“Anina Lasi” Gaudia Ita Dadaraia
“Anina Lasi” Gaudia Ita Dadaraia
“Anina lasi karadia dekenai, iena nega ia haorea tauna be kavakava.”—AON. 12:11.
1. Mai anina bada gaudia haida be dahaka, bona edena dala ai ita gaukaralaidia diba?
KERISTANI taudia ibounai be mai edia goada, diba, moni bona kohu—unai be mai anina bada gaudia. Ita be Iehova ita lalokau henia dainai, Baibel ena hereva hegeregerena, mai moale ida unai anina bada gaudia ita gaukaralaia Iehova ita hesiai henia totona.—Aon. 3:9.
2. Baibel ese anina lasi gaudia be edena bamona ia herevalaia? Aonega Herevadia 12:11 ena anina mani oi herevalaia.
2 Danu, Baibel be anina lasi gaudia ia herevalaia, bona ita ia hadibaia unai gaudia dekenai eda goada bona moni ita halusia kava lasi. Aonega Herevadia 12:11 ia gwau: “Iena tano ia gaukaralaia namonamo tauna, ese aniani momo do ia davaria, to anina lasi karadia dekenai, iena nega ia haorea tauna be kavakava.” Unai aonega herevana ena anina ita lalopararalaia diba. Bema ta be ena ruma bese ia naria totona moni gaukara dekenai ena nega bona goada ia henia, ia bona ena ruma bese be tauanina dalanai do idia hegeregere. (1 Tim. 5:8) To, bema anina lasi gaudia abia totona ena nega bona goada ia halusia kava, ia be “kavakava” tauna bona ia laloa namonamo lasi. Unai bamona tauna be tauanina dalanai do ia ogogami.
3. Edena dala ai eda tomadiho karana lalonai Aonega Herevadia 12:11 ena hereva be mai anina bada?
3 Iseda tomadiho karana lalonai, Aonega Herevadia 12:11 ena hereva be mai anina bada danu. Hegeregere, Iehova ia hesiai henia goadagoada abidadama Keristani tauna ena mauri do ia namo. Ia diba momokani hari bona vaira negana ai Dirava amo hahenamo bona hahemauri do ia abia. (Mat. 6:33; 1 Tim. 4:10) To, anina lasi gaudia ia tahua momo Keristani tauna ta be ena hetura karana Iehova ida ia hadikaia bona mauri hanaihanai ia haboioa diba. Unai ia vara lasi totona, dahaka ita karaia be namo? Namona be ita tahua iseda mauri lalonai edena gaudia be “anina lasi,” bona eda lalona ita hadaia unai gaudia ita dadaraia totona.—Tito 2:11, 12 duahia.
4. Anina lasi gaudia be dahaka?
4 Anina lasi gaudia be dahaka? Idia be Iehova ena hesiai gaukara idia hadikaia diba gaudia. Hegeregere, reana idia ta be moale karadia idauidau. Momokani, moale karadia be dika lasi. To, bema eda nega bada be moale karadia dekenai ita halusia kava dainai, Keristani hebou bona haroro gaukara totona be nega lasi, vadaeni unai moale karadia be anina lasi gaudia. (Had. 2:24; 4:6) Unai ia vara lasi totona, Keristani tauna ese iena nega ia gaukaralaia dalana ia laloa namonamo be namo. (Kolose 4:5 duahia.) Anina lasi gaudia ma haida be dika momokani, hegeregere dirava koikoidia.
