IEHOVA DIRAVA ia ura Keristani taudia be maino ai idia noho, bona edia mauri lalonai maino idia hahedinaraia. Bema tomadiho momokani taudia be ta ta ida maino idia karaia, ibounai idia moale diba. Bona bema Keristani kongrigeisen lalonai maino ia noho, unai kara ese taunimanima momo do ia veria mai.

Hegeregere Madagascar ai, babalau tauna ta ia itaia Iehova ena Witnes huanai maino ia noho. Vadaeni sibona dekenai ia gwau, ‘Bema gabeai lau ura tomadiho ta lau badinaia, lau ese inai tomadiho do lau badinaia.’ Daudau lasi, iena babalau karadia ia rakatania, iena headava ia hamaoromaoroa, bona Iehova, maino Diravana, ia tomadiho henia matamaia.

Unai tauna bamona, lagani ta ta ai taunimanima tausen momo be Keristani kongrigeisen idia bamoa, badina idia ura bada maino ai idia noho. To Baibel ese ia hahedinaraia, bema kongrigeisen lalonai “mama dikana bona badu idia noho,” unai ese hetura karana ia hadikaia bona hekwakwanai ia havaraia diba. (Iam. 3:14-16) Ita moale, badina Baibel ese unai hekwakwanai hanaia bona maino havaraia dalana dekenai sisiba namodia ia henia. Unai sisiba namodia ese momo ia durua dalana mani ita itaia.

“Lau bona tadikaka ta be ai gaukara hebou namonamo diba lasi. Nega ta, ai ruaosi ai badu noho neganai, tatau rua idia mai bona unai idia itaia.”​—CHRIS.

“Nega momo lau ida ia haroro taihu ta be gabeai haroro gaukara ai lau ia bamoa lou lasi. Unai murinai lau ia hereva henia lasi. Lau diba lasi dahaka dainai unai ia karaia.”​—JANET.

“Lau be taunimanima toi ida fon amo ai herevahereva. Idia ta ia gwau bamahuta, bona lau laloa ia be ena fon ia atoa diho vadaeni. Bena fon amo ma ta dekenai ia hadikaia herevadia lau gwauraia, to unai tauna be iena fon ia do atoa diho lasi.”​—MICHAEL.

“Emai kongrigeisen lalonai, painia taihu rua huanai hekwakwanai ta ia vara. Bona ta ese ma ta ia gwau-henia. Edia huanai ia vara karana ese ma haida ia hahekwakwanaia.”​—GARY.

Reana do oi laloa unai be hekwakwanai maragidia. To, unai hekwakwanai ta ta ese unai tadikaka taihu edia hemami bona kongrigeisen lalonai ia noho maino ia hadikaia. Ita moale badina gabeai unai tadikaka taihu be Baibel ena hakaua herevadia idia badinaia, bona maino idia karaia lou. Oi laloa edena Baibel sisiba ese idia ia durua?

 “Dala dekenai umui lao neganai, umui ta ta umui laloa hekwarahi lasi.” (Gen. 45:24) Iosepa ena tadikaka be edia tamana dekenai idia giroa lou neganai, ia ese idia dekenai unai sisiba ia henia. Unai be sisiba namona! Tau ta ese ena hemami ia biagua lasi bona ia badu haraga neganai, ia ese ma haida ia habadua diba. Chris ia laloparara, ia be ia hekokoroku bona hakaua herevadia ia badinaia lasi dainai, ia bona tadikaka huanai unai hekwakwanai ia vara. Ia ura iena kara ia haidaua dainai, tadikaka dekenai sori hereva ia gwauraia bona ia gaukara goada iena badu haraga karana ia biagua totona. Tadikaka ia itaia Chris be unai ia karaia neganai, ia danu ese ena kara ia haidaua. Hari idia ruaosi be mai moale ida Iehova idia hesiai henia noho.

“Sisiba do oi abia lasi neganai, do oi moru.” (Aon. 15:22) Janet ia laloa ia ese unai sisiba ia badinaia be namo. Unai dainai unai taihu ia hereva henia. Idia herevahereva noho lalonai, Janet be mai hemataurai ida taihu ia lalohisihisi ena badina ia tahua. Matamanai ia auka idia herevahereva namonamo totona. To mai manau ida ia vara hekwakwanai idia hamaoromaoroa neganai, idia ruaosi idia herevahereva namonamo diba. Taihu ia laloparara ia be guna Janet ese ia karaia karana dekenai lalohadai kererena ia abia. Unai dainai Janet dekenai sori herevana ia gwauraia bona hari Iehova idia hesiai henia hebou noho.

