Aonega Sisibana Headava Taudia Totona
Aonega Sisibana Headava Taudia Totona
“Hahine e, emui adavana do umui kamonai henia, Lohiabada umui kamonai henia hegeregerena. Tatau e, emui adavana do umui lalokau henia.”—EFESO 5:22, 25.
1. Headava dekenai lalohadai maorona be dahaka?
IESU ia gwau headava be Dirava ese tau bona hahine ia hakapua bena idia be tauanina “tamona” ai idia lao. (Mataio 19:5, 6) Headava lalonai be taunimanima rua mai edia kara idauidau idia noho, idia gaukara hebou gau tamona idia ura henia bona tahua gaudia tamona idia hagugurua totona. Headava lalonai tau bona hahine ese ta ta idia gwauhamata henia do idia noho hebou ela bona mase ese idia ruaosi ia hapararaia, ia be nega sisina lalonai ia noho bona idia hadokoa haraga gauna lasi. Tano momo dekenai, headava hadokoa karana be auka lasi, to Keristani tauna dekenai, headava be helaga. Badina badana ta sibona dainai headava idia hadokoa be namo.—Mataio 19:9.
2. (a) Headava taudia be dahaka heduru idia abia diba? (b) Dahaka dainai headava ia namo totona idia hekwarahi be mai anina bada?
2 Headava taudia ia sisiba henia hahinena ta ia gwau: “Headava namona lalonai, gau matamatadia idia vara neganai, tau bona hahine idia noho hegaegae edia kara idia haidaua totona, hekwakwanai idia hamaoromaoroa, bona edia mauri lalonai idia abia diba heduru namona idia gaukaralaia.” Idia headava tau eiava hahine dekenai, unai heduru gaudia be Baibel ena aonega herevadia, Keristani tadikaka edia heduru bona guriguri amo Iehova tura henia karana. Headava namona do ia noho daudau herevana hekwakwanai idia vara bona idia hanaia laganidia lalonai, tau bona hahine dekenai moale ia havaraia. Mai anina bada gauna be inai, unai ese headava ia Hamatamaia Tauna, Iehova Dirava ia hanamoa.—Genese 2:18, 21-24; 1 Korinto 10:31; Efeso 3:15; 1 Tesalonika 5:17.
Iesu Bona Ena Kongrigeisen Tohotohoa
3. (a) Paulo ena sisiba headava taudia dekenai oi gwauraia. (b) Iesu ese dahaka haheitalaia namona ia hahedinaraia?
3 Lagani 2,000 gunanai, aposetolo Paulo ese headava taudia dekenai aonega sisibana ia henia neganai, ia gwau: “Hahine ese gau ibounai lalonai, edia adavana do idia kamonai henia, ekalesia ese Keriso ia kamonai henia bamona. Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:24, 25) Unuseniai hahegeregerea hereva namona ia gwauraia! Mai manau ida edia tatau henunai idia noho Keristani hahine ese kongrigeisen idia tohotohoa, idia ese kwara dagina idia matauraia. Keristani tatau ese nega namodia bona nega dikadia ai edia hahine idia lalokau henia neganai, idia hahedinaraia idia ese Keriso be kongrigeisen ia lalokau henia bona ia naria dalana idia tohotohoa.
4. Edena dala ai tatau ese Iesu ena haheitalai idia badinaia diba?
4 Keristani tatau be edia ruma bese ena kwarana, to idia be mai edia kwarana danu, Iesu. (1 Korinto 11:3) Unai dainai, Iesu ese ena kongrigeisen ia naria hegeregerena, tatau ese edia ruma bese be lauma bona tauanina dalanai idia naria, ena be unai idia karaia totona edia ura gaudia haida do idia reaia. Edia ruma bese ena namo idia atoa guna bona edia ura be gabeai. Iesu ia gwau: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mataio 7:12) Headava dekenai unai hakaua herevana be mai anina bada. Paulo ese unai ia hahedinaraia, ia gwau: “Tatau ese edia adavana do idia lalokau henia, idia edia tauanina idia lalokau henia hegeregerena. . . . Tau ta ese sibona ena tauanina ia badu henia diba lasi. To ia ubua noho, bona ia naria noho.” (Efeso 5:28, 29) Namona be tau ese ena hahine ia ubua bona naria ia sibona ia ubua bona naria hegeregerena.
