Dahaka Dainai Bapatiso Oi Abia be Namo?

“Umui lao bona bese iboudiai taudia be hahediba taudia ai do umui halaoa . . . do umui bapatisoa.”​​—⁠MATAIO 28:⁠19.

1, 2. (a) Bapatiso negadia haida ai, dahaka ia vara? (b) Bapatiso idia herevalaia henanadai haida be dahaka?

LAGANI 775-​77 C.E. ai, Frankish King Charlemagne ese ia halusia Saxon taudia ia hagania bapatiso idia abia, bona hutuma bada bapatisona idia abia. Histori torea tauna John Lord ia gwau: “Ia ese Keristani taudia ai idia lao totona idia ia fosia.” Lagani 987 C.E. ai, Russia lohia tauna Vladimir Ginigunana ese Greek Otodoks tomadiho ia badinaia lohia kekenina ia adavaia, bona unai murinai ia danu ia laloa ia lohiaia taudia be “Keristani taudia” ai idia lao be namo. Iena oda dainai, hutuma bada bapatisona idia abia​​—⁠bema ta ia ura lasi bapatiso ia abia, tuari kaia amo idia doria!

² Unai bamona bapatiso be maoro, a? Idia be mai anina karadia, a? Taunimanima iboudiai ese bapatiso idia abia be namo, a?

Bapatiso​​—⁠Edena Dala Ai?

3, 4. Dahaka dainai kwarana latanai ranu idia bubua o ranu sisina amo idia haparia be Keristani bapatiso maorona lasi?

³ Charlemagne bona Vladimir Ginigunana ese taunimanima idia fosia bapatiso idia abia totona neganai, edia kara be Dirava ena Hereva hegeregerena lasi. Momokani, inai bamona bapatiso, ta ena kwarana latanai ranu ia bubua eiava ranu sisina amo ia haparia, eiava Baibel ena hereva momokani ia diba lasi tauna be ranu lalonai idia hadihoa, be namo idia havaraia lasi.

⁴ Lagani 29 C.E. ai, Nasareta tauna Iesu be Ioane Bapatiso dekenai ia lao neganai, mani idia vara gaudia oi laloa. Ioane be Ioridane Sinavai lalonai taunimanima ia bapatisoa. Mai edia ura ida ia dekenai idia lao, bapatiso do idia abia totona. Idia ia hamaoroa Ioridane lalonai idia gini bena sinavai ena ranu be edia kwarana latanai do ia bubua eiava ranu sisina amo do ia haparia, a? Ioane be Iesu ia bapatisoa neganai dahaka ia vara? Mataio ia gwau Iesu be bapatiso ia abia murinai, “ranu dekena amo ia daekau.” (Mataio 3:16) Ioridane Sinavai lalonai Ioane ese ia hadihoa, Iesu be ranu lalonai ia diho momokani. Unai hegeregerena, tomadiho ia laloa bada Etiopia eunuko tauna  be “ranu gabuna ta” dekenai bapatiso ia abia. Unai bamona ranu bada gabuna idia davaria be namo, badina Iesu bona iena hahediba taudia ese bapatiso idia abia neganai, edia tauanina ibounai be ranu lalonai idia diho momokani.​—⁠Kara 8:⁠36.

5. Keristani taudia ginigunadia ese edena dala ai taunimanima idia bapatisoa?

⁵ Greek gado herevadia, idia hahanaia “bapatisoa” bona “bapatiso,” edia anina be ranu lalonai idia hadihoa eiava ranu henunai idia atoa diho. Smith’s Bible Dictionary ia gwau: “Bapatiso ena anina maorona bona korikorina be ranu lalonai idia hadihoa.” Baibel haida ese ranu lalonai ia “Hadihoa Tauna Ioane” bona “ranu henunai ia atoa diho tauna Ioane” idia herevalaia. (Mataio 3:​1, Rotherham; Diaglott interlinear) Augustus Neander ena buka, History of the Christian Religion and Church, During the Three First Centuries lalonai ia gwau: “Matamanai, bapatiso idia karaia neganai ranu lalonai idia hadihoa.” France bukana badana Larousse du XX^e Siècle (Paris, 1928) ia gwau: “Keristani taudia ginigunadia be ranu gabuna idia davaria neganai, ranu henunai idia diho momokani karana amo bapatiso idia abia.” New Catholic Encyclopedia ia gwau: “Ia hedinarai goevagoeva idaunegai Dubu dekenai, Bapatiso idia karaia neganai, ranu lalonai idia diho.” (1967, Volium 2, rau 56) Unai dainai, Iehova ena Witnes tauna ai oi lao totona bapatiso oi abia neganai, emu tauanina ibounai be ranu lalonai idia hadihoa.

