Dirava Ena Hereva Abia Dae, Emu Dala Ia Hadiaria Totona

“Oiemu hereva . . . ese egu dala ia hadiaria noho.”​—SALAMO 119:105.

1, 2. Dahaka do ita karaia, bena Iehova ena hereva ese iseda dala ia hadiaria diba?

BEMA Iehova ena hereva ita abia dae, iseda dala ia hadiaria diba. Unai lauma diari amo namo ita abia totona, gau badana be Dirava ena Hereva, Baibel ita stadilaia namonamo bona ena sisiba ita badinaia. Unai dala sibona amo, ita ese Salamo torea tauna ena lalohadai ita abia diba: “Lohiabada e, oiemu hereva be lamepa bamona, lau ia hakaua noho, vadaeni lau raka maoromaoro diba.  Oiemu hereva be diari, ia ese egu dala ia hadiaria noho.”​—Salamo 119:105.

² Hari, ita ese Salamo 119:​89-176 do ita stadilaia. Inai salamo ena kahana 11 dekenai be aonega herevadia momo herea idia noho! Ita do idia durua mauri hanaihanai ena dala dekenai ita raka noho totona.​—Mataio 7:​13, 14.

Dahaka Dainai Dirava Ena Hereva Ita Ura Henia be Namo?

3. Edena dala ai Salamo 119:​89, 90 ia hahedinaraia, Dirava ena hereva ita abidadama henia diba?

³ Iehova ena hereva ita ura henia neganai lauma dalanai ita gini goada diba. (Salamo 119:​89-96) Salamo torea tauna ia gwau: “Lohiabada e, oiemu hereva be do ia noho ela bona hanaihanai. Ia be guba dekenai ia gini goada noho. . . . Oi ese tanobada oi karaia, bona ia gini goada noho.” (Salamo 119:​89, 90) Dirava ena hereva​—“guba ena taravatudia”​—dainai guba gaudia idia heau namonamo bona tanobada be ena gabu korikori ai ia noho hanaihanai. (Iobu 38:​31-33; Salamo 104:5) Iehova ena uduna amo idia mai herevadia ita abidadama henia diba, badina Dirava ese ia gwauraia herevadia be iena ura hegeregerena ‘anina do idia havaraia momokani.’​—Isaia 55:​8-11.

4. Dirava ena hesiai taudia be hisihisi idia davaria neganai, ena hereva idia ura henia dainai dahaka namo idia davaria?

⁴ Bema salamo ia torea tauna be ‘Dirava ena taravatu ia moalelaia lasi, ena hisihisi ese ia hamasea momokani’ diba. (Salamo 119:92) Ia be idau bese taudia ese idia dagedage henia lasi, to taravatu idia makohia Israela taudia ese idia inai henia. (Levitiko 19:17) To unai dainai ia manoka lasi, ia be Dirava ena taravatu ia ura henia bona unai taravatu ese ia durua. Korinto dekenai, aposetolo Paulo be “aposetolo taudia namo herea,” bona reana “varavara koikoi taudia” ese idia gwauraia dika. (2 Korinto 11:​5, 12-14, 26) To, Paulo be lauma dalanai ia manoka lasi, badina Dirava ese ia gwauraia herevadia ia ura henia. Ita be Dirava ena Hereva, Baibel, ita ura henia bona ita badinaia dainai, iseda tadikaka ita lalokau henidia. (1 Ioane 3:15) Tanobada ena inai henia karana ese iseda Dirava ena hadibaia herevadia laloatao karana ia hadikaia lasi. To mai lalokau bona lalotamona ida iseda tadikaka danu Dirava ena ura ita karaia noho, bona ita moale badina Iehova do ita hesiai henia ela bona hanaihanai.​—Salamo 119:93.