5. Edena dala ai hahine ese Keristani kongrigeisen idia tohotohoa diba?
5 Dirava idia tomadiho henia hahine ese Keristani kongrigeisen idia tohotohoa. Iesu be tanobada dekenai ia noho neganai, ena murinai idia raka taudia ese sibodia edia gaukara idia rakatania bona ia idia badinaia. Ia mase murinai, ia henunai idia do noho bona kahirakahira lagani 2,000 idia hanaia murinai, Keristani kongrigeisen momokani be Iesu henunai idia noho bona gau ibounai dekenai ena hakaua dalana idia badinaia. Unai hegeregerena namo lasi Keristani hahine ese edia adavadia idia matauraia lasi eiava Baibel ese ia gwauraia kwara dagina idia laloa maragi. To, edia adavadia idia durua, edia henunai idia noho, idia gaukara hebou bona idia hagoadadia. Tau bona hahine be unai bamona lalokau dalana ai idia kara neganai, edia headava do ia namo bona edia hetura karana do idia moalelaia.
Idia Danu Umui Noho
6. Petero ese tatau dekenai dahaka sisiba ia henia, bona dahaka dainai unai be mai anina bada?
6 Aposetolo Petero danu ese headava taudia ia sisiba henidia bona ena hereva be mai anina bada tatau dekenai. Ia gwau: “Emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia. Umui laloaboio lasi, umui, mai emui adavana danu, ese Dirava ena hariharibada umui abia hebou dainai, mauri hanaihanai umui davaria. Unai bamona do umui karaia neganai, emui guriguri haere dalana be gau ta ese do ia koua lasi.” (1 Petero 3:7) Unai siri ena dokona kahana ese ia hahedinaraia Petero ena hereva be mai anina bada. Bema tau ese ena adavana ia matauraia lasi, ena hetura karana Iehova ida ia hadikaia unai. Iehova ese ena guriguri do ia haerelaia lasi.
7. Edena dala ai tau ese ena adavana ia matauraia be namo?
7 Edena dala ai tatau ese edia adavadia idia matauraia diba? Adavana matauraia karana ena anina be mai lalokau ida ia kara henia. Taunimanima momo dekenai hahine be unai bamona hebogahisi dalanai idia kara henia be kara idauna. Greek ena diba bada tauna ta ia gwau: “Roma ena taravatu henunai hahine be maoro lasi gau ta idia karaia totona. Taravatu henunai ena maoro be natuna ta ena bamona. . . . Ia be nega ibounai ena tau ena siahu henunai ia noho bona ena ura sibona ia karaia.” Unai be Keristani hadibaia herevadia hegeregerena lasi! Keristani tau ese ena adavana ia matauraia. Keristani hakaua herevadia hegeregerena ia kara henia, to sibona ena ura hegeregerena lasi. Hahine ena tauanina be ia goada lasi, unai ia “laloa namonamo” be namo.
Edena Dala ai Edia ‘Tauanina be Goada Lasi’?
8, 9. Edena dala idauidau ai hahine be tatau ida idia hegeregere?
8 Petero ia gwau hahine ena ‘tauanina be goada lasi’ neganai, ia gwau lasi hahine edia aonega eiava edia goada lauma dalanai be tatau ese idia hereaia. Momokani, Keristani tatau momo be kongrigeisen lalonai gaukara idauidau idia karaia, hahine ese idia karaia diba lasi gaukaradia unai, bona ruma bese lalonai hahine be edia tatau henunai idia noho. (1 Korinto 14:35; 1 Timoteo 2:12) To ibounai, tau bona hahine ese abidadama, haheauka, bona kara maoromaoro taravatudia idia badinaia be namo. Bona Petero ia gwau bamona, tau bona hahine ruaosi be “Dirava ena hariharibada [idia] abia hebou . . . mauri hanaihanai [idia] davaria.” Iehova Dirava ena matanai idia be hegeregere bona hahemauri do idia abia. (Galatia 3:28) Petero be aposetolo edia negai idia noho horoa Keristani taudia ia tore henidia. Iena hereva ese Keristani tatau ia hadibaia lou idia be Keriso ida do idia lohia hebou dainai, idia bona edia hahine be guba helaro tamona do idia abia. (Roma 8:17, NW ) Dina ta, tatau bona hahine be Dirava ena guba Basileiana lalonai hahelaga gaukarana do idia karaia!—Apokalupo 5:10.
