Israela Taudia Edia Kerere amo Gau ta Ita Dibaia

IEHOVA ia ura Israela taudia be Gwauhamata Tanona ai idia vareai neganai iena hahegani idia badinaia, bona Israela taudia be unai idia diba. Dirava be Mose amo inai hahegani ia henia: “Unai tano taudia ibounai do umui lulua lao. Idia edia nadi helaga gaudia bona auri dirava koikoi gaudia ibounai do umui negea, edia kaivakuku ibounai do umui gabua ore, bona edia tomadiho gabudia ibounai danu do umui hadikaia ore.”​​—Num. 33:52.

Israela taudia be Gwauhamata Tanona ai idia noho taudia ida maino gwauhamatana ta do idia karaia lasi eiava edia bese dekenai do idia headava lasi. (Deu. 7:​2, 3) Momokani, Dirava ese ena bese taudia ia hadibaia: “Do umui naria namonamo, do umui lao gabudia edia noho taudia danu do umui gwauhamata karaia lasi, hekwakwanai dekenai do umui moru garina.” (Eso. 34:12) To, Israela taudia be Dirava idia kamonai henia lasi dainai idia moru. Dahaka dainai idia moru? Unai sivarai amo dahaka ita dibaia?​​—1 Kor. 10:11.

Idau Bese Bamoa Bona Kaivakuku Tomadiho Henia Karana

Israela taudia be Gwauhamata Tanona ai idia noho taudia idia halusia murinai, unai tano idia abia. To, Israela taudia be Dirava ena hahegani ibounai idia badinaia lasi. Idia ese edia inai taudia idia lulua lasi. (Gun. 1:1–​2:​10) To, Israela taudia be “bese ibounai 7” edia taunimanima huanai idia noho, bona hanaihanai unai bese taudia idia bamoa. (Deu. 7:1) Unai dainai, Israela taudia dekenai dahaka ia vara? Baibel ia gwau: “Idia ese unai bese taudia edia natudia kekeni idia adavaia, bona edia natudia kekeni be unai bese edia uhau taudia dekenai idia henia, do idia adavaia totona. Ma Israela taudia ese danu unai bese taudia edia dirava edia hesiai gaukara idia karaia. Israela taudia ese Lohiabada, edia Dirava idia laloaboio, bona Dirava ena vairana dekenai idia kara dika. Bala bona Asera dirava koikoidia dekenai idia tomadiho.” (Gun. 3:​5-7) Israela taudia be unai bese taudia idia bamoa dainai, idia be unai bese taudia idia adavaia bona kaivakuku idia tomadiho henia. Unai bamona headava karana dainai, Israela taudia ese Gwauhamata Tanona dekenai kaivakuku idia tomadiho henia taudia idia lulua be ia auka. Israela taudia ese tomadiho momokanina idia hadikaia, badina dirava koikoidia edia hesiai gaukara idia karaia.

 Gwauhamata Tanona ai idia noho taudia be Israela taudia idia tuari henia bona hadikaia diba. To hari idia ese Israela taudia idia hadikaia dalana badana be inai: Israela taudia be idia bamodia dainai, idia ese Israela taudia edia lalohadai idia hakererea diba bona Dirava idia tomadiho henia lasi totona. Israela taudia edia tomadiho ia hadikaia gauna ma ta mani ita laloa.

Biru Gaukara Bona Bala Tomadiho Henia Karana

Israela taudia be Gwauhamata Tanona ai idia vareai neganai, gabu ma haida dekenai idia loaloa lasi to momo be biru taudia ai idia lao. Reana Israela taudia edia uma karaia dalana be guna Kanana ai idia noho taudia edia bamona. Toana be, Israela taudia be Kanana taudia edia kara ma haida idia tohotohoa danu. Israela taudia be Kanana taudia idia bamoa dainai, Kanana taudia ese uma idia karaia neganai idia karaia tomadiho karadia be Israela taudia ese idia abia dae danu.

