. Unai dainai, bema ena abidadama ia goada haraga lasi, namona be ita lalomanoka eiava hesiku lasi. Biru tauna hegeregerena, ita haheauka ela bona stiuden sibona be abia hidi do ia karaia bapatiso ia abia totona.​—Iam. 5:7, 8.

14. Dahaka dainai haida be nega daudau murinai sivarai namona idia kamonai? Haheitalai gwauraia.

¹⁴ Gabu haida ai, ta be nega daudau murinai bapatiso ia abia diba. Mani idia vara hebou taihu rua Gladys bona Ruby Allen edia ekspiriens ita itaia, lagani 1959 ai, Canada ena gabu ta Quebec dekenai regula painia idia karaia. * Taunimanima be edia neiba bona pris taudia dekenai idia gari dainai, idia ura lasi Basileia ena sivarai idia kamonai. Gladys ia gwau: “Lagani rua lalonai dina ta ta hora 8 ai haroro, to ta ia kamonai diba lasi! Taunimanima be ai idia itaia neganai, edia iduara bona windo idia koua. To ai hesiku lasi.” Metairametaira taunimanima be edia lalohadai idia haidaua bona haida idia kamonai matamaia. Hari unai taoni ai kongrigeisen toi idia noho.​—Isa. 60:22

15. Korinto Ginigunana 3:6, 7 ai, hahediba taudia halaoa gaukarana dekenai dahaka ita dibaia?

¹⁵ Momo idia gaukara hebou ta idia durua hahediba tauna ai ia lao totona. Kongrigeisen lalonai ibounai idia gaukara hebou ta idia durua ia bapatiso totona. (1 Korinto 3:6, 7 duahia.) Hegeregere, pablisa ta be kamonai tauna dekenai pepapepa eiava magasin ta ia rakatania. To mai ena gaukara ta dainai lou henia ia karaia diba lasi bona pablisa ma ta ia noia unai ia karaia totona. Bona unai  pablisa ese Baibel stadi ia hamatamaia. Bena tadikaka taihu ma haida ia boiria, unai stadi ai idia helai, bona idia ese dala idauidau ai stiuden idia hagoadaia. Oibe, tadikaka eiava taihu ta ta ese stiuden do idia durua Iehova ia dibaia noho totona. Unai amo, ta ia bapatiso neganai, ia idia durua taudia ibounai idia moale bada.​—Ioa. 4:35-38.

16. Dahaka dainai haroro gaukara ai ita moale, ena be ita gorere eiava eda goada ia ore?

¹⁶ Reana haroro gaukara bona hadibaia gaukara oi karaia diba lasi, badina oi gorere eiava emu goada be guna bamona lasi. To unai gaukara oi durua noho diba bona do oi moale. Mani King Davida ena sivarai ita laloa, ia bona ena tatau be Amaleka taudia amo edia famili idia hamauria bona kohu idia abia lou. Tatau 200 be idia hesiku bada dainai tuari dekenai idia lao lasi, to kohu idia naria. Davida bona ena tatau be tuari dekenai idia kwalimu, bona edia inai taudia amo gau momo idia abia. Bena oda ia henia unai gaudia idia haria neganai, tuari idia lao taudia bona kohu idia naria taudia be ahuna tamona do idia abia. (1 Sam. 30:21-25) Unai sivarai be iseda hadibaia gaukarana ida ia hegeregere. Bema pablisa ta ta idia gaukara goada bona ta idia durua mauri dalana ia badinaia neganai, idia ibounai do idia moale bada.

17. Dahaka dainai Iehova ita tanikiu henia be namo?

¹⁷ Iehova ita tanikiu henia badina ia totona ita karaia hesiai gaukarana ia moalelaia. Iehova ia diba taunimanima do ita doria lasi ita idia kamonai henia eiava ia idia tomadiho henia totona. To ita gaukara goada bona ia ita lalokau henia dalana ia itaia, bona ita ia hanamoa. Danu, haroro gaukara ita moalelaia dalana ia hadibaia. (Ioa. 14:12) Bema ita hesiku lasi, ita diba momokani Dirava ena lalonamo do ita abia!