5. Edena dala ai King Asa ese Iehova ia tahua?

⁵ Iehova ita badinaia karana be inai bamona ita gurigurilaia diba: “Lohiabada e, lau be oiemu, mani lau do oi hamauria, badina lau ese oiemu hadibaia hereva lau tahua namonamo vadaeni.” (Salamo 119:94) King Asa be Dirava ia tahua bona Iuda dekenai tomadiho momokani negea karana ia hadokoa. Asa ena lohia laganina 15 (963 B.C.E.) ai, hebou badana ta ia karaia bona Iuda dekenai idia noho taudia be ‘gwauhamata taravatuna idia karaia Dirava do idia tahua momokani’ totona. Vadaeni, Dirava “idia davaria” bona “Lohiabada ese idia dekenai maino ia henia edia tano kahana ibounai dekenai.” (2 Sivarai 15:​10-15) Unai haheitalai ese Keristani kongrigeisen amo idia hure oho taudia ia durua, Dirava idia tahua lou totona be namo. Dirava ese iena taunimanima idia bamoa lou taudia do ia hanamoa bona ia gimaia.

6. Dahaka kara ese lauma dalanai ita do ia gimaia?

⁶ Iehova ena hereva amo aonega ita abia bona lauma dalanai ita ia gimaia diba. (Salamo 119:​97-104) Dirava ena taravatu ese ita dekenai aonega ia henia, bona iseda inai taudia edia aonega ia hereaia. Iena hadibaia herevadia ita badinaia neganai ita laloparara ‘bona iseda aonega ese tau buruka edia aonega ia hereaia, badina Dirava ena oda hereva ita badinaia noho.’ (Salamo 119:​98-100) Bema Iehova ena hereva ‘ena mamina iseda uduna dekenai ese hani ena mamina ia hereaia,’ vadaeni ‘kara dikadia ibounai do ita ura henia lasi.’ (Salamo 119:​103, 104) Hari dina gabedia ai, unai ese lauma dalanai ita do ia gimaia, badina ita be heagi, hebogahisi lasi, bona Dirava idia dadaraia taudia huanai ita noho.​—2 Timoteo 3:​1-5.

Lamepa Bamona Iseda Dala Ia Hadiaria

7, 8. Salamo 119:105 ena hereva hegeregerena, dahaka ita karaia be namo?

⁷ Dirava ena hereva ese hanaihanai lauma dalanai diari ia halasia. (Salamo 119:​105-112) Herevana ita be horoa Keristani taudia eiava edia bamodia “mamoe idaudia” taudia, ita  gwau: “Lohiabada e, oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.” (Ioane 10:16; Salamo 119:105) Dirava ena hereva be lamepa bamona iseda raka dalana ia hadiaria, unai amo lauma dalanai ita hekwakwanai bona ita moru lasi. (Aonega Herevadia 6:23) To, namona be ita ta ta ese Iehova ena hereva ena diari ita abia dae iseda raka dalana ia hadiaria totona.

⁸ Salamo 119 ia torea tauna ena gini goada karana ita tohotohoa be namo. Ena lalona ia hadaia Dirava ena oda do ia rakatania lasi. Ia gwau: “Lau ese lau gwauhamata vadaeni, oiemu [Iehova ena] hadibaia hereva maoromaorona do lau badinaia, vadaeni inai gwauhamata do lau makohia lasi momokani.” (Salamo 119:106) Namona be Baibel ita stadilaia hanaihanai karana bona Keristani heboudia dekenai haere karana edia namo ita laloa bada.

9, 10. Edena bamona ita diba Iehova idia gwauhamata henia taudia ese Dirava ena ‘hadibaia hereva idia rakatania’ diba, bona edena bamona unai ita dadaraia diba?

⁹ Ena be salamo torea tauna ese ‘Dirava ena hadibaia hereva ia rakatania lasi,’ to Iehova ia gwauhamata henia tauna be unai ia karaia diba. (Salamo 119:110) Ena be King Solomona be Iehova dekenai gwauhamata idia karaia besena amo ia mai bona matamanai Dirava ena aonega hegeregerena ia kara, to gabeai Iehova ena hadibaia herevana ia rakatania. “Solomona ese kara dika dekenai ia moru, idau bese hahine taudia dainai,” badina idia ese ia idia veria dirava koikoidia ia tomadiho henia totona.​—Nehemia 13:26; 1 King Taudia 11:​1-6.

