Kahirakahira Dirava Ena Basileia ese Hahemauri Do Ia Mailaia!
Kahirakahira Dirava Ena Basileia ese Hahemauri Do Ia Mailaia!
“Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—MAT. 6:10.
1. Iesu ese ia harorolaia hereva badana be dahaka?
IESU KERISO ena Ororo Harorona lalonai, guriguri dalana ia hadibaia bona unai guriguri be Iesu ese ia harorolaia hereva badana ia hahedinaraia. Iena murinai idia raka taudia ia hadibaia Dirava dekenai inai bamona do idia guriguri: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mat. 6:9-13) Baibel ia gwau Iesu be “hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia.” (Luka 8:1) Keriso ese iena murinai idia raka taudia ia hagoadaia: “Dirava ena Basileia bona iena kara maoromaoro do umui tahua guna.” (Mat. 6:33) Inai stadi herevana oi hegaegaelaia neganai, emu haroro gaukara lalonai do oi gaukaralaia diba daladia oi tahua. Hegeregere, edena dala ai inai henanadai do oi haerelaia: Basileia ena sivarai be mai anina bada, a? Dirava ese taunimanima be dahaka amo do ia hamauridia? Bona edena dala ai Dirava ena Basileia ese hahemauri do ia mailaia?
2. Basileia ena sivarai be mai anina bada, a?
2 Iesu ese inai peroveta herevana ia gwauraia: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mat. 24:14) Dirava ena Basileia ena sivarai namona be mai anina bada. Oibe, tanobada hegegemadai unai sivarai be mai anina bada momokani! Tanobada hegegemadai Iehova ena Witnes taudia edia kongrigeisen 100,000 mai kahana lalonai, Dirava ena hesiai taudia 7 milioni bamona be haroro gaukara badana idia karaia, bona ma haida idia hadibaia Dirava ena Basileia be ia gini vadaeni. Unai be sivarai namona badina Dirava ese guba dekenai gavamani ta ia haginia tanobada ia naria totona. Basileia ena lohia siahuna henunai, Iehova ena ura be tanobada ai do ia karaia, guba dekenai ia karaia bamona.
3, 4. Dirava ena ura be tanobada ai ia karaia neganai, dahaka do ia vara?
3 Tanobada dekenai Dirava be ena ura ia karaia neganai, taunimanima dekenai dahaka namo do ia mailaia? Paradaiso lalonai Iehova ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” (Apok. 21:4) Taunimanima be Adamu ena kara dika dainai, do idia gorere bona mase lasi. Dirava ese ia laloatao noho mase taudia be do idia toreisi lou bona dala ia kehoa mauri hanaihanai idia abia totona, badina Baibel ena gwauhamata be: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Tuari, gorere bona hitolo do idia ore bona tanobada be paradaiso ai do ia lao. Hari idia dagedage animal idauidau danu be taunimanima ida bona animal ma haida ida maino ai do idia noho.—Sal. 46:9; 72:16; Isa. 11:6-9; 33:24; Luka 23:43, NW.
4 Basileia ena lohia siahuna henunai unai bamona hahenamo namodia do idia vara dainai, Baibel ese unai nega ena mauri dalana be inai bamona ia herevalaia: “Manau taudia ese noho gabuna tano do idia abia, do idia helai namonamo, mai moale bona mai maino danu.” To, kara dika taudia be edena bamona? Baibel ia gwau: “Nega daudau lasi lalonai kara dika taudia do idia ore.” To, “Lohiabada idia abidadama henia taudia ese, edia tano dekenai do idia noho.”—Sal. 37:9-11.
5. Hari inai negai idia noho gavamani, tomadiho bona bisinesi idauidau dekenai dahaka do ia vara?
5 Unai hahenamo idauidau idia vara totona, Dirava ena guba gavamanina ese hari inai negai idia noho gavamani, tomadiho bona bisinesi idauidau do ia kokia. Lauma Helaga amo Daniela be inai peroveta herevana ia gwauraia: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” (Dan. 2:44) Aposetolo Petero ia gwau: “Guba matamata bona tanobada matamata” do idia vara bona “unai gabu dekenai be kara maoromaoro sibona do ia noho.” Dirava ena Basileia—guba gavamani matamatana unai—ese tanobada matamatana do ia lohiaia.—2 Pet. 3:13.
Hari ta ese Ita Ia Hamauria be Namo
6. Baibel ese inai tanobada ena dika be edena bamona ia gwauraia?
6 Satani, Adamu, bona Heva be sibona abia hidi idia karaia dahaka be maoro bona dahaka be kerere neganai, idia ese Dirava idia gwau-edeede henia bona unai amo taunimanima dekenai kara dika idia havaraia. Lagani 1,600 bamona murinai, abata ia do mai lasi neganai, taunimanima “edia kara dika be bada herea gabu ibounai dekenai, bona edia laloa be nega ibounai ia dika sibona mo.” (Gen. 6:5) Abata ia vara bena lagani 1,300 idia hanaia murinai, Solomona be dika bada ia itaia dainai inai ia torea: “Idia mase guna taudia edia noho be namo, idia edia noho ese do mauri noho taudia edia noho ia hereaia noho. To idia ruaosi, mase vadaeni, bona do mauri noho taudia edia noho idia hereaia noho taudia be idia do vara lasi taudia, ani? Badina be idia ese tanobada dekenai idia karaia noho kara dika idia itaia noho lasi.” (Had. 4:2, 3) Unai nega amo ema bona hari, lagani 3,000 idia hanaia vadaeni, bona kara dika be ia bada ia lao noho.
