Baibel ai ia noho edukeisen hereadaena be mai ena siahu ta ena mauri ia haidaua totona. Mani inai haheitalai rua ita itaia: Ricardo bona Andres.

RICARDO: Egu mauri lagani be 15 neganai raskol oreana ta lau bamoa. Egu tura matamatadia ese egu kara namodia idia hadikaia. Bona, egu tahua gauna be lagani ten dibura ruma ai do lau noho! Reana unai be kavakava lalohadaina. To lau noho gabunai, guna dibura ruma ai idia noho taudia be taunimanima ese idia matauraia bada. Bona lau ura idia bamona lau lao.

Lau be raskol taudia ese idia karaia gaudia ibounai lau karaia, hegeregere drag abia karana, matabodaga, bona dagedage karadia. Hanuaboi ta ai, raskol oreana ma ta ida ipidi amo ai heai. Lau laloa lau do idia alaia, to bero lasi ida lau heau boio. Unai murinai, egu mauri bona egu tahua gaudia lau laloa lou, bona lau ura egu mauri lau haidaua. To edena dala ai? Edeseniai heduru lau abia diba?

Egu varavara momo be idia moale lasi. Edia mauri lalonai hekwakwanai momo idia vara. To egu ankol ta, ia be egu sinana ena tadina, iena ruma bese maurina be unai bamona lasi. Lau diba idia be taunimanima namodia, bona lau diba edia mauri ai Baibel ena hakaua herevadia idia badinaia. Oibe, idia amo lau dibaia gauna ta be Dirava ena ladana be Iehova. Unai heai ia vara murinai, Iehova lau guriguri henia, iena ladana lau gwauraia bona lau noia lau ia durua totona. Lau hoa badina, murina dinana ai, Iehova ena Witnes tauna ta be egu iduara dekenai ia pidipidi! Bona ia ese Baibel amo lau ia stadi henia.

Daudau lasi murinai hahetoho badana ta lau davaria. Egu tura gunadia be nega momo lau idia rini henia bona noia idia lau bamoa totona. Ena be ia auka, to lau gwau, lasi. Egu lalona lau hadaia Baibel lau stadilaia noho, bona lau moale unai bamona lau karaia dainai! Egu mauri ia namo, bona moale korikorina lau davaria.

Lau laloatao guriguri amo Dirava lau hamaoroa, guna egu ura gauna be lagani ten dibura ruma ai do lau noho unai amo raskol oreana ena memba ta ai lau lao. Unai dainai Dirava lau noia lau ia durua lagani ten ful-taim hesiai gaukara do lau karaia, unai amo ma haida lau durua lau ese heduru lau abia hegeregerena. Dirava ese egu guriguri ia haerelaia, bona lagani 17 lalonai ful-taim hesiai gaukara lau karaia! Bona dibura ruma dekenai lau lao lasi.

Egu tura gunadia momo be lagani momo dibura ruma dekenai idia noho. Haida be idia mase vadaeni. Egu mauri lau laloa lou neganai, egu Witnes varavaradia dekenai lau moale. Idia be Baibel ena hakaua herevadia idia badinaia bona mai ura ida edia mauri idia  haidaua. Idia lau matauraia bada, guna egu raskol turadia lau matauraia bamona lasi. Bona Dirava lau tanikiu henia bada, badina lau dekenai mauri dalana namona ia hadibaia.

ANDRES: Lau be ogogami hanuana ta ai lau tubu daekau, unuseniai drag abia karana, henaohenao, ala-ala, bona lebulebu karadia be bada. Egu tamana be alkahol ia inua momo bona kokein ia ania momo tauna. Ia bona egu sinana be hanaihanai idia heai bona ta ta idia hereva dika henia.

Lau do matamata neganai, alkahol lau inua bona drag lau ania matamaia. Nega momo strit dekenai lau loaloa, lau henaohenao bona lau henaoa gaudia lau hoihoilaia. Lau bada neganai, egu tamana ia ura ia ida do lau noho, to ia be lau ia hakaua kerere. Ia ese lau dekenai hehuni dalanai emai tano dekenai drag bona gavamani ese ia taravatua gaudia abia vareai bona hoihoilaia karana ia hadibaia. Bona moni momo lau karaia. Bena nega ta pulisi be egu ruma dekenai idia mai. Ala-ala karana dainai lau idia arest bona lagani faiv dibura ruma dekenai lau noho.

Daba ta ai dibura ruma ena spika amo anaunsmen ta idia henia bona dibura taudia idia invait, Iehova ena Witnes taudia edia Baibel tok ta do idia kamonai. Egu lalona lau hadaia lau lao totona. Lau kamonai gaudia lau ura henia, unai dainai Witnes taudia ida Baibel lau stadilaia matamaia. Idia ese Baibel ena hakaua herevadia haida sibona idia gwauraia lasi, to Dirava ena kara maoromaoro taravatudia idia hahedinaraia danu.

Lau laloparara bema heduru lau abia lasi egu mauri do lau haidaua diba lasi, badina egu dibura turadia be lau karaia karana idia ura henia lasi bona lau idia dagedage henia. Unai dainai goada bona aonega totona lau guriguri, bona Iehova ese lau ia durua. Momokani, dibura taudia ma haida dekenai Baibel lau herevalaia dainai, unai dagedage karana lau hanaia.

Lau idia ruhaia dinana ia ginidae neganai, lau lalohekwarahi bada bona lau ura dibura ruma ai do lau noho daudau! Dibura ruma lau rakatania negana ai, egu turadia momo ese lau idia bamahuta henia. Haida be mai hebogahisi ida idia gwau, “Bamahuta, haroro tauna.”

Egu mauri gunana lau laloa neganai lau gari, bona lau laloa hari egu mauri be do edena bamona bema Dirava ena edukeisen hereadaena lau abia lasi. Dirava lau tanikiu henia bada, badina lau ia lalokau henia bona lau ia rakatania lasi. a