Dirava Koikoidia Dadaraia
5. Heberu gado Baibel momo ai inai hereva “anina lasi” be edena bamona idia gaukaralaia?
5 Heberu gado Baibel momo ai dirava koikoidia idia gwauraia neganai, nega momo inai hereva “anina lasi” ia hedinarai danu. Hegeregere, Iehova ese Israela taudia ia hamaoroa: “Kaivakuku [“anina lasi diravadia,” NW ] do umui karaia lasi. Dirava ena laulauna nadi dekena amo do umui karaia lasi, tomadiho totona do umui haginia lasi. Du helagana, o nadi, ena toana namo dekenai do umui tomadiho henia lasi, emui tano ibounai lalonai. Lau be Lohiabada, emui Dirava.” (Lev. 26:1) King Davida ia gwau: “Lohiabada be mai ena ladana badana, inai ladana badana do ita abia isi noho be namo. Ita ese taunimanima edia dirava idauidau, be do ita gari henia lasi. Lohiabada sibona do ita gari henia, bona matauraia. Badina be tanobada bese idauidau edia dirava, be dirava koikoi gaudia sibona [“edia dirava be anina lasi,” NW ]. To Lohiabada ese guba bona guba dekenai noho gaudia ia karaia vadaeni.”—1 Siv. 16:25, 26.
6. Dahaka dainai dirava koikoidia be anina lasi?
6 Davida ena hereva hegeregerena, Iehova ena siahu idia hamomokania gaudia be momo herea. (Sal. 139:14; 148:1-10) Iehova ese Israela taudia be ena bese ai ia halaoa be hahenamo badana ta! To, idia ese Iehova idia rakatania bona kaivakuku idia tomadiho henia be kavakava karana! Dika ia vara neganai, unai bamona dirava be anina lasi, badina idia sibona o edia taunimanima idia hamauria diba lasi.—Gun. 10:14, 15; Isa. 46:5-7.
7, 8. Edena dala ai “kohu” o moni be dirava ta bamona ai ia lao diba?
7 Hari, tano momo ai, taunimanima be kaivakuku idia do tomadiho henia, to unai bamona dirava be anina lasi, guna hegeregerena. (1 Ioa. 5:21) Baibel be kaivakuku sibona ia gwauraia lasi, to dirava ai ita halaoa diba gaudia ma haida ia gwauraia danu. Hegeregere, Iesu ia gwau: “Tau ta ese biaguna rua edia hesiai gaukara ia karaia diba lasi. Badina be ta do ia badu henia, to ta be do ia lalokau henia, o ta be do ia abia dae, ma ta be do ia abia dae lasi. Dirava bona kohu momo danu nega tamona edia hesiai gaukara do oi karaia diba lasi.”—Mat. 6:24.
8 Edena dala ai “kohu” be dirava ta bamona ai ia lao diba? Idaunegai Israela ena tano dekenai ia noho nadi ta oi laloa. Ta be unai bamona nadi ia gaukaralaia, ruma ta o magu ia haginia totona. To danu, bema unai nadi be “du helagana” ai idia noho, unai ese Iehova ena taunimanima ia hahekwakwanaia diba. (Lev. 26:1) Unai hegeregerena, moni be heduru gauna. Moni amo mauri durua gaudia ita hoia, bona Iehova ena hesiai gaukara lalonai ita gaukaralaia diba. (Had. 7:12; Luka 16:9) To, bema moni ita atoa guna bona Dirava ena hesiai gaukara ita laloa maragi, vadaeni moni be dirava ta ai ita halaoa unai. (1 Timoteo 6:9, 10 duahia.) Inai tanobada taudia dekenai moni o kohu be mai anina bada dainai, ita naria namonamo bona lalohadai maorona ita abia be gau badana.—1 Tim. 6:17-19.
9, 10. (a) Keristani tauna ta ese edukeisen be edena bamona ia laloa? (b) Koledi o iunivesiti ena dika be dahaka?
9 Edukeisen danu be heduru gauna, to ia be anina lasi gauna ai ia lao diba. Ita ura iseda natudia be diba namona idia abia, unai amo gabeai edia mauri idia durua diba. Danu, gau badana be Keristani tauna ese diba namona ia abia, unai amo mai laloparara ida Baibel ia duahia diba, hekwakwanai idauidau ia laloa namonamo diba, abia hidi maorona ia karaia diba, bona Baibel ena hereva momokani ia hadibaia namonamo diba. Momokani, ena be edukeisen namona abia totona nega bada ita halusia diba, to edukeisen be mai ena namo.
10 To, koledi eiava iunivesiti dekenai ita lao be edena bamona? Momo idia gwau, unai sikuli dekenai idia lao taudia be mauri namona idia abia diba. To, unai sikuli dekenai idia lao taudia momo be hereva koikoidia ese edia lalohadai idia hadikaia. Matamata taudia momo ese edia nega be Iehova ena hesiai gaukara lalonai idia gaukaralaia lasi, to unai sikuli dekenai idia haorea kava. (Had. 12:1) Tano haida ai, momo be koledi o iunivesiti dekenai idia lao dainai, Dirava idia abidadama henia lasi. To, Keristani tauna ese Iehova ia abidadama henia be namo, bona tanobada ena sikuli badadia dekenai mauri namona davaria dalana ia tahua lasi.—Aon. 3:5.
Tauanina Ena Ura be Dirava ta ai Ita Halaoa Lasi
11, 12. Dahaka dainai Paulo ia gwau haida “edia dirava be edia tauanina ena ura”?
11 Paulo be Filipi taudia ia tore henia neganai, dirava ta ai ia lao diba gauna ma ta ia gwauraia. Paulo ese ena tadikaka haida ia herevalaia neganai, ia gwau: “Umui lau hamaoroa guna, bona hari, mai tai danu umui lau hamaoroa lou: Haida be idia raka kerere, idia ese Keriso ena mase satauro dekenai ena anina idia hadikaia noho. Edia dokona be hel dekenai, badina be edia dirava be edia tauanina ena ura . . . bona inai tanobada gaudia sibona idia laloa.” (Fili. 3:18, 19) Edena dala ai tauanina ena ura be dirava ta ai ia lao diba?
12 Toana be Paulo ena turana haida be tauanina ena ura gaudia idia laloa momo dainai, idia be Paulo idia bamoa lasi bona Iehova ena hesiai gaukara idia laloa maragi. Haida be idia aniani momo o inuinu momo. (Aon. 23:20, 21; Deuteronomi 21:18-21 hahegeregerea.) Ma haida be tanobada ena kara idauidau lalonai idia vareai momo dainai, Iehova ena hesiai gaukara idia rakatania. Namo lasi tanobada ena kara ese ita ia koua, to ita ura mai iseda lalona ibounai ida Iehova ita hesiai henia noho.—Kol. 3:23, 24.
13. (a) Mataganigani tauna ena ura be dahaka, bona Paulo be dahaka ia gwau? (b) Edena dala ai mataganigani karana ita dadaraia diba?
13 Siri ma ta dekenai, Paulo be dirava ta ai ia lao diba gauna ma ta ia gwauraia. Ia gwau: “Unai dainai tauanina ena ura kara, umui emui lalonai idia gaukara noho, be do umui hamasea. Gaudia be inai: Heudahanai, lebulebu, ura dikadia, matabodaga, bona kohu momo ura dikadika kara [“mataganigani,” BHğ]. Kohu momo ura dikadika kara [“mataganigani,” BHğ] be hegeregere kaivakuku tomadiho henia kara bamona. (Kol. 3:5) Mataganigani tauna ia ura dikadika gau ta ia abia, ena be unai gau be iena lasi. Hegeregere, ia ura dikadika kohu momo ia abia. Eiava ia ura dikadika ma ta ena adavana danu idia mahuta hebou. (Eso. 20:17) Unai bamona ura dikadia be kaivakuku tomadiho henia kara bamona. Iesu ese ia hahedinaraia, gau badana be ita hekwarahi unai bamona ura kereredia ita dadaraia totona.—Mareko 9:47 duahia; 1 Ioa. 2:16.
Anina Lasi Herevadia Dekenai Naria Namonamo
14, 15. (a) Edena “anina lasi” herevana dainai, Ieremia ena negai idia noho taudia momo ese dika idia davaria? (b) Dahaka dainai Mose ena hereva be mai anina bada?
14 Hereva haida be anina lasi gaudia danu. Hegeregere, Iehova be Ieremia dekenai ia gwau: “Peroveta taudia ese hereva koikoi idia gwauraia noho, lauegu ladana dekenai. Lau ese idia lau siaia lasi, bona oda o hereva ta lau henidia lasi. Edia nihi o mata hanai be lau dekena amo idia mai lasi. Unai edia peroveta herevadia be anina lasi, to idia sibodia idia laloa kava gaudia.” (Ier. 14:14) Ena be unai peroveta taudia koikoidia idia gwau Iehova ena ladana ai idia hereva, to lasi, idia be sibona edia lalohadai o aonega idia herevalaia. Unai dainai, idia edia hereva be “anina lasi.” Edia hereva koikoi dainai, Iehova ena taunimanima ese dika idia davaria. Lagani 607 B.C.E. ai, peroveta taudia koikoidia edia anina lasi herevadia idia badinaia taudia momo be Babulonia ena tuari taudia ese idia hamasea ore.
15 To, Mose be Israela taudia ia hamaoroa: “Hari dina dekenai umui lau hamaoroa herevadia ibounai do umui laloatao. . . . Badina be inai herevadia be gau maragina lasi umui dekenai. Lasi, idia be emui mauri. Idia do umui kamonai henia, vadaeni Ioridane Sinavai unai kahana dekenai do umui noholaia tano dekenai emui mauri dinadia do idia momo.” (Deu. 32:46, 47) Momokani, Dirava ena lauma helaga ena siahu amo Mose be unai hereva ia gwauraia. Unai dainai, idia be mai anina bada bona Israela besena be namo ia davaria diba. Mose ena hereva idia badinaia taudia be mauri bona namo idia abia. Nega ibounai anina lasi herevadia ita dadaraia bona hereva momokani, anina bada herevadia unai, ita abia dae be namo.
16. Bema saiens taudia be Baibel ena hereva idia hakoikoia, vadaeni dahaka ita laloa?
16 Hari inai negai, haida be anina lasi herevadia idia gwauraia, a? Oibe. Hegeregere, saiens taudia haida idia gwau evolusen herevana bona idia davaria gaudia ma haida ese idia hahedinaraia, gau ibounai be idia vara kava dainai Dirava ita abidadama henia be anina lasi. Unai bamona hekokoroku herevadia ita laloa momo be namo, a? Lasi vaitani! Taunimanima edia aonega be Dirava ena bamona lasi. (1 Kor. 2:6, 7) Ita diba taunimanima edia hadibaia herevadia be hanaihanai idia kerere, bema idia ese Dirava ena lalohadai idia hadibaia lasi. (Roma 3:4 duahia.) Herevana saiens taudia be gau namodia momo idia havaraia, to Baibel ese taunimanima edia aonega ia herevalaia dalana be ia momokani: “Inai tanobada ena aonega be kavakava, Dirava ena vairana dekenai.” Oibe, Dirava ena aonega hereadaena be taunimanima edia aonega ia hanaia.—1 Kor. 3:18-20.
17. Kerisendom ena dubu gunalaia taudia bona aposteit taudia edia hereva be edena bamona ita laloa be namo?
17 Kerisendom ena dubu gunalaia taudia momo be anina lasi herevadia idia gwauraia danu. Idia gwau idia be Dirava ena ladana ai idia hereva, to idia gwauraia herevadia momo be Baibel ena hereva hegeregerena lasi, bona edia hereva be anina lasi. Aposteit taudia danu be anina lasi herevadia idia gwauraia, bona idia gwau edia aonega be “hesiai tauna mai ena kamonai, bona mai ena kara maoromaoro” oreana ena aonega ia hanaia. (Mat. 24:45-47) To, aposteit taudia be sibona edia aonega amo idia hereva dainai, edia hereva be anina lasi bona idia kamonai taudia idia hakaua kerere diba. (Luka 17:1, 2) Idia ese ita idia hakaua kerere lasi totona, dahaka ita karaia be namo?
