Dirava Ena Aonega—Edena Bamona Ia Hedinarai?

“OGOGAMI tauna ena aonega be idia ese idia negea, bona iena hereva idia kamonai henia noho lasi.” Unai hereva amo, King Solomona ese siti ibounai be dika amo ia hamauria ladana bada lasi to mai aonega tauna ena sivarai ia hadokoa. To madi, “tau ta ese unai ogogami tauna ia laloatao lasi.”​​—⁠Hadibaia Tauna 9:​14-16.

Taunimanima ese ogogami taudia idia matauraia lasi, herevana unai ogogami taudia ese kara namodia idia karaia. Unai be momokani Iesu dekenai. Isaia ese ia perovetalaia: “Taunimanima ese ia idia negea, bona ia idia rakatania. Ia be lalohisihisi tauna, bona hisihisi momo ia abia.” (Isaia 53:⁠3) Haida ese Iesu idia ura henia lasi, badina ena nega ai idia noho tatau badadia bamona, ia be lada bada eiava dagi bada lasi dainai. To, kara dika taudia ibounai edia amo ia be mai ena aonega bada. Iesu ena hanua dekenai idia noho taudia idia ura lasi idia abia dae inai ‘kapenta tauna ena natuna’ be unai bamona aonega ia hahedinaraia bona hoa karadia ia karaia. To, unai be kerere badana ta, badina unai sivarai ma ia gwau Iesu ese “unuseni be siahu karadia momo lasi ia karaia, badina idia be abidadama lasi dainai.” Unai taudia ese gau namona idia haboioa!​​—⁠Mataio 13:​54-​58.

Namona be unai bamona kerere ita karaia lasi. Iesu ia gwau, ‘Gaukara ese aonega ia hamomokania.’ Dirava ena gaukara idia karaia bona guba amo ia mai aonegana idia henia noho taudia be idau, edia dagi eiava ladana badana dainai lasi, to Baibel amo idia abia abidadama bona karadia amo​​—⁠“huahua namona” idia hahedinaraia dainai.​​—⁠Mataio 7:​18-​20; 11:⁠19.