9 Horoa Keristani hahine be edia horoa Keristani tatau ese idia hereaia lasi. Unai be momokani tanobada helarona idia abia taudia dekenai danu. Hutuma bada herea lalonai idia noho tatau bona hahine be Mamoe Natuna ena rarana lalonai edia dabua idia huria dainai ia kurokuro. Tanobada hegegemadai tatau bona hahine ese “dina bona hanuaboi” Iehova idia hanamoa hebou. (Apokalupo 7:9, 10, 14, 15) Tatau bona hahine ese gabeai “Dirava ena natuna edia hairaina” do idia abia hebou, unai neganai “mauri” korikorina do idia moalelaia. (Roma 8:21; 1 Timoteo 6:19) Ena be Keristani taudia be horoa taudia eiava mamoe idaudia, idia ibounai be ‘orea tamona’ lalonai Iehova idia hesiai henia, bona ‘naria tauna tamona’ henunai idia noho. (Ioane 10:16) Unai badina dainai Keristani tatau bona hahine be ta ta idia matauraia be namo!
10. Edena dala ai hahine edia ‘tauanina be goada lasi’?
10 Edena dala ai hahine edia ‘tauanina be goada lasi’? Reana Petero ena hereva ena anina be, vaia hahine momo edia tauanina bona edia goada ena bada be tatau edia bamona lasi. Danu, inai goevadae lasi maurina ai, hahine dekenai ia vara gauna namona be natuna idia havaraia diba, unai neganai hisihisi bada idia mamia. Natuna havaraia lagani idia abia hahine be hua ta ta ai idia mamia idia gorere sisina. Unai bamona hisihisi eiava idia rogorogo bona natuna idia havaraia murinai edia tauanina ia manoka neganai, ta ese ia naria bona laloa be namo. Ena adavana ia matauraia tauna ia itaia, namona be ia ese ena adavana ena lalona ia hagoadaia, unai ese headava ia durua bada ia namo totona.
Tomadiho Dainai Idia Parara Ruma Besedia Lalonai
11. Edena dala ai headava ia namo diba ena be tau bona hahine edia tomadiho be idau?
11 Bema headava tau bona hahine edia lalohadai tomadiho dekenai be idau, idia headava bena nega sisina murinai idia ta ese Keristani hereva momokani ia abia dae bona ta ese ia abia dae lasi, be edena bamona? Unai bamona headava ia namo diba, a? Oibe, sivarai momo ese idia hahedinaraia edia headava ia dika lasi. Tomadiho dekenai edia lalohadai be idau tau bona hahine edia headava ia namo diba bona idia ruaosi ia hamoalea diba. Danu, Iehova ena matanai headava be mai anina bada; idia be do tauanina “tamona.” Unai dainai, Baibel ese Keristani taudia ia sisiba henidia edia abidadama lasi adavadia danu do idia noho hebou, bema edia adavadia idia ura. Bema idia be mai edia natudia, unai natudia be edia Keristani tama eiava sina ena abidadama dainai namo idia abia.—1 Korinto 7:12-14.
12, 13. Petero ena sisiba hegeregerena, Keristani hahine be edena dala ai edia abidadama lasi tatau idia durua diba?
12 Petero be mai hebogahisi ida tomadiho dalanai idia parara ruma bese ai idia noho Keristani hahine ia sisiba henidia. Unai bamona hekwakwanai tamona idia davaria Keristani tatau danu ese unai hakaua herevana idia badinaia diba. Petero ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.”—1 Petero 3:1, 2.