“Bema emu harihari gauna oi abia lao pata helagana dekenai bona oi laloatao emu tadikaka be oi dekenai ia lalohisihisi, namona be emu harihari gauna be pata helagana vairanai oi rakatania bona oi lao. Emu tadikaka ida maino oi karaia guna.” (Mat. 5:23, 24) Iesu ese Ororo Harorona ia henia neganai, unai sisiba ia henia. Michael ia laloparara ia ese ena tadikaka ia laloa lasi bona ia hadikaia herevadia ia gwauraia neganai, ena hemami ia dika momokani. Unai dainai ia ura bada maino ia karaia. Bena mai manau ida tadikaka dekenai sori herevana ia gwauraia. Dahaka ia vara? Michael ia gwau: “Lauegu tadikaka ese egu kerere ia gwauatao.” Bona idia be tura namodia ai idia lao lou.

“Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni.” (Kol. 3:12-14) Nega daudau idia painia taihudia rua durua totona, tadikaka ese idia ia hamaoroa inai henanadai do idia laloa: ‘Ita ruaosi be gau ta dekenai ita lalotamona lasi dainai, ita be mai iseda maoro ma haida edia lalona ita hahisia totona, a? Badina namona ta dainai, ita gaukara hebou diba lasi bona mai maino ida Iehova ita hesiai henia diba lasi, a?’ Idia ese elda tauna ena sisiba idia abia dae bona idia badinaia. Hari mai moale ida sivarai namona idia harorolaia hebou noho.

 Bema ta ese emu lalona ia hahisia, namona be Kolose 3:12-14 dekenai ia noho sisiba oi badinaia. Momo idia abia dae, bema idia manau idia ese ta ena kerere idia gwauatao bona laloaboio diba. To bema unai ia vara lasi, Mataio 18:15 ena hakaua herevana oi badinaia diba, a? Iesu ese unai sisiba ia henia neganai, ia ese kara dika badana ia karaia tauna ia herevalaia. To oi ese unai hakaua herevana oi badinaia diba. Emu tadikaka o taihu dekenai oi lao diba bona mai hebogahisi bona manau ida ia vara hekwakwanai umui herevalaia bona hamaoromaoroa.

Baibel lalonai hekwakwanai hamaoromaoroa daladia ma haida idia noho danu. Hegeregere “lauma helaga ena huahua” oi hahedinaraia diba, idia be “lalokau, moale, maino, boga-auka, hebogahisi, kara namo, abidadama, manau, bona sibona biagua karana.” (Gal. 5:22, 23) Oela ese masini ena heau dalana ia hanamoa hegeregerena, bema unai kara namodia ita hahedinaraia, do ia auka lasi hekwakwanai ta ita hamaoromaoroa totona.

Taunimanima ta ta edia kara be idauidau, unai dainai ita tura heheni diba. To nega haida heiriheiri ia vara diba. Lo elda ta be inai haheitalai ia gwauraia, ia gwau: “Ia hemarai momo tauna dekenai do ia auka herevahereva momo tauna ia bamoa totona. Ena be oi dekenai unai be gau badana lasi, to unai ese hekwakwanai badana ia havaraia diba.” Oi abia dae taunimanima edia kara be idauidau neganai, hekwakwanai do idia vara, a? Mani aposetolo rua edia sivarai ita laloa. Petero ena kara be edena bamona? Reana do oi gwau ia be mai lalogoada ida ia hereva tauna bona hereva haragaharaga tauna danu. Ioane be edena bamona? Do ita gwau ia be lalokau tadikaka bona nega momo ia laloa guna, gabeai ia hereva o kara. Ena be Petero bona Ioane edia kara be idauidau, to idia gaukara hebou namonamo. (Kara 8:14; Gal. 2:9) Unai ese ia hahedinaraia, ena be hari Keristani taudia edia kara be idauidau, to idia gaukara hebou namonamo diba.

 Reana emu kongrigeisen ai, tadikaka ta ena hereva o kara ese emu lalona ia hahisia diba. To namona be oi laloatao, Keriso be oi bona unai tauna totona ia mase, unai dainai do umui lalokau heheni. (Ioa. 13:34, 35; Roma 5:6-8) Bona namo lasi emu hetura karana unai tadikaka ida oi hadokoa, to sibona oi nanadaia: ‘Egu tadikaka ena kara amo Baibel ena taravatu ta ia makohia, a? Ia be ia ura egu lalona ia hahisia sibona, a? Eiava emai kara be idau dainai unai ia vara, a?’ To, inai henanadai be mai anina bada: ‘Iena kara namodia ibounai amo edena kara lau ura henia?’

Hegeregere, bema ta be herevahereva momo tauna, to oi be oi hereva momo lasi, haroro gaukara ai ena hereva ia hamatamaia dalana oi laloa. Reana haroro gaukara ai umui gaukara hebou diba, bona ia amo gau haida do oi dibaia. Bema ia be hanaihanai heabidae karana ia hahedinaraia, to oi be unai oi karaia lasi, namona be buruka, gorere, o ogogami taudia durua karana amo do oi abia moalena oi laloa. Gau badana be inai, ena be oi bona emu tadikaka emui kara be idauidau, to ma ta ena kara namodia oi laloa neganai, emui hetura karana be do ia goada. Bema unai ia vara, oi bona kongrigeisen taudia huanai maino do ia noho.

Reana Euodia bona Sunutuke edia kara be idau. To, aposetolo Paulo ese idia ia hagoadaia ia gwau, “umui be Lohiabada ena gaukara umui karaia dainai, do umui lalotamona.” (Fili. 4:2) Ita danu ita ura mai lalotamona ida iseda tadikaka taihu danu ita gaukara, unai amo kongrigeisen lalonai maino ia noho diba.

Flaoaflaoa huanai idia tubu ava dikadia bamona, bema nega daudau lalonai ma ta ita lalodika henia bona unai hemami be ia goada, unai ese kongrigeisen ena noho namo ia hadikaia diba, unai dainai ita hekwarahi be namo unai bamona hemami ita kokia haraga totona. Bema Iehova bona iseda tadikaka taihu ita lalokau henia, do ita gaukara goada Dirava ena taunimanima huanai ia noho maino ita gimaia totona.

 Ma haida ida hepapahuahu ita hamaoromaoroa bona maino ita karaia neganai, namo ia vara diba. Taihu ta dekenai ia vara gauna mani ita laloa, ia gwau: “Lau mamia taihu ta ese lau be natu maragina ta bamona ia kara henia. Bona unai lau lalohekwarahilaia momo dainai, hemataurai lasi dalanai ia lau hereva henia matamaia. Sibona dekenai lau gwau, ‘Ia be hemataurai dalanai lau ia kara henia lasi dainai, ia dekenai hemataurai do lau hahedinaraia lasi.’”

Taihu be sibona ena kara ia lalohadailaia matamaia. Ia gwau: “Lau sibona egu kerere lau lalopararalaia matamaia, bona sibona dekenai lau moale lasi. Unai dainai egu laloa dalana lau haidaua. Ia vara hekwakwanai dainai Iehova lau guriguri henia murinai, taihu totona harihari gauna maragina lau hoia bona ia dekenai egu sori herevana be kadi ta dekenai lau torea. Ta ta ai rosia bona ai lalotamona ia vara hekwakwanai do ai laloaboio. Unai murinai ai ruaosi huanai hekwakwanai ma haida idia vara lasi.”

Taunimanima ibounai idia ura maino ai idia noho. To, bema idia mamia ma ta be ia ura edia dagi ia abia eiava bema idia hekokoroku, maino dalanai gau do idia karaia lasi. Iehova idia tomadiho henia lasi taudia momo be unai bamona idia karaia, to ia idia tomadiho henia taudia huanai maino bona lalotamona ia noho be namo. Paulo ia gwau: “Lau ese umui lau noia umui abia boiboi herevana hegeregerena, mai maoromaoro ida do umui raka. Nega ibounai do umui manau, do umui lalomanada, bona do umui boga-auka, bona mai lalokau ida umui ta ta emui kara do umui haheaukalaia. Do umui gaukara goada lauma helaga ese ia henia lalotamona karana umui badinaia totona, bona maino ese umui do ia hatamonaia.” (Efe. 4:1-3) Oibe, ita ia hatamonaia mainona be dava bada gauna bamona. Unai dainai namona be unai kara ita goadalaia bona ita hekwarahi ita huanai ia vara hekwakwanai ita hamaoromaorodia haraga totona.