Anina Lasi Herevadia Ita Dadaraia Dalana
18. Edena dala ai 1 Ioane 4:1 ena sisiba ita badinaia diba?
18 Aposetolo burukana Ioane be sisiba namona ia henia. (1 Ioane 4:1 duahia.) Iena sisiba hegeregerena, hanaihanai haroro gaukara ai ita davaria taudia ita hagoadaia, idia dibaia gaudia do idia tahua namonamo, bona idia itaia idia be Baibel ena hereva hegeregerena o lasi. Ita danu ese unai bamona ita karaia be namo. Bema ta be hereva momokani, kongrigeisen, elda taudia, eiava eda tadikaka taihu ia gwauraia dika, iena hereva ita abia dae haraga lasi. To, ita sibona ita nanadaia: “Unai samania herevadia ia halasia tauna ena kara be Baibel ena hereva hegeregerena, eiava? Unai samania herevadia be Iehova ena gaukara ia durua, a? Unai hereva ese kongrigeisen lalonai maino ia havaraia, a?” Bema hereva ta be tadikaka oreana ia hagoadaia lasi to ia hadikaia, vadaeni unai hereva be anina lasi.—2 Kor. 13:10, 11.
19. Edena dala ai elda taudia be anina bada herevadia idia gwauraia diba?
19 Danu, gau badana be elda taudia idia naria namonamo. Idia ese sisiba idia henia neganai, anina lasi herevadia idia gwauraia lasi be namo. Gau badana be idia laloatao: Edia aonega be mai ena hetoana dainai, sibona edia diba dekenai sisiba idia henia lasi. Hanaihanai Baibel idia gaukaralaia be namo. Paulo be sisiba namona ia gwauraia: “Buka Helaga ai idia torea herevadia do umui badinaia.” (1 Kor. 4:6, BHğ) Elda taudia be Baibel ena hereva dekenai hereva ma haida idia atoa kau lasi. Danu, idia ese hesiai tauna mai ena kamonai bona mai ena kara maoromaoro oreana ese idia halasia buka o magasin dekenai hereva ma haida idia atoa kau lasi.
20. Dahaka ese ita ia durua anina lasi gaudia ita dadaraia totona?
20 Anina lasi gaudia—dirava koikoidia, anina lasi herevadia bona ma gau haida—be mai edia dika. Unai dainai, hanaihanai Iehova ita noia anina lasi gaudia ita lalopararalaia bona ita dadaraia totona. Unai bamona ita karaia neganai, ita be salamo torea tauna ena hereva ita gwauraia diba: “Mani lau do oi durua, lau ese anina lasi gaudia do lau tahua lasi, to oiemu dala dekenai lau raka dainai, egu mauri do oi hamatamataia.” (Sal. 119:37) Stadi gabena ai Iehova ena hakaua herevadia ita abia dae ena namo do ita herevalaia.
Anina Oi Gwauraia Diba, A?
• Edena “anina lasi” gaudia ita dadaraia be namo?
• Edena dala ai moni be dirava ta bamona ai ia lao diba?
• Edena dala ai tauanina ena ura be dirava ta ai ita halaoa lasi?
• Edena dala ai anina lasi herevadia ita dadaraia diba?
[Study Questions]
[Picture on page 3]
Dirava ena Hereva ese Israela taudia ia hagoadaia ‘edia tano idia gaukaralaia’ totona, bona anina lasi gaudia idia tahua lasi
[Picture on page 5]
Namo lasi kohu o moni ita laloa bada dainai, unai ese Iehova ita hesiai henia karana ia koua
[Picture on page 6]
Elda taudia be anina bada herevadia idia gwauraia diba