1, 2. (a) Edena dala ai Iehova ese taunimanima ia kara henia dalana be siahu taudia amo ia idau? (b) Inai stadi ai dahaka do ita herevalaia?

SIAHU TAUDIA bona dagi bada taudia be nega momo ma haida “idia lohiaia” bona biagua auka. (Mat. 20:25; Had. 8:9) Iehova be unai bamona lasi! Ena be ia be Siahu Ibounai Diravana, to goevadae lasi taudia ia laloa danu. Ia be hebogahisi bona ma haida ia laloa bada tauna. Iseda hemami bona dabu gaudia ia diba. Danu Ia diba “ita be kahu sibona” dainai, ita ia doria lasi ita karaia diba lasi gauna ta ita karaia totona.​—Sal. 103:13, 14.

² Baibel lalonai Iehova ese ena hesiai taudia ia laloa bada karana ena haheitalai momo idia noho. Mani dala toi ita herevalaia. Ginigunana be, Dirava ese mero matamata Samuela ia durua Hahelaga Tauna Badana Eli dekenai hahemaoro herevana ia gwauraia totona; iharuana be, Iehova ese mai haheauka ida Mose ia durua, ena be Mose ia mamia ia hegeregere lasi Israela taudia ia hakaua totona; bona ihatoina be, Dirava ese Aigupito amo Israela taudia ia hakaua siri karana amo ia hahedinaraia idia ia laloa bada. Unai haheitalai ita herevalaia neganai, namona be Iehova  amo ita dibaia gaudia bona ita badinaia diba daladia ita laloa.

3. Hanuaboi ta Samuela dekenai dahaka gau idauna ta ia vara, bona unai ese dahaka henanadai ia havaraia? (Laulau ginigunana herevalaia.)

³ Samuela be ia mero maragi neganai, dubu helaga dekenai Iehova ena “hesiai gaukara” ia karaia. (1 Sam. 3:1) Hanuaboi ta Samuela ia mahuta murinai, gau idauna ta ia vara. * (1 Samuela 3:2-10 duahia.) Samuela ia kamonai gado ta be iena ladana ia boiria. Samuela ia laloa Hahelaga Tauna Badana Eli ese ia boiria noho, unai dainai ia heau lao bona ia gwau: “Oi ese lau oi boiria, lau mai inai!” Eli ia gwau: “Oi dekenai lau boiboi lasi.” Ma nega rua unai bamona ia vara neganai, Eli ia laloparara Dirava ese Samuela ia boiria noho. Vadaeni mero ia hadibaia edena bamona do ia haere, bona Samuela ia kamonai. Dahaka dainai matamanai Iehova ese ena aneru amo Samuela ia hadibaia lasi daika ese ia boiria? Baibel ese unai ia hahedinaraia lasi, to Iehova be unai bamona ia karaia badina Samuela ena hemami ia laloa. Edena dala ai?

4, 5. (a) Samuela ese Dirava amo ia abia asainmen be edena bamona ia laloa, bona daba ai dahaka ia vara? (b) Unai sivarai amo Iehova dekenai dahaka ita dibaia?

⁴ 1 Samuela 3:11-18 duahia. Iehova ena taravatu ia gwau, natudia ese buruka taudia idia matauraia be namo, hegeregere lohia taudia. (Eso. 22:28; Lev. 19:32) Oi laloa Samuela be mai gari lasi ida dabai do ia lao Eli dekenai Dirava ena hahemaoro hereva aukana do ia gwauraia totona, a? Lasi! Badina unai sivarai amo ita diba Samuela ese “Lohiabada ena hereva, be Eli dekenai do ia hamaoroa totona, be ia gari.” To, Dirava ese Eli dekenai ia hahedinaraia Ia ese Samuela ia boiria. Unai dainai, Eli ese Samuela ia oda henia do ia hereva totona. Ia gwau: “Lau dekena amo gau ta do [oi] hunia lasi.” Samuela be mai hemataurai ida Eli dekenai “hereva ibounai” ia gwauraia.

⁵ Eli be Samuela ese ia gwauraia herevana dekenai ia hoa lasi. Badina “Dirava ena hesiai tauna ta” be hahelaga tauna badana dekenai unai hereva tamona ia gwauraia. (1 Sam. 2:27-36) Samuela bona Eli edia sivarai ese ita ia hadibaia Iehova be ma haida ia laloa bada bona ia be aonega Diravana.

6. Dirava ese Samuela ia durua dalana amo dahaka ita dibaia?

⁶ Oi be matamata tauna ta, a? Bema oibe, Samuela ena sivarai ese ia hahedinaraia Iehova be oi davaria hekwakwanai idauidau bona emu hemami ia lalopararalaia. Reana oi hemarai bona oi gari taunimanima badadia dekenai Basileia sivaraina oi harorolaia, eiava emu turadia amo oi idau totona. Namona be oi diba Iehova be ia ura oi ia durua. Unai dainai emu kudouna ena ura gaudia be guriguri amo ia dekenai do oi hamaoroa. (Sal. 62:8) Baibel lalonai Samuela bamona matamata taudia edia sivarai haida umui laloa diba. Bona hekwakwanai idia hanaia Keristani tadikaka taihu​—matamata eiava buruka taudia​—ida oi herevahereva diba. Momokani, reana idia laloa lasi dalana ai Iehova ese idia ia durua negadia be oi dekenai do idia herevalaia.

7, 8. Edena dala ai Iehova ia hahedinaraia Mose ena hemami ia laloa bada?

⁷ Mose ena mauri lagani be 80 neganai, Iehova ese asainmen badana ta ia henia. Mose ese Israela taudia be Aigupito edia igui amo do ia ruhaia. (Eso. 3:10) Ia be lagani 40 lalonai Midiana dekenai mamoe naria gaukarana ia karaia, unai dainai unai boiboi herevana ia abia neganai ia hoa. Ia gwau: “Lau be daika, dohore Farao dekenai lau lao,  bona Israela taudia Aigupito dekena amo do lau hakaua siri?” Dirava ese ia hagoadaia, ia gwau: “Momokani, dohore lau durua oi.” (Eso. 3:11, 12) Danu, ia gwauhamata ia gwau: Israela tau badadia “be oiemu hereva do idia kamonai.” To Mose ia haere ia gwau: “Israela taudia be . . . lauegu hereva do idia abia dae lasi.” (Eso. 3:18; 4:1) Reana Mose ese Iehova ena hereva ia hamomokania lasi! To Iehova be ia haheauka. Danu ia ese Mose dekenai siahu ia henia hoa karadia ia karaia totona. Baibel lalonai ia be tau ginigunana unai bamona siahu ia abia.​—Eso. 4:2-9, 21.

⁸ Mose be ekskius herevadia ia gwauraia bona ia gwau ia be hereva momo tauna lasi. Dirava ese ia haere henia ia gwau: “Lau be oiemu hereva do lau durua. Do oi gwauraia herevadia dohore lau henia oi dekenai.” Dokonai Mose be Dirava ena hereva ia abia dae, a? Lasi. To mai manau ida Dirava ia noia tau ma ta ia siaia totona. Unai negai Iehova be ia badu. To Mose ia doria lasi. Dirava ese Mose ena hemami ia laloa dainai, Arona ia abia hidi Mose ena hereva gwauraia tauna ai do ia lao.​—Eso. 4:10-16.

9. Edena dala ai Iehova ena haheauka bona hebogahisi karana ese Mose ia durua ena asainmen ia karaia totona?

⁹ Inai sivarai amo Iehova dekenai dahaka ita dibaia? Ia be Siahu Ibounai Diravana dainai, reana Mose ia hagaria diba ena hereva ia badinaia totona. To Iehova be haheauka bona hebogahisi karana ia hahedinaraia, ena manau hesiai tauna ia durua totona. Unai kara ese Mose ia durua, a? Oibe! Mose be gunalaia tauna namona ta ai ia lao badina Iehova ese ia ia kara henia dalana hegeregerena, mai manau ida ma haida ia durua bona laloa bada.​—Num. 12:3.

10. Bema Iehova ese ma haida ia laloa bada karana ita tohotohoa, dahaka namo do ita davaria?

¹⁰ Ita badinaia diba daladia be inai: Oi be headava tauna ta, tama ta, eiava kongrigeisen elda ta, a? Bema oibe, oi be mai emu maduna. Namona be Iehova ena kara oi tohotohoa, oi naria taudia oi laloa bada, hebogahisi, bona boga-auka karana oi hahedinaraia. (Kol. 3:19-21; 1 Pet. 5:1-3) Bema oi hekwarahi Iehova bona Mose Badana, Iesu  Keriso, oi tohotohoa, ma haida ese oi do idia ura henia bona idia do oi hagoadaia. (Mat. 11:28, 29) Danu, emu haheitalai namona do idia tohotohoa diba.​—Heb. 13:7.

11, 12. Iehova ese Israela taudia ia durua Aigupito amo idia raka-lasi neganai, edena dala ai idia gari lasi?

¹¹ Lagani 1513 B.C.E. ai, Israela taudia be Aigupito idia rakatania neganai, idia ibounai be 3 milioni mai kahana. Unai bese lalonai be natudia, buruka taudia, bona haida be gorere o diseibol taudia. Aigupito amo unai bamona hutuma bada hakaua totona, idia do ia Gunalaia Tauna be ma haida edia namo bona hemami ia laloa bada be namo. Iehova ese Mose ia gaukaralaia amo, edia gunalaia tauna ai ia lao. Unai dainai ena be Israela taudia ese edia noho gabuna idia rakatania, to idia gari lasi.​—Sal. 78:52, 53.

¹² Edena dala ai Iehova ese ena taunimanima ia durua idia gari lasi totona? Dala ta be, ia ese idia ia durua “tuari taudia edia orea bamona,” orea ta ta dekenai Aigupito tanona amo idia raka-lasi. (Eso. 13:18, NWT) Unai dainai Israela taudia idia abia dae momokani Dirava ese gau ibounai ia biagua. Danu, Iehova ese “dina dekenai . . . ori korema” bona “hanuaboi ena nega ibounai . . . lahi ena diari” ia gaukaralaia, unai amo ia hahedinaraia ia be idia danu ia noho. (Sal. 78:14) Toana be Iehova be idia ia hamaoroa ia gwau: “Umui gari lasi, lau be umui ida, bona umui do lau gimaia.” Momokani, unai bamona hagoadaia hereva ese gabeai idia do ia durua!