7. Dahaka dainai hari iseda nega ai Dirava ese ita ia hamauria be mai anina bada?
7 Momokani, ita gwau diba kara dika be guna amo ia noho gauna. To, hari iseda nega ai Dirava ena Basileia ese ita ia hamauria be mai anina bada. Badina idia hanaia lagani 100 lalonai, kara dika bada ia vara noho bona do ia dika momokani. Orea ta (Worldwatch Institute) ia gwau: “Lagani [1900-2000] huanai idia vara tuari, ese aposetolo edia nega ela bona lagani 1899 ai idia vara tuari lalonai idia mase taudia edia namba be nega toi ia hanaia.” Lagani 1914 amo, tuari dainai taunimanima 100 milioni mai kahana idia mase! Buka ta ia gwau, Tanobada Tuarina Iharuana lalonai kahirakahira taunimanima 60 milioni idia mase. Bese haida be niuklia tuari kohudia idia karaia dainai, idia be mai edia siahu taunimanima momo herea idia hamasea totona. Bona ena be saiens ena aonega ia bada bona muramura matamatadia idauidau idia karaia, to lagani ta ta lalonai natudia 5 milioni bamona be hitolo dainai idia mase.—Baibel be Dahaka Ia Hadibaia? bukana ena karoa 9 itaia.
8. Lagani tausen momo lalodiai taunimanima edia lohia dalana ese dahaka ia hamomokania?
8 Taunimanima be kara dika idia koua toho to idia kwalimu lasi. Tanobada ena gavamani, tomadiho bona bisinesi oreadia be hegeregere lasi maino bona noho namo idia havaraia bona gorere idia haorea totona. To, idia ese taunimanima edia hisihisi idia habadaia sibona. Lagani tausen lalodiai taunimanima idia lohia vadaeni, bona inai siri idia hamomokania: “Taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ier. 10:23) Oibe, “taunimanima haida ese ma haida idia biagua noho, bona idia hisihisi henidia noho.” (Had. 8:9) Danu, “Dirava ese ia karaia gaudia iboudiai be idia taitai hebou noho bona idia hisihisi hebou noho ema bona hari.”—Roma 8:22, NW.
9. Keristani momokani taudia idia diba “nega ena dokona dekenai” dahaka gaudia do idia vara?
9 Baibel be iseda nega ia perovetalaia, ia gwau: “Nega ena dokona dekenai, metau dikadia momo do idia vara.” Paulo ese nega dokona ai taunimanima edia lohia henunai do idia vara gaudia ia herevalaia murinai, inai peroveta herevana ia gwauraia: “Kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:1-5, 13 duahia.) Keristani taudia idia diba unai do ia vara, badina “Satani ese tanobada taudia ibounai ia gunalaia noho.” (1 Ioa. 5:19) To, sivarai namona be: Kahirakahira, Dirava ese inai tanobada dikana amo Ia idia lalokau henia taudia do ia hamauria.
Hahemauri Tauna Tamona
10. Dahaka dainai Iehova sibona be iseda Hahemauri Tauna tamona?
10 Sivarai namona oi harorolaia neganai, oi hahedinaraia Iehova sibona be iseda Hahemauri Tauna Tamona. Iena siahu be bada bona ia ura iena taunimanima be dika amo do ia hamauridia. (Kara 4:24, 31; Apok. 4: 11) Ita diba momokani Iehova be iena taunimanima do ia hamauria bona Iena ura do ia hagugurua, badina ia gwauhamata: “Lau ese lau palania gauna, be momokani do ia vara.” Oibe, ia “gwauraia hereva, be anina do ia havaraia, bona [ia] dekenai do ia giroa kava lasi.”—Isaia 14:24, 25; 55:10, 11 duahia.
11, 12. Dirava be iena hesiai taudia dekenai dahaka gwauhamata ia henia?
11 Iehova ia gwau iena hesiai taudia do ia hamauria, to kara dika taudia do ia hahemaoro henidia. Dirava ese Ieremia ia siaia kara dika taudia ia haroro henidia gwauraia neganai, Dirava ese Ieremia ia hamaoroa: “Oi gari lasi.” Dahaka dainai do ia gari lasi? Dirava ena haere be: “Badina lau be oi dekenai do lau noho, bona lau ese oi do lau naria.” (Ier. 1:8) Unai hegeregerena, Iehova ese Sodoma bona Gomora ia hadikaia gwauraia neganai, iena aneru rua ia siaia Lota bona ena ruma bese be unai gabu amo idia hamauria totona. Bena “Lohiabada ese salipa nadi mai lahi bada danu guba dekena amo ia negea diho, Sodoma bona Gomora edia latanai.”—Gen. 19:15, 24, 25.
12 Iehova ese tanobada hegegemadai iena ura idia karaia taudia ia hamauria diba. Gunaguna, tanobada dikana ia hadikaia neganai, “Noa, kara maoromaoro ia harorolaia tauna, bona taunimanima 7” ia hamