Duahia Taudia Edia Henanadai

Keristani tauna ese gavamani opesi ai ia gaukara tauna ta ena gaukara dainai, moni eiava harihari gauna ta ia henia be namo, eiava unai be laloani karana ta?

Herevana edeseniai idia noho, Keristani taudia be mai aonega ida idia kara be namo; idia laloatao, tano haida dekenai kara haida be taravatu hegeregerena idia karaia be namo, to tano ma haida dekenai unai kara idia abia dae lasi bona idia be taravatu hegeregerena lasi. (Aonega Herevadia 2:​6-9) Oibe, namona be hanaihanai Keristani tauna ia laloatao: Bema ta ia ura Iehova ena “Dubu Helaga dekenai do ia noho,” namona be laloani karana ia dadaraia.​—Salamo 15:​1, 5; Aonega Herevadia 17:23.

Laloani karana be dahaka? The World Book Encyclopedia ia gwau, “laloani karana ena anina be, ta ese dava bada gauna ta ia henia eiava ia hariharilaia . . . gavamani opesi ai ia gaukara tauna ta dekenai, bena unai gavamani tauna ese ena dagi ia gaukaralaia kerere eiava taravatu ia utua, unai amo henia tauna ese namo ia davaria.” Unai dainai, herevana edeseniai ita noho, bema diadi eiava pulisi ofesa tauna dekenai moni eiava harihari gauna ita henia kota maorona ia hagagevaia totona, eiava inspekta tauna dekenai moni ita henia kerere gauna ta eiava taravatu utua karana ia laloa bada lasi totona, vadaeni unai be laloani karana. Danu, bema ta dekenai harihari gauna ta ita henia bena ia ese naria taudia edia lista dekenai eda ladana ia atoa guna eiava ma haida ita hanaia bena vairanai ita gini karana be laloani karadia. Unai danu be lalokau karana lasi.​—Mataio 7:​12; 22:39.

To, bema gavamani opesi ai ia gaukara tauna dekenai harihari gauna ta eiava moni oi henia, unai amo ia ese taravatu hegeregerena oi ia durua; unai be laloani karana, a? Hegeregere, tano haida dekenai, gavamani ai idia gaukara taudia be idia ura lasi sikuli dekenai natudia idia abia dae, idia ura lasi gorere tauna be hospital dekenai ia noho, eiava idia ura lasi idau tano tauna ena loaloa gwaumaoro pepadia dekenai gwaumaoro makana idia atoa ela bona moni idia abia guna. Eiava laiseni matamata edia aplikeisen pepadia idia karaia haraga lasi.

Tano idauidau ai, moni henia o abia karana bona laloa dalana be idauidau. Tano haida dekenai unai bamona kara be vaia taunimanima edia kara o taravatu ia utua lasi, to Keristani taudia haida idia laloa gavamani tauna dekenai moni idia henia heduru ia henia totona neganai, gau badana be Baibel ena hakaua herevadia idia utua lasi. Tano haida dekenai, gavamani ai ia gaukara tauna ena davana be maragi dainai, taunimanima idia laloa unai bamona harihari monina idia henia unai gaukara tauna idia durua totona. Laloaboio lasi, ta dekenai harihari gauna oi henia bena taravatu hegeregerena heduru do ia henia be idau, bona ta dekenai laloani monina oi henia bena taravatu utua gaukarana ta do ia karaia be ma idau.

To, Iehova ena Witnes taudia haida be taravatu hegeregerena gaukara idia karaia neganai, idia ura lasi inspekta taudia, kohu sekea taudia, eiava gavamani taudia ma haida dekenai moni idia henia, herevana taunimanima ma haida be unai bamona idia karaia. Taunimanima momo idia diba Witnes taudia be taravatu idia badinaia namonamo bona idia koikoi lasi dainai, nega haida Witnes taudia be heduru idia abia, to momo ese unai bamona heduru be moni idia henia sibona amo idia abia.​—Aonega Herevadia 10:9; Mataio 5:​16.

Vadaeni, namona be Iehova ena hesiai taudia ta ta be abia hidi do idia karaia, gavamani ai ia gaukara tauna ta dekenai moni ia henia bena taravatu hegeregerena heduru do ia henia. Gau badana be, Keristani tauna ese ia badinaia dalana amo ena lalomamina namona ia hadikaia lasi, Iehova ena ladana ia hadikaia lasi, bona ma haida ia hahekwakwanaia lasi be namo.​—Mataio 6:9; 1 Korinto 10:​31-​33; 2 Korinto 6:3; 1 Timoteo 1:5.