13 Bema hahine be dala namona ai ena adavana dekenai ena tomadiho ia herevalaia diba, unai be namo. To bema ia ura lasi kamonai be edena bamona? Unai be ena abia hidi. To dala ia noho, badina Keristani kara ese ma haida dekenai haroro goadana ia henia diba. Guna edia adavadia edia tomadiho idia laloa bada lasi, eiava idia dagedage henidia tatau momo be edia adavadia edia kara idia itaia murinai, “mauri hanaihanai idia ura kudou-maoro taudia” ai idia lao. (Kara 13:48, NW ) Ena be tau ta ese Keristani hereva momokani ia abia dae lasi, to ena adavana ena kara do ia ura henia momokani bona unai ese headava do ia hanamoa. Iehova ena Witnes hahinena ia adavaia tauna ta ia gwau Witnes taudia edia kara maoromaoro taravatudia ia badinaia diba lasi. To sibona ia gwauraia “hahine namo hereana ena moale adavana” bona niuspepa ta dekenai ia torea revarevana ta lalonai ena adavana bona ena Witnes turadia ia hanamoa.
14. Edena dala ai tatau ese abidadama lasi hahine idia durua diba?
14 Petero ena hakaua hereva idia badinaia Keristani tatau edia kara ese edia adavadia edia lalona idia veria danu. Abidadama lasi hahine idia itaia edia tatau ese edia maduna idia huaia, kuku, inuinu bona laki gadara dekenai edia moni idia negea kava lasi bona hereva mirodia idia gwauraia lasi. Idia haida ese Keristani kongrigeisen taudia haida idia hedavari henidia. Lalokau Keristani tadikaka edia kara idia hoalaia bona tadikaka huanai idia itaia gauna ese Iehova kahirakahira idia ia abia lao.—Ioane 13:34, 35.
“Hairai Korikorina be Emu Lalona Dekenai Ia Noho”
15, 16. Keristani hahine ese edena bamona kara ia hahedinaraia diba ena abidadama lasi tau ena lalona ia veria totona?
15 Edena kara ese tau ta ena lalona ia veria diba? Ita gwau diba, Keristani hahine ese idia hahedinaraia kara unai. Petero ia gwau: “Umui ese kopina dekenai herahera gaudia, hegeregere kavabukavabu do umui atoa lasi. Emui huina danu sitaelo sitaelo bamona do umui karaia lasi. Bona dabua, edia toana namo herea momokani do umui atoa lasi. Inai gaudia be emui kopina edia murimuri kahanai sibona. To namona be emui hairai korikori be emui lalona dekenai ia noho. Herahera namodia, do idia dika diba lasi gaudia, hegeregere laloa manau, bona dagedage lasi, emui lalona dekenai do umui atoa. Idia edia hairai do ia noho hanaihanai, bona idia be namo bada herea Dirava ena vairanai. Gunaguna, sene hahine helagadia, Dirava idia abidadama henia hahine, ese unai bamona hairai idia atoa. Vadaeni, unai dainai idia ese edia adavana idia kamonai henia. Sara be unai bamona ia karaia. Ia ese Aberahamo ena hereva ia kamonai henia, bona ‘lohia’ ia gwauraia. Bema umui ese kara namo umui karaia, bona gau ta dekenai umui gari henia lasi neganai, umui be Sara ena natuna.”—1 Petero 3:3-6.
16 Petero ese Keristani hahine ia sisiba henia ena toana sibona ia laloa lasi be namo. To, Baibel ena hadibaia hereva ese ena kara ia haidaua dalana be ena tau ese ia itaia be namo. Namona be ia itaia danu ena adavana ese mauri matamata ia hahedinaraia. Reana ena hahine ena mauri gunana ida unai do ia hahegeregerea. (Efeso 4:22-24) Do ia davaria ena hahine ena “laloa manau, bona dagedage lasi” karana ese ia dekenai laga-ani do ia henia bona do ia hamoalea. Unai bamona kara ese tau ia hamoalea sibona lasi to “idia be namo bada herea Dirava ena vairanai.”—Kolose 3:12.
17. Edena dala ai Sara be haheitalai namona Keristani hahine dekenai?
17 Sara be haheitalai namona Keristani hahine dekenai, ena be edia tau be abidadama taudia eiava lasi. Sara ia abia dae momokani Aberahamo be ena kwarana. Ena kudouna dekenai, Aberahamo ia gwauraia ena “lohia.” (Genese 18:12, NW ) To unai ese Sara ia hadihoa lasi. Ia hedinarai goevagoeva, lauma dalanai ia goada badina Iehova ia abidadama henia momokani. Oibe, Sara be “witnes taudia hutuma bada ori ta bamona” ena orea lalonai ia noho, edia abidadama ese ita ia veria “iseda vairana dekenai ia noho heau helulu, be mai haheauka danu do ita heau goada.” (Heberu 11:11; 12:1; NW ) Bema Keristani hahine ese Sara ena kara ia tohotohoa, unai ese ia do ia hadihoa lasi.
18. Idia parara ruma bese lalonai edena hakaua herevadia idia badinaia diba?
18 Tomadiho dainai idia parara ruma bese lalodiai, tau be kwarana. Bema ia be abidadama tauna, ena hahine ena tomadiho do ia laloa, to sibona ena abidadama idia hamanokaia gaudia do ia karaia lasi. Bema hahine be abidadama hahinena, ia danu ese ena abidadama do ia hamanokaia gaudia do ia karaia lasi. (Kara 5:29) To, ena tau ena kwara dagina do ia gwauraia dika lasi. Ena kwara dagina do ia matauraia bona tau ena “taravatu” henunai do ia noho.—Roma 7:2.
Baibel Ena Aonega Sisibana
19. Dahaka gaudia haida ese headava ia hadikaia diba, to edena bamona unai gaudia ita dadaraia diba?
19 Hari inai negai, gau momo ese headava ia hadikaia diba. Tatau haida ese edia maduna idia huaia lasi. Hahine haida ese edia tatau edia kwara dagina idia abia dae lasi. Headava haida lalonai, ta be ma ta ese ia hahisia bada. Keristani taudia dekenai, moni ena lalohekwarahi, goevadae lasi maurina, bona tanobada ena lauma mai ena matabodaga karadia bona kara maoromaoro taravatudia laloa kerere karana ese badinaia karana ia tohoa diba. To, Baibel ena hakaua herevadia idia badinaia Keristani tatau bona hahine, herevana edia mauri lalonai dahaka ia vara, ese Iehova ena hanamoa idia abia. To bema headava lalonai ta sibona ese Baibel ena hakaua herevadia ia badinaia, unai be namo, to bema ruaosi ese idia badinaia lasi hekwakwanai do ia bada. Danu, edia headava gwauhamatana idia badinaia taudia, herevana nega dikadia lalonai danu, be Iehova ese ia lalokau henidia bona durudia. Edia badinaia karana ia laloaboio lasi.—Heberu 6:10; 1 Petero 3:12.
20. Keristani taudia ibounai dekenai Petero be dahaka sisiba ia henia?
20 Aposetolo Petero be headava tatau bona hahine ia sisiba henidia murinai, ena hereva dokonai idia ia hagoadaia. Ia gwau: “Egu hereva ena anina be inai: Umui ibounai mai lalona tamona danu do umui noho, umui ta ta dekenai durua do umui henia. Umui ta ta dekenai do umui lalokau henia, tadikaka bamona. Umui ta ta dekenai do umui bogahisihisi henia, do umui manau. Tau ta bema umui dekenai ia kara dika neganai, davana do umui henia lasi. Bema umui dekenai idia hereva dika neganai, umui ese hereva dika do umui henia lou lasi. Lasi, to hanamoa hereva do umui henia lou, bona umui ese Dirava do umui noia, ia ese idia do ia hanamoa. Dirava ese umui ia boiria, inai bamona do umui karaia, iena hanamoa do umui abia totona.” (1 Petero 3:8, 9) Unai be sisiba namona ita ibounai dekenai, to headava taudia dekenai ia be mai anina bada!
Oi Laloatao, A?
• Edena dala ai Keristani tatau ese Iesu idia tohotohoa?
• Edena dala ai Keristani hahine ese kongrigeisen idia tohotohoa?
• Edena dala ai tatau ese edia adavadia idia matauraia diba?
• Keristani hahine, ena adavana be abidadama lasi tauna, ese edena dala ia badinaia be namo?
[Study Questions]
[Picture on page 24]
Keristani tau ese ena adavana ia lalokau henia bona naria
Keristani hahine ese ena adavana ia matauraia
[Picture on page 25]
Keristani hahediba henunai tau ese ena adavana do ia matauraia, to Roma ena taravatu be unai bamona lasi
[Picture on page 26]
“Hutuma bada herea” lalonai idia noho tatau bona hahine be paradaiso lalonai mauri hanaihanai do idia abia hebou
[Picture on page 28]
Sara ese Aberahamo be ena lohia ia gwauraia