United Nations ese taunimanima idia hagoadaia idia gaukara hebou, ma haida edia maoro idia matauraia bona tanobada idia gimaia. Dahaka dainai? Badina magasin ta ladana UN Chronicle lalonai, Maher Nasser ia gwau, “keru bona siahu negadia idia idau, raskol karadia, moni ena hekwakwanai, hepapahuahu, momo be dagedage dainai edia gabu idia rakatania, terorist karadia, daihanai goreredia bona unai bamona gaudia,” be tanobada hegegemadai idia vara noho.

Haida be idia ura tanobada ena gavamani idia durua. Hegeregere, Italy ena aonega bona toretore tauna Dante, (1265-1321) bona saiens tauna Albert Einstein (1879-1955). Dante ia abia dae politikol dalanai ia parara tanobadana lalonai maino do ia noho daudau lasi. Ia ese Iesu Keriso ena hereva ia gwauraia, ia gwai: “Basileia ta bema sibona ia hapararaia, ia be do ia dika.”​​—⁠Luka 11:17.

Tanobada tuarina iharuana ai, atomic bomu rua idia gaukaralaia murinai, Albert Einstein ese General Assembly of the United Nation dekenai leta ta ia siaia. Ia gwau: “Tanobada hegegemadai ai noho namona ia vara totona, United Nation ese gavamani korikorina ta idia haginia be namo.”

To unai gavamani badana lalonai idia noho politikol taudia be do idia kara gageva lasi, do idia moru lasi, bona do idia dagedage lasi, a? Eiava lohia taudia ma haida bamona do idia kara, a? Unai henanadai dainai British ena histori torea tauna Lord Acton ena hereva ita laloa lou, ia gwau: “Siahu ese taunimanima ia hadikaia bona siahu bada ese idia ia hadikaia bada.”

To, taunimanima idia moale bona maino ai idia noho totona, ita lalotamona be namo. To edena dala ai unai ita karaia diba? Unai ia vara diba, a? Baibel ena haere be oibe. Unai ia vara diba. Edena dala ai? Unai be tanobada ena kara gageva gavamanina ta ese do ia karaia diba lasi. To, Dirava ena gavamani ese unai do ia hagugurua. Danu, unai gavamani amo Dirava ese ia havaraia gaudia do ia lohiaia ena maoro do ia hahedinaraia. Unai gavamani be dahaka? Baibel ese unai gavamani ia gwauraia “Dirava ena Basilea.”​​—⁠Luka 4:43.

Iesu Keriso be Dirava ena Basilea ia laloa dainai, ena guriguri ai ia gwau: “Oiemu Basileia do ia mai. Oiemu ura gauna tanobada dekenai do ia vara.” (Mataio 6:9, 10) Oibe, Dirava ena Basileia ese do ia hahedinaraia Dirava ena ura be tanobada ai do ia vara, to siahu idia ura bada taudia eiava hekokoroku taudia edia ura lasi.

Dirava ena Basilea ena ladana ma ta be, “Dirava ena guba Basilea.” (Mataio 5:3) Dahaka dainai? Badina unai Basileia be guba amo do ia lohia to tanobada amo lasi; bona tanobada ibounai do ia lohiaia. Mani oi laloa, unai gavamani be moni eiava takisi do ia noia lasi. Taunimanima be mauri namona do idia moalelaia!

Dirava ese Iesu Keriso ia abia hidi King ai do ia lao bona ena Basileia do ia lohiaia. Baibel ese Iesu be inai bamona ia herevalaia:

• “Gavamani be iena pagana dekenai do ia atoa. . . . Iena Lohia siahuna habadaia karana bona maino do idia doko lasi.”​​—⁠Isaia 9:6, 7, King James Version.

• “Siahu bona mataurai bona dagi bada be unai Tau dekenai ia henia, bese ibounai  bona iduhu ibounai bona gado ibounai taudia ese iena hesiai gaukara do idia karaia. Iena siahu be do ia noho hanaihanai.”—Daniela 7:14.

• “Tanobada ena basileia be iseda Lohiabada [Dirava] bona iena Keriso edia basileia ai ia lao.”​​—⁠Apokalupo 11:15.

Iesu ena guriguri herevana hegeregerena, Dirava ena Basileia ese ena ura gauna tanobada dekenai do ia hagugurua. Unai Basileia henunai taunimanima ibounai ese tanobada naria namonamo dalana do idia dibaia, unai amo do ia goeva bona mauri gaudia ibounai ese do idia noholaia.

Danu, Dirava ena Basileia ese ia lohiaia taudia do ia hadibaia namonamo. Idia ibounai be diba tamona do idia abia. Idia huanai hepapahuahu bona heiriheiri do ia vara lasi. Isaia 11:9 ia gwau: “Dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”

Tanobada ibounai dekenai taunimanima be do idia lalotamona bona maino ai do idia noho, unai be United Nations ese idia ura hagugurua gauna. Salamo 37:11 ia gwau: “Do idia helai namonamo, mai moale bona mai maino danu.” Unai nega ai, inai bamona gaudia hegeregere, “taravatu utua karadia,” “ranu, hodahoda bona mauri gaudia ia hadikaia chemical,” “ogogami,” bona “tuari” do ita herevalaia lou lasi. To edena negai unai do ia vara? Edena negai Dirava ena Basileia ese tanobada ibounai do ia lohiaia? Edena bamona unai do ia vara? Bona edena dala ai ena lohia dalana amo namo oi abia diba? Mani unai ita herevalaia.