Bapatiso Ena Badina Matamata

6, 7. (a) Ioane ia karaia bapatiso ena anina be dahaka? (b) Dahaka dainai Iesu murinai idia raka taudia edia bapatiso ena anina be matamata?

⁶ Ioane ia karaia bapatiso bona Iesu murinai idia raka taudia idia karaia bapatiso edia anina be idau. (Ioane 4:​1, 2) Ioane be Taravatu idia utua bona taunimanima vairanai edia helalo-kerehai toana idia ura idia hahedinaraia taudia ia bapatisoa. * (Luka 3:⁠3) To Iesu murinai idia raka taudia be bapatiso idia abia neganai, gau ta be matamata. Pentekoste 33 C.E. ai, aposetolo Petero ese idia kamonai taudia ia hagoadaia: “Umui ibounai ese emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona.” (Kara 2:​37-41) Ena be Petero ese Iuda bona Iuda tomadiho idia abia dae taudia ia hereva henia, to unai bapatiso be Taravatu utua karana ena helalo-kerehai toana lasi, bona Iesu ena ladanai bapatiso idia abia taudia edia kara dika do ia huria oho lasi.​—⁠Kara 2:​10, NW.

⁷ Unai neganai Petero ese “Basileia ena ki” ginigunana ia gaukaralaia. Dahaka ia karaia totona? Ia gaukaralaia unai kamonai taudia dekenai, guba ena Basileia vareai dalana ia hahedinaraia totona. (Mataio 16:19) Iuda taudia ese Mesia tauna Iesu idia dadaraia dainai, Dirava ese edia kerere ia gwauatao totona, gau badana be kara matamata idia karaia, idia helalo-kerehai bona Iesu idia abidadama henia. Taunimanima vairanai unai abidadama do idia hamomokania dalana be Iesu Keriso ena ladanai ranu lalonai bapatiso idia abia. Unai dala amo do idia hahedinaraia Keriso amo Dirava dekenai edia mauri idia gwauhamatalaia. Hari, Dirava ena lalo-namo idia ura idia abia taudia ibounai be unai bamona abidadama idia hahedinaraia be namo; Iehova Dirava dekenai edia mauri idia gwauhamatalaia, bona Keristani bapatisona amo idia hahedinaraia Ataiai Momokani Diravana dekenai edia mauri ibounai idia gwauhamatalaia.

Diba Maoromaoro Abia be Gau Badana

8. Dahaka dainai taunimanima ibounai idia hegeregere lasi Keristani bapatiso abia totona?

⁸ Taunimanima ibounai idia hegeregere lasi Keristani bapatiso abia totona. Iesu ese ia murinai idia raka taudia ia hagania: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Taunimanima be bapatiso idia do abia lasi neganai, Iesu ese ena hahediba taudia dekenai ‘ia henia hereva ibounai’ idia dibaia be namo. Unai dainai, Dirava ena Hereva idia diba maoromaoro lasi bona idia abidadama lasi taudia fosia bapatiso idia abia totona be anina lasi, bona Iesu murinai idia raka taudia momokanidia dekenai ia henia gaukarana ia badinaia lasi.​—⁠Heberu 11:⁠6.

9. ‘Tamana ena ladanai’ bapatiso abia ena anina be dahaka?