¹⁰ Satani be “hunia dekenai idia noho” tarapu dikadia momo ia atoa. (Salamo 91:3) Hegeregere, guna ita danu ia hebou tauna ese ita ia koia lauma diari gabuna do ita rakatania bona aposteit ena dibura dekenai ita vareai totona. Tuatira Keristani taudia huanai, hahine ta “ladana Iesebele,” reana hahine oreana ta, be ma haida idia hadibaia kaivakuku bona matabodaga karadia idia karaia totona. Iesu ese unai bamona kara dika ia inai henia hegeregerena, ita danu ita inai henia be namo. (Apokalupo 2:​18-22; Iuda 3, 4) Unai dainai Iehova ena heduru totona ita guriguri be namo, unai amo iena oda do ita rakatania lasi bona ena lauma diarina lalonai do ita noho.​—Salamo 119:​111, 112.

Dirava Ena Hereva ese Ita Ia Naria

11. Salamo 119:119 hegeregerena, Dirava ese kara dika taudia be edena bamona ia laloa?

¹¹ Bema Dirava ena taravatu ita rakatania lasi, Ia ese ita do ia naria. (Salamo 119:​113-120) Hari inai negai, Iesu ese siahu sisina sibona Keristani taudia ia abidia dae lasi hegeregerena, ita danu Dirava ena “murina dekenai idia raka koikoi taudia” ita ura henidia lasi. (Salamo 119:113; Apokalupo 3:16) Mai iseda kudouna ibounai ida Iehova ita hesiai henia dainai, ia ese ‘iseda mauri ia naria’ bona ita do ia hagoadaia. Mai koikoi ida ‘iena taravatu idia kamonai henia lasi taudia be Ia ese do ia negedia.’ (Salamo 119:​114, 117, 118; Aonega Herevadia 3:32) Ia laloa unai bamona taudia be “momoru sibona”​—hegeregere golo bona siliva idia hagoevaia neganai idia daekau miro hegeregerena. (Salamo 119:119; Aonega Herevadia 17:3) Namona be nega ibounai Dirava ena hadibaia hereva ita ura henidia, badina ita ura lasi momoru bamona  idia haboua kara dika taudia edia huanai ita noho bona dika do ita davaria!

12. Dahaka dainai Iehova gari henia karana be mai anina bada?

¹² Salamo torea tauna ia gwau: “Lohiabada e, oi garina lau gari noho.” (Salamo 119:120) Dala maorona ai Dirava ita gari henia karana anina be Ia inai henia gaudia do ita dadaraia, bona unai be mai anina bada bema ita ura Ia ese ita do ia naria. Iobu be mai hemataurai ida Iehova ia gari henia dainai mai kara maoromaoro ida ia noho. (Iobu 1:1; 23:15) Herevana dahaka hekwakwanai ita haheaukalaia noho, to Dirava gari henia karana ese ita do ia durua diba Dirava ena dala dekenai ita raka noho totona. To, ita haheauka totona mai abidadama ida do ita guriguri goadagoada be namo.​—Iamesi 5:15.

Mai Abidadama ida Ita Guriguri

13-15. (a) Dahaka dainai ita abia dae momokani iseda guriguri edia haere do ita abia? (b) Dahaka ia vara diba bema guriguri lalonai ita diba lasi dahaka do ita hereva? (c) Salamo 119:​121-128 amo oi hahedinaraia edena dala ai unai siri ese ita “gwauraia diba lasi” herevadia ia hahedinaraia?

¹³ Mai abidadama ida ita guriguri diba badina ita diba momokani Dirava ese ita dainai kara ta do ia karaia. (Salamo 119:​121-128) Salamo torea tauna hegeregerena, ita diba iseda guriguri ena haere do ita abia. Dahaka dainai? Badina Dirava ena oda hereva ‘ita lalokau henia bada, to golo ita ura henia sisina.’ Bona ita abia dae danu, ‘Dirava ena oda ibounai be maoro.’​—Salamo 119:​127, 128.