13, 14. (a) Iehova be Israela taudia ia laloa dainai, Davara Kakakakana ai dahaka ia karaia? (b) Edena dala ai Iehova ese Aigupito taudia dekenai ena siahu ia hahedinaraia?

¹³ Esodo 14:19-22 duahia. Mani sibona oi piksaia, oi be Farao mai ena tuari oreana bona Davara Kakakakana edia huanai oi gini, bona dala be lasi. Bena Dirava ese kara ta ia karaia. Emui vairanai ia noho ori be murina kahanai ia lao, unai amo Aigupito taudia ia koua bona dibura lalonai idia noho. To hoa dalana ai umui ibounai be diari lalonai umui noho! Bena oi itaia Mose be ena imana ia atoa maoromaoro davara ena ataiai, bona ist kahana amo ia mai lai goadana ese davara ia hapararaia. Bena oi, emu ruma bese, bona emui animal idauidau be Israela taudia ida tano kaukauna dekenai umui raka hanai. Maoromaoro, gau idauna ta oi itaia. Unai tano kaukauna be ia kopukopu o paraka lasi; to tano ia kaukau bona ia auka dainai umui raka hanai diba. Unai badina dainai, idia raka metairametaira taudia be idia raka namonamo diba.

¹⁴ Esodo 14:23, 26-30 duahia. Unai nega ai, hekokoroku tauna, Farao be mai badu ida tano kaukauna dekenai edia murinai ia heau lao. Bena, Mose ese ena imana be davara ena ataiai ma ia atoa maoromaoro. Unai nega ai, haba rua bamona idia gini ranu be idia moru diho. Davara be sunami ena hurehure bamona kahana kahana amo idia vareai mai. Farao bona ena tuari taudia ibounai idia mase!​—Eso. 15:8-10.

15. Inai sivarai amo Iehova dekenai dahaka ita dibaia?

¹⁵ Unai sivarai amo ita diba Iehova be gau ibounai ia karaia namonamo Diravana, unai ese ita ia durua ita gari lasi totona. (1 Kor. 14:33) Danu Iehova ia hahedinaraia ia be lalokau mamoe naria tauna bamona dala idauidau ai ena taunimanima ia naria. Mai hebogahisi ida idia ia naria, bona edia inai taudia amo idia ia gimaia. Inai nega oromana ena dokona ia kahirakahira noho lalonai, unai bamona hereva momokanidia ese ita ia hagoadaia!​—Aon. 1:33.

16. Iehova ese Israela taudia ia hamauria dalana ita stadilaia karana ese edena dala ai ita ia durua diba?

¹⁶ Hari inai negai danu, Iehova ese ena  taunimanima ia naria noho​—lauma dalanai bona tauanina dalanai. Danu kahirakahira do ia vara hisihisi badana lalonai Ia ese ita do ia naria. (Apok. 7:9, 10) Unai dainai hisihisi badana lalonai Dirava ena taunimanima, ena be matamata eiava buruka, tauanina ia namo eiava diseibol, be do idia gari lasi. * To gau ta do idia karaia! Idia ese Iesu Keriso ena hereva do idia laloa, ia gwau: “Umui gini tore bona emui kwarana umui abia isi, badina emui hahemauri be kahirakahira.” (Luka 21:28) Herevana Goga​—idia haboua tanobada besedia, ena goada ese Farao ena ia hereaia​—ese Dirava ena taunimanima do ia dagedage henia, to mai gari lasi ida do idia gini goada. (Ese. 38:2, 14-16) Dahaka dainai Dirava ena taunimanima be do idia gini goada noho? Badina idia diba Iehova ena kara be ia idau diba lasi. Danu ia ese ena taunimanima do ia naria bona edia Hamauria Tauna ai do ia lao.​—Isa. 26:3, 20.

17. (a) Edena dala ai Baibel lalonai Iehova ese ena taunimanima ia naria dalana ita stadilaia karana ese ita ia durua diba? (b) Stadi gabena ai dahaka do ita herevalaia?

¹⁷ Inai atikol lalonai Iehova ese mai hebogahisi bona laloparara ida ena taunimanima ia naria, hakaua, bona hamauria daladia edia haheitalai haida sibona ita herevalaia. Unai sivarai ta ta oi laloa dobu neganai, Iehova ena kara ma haida do oi dibaia. Bema unai bamona oi karaia, unai kara namodia be emu lalona bona kudouna ai do idia noho, bona emu lalokau bona abidadama Dirava dekenai do ia goada. Stadi gabena ai Iehova ese ma haida ia laloa bada karana dekenai, ia ita tohotohoa diba daladia do ita herevalaia. Hegeregere ruma bese, Keristani kongrigeisen lalonai, bona haroro gaukara ai.