⁹‘Tamana ena ladanai’ bapatiso abia ena anina  be dahaka? Ena anina be bapatiso ia abia gwauraia tauna ese iseda guba Tamana ena dagi bona lohia siahuna ia abia dae. Iehova Dirava be iseda Havaraia Tauna, “Ataiai Momokani Diravana,” bona Guba bona Tanobada edia Lohia Badana.​—⁠Salamo 83:18; Isaia 40:28; Kara 4:⁠24.

10. ‘Natuna ena ladanai’ bapatiso abia ena anina be dahaka?

¹⁰‘Natuna ena ladanai’ bapatiso abia ena anina be Iesu be Dirava sibona ia havaraia Natuna tamona dainai, ena dagi bona lohia siahuna ita abia dae. (1 Ioane 4:⁠9) Idia hegeregere bapatiso abia totona taudia idia abia dae, Dirava ese Iesu amo ‘taunimanima momo edia dika davana ia karaia.’ (Mataio 20:28; 1 Timoteo 2:​5, 6) Bapatiso idia abia gwauraia taudia idia abia dae Dirava ese ena Natuna “ia abia isi,” bona dagi badana ia henia.​—⁠Filipi 2:​8-11; Apokalupo 19:⁠16.

11. ‘Lauma helaga ena ladanai’ bapatiso abia ena anina be dahaka?

¹¹‘Lauma helaga ena ladanai’ bapatiso abia ena anina be dahaka? Unai ese ia hahedinaraia bapatiso ia abia gwauraia tauna ia diba lauma helaga be Iehova ena gaukara siahuna, bona iena ura hegeregerena, dala idauidau ai ia gaukaralaia. (Genese 1:2; 2 Samuela 23:​1, 2; 2 Petero 1:21) Bapatiso abia totona idia hegeregere taudia idia diba lauma helaga ese idia ia durua “Dirava ena laloa dobu gaudia” idia lalo-pararalaia, Basileia haroro gaukara idia karaia, bona lauma helaga ena huahua idia hahedinaraia totona. Unai huahua be, “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.”​—⁠1 Korinto 2:10; Galatia 5:​22, 23; Ioela 2:​28, 29.

Helalo-Kerehai Bona Kara Haidaua be Gau Badana

12. Keristani bapatiso ena anina helalo-kerehai karana dekenai be dahaka?

¹² Dirava ia lalo-namo henia karana be taunimanima be bapatiso idia abia, bona bapatiso ia hahedinaraia edia kara dika amo idia helalo-kerehai. Kara dika lasi tauna Iesu sibona dekenai unai be momokani lasi. Ita helalo-kerehai neganai, ita karaia karana eiava ita karaia lasi karana dainai, ita lalohisihisi eiava ita sori. Bema aposetolo taudia edia negai idia noho Iuda taudia idia ura Dirava idia hamoalea, Keriso dekenai idia karaia kara dika amo idia helalo-kerehai be gau badana. (Kara 3:​11-19) Korinto dekenai, Idau Bese taudia haida be sihari kava karana, kaivakuku tomadiho henia karana, henaohenao karana, bona kara dika badadia ma haida amo idia helalo-kerehai. Unai helalo-kerehai karana dainai, Iesu ena rara dekenai sibona idia “huria goeva” bona Dirava ena hesiai gaukara karaia totona idia “helaga” bona Keriso ena ladana ai bona Dirava ena lauma amo idia gwauraia “maoromaoro.” (1 Korinto 6:​9-11) Kara dika amo ita helalo-kerehai neganai, iseda lalona ena mamina ia namo ia lao bona Dirava ese ita do ia durua kara dika do ita lalohisihisilaia hanaihanai lasi totona.​—⁠1 Petero 3:⁠21.

13. Bapatiso ita herevalaia neganai, iseda kara haidaua karana ena anina be dahaka?

¹³ Iehova ena Witnes taudia ese bapatiso idia do abia lasi neganai, edia kara idia haidaua guna be gau badana. Mai ena kudouna ibounai ida Keriso Iesu murinai ia raka tauna ia ura ena kara ia haidaua. Unai bamona taudia ese guna idia badinaia dala kererena idia dadaraia bona edia lalona idia hadaia Dirava ena matana ai ia maoro dalana do idia badinaia. Baibel lalonai, Heberu bona Greek gado ai, kara haidaua karana idia herevalaia herevadia edia anina be ia giroa lao, o giroa lou. Unai kara ena anina be dala kererena amo ita giroa bona Dirava dekenai ita lao. (1 King Taudia 8:​33, 34) Unai kara haidaua karana be ‘kara ta do ita karaia, iseda lalona giroa hamomokania totona.’ (Kara 26:20) Kara haidaua karana be tomadiho koikoi do ita rakatania, Dirava ena hahegani ita badinaia, bona Iehova sibona ita tomadiho henia. (Deuteronomi 30:​2, 8-10; 1 Samuela 7:⁠3) Iseda kara ita haidaua neganai, iseda laloa dalana, ita tahua gaudia, bona kara toana do idia idau. (Esekiela 18:31) Dirava ia ura lasi karadia ita kokia bona mauri matamatana ita atoa neganai, iseda ‘lalona ia giroa.’​—⁠Kara 3:19; Efeso 4:​20-24; Kolose 3:​5-14.

Mai Emu Kudouna Ibounai ida Gwauhamata Oi Karaia be Gau Badana

14. Iesu murinai idia raka taudia edia gwauhamata ena anina be dahaka?

¹⁴ Iesu murinai idia raka taudia be bapatiso idia do abia lasi neganai, mai edia kudouna ibounai ida Dirava dekenai edia mauri idia gwauhamatalaia. Gwauhamata karaia ena anina be tau ta be ena mauri ia atoa helaga gaukara do ia karaia totona.  Unai kara be mai anina bada dainai, guriguri amo Iehova dekenai iseda gwauhamata, ia sibona do ita tomadiho henia ela bona hanaihanai, ita gwauraia be namo. (Deuteronomi 5:⁠9) Momokani, iseda gwauhamata be gaukara ta, o tau ta dekenai lasi, to ia be Dirava dekenai ita henia.

15. Dahaka dainai bapatiso idia abia taudia be ranu lalonai idia diho?

¹⁵ Keriso ena ladana amo Dirava dekenai iseda mauri ita gwauhamatalaia neganai, ia hahedinaraia iseda lalona ita hadaia iseda mauri do ita gaukaralaia Dirava ena ura, Baibel lalonai, do ita karaia. Unai gwauhamata hahedinaraia totona, bapatiso idia abia taudia be Iesu hegeregerena ranu lalonai idia diho. Ia be Ioridane Sinavaina lalonai bapatiso ia abia, Dirava dekenai sibona ia henia karana ia hahedinaraia totona. (Mataio 3:13) Namona be inai ita laloa, unai mai anina negana ai Iesu ia guriguri.​—⁠Luka 3:​21, 22.

16. Taunimanima edia bapatiso ita itaia neganai, moale hahedinaraia dala maorona be dahaka?

¹⁶ Iesu ia bapatiso neganai ia be mai anina karana ta, to ia be moale negana danu. Hari, Keristani bapatiso be unai bamona danu. Dirava dekenai edia mauri idia gwauhamatalaia bona idia hamomokania taudia ita itaia neganai, iseda moale hahedinaraia dalana be iseda imadia ita hapatapataia bona hanamoa herevadia ita henia. To unai abidadama hahedinaraia karana be helaga bona ita laloa bada dainai, boiboi badabada, hioga, bona unai bamona karadia do ita karaia lasi. Iseda moale be mai hemataurai ida ita hahedinaraia.

17, 18. Edena gaudia do idia hahedinaraia ta ia hegeregere bapatiso abia totona?

¹⁷ Taunimanima be ranu sisina amo beibi idia haparia bona Baibel idia diba lasi hutuma idia doria bapatiso idia abia totona, to Iehova ena Witnes taudia be ta idia fosia lasi bapatiso idia abia totona. Momokani, lauma dalanai idia hegeregere lasi taudia do idia bapatisoa lasi. Ta be bapatiso lasi haroro tauna ta ai ia do lao lasi neganai, Keristani elda taudia do idia hamomokania ia ese Baibel ena hahediba herevadia badadia ia diba, ena mauri lalonai ia badinaia, bona inai bamona henanadai, “oi ura momokani Iehova ena Witnes tauna ta ai oi lao, a?” dekenai do ia gwau diba oibe.

¹⁸ Nega momo, elda taudia ese mai anina Basileia haroro gaukarana idia karaia bona idia ura bapatiso idia abia taudia ida do idia hebou, bona do idia hamomokania Iehova dekenai unai taudia be gwauhamata idia karaia bona Dirava ia gwauraia taravatu, bapatiso gwauraia taudia totona, idia badinaia vadaeni. (Kara 4:4; 18:⁠8) Elda taudia ese henanadai 100 bona ma haida, Baibel ena hahediba herevadia dekenai, do idia henia, bena do idia diba bema bapatiso idia ura abia taudia be Baibel ia gwauraia taravatudia idia badinaia. Haida do idia hegeregere lasi, unai dainai Keristani bapatiso do idia abia lasi.

Gau ta ese Oi Ia Koua, A?

19. Ioane 6:​44 ena hereva hegeregerena, daidia be Iesu ida do idia lohia?

¹⁹ Ta ese idia ia fosia dainai, taunimanima momo ida bapatiso idia abia taudia idia hamaorodia, idia mase neganai guba dekenai do idia lao. To Iesu be ia murinai idia raka taudia ia herevalaia neganai, ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioane 6:44) Iehova ese Keriso dekenai taunimanima 144,000 ia veria mai, guba Basileiana dekenai Iesu ida do idia lohia totona. Ta ese ia fosia dainai bapatiso ia abia tauna ia helaga lasi, bona Dirava ena Basileia lalonai gabu ta do ia abia lasi.​—⁠Roma 8:​14-17; 2 Tesalonika 2:13; Apokalupo 14:⁠1.

20. Bapatiso idia do abia lasi taudia ia durua gauna be dahaka?

²⁰ Lagani 1935 bamona murinai, taunimanima hutuma, Iesu ia gwauraia “mamoe idaudia,” edia helaro be “hisihisi badana” amo do idia roho mauri bona tanobada dekenai do idia noho ela bona hanaihanai. (Apokalupo 7:​9, 14, NW; Ioane 10:16) Idia hegeregere bapatiso abia totona, badina Dirava  ena Hereva idia badinaia bona ‘mai edia kudouna, lauma, goada, bona lalona ibounai ida’ ia idia lalokau henia. (Luka 10:​25-28) Taunimanima haida idia diba Iehova ena Witnes taudia be mai lauma bona mai momokani ida Dirava idia tomadiho henia. To Iesu ena haheitalai idia do tohotohoa lasi, bapatiso amo taunimanima vairanai idia hamomokania lasi Iehova idia lalokau henia bona ia sibona do idia tomadiho henia. (Ioane 4:​23, 24; Deuteronomi 4:24; Mareko 1:​9-11) Guriguri lalonai, mai momokani ida unai mai anina bada kara idia herevalaia neganai, reana idia do ia hagoadaia Dirava ena Hereva ibounai hegeregerena do idia noho, bena Iehova Dirava dekenai edia mauri ibounai do idia gwauhamatalaia, bona bapatiso do idia abia.

21, 22. Dahaka dainai haida be gwauhamata bona bapatiso idia karaia lasi, to idia naria?

²¹ Haida be gwauhamata idia karaia lasi bona bapatiso idia abia lasi to idia naria, badina tanobada karadia eiava ena kohu idia tahua goadagoada, bona nega be lasi lauma gaudia totona. (Mataio 13:22; 1 Ioane 2:​15-17) Bema edia tahua gaudia bona lalohadai idia haidaua, do idia moale bada! Iehova kahirakahira idia lao neganai, lauma dalanai do idia taga, edia lalo-hekwarahi do ia hamaragia, bona maino bona moale do idia abia, badina Dirava ena ura idia karaia.​—⁠Salamo 16:11; 40:8; Aonega Herevadia 10:22; Filipi 4:​6, 7.