¹⁴ Iehova be iseda noinoi ia kamonai, badina mai abidadama ida ita guriguri bona danu iena oda hereva ita badinaia namonamo. (Salamo 65:2) To, edena bamona bema ita be hekwakwanai aukana ita davaria bona iseda guriguri lalonai ita diba lasi dahaka do ita hereva? Unai neganai “Lauma Helaga ese ita totona ia noinoi Dirava dekenai, mai taitai bada danu. Iena noinoi herevadia be taunimanima idia gwauraia diba lasi gaudia.” (Roma 8:​26, 27) Unai bamona negadia ai, Baibel lalonai idia torea herevadia be iseda guriguri bamona Dirava ese ia abia dae.

¹⁵ Baibel lalonai guriguri bona lalohadai momo idia noho bona idia be ita “gwauraia diba lasi” herevadia hegeregerena. Mani Salamo 119:​121-128 ita laloa. Unuseniai idia torea herevadia ese reana ita davaria hekwakwanai idia herevalaia. Hegeregere, bema tau ta ese ita ia koia bona ita amo gau ta ia henaoa, namona be salamo torea tauna ese Dirava ia guriguri henia dalanai do ita guriguri. (Siri 121-123) Reana ia auka abia hidi ta ita karaia totona. Namona be ita guriguri Iehova ena lauma helaga ese ita do ia durua Dirava ena hadibaia herevadia ita laloatao bona badinaia totona. (Siri 124, 125) Ena be ‘dala koikoi ibounai ita ura lasi momokani,’ to namona be Dirava ena heduru totona ita guriguri, unai amo iena taravatu ia utua hahetoho do ita dadaraia. (Siri 126-128) Bema dina ta ta ai Baibel ita duahia, bona ita guriguri neganai, unai bamona siri namodia do ita laloatao diba.

Iehova Ena Hadibaia Herevadia ese Ita Idia Durua

16, 17. (a) Dahaka dainai Dirava ena hadibaia hereva ita badinaia be namo, bona edena bamona ita laloa be namo? (b) Taunimanima ese edena dala ai ita idia laloa, to dahaka be mai anina bada?

¹⁶ Dirava ese iseda guriguri ia kamonai bona ita ia lalonamo henia totona, namona be iena hadibaia herevadia ita badinaia. (Salamo 119:​129-136) Ita be laloaboio momo taudia dainai, Iehova ena hadibaia hereva namodia ita kamonai lou be namo, unai amo iena hereva bona oda do ita  lalodiatao. Oibe, Dirava ena hereva lalonai lauma dalanai gau matamatana ta idia halasia neganai, unai diari ita moalelaia. (Salamo 119:​129, 130) Ena be ‘iseda matana ranu be sinavai ranu bamona ia diho,’ badina taunimanima momo ese iena taravatu idia utua, to ita moale danu badina Iehova ese ita ia lalonamo henia,‘ena vairana ena diari be ita dekenai ia henia.’​—Salamo 119:​135, 136; Numera 6:25.

¹⁷ Bema Dirava ena taravatu maorodia ita badinaia, ita diba ia ese ita do ia lalonamo henia noho. (Salamo 119:​137-144) Ita be Iehova ena hesiai taudia dainai, ita abia dae ia be mai ena maoro ita dekenai iena taravatu maorodia ia hahedinaraia bona ita badinaia be namo. (Salamo 119:138) Salamo torea tauna be Dirava ena taravatu ia badinaia, to dahaka dainai ia gwau: “Lau be anina lasi tauna, bona taunimanima ese lau idia hereva dika henia”? (Salamo 119:141) Ia be ena inai taudia ese ia idia lalodika henia karana ia herevalaia. Bema ita be kara maoromaoro dekenai ita gini auka, haida ese ita do idia laloa maragi. To, mai anina bada gauna be Iehova ese ita ia lalonamo henia, badina ita be iena kara maoromaoro taravatudia ita badinaia.

Noho Namo Bona Maino

18, 19. Dirava ena hadibaia herevadia ita badinaia neganai, dahaka ia vara?