Kanana taudia be Bala momo idia tomadiho henia, badina idia laloa unai dirava be uma ena aniani idia havaraia. Gabeai, Israela taudia be uma idia karaia bona uma anina idia abia neganai, idia be Kanana taudia ida idia haboua bona Kanana taudia edia dirava idauidau idia tomadiho henia, badina idia gwau unai dirava ese gau namodia momo idia henia. Israela taudia momo idia koikoi idia gwau idia be Iehova idia tomadiho henia, to lasi, idia be dirava koikoidia idia tomadiho henia.

Hadibaia Herevana ta ​—Ita Naria Namonamo Totona

Momokani, Israela taudia be Gwauhamata Tanona bona unai hanua taudia huanai idia noho neganai, reana idia laloa Bala dirava do idia tomadiho henia lasi bona kara dikadia do idia karaia lasi. To, Israela taudia ese unai taudia idia bamoa dainai, Bala idia tomadiho henia. Herevana ita bamoa taudia edia kara be namo, to bema idia be Iehova idia tomadiho henia lasi bona Iehova ena taravatu o hakaua herevadia idia badinaia lasi, ita be Israela taudia bamona ita moru diba, ani? Momokani, nega haida emu moni gaukara gabunai, sikuli gabunai, o emu noho gabunai taunimanima ida oi herevahereva be kerere lasi. To, Israela taudia edia sivarai ese ita ia hadibaia, bema unai bamona taudia ita bamoa momo, ita be dika do ita davaria. Baibel ena hereva be momokani: “Bema kara dika taudia danu umui turana karaia neganai, idia ese emui kara namona do idia hadikaia.”​​—1 Kor. 15:33.

Hari inai negai idia vara hahetoho momo be Israela taudia edia negai idia vara bamona. Taunimanima ese gau haida o tau ta (o hahine ta) be dirava ai idia halaoa. Unai dirava haida be inai: Moni, ladana bada ane abia taudia o TV ai idia hedinarai taudia, ladana bada spot gadara taudia, politikol karadia, ladana bada tomadiho gunalaia taudia haida, bona ruma bese taudia. Iseda mauri lalonai, idia be gau badadia ai idia lao diba. Bema Iehova idia lalokau henia lasi taudia ita bamoa, ita ese eda hetura karana Dirava ida ita hadikaia diba.

Bala dirava tomadiho henia karana lalonai idia karaia matabodaga karadia ese Israela taudia momo ia hamorua. Hari inai negai, Dirava ena taunimanima danu be unai bamona tarapu lalonai idia moru. Hegeregere, bema tadikaka (o taihu) ta be sibona ena ruma dekenai Internet o kompiuta ai ponografi (matabodaga laulaudia) ia itaia, unai ese ena lalomamina ia hadikaia diba. Internet o kompiuta ai ponografi itaia karana ese tadikaka (o taihu) ta ia hamorua be dika rohoroho!

“Lohiabada Ena Taravatu Hegeregerena Idia Noho Taudia, be Do Idia Moale Noho”

Iseda turana abia hidi karana dekenai Iehova ena hereva do ita badinaia eiava lasi be ita sibona ese do ita abia hidi. (Deu. 30:​19, 20) To, namona be sibona ita nanadaia: ‘Moale karadia dekenai, lau be daidia lau bamoa? Idia be Dirava ena taravatu idia laloa bada o lasi? Idia be Iehova idia tomadiho henia o lasi? Edia hebamo karana ese lau do idia durua tadikaka (o taihu) goadana ai lau lao totona, a?’

Salamo torea tauna ia gwau: “Mai edia kerere lasi dekenai idia noho taudia, bona Lohiabada ena taravatu hegeregerena idia noho taudia, be do idia moale noho. Dirava ena hadibaia hereva idia kamonai henia momokani taudia, bona mai edia kudouna ibounai Lohiabada idia tahua taudia, be do idia moale noho.” (Sal. 119:​1, 2) Momokani, “Lohiabada dekenai idia gari noho taudia ibounai be namo.” (Sal. 128:1) Iseda hebamo taudia ita abia hidi gwauraia neganai, namona be Israela taudia edia kerere amo gau ta ita dibaia, bona Iehova ita badinaia goadagoada be gau badana.​​—Aon. 13:20.

[Picture on page 26]

Iehova idia lalokau henia lasi taudia ita bamoa neganai, ita be dirava koikoidia ita tomadiho henia diba