GORERE BADANA EIAVA DISEIBOLO ESE TA ENA MAURI IA HAIDAUA DIBA. Matamanai, Ulf ena tauanina ia goada bona ia namo, to gabeai ia paralais, ia gwau: “Lau lalometau bada. Egu goada ibounai ia ore . . . Lau mamia lau ‘dika vadaeni.’”

Ulf ena sivarai amo ita diba, ita be hegeregere lasi eda helt ita biagua totona. To, gau haida ita karaia diba ita gorere lasi totona. Bema eda gorere ia bada ia lao be edena bamona? Unai ese eda moale ia hadikaia diba, a? Lasi. To iseda helt ita naria namonamo totona, hakaua hereva haida ita itaia be namo.

EMU ‘KARA OI BIAGUA.’ (1 Timoteo 3:2, 11) Aniani o inuinu momo karana ese eda helt ia hadikaia sibona lasi, to eda moni ia haorea diba. “Kekero muramura momo idia inua taudia, danu do oi inua hebou lasi, bona aniani idia ania momo taudia, danu do oi noho lasi. Kekero taudia bona idia aniani momo taudia, be do idia ogogami.”​—⁠Aonega Herevadia 23:20, 21.

EMU TAUANINA OI HAMIROA LASI. “Namona be tauanina bona kudouna hamiroa gaudia ibounai amo ita goeva.” (2 Korinto 7:1) Taunimanima ese edia tauanina idia hamiroa badina be tobacco o kuku idia ania, o alkahol momo idia inua, o drag idia ania. Hegeregere, orea ta ladana U.S. Centers for Disease Control and Prevention ia gwau, kuku ania karana ese “gorere ia havaraia diba bona tauanina ibounai ia hadikaia diba.”

EMU TAUANINA BONA MAURI BE HARIHARI GAUDIA BAMONA OI LALOA. “[Dirava] dainai ita mauri, ita loaloa bona ita noho.” (Kara 17:28) Unai dainai, eda moni gaukara gabudiai, o motuka ita taria neganai, o moale karadia ita abia hidi neganai, namona be tauanina bona mauri idia hadikaia diba gaudia ibounai ita dadaraia. Namo lasi moale karana maragina ta amo emu mauri oi hadikaia!

LALOHADAI KEREREDIA OI NEGEA. Emu lalona bona tauanina be idia gaukara hebou namonamo. Unai dainai, namona be ita wari momo lasi, badu kava lasi, mama lasi, bona lalohadai kereredia ibounai ita dadaraia. Salamo 37:8 ia gwau, “Do oi badu lasi, do oi dagedage lasi.” Ma Baibel ia gwau: “Kerukeru totona umui lalohekwarahi lasi, badina kerukeru danu be mai ena lalohekwarahi.”​—⁠Mataio 6:34.

 GAU NAMODIA SIBONA OI LALOA. Aonega Herevadia 14:30 ia gwau, “Bema oiemu kudouna be mai ena maino danu neganai, oiemu tauanina do ia noho namo.” Baibel ma ia gwau: “Iena kudouna ia moale tauna ese namo ia havaraia noho.” (Aonega Herevadia 17:22, NWT) Saiens taudia danu be unai bamona sisiba herevana idia gwauraia. Scotland ena helt ai ia gaukara tauna ta, Dr. Derek Cox ia gwau: “Bema oi be moale tauna gabeai do oi gorere momo lasi, to idia moale lasi taudia be idia gorere momo.”

HAHEAUKA HANAIHANAI. Ulf bamona, reana hisihisi idauidau ita koua diba lasi, to dala ita tahua unai hisihisi ita haheaukalaia totona. Haida be idia lalomanoka, unai ese hisihisi ia habadaia. Aonega Herevadia 24:10 (NWT) ia gwau: “Bema lalometau negana ai oi lalomanoka, emu goada do ia ore.”

Haida be matamanai idia lalohisihisi, to gabeai unai lalohisihisi ia ore. Senisi idia karaia bona dala idia tahua idia haheauka totona. Ulf be unai bamona ia karaia. Ia gwau, ia guriguri bona Baibel ena hereva namodia ia laloa dobu murinai, ia “karaia diba gaudia ia laloa bona hisihisi ia laloa momo lasi.” Momo ese hisihisi badadia idia haheaukalaia hegeregerena, Ulf be haida hebogahisi henia karana amo mai anina bada gaudia ia dibaia​—⁠unai dainai, ia ura Baibel ena sivarai namona be ma haida dekenai ia harorolaia.

Hisihisi badana ia davaria tauna ma ta ladana be Steve. Iena mauri lagani be 15 neganai, au amo ia moru, bona aiona amo ela bona tauanina ibounai be idia paralais. Iena mauri lagani be 18 neganai, ena imana ia gaukaralaia lou diba. Gabeai, iunivesiti ta dekenai ia lao, bona drag ia ania, ia inuinu kekero, bona matabodaga karadia ia karaia. Ia laloa namo ta do ia vara lasi, to gabeai Baibel ia stadilaia neganai, ia itaia mauri be mai anina bada bona unai ese ia durua kara dikadia ia dadaraia totona. Steve ia gwau, “Matamanai, lagani daudau lalonai lau laloa mauri be anina lasi. Hari, egu mauri be moale bona maino amo ia honu momokani.”

Steve bona Ulf edia hereva be Salamo 19:7, 8 ena bamona, ia gwau: “[Iehova] ena Taravatu be ia namo momokani. Ia ese taunimanima edia lauma ia hamauria lou. . . . Lohiabada ena Taravatu be idia maoromaoro vadaeni. Unai Taravatu idia badinaia taudia ese, moale idia davaria noho. Lohiabada ena oda be diari hegeregerena. Idia ese taunimanima edia laloa idia hadiaria.”