¹⁸ Dirava ena hadibaia hereva ita badinaia neganai, Ia kahirakahira ita noho. (Salamo 119:​145-152) Iehova ena hadibaia hereva ita kamonai dainai, mai iseda kudouna ibounai ida ia dekenai ita guriguri diba bona ita diba do ia kamonai. Reana “daba rere do lasi neganai” ita toreisi bona heduru totona Ia ita noia. Unai be guriguri negana namona! (Salamo 119:​145-147) Iesu ia karaia hegeregerena, ita be kara dika ita dadaraia bona ita abia dae Dirava ena hereva be hereva momokani dainai, Dirava be ita kahirakahira ia noho danu. (Salamo 119:​150, 151; Ioane 17:17) Inai hekwakwanai amo ia honu tanobadana lalonai, Iehova ita tura henia namonamo karana ese ita ia gimaia, bona Aramagedono tuarina badana lalonai, ita do ia hamauria.​—Apokalupo 7:​9, 14; 16:​13-16.

¹⁹ Dirava ena hereva ita matauraia bada dainai, noho namo ita moalelaia. (Salamo 119:​153-160) Ita be kara dika taudia bamona lasi, ita be ‘Iehova ena taravatu badinaia karana amo ita raka siri  lasi.’ Ita be Dirava ena taravatu ita ura henia dainai, ita ia lalokau henia. (Salamo 119:​157-159) Iehova ena hadibaia herevadia ese iseda lalona ia hanogaia dainai, ita diba dahaka do ita karaia nega idauidau ai. To, Dirava ena oda herevadia be hakaua herevadia, bona ita abia dae iseda Havaraia Tauna be mai ena maoro ita ia hakaua totona. Ita diba Dirava ena “hereva ibounai edia anina be momokani,” bona ita sibona be iseda raka dalana ita biagua diba lasi dainai, mai moale ida Iena hakaua dalana ita badinaia.​—Salamo 119:160; Ieremia 10:23.

20. Dahaka dainai ita be “maino namo herea” ita davaria?

²⁰ Iehova ena taravatu ita ura henia dainai maino namo herea ita davaria. (Salamo 119:​161-168) Dagedage karadia ese ita dekenai “Dirava ena maino” do idia hadikaia diba lasi. (Filipi 4:​6, 7) Iehova ena kota maoromaoro karana ita laloa bada dainai, “dina ta ta lalonai, nega 7” Iehova ita hanamoa. (Salamo 119:​161-164) Salamo torea tauna ia gwau: “Lohiabada e, oiemu taravatu idia ura henia noho taudia ese, maino namo herea idia abia noho, bona gau ta ese do ia hamorudia diba lasi.” (Salamo 119:165) Bema ita ta ta be Iehova ena taravatu ita ura henia bona ita badinaia, tau ta eiava hekwakwanai ta ese lauma dalanai ita do ia hamanokaia lasi.

21. Edena siri ese idia hahedinaraia, kongrigeisen lalonai hekwakwanai idia vara neganai, namo lasi ita manoka?

²¹ Baibel ese ia sivarailaia taudia momo be hekwakwanai ta dainai nega daudau lalonai idia manoka lasi. Hegeregere, Keristani tauna Gaio be Diotrepe ena kara kerere dainai ia manoka lasi, to ‘hereva momokani ena dala dekenai ia raka noho.’ (3 Ioane 1-3, 9, 10) Reana Keristani hahine rua Euodia bona Sunutuke huanai hekwakwanai ta ia vara, unai dainai Paulo ese ia sisiba henidia idia “laloa tamona be namo.” Haida ese idia durudia edia hekwakwanai idia hamaoromaoroa, bona mai abidadama ida Iehova idia hesiai henia noho. (Filipi 4:​2, 3) Unai dainai, namo lasi kongrigeisen lalonai idia vara hekwakwanai haida dainai ita manoka. Ita diba Iehova be ‘iseda kara ibounai ia itaia noho,’ unai dainai namona be ita hekwarahi ena oda ita badinaia totona. (Salamo 119:168; Aonega Herevadia 15:3) Unai amo gau ta ese iseda “maino namo herea” do ia hadikaia lasi.