²² Ma haida idia gwau Iehova idia lalokau henia, to gwauhamata bona bapatiso idia karaia lasi badina idia laloa bema idia karaia lasi, kara kerere ena davana do idia abia lasi. To ita ta ta be Dirava vairanai iseda kara ena badina do ita gwauraia hedinarai. Iehova ena hereva ita kamonai neganai, maduna ita abia. (Esekiela 33:​7-9; Roma 14:12) Idaunegai Israela taudia be Dirava ia abia hidi besena, unai dainai Iehova dekenai gwauhamata ia henia besena lalonai idia vara bona edia maduna be mai abidadama ida ia idia hesiai henia bona iena taravatu do idia badinaia. (Deuteronomi 7:​6, 11) Hari taunimanima ta lasi be unai bamona bese dekenai ia vara, to bema Baibel ena hadibaia hereva maorodia ita diba, namona be mai abidadama ida ita badinaia.

23, 24. Taunimanima ese edena gari dainai bapatiso idia abia lasi be maoro lasi?

²³ Haida idia laloa edia diba ia hegeregere lasi dainai bapatiso do idia abia lasi. To, ita ibounai be gau momo ita do dibaia lasi, badina ‘Dirava momokanina be matamana ela bona dokona ia karaia gaukarana do ita davaria diba lasi.’ (Hadibaia Tauna 3:​11, NW ) Etiopia eunuko tauna mani oi laloa. Ia ese Iuda tomadiho ia abia dae dainai, Baibel dekenai  diba sisina ia abia, to Dirava ena ura dekenai idia noho henanadai ibounai ia haerelaia diba lasi. Eunuko tauna ese Iehova ia henia hahemauri dalana, Iesu ena mauri davalaia boubouna, ia dibaia murinai, maoromaoro Dirava dekenai ena mauri ia gwauhamatalaia bona ranu bapatiso ia abia.​—⁠Kara 8:​26-38.

²⁴ Taunimanima haida be Dirava dekenai edia mauri idia gwauhamatalaia lasi badina idia gari do idia moru. Mauri lagani 17 kekenina, Monique, ia gwau: “Bapatiso lau abia lasi to lau naria, badina lau gari unai gwauhamata do lau badinaia noho diba lasi.” Bema Iehova ita lalokau henia mai iseda kudouna ibounai ida, ‘dala maorona be ita dekenai do ia hadibaia.’ Ita, iena abidadama gwauhamata hesiai taudia, do ia durua “hereva momokani ena dala dekenai” do ita raka noho totona.​—⁠Aonega Herevadia 3:​5, 6; 3 Ioane 4.

25. Edena henanadai do ita laloa?

²⁵ Lagani ta ta ai, taunimanima tausen momo be Iehova idia abidadama henia momokani bona idia lalokau henia dainai, ia dekenai edia mauri idia gwauhamatalaia bona bapatiso idia abia. Bona Dirava dekenai edia mauri idia gwauhamatalaia taudia ibounai idia ura ia idia badinaia noho. To, nega dikana lalonai ita noho, bona iseda abidadama idia tohoa gaudia idauidau ita davaria. (2 Timoteo 3:​1-5) Iehova dekenai ita henia gwauhamata ita hamomokania totona, dahaka ita karaia diba? Hereva gabena lalonai unai do ita laloa.

[Footnotes]

Oi Laloatao, A?

• Keristani bapatiso karaia dalana be dahaka?

• Bema ta ia ura bapatiso ia abia, edena diba ia abia guna be gau badana?

• Ta be Keristani momokani tauna ena bapatiso ia do abia lasi neganai, edena kara idauidau do ia karaia guna?

• Dahaka dainai haida be bapatiso idia abia lasi to idia naria, bona dahaka ese idia ia durua diba?

[Study Questions]

[Pictures on page 14]

‘Tamana, Natuna, bona lauma helaga edia ladanai’ bapatiso abia ena anina oi diba, a?