22. (a) Bema Dirava ita kamonai henia, dahaka hahenamo do ita moalelaia? (b) Keristani kongrigeisen amo idia raka boio taudia be edena bamona ita lalodia be maoro?

²² Bema nega ibounai Iehova ita kamonai henia, Ia do ita hanamoa noho. (Salamo 119:​169-176) Dirava ena taravatu hegeregeredia ai ita noho neganai, lauma dalanai do ita noho namo sibona lasi, to ‘Iehova do ita hanamoa noho.’ (Salamo 119:​169-171, 174) Inai nega dokona ai unai be hahenamo badana. Salamo torea tauna ia ura ia mauri bona Iehova do ia hanamoa noho, to ita diba lasi dalana ai, ia be ‘ia boio vadaeni mamoe bamona ia loaloa kava.’ (Salamo 119:​175, 176) Keristani kongrigeisen amo idia raka boio taudia haida be reana Dirava idia do lalokau henia noho bona idia ura Ia do idia hanamoa. Unai dainai, namona be ita ese idia ita durua, bena lauma dalanai noho namo do idia davaria bona Iehova idia hanamoa taudia ese idia davaria moalena do idia abia lou.​—Heberu 13:15; 1 Petero 5:​6, 7.

Iseda Dala Ena Noho Hanaihanai Diarina

23, 24. Salamo 119 amo dahaka namo oi abia?

²³ Salamo 119 be dala idauidau ai ita ia durua diba. Hegeregere, ita ia durua Dirava dekenai ita tabekau totona, badina ia hahedinaraia ‘Iehova ena taravatu hegeregerena idia raka noho taudia’ ese moale korikorina do idia davaria. (Salamo 119:1) Salamo torea tauna ese ita ia hadibaia ‘Dirava ena hereva ibounai edia anina be momokani.’ (Salamo 119:160) Unai ese ita ia durua Dirava ena Hereva ibounai ita ura henia karana ita habadaia totona. Namona be Salamo 119 ita laloa dobu karana ese ita ia veria Baibel ita  stadilaia namonamo totona. Salamo torea tauna be hanaihanai Dirava ia guriguri henia: “Oiemu taravatu lau dekenai do oi hadibaia.” (Salamo 119:​12, 68, 135) Bona danu ia noinoi, ia gwau: “Aonega bona lalona kehoa be lau dekenai do oi hadibaia.” (Salamo 119:66) Ita danu be unai bamona ita guriguri be namo.

²⁴ Dirava ena hahediba dalana ese ita ia durua Iehova ita tura henia totona. Salamo torea tauna be nega ibounai sibona ia gwauraia Dirava ena hesiai tauna. Iehova dekenai ia gwau: “Lau be oiemu.” (Salamo 119:​17, 65, 94, 122, 125; Roma 14:8) Ita be Iehova ena Witnes taudia bona Ia ita hanamoa be hahenamo ta! (Salamo 119:7) Oi be mai moale ida Dirava ena Basileia ena sivarai oi harorolaia noho, a? Bema oibe, namona be oi diba momokani, nega ibounai iena hereva oi abidadama henia bona oi abia dae oiemu dala do ia hadiaria neganai, Iehova ese oiemu gaukara do ia durua bona oi do ia hanamoa noho.

Edena Bamona Do Oi Haere?

• Dahaka dainai Dirava ena uduna amo idia mai herevadia ita ura henia be namo?

• Dirava ena uduna amo idia mai herevadia ese edena dala ai ita idia naria?

• Iehova ena hadibaia herevadia ese edena dala ai ita idia durua?

• Dahaka dainai Iehova ena taunimanima be noho namo bona maino dekenai idia noho?

[Study Questions]

[Picture on page 10]

Dirava ena hereva ese lauma dalanai diari ia halasia

[Picture on page 11]

Bema Iehova ena hadibaia hereva ita ura henia, ita be “momoru” bamona do ia laloa lasi

[Pictures on page 12]

Bema Baibel be dina ta ta ai ita duahia, ita guriguri neganai ita idia durua siridia do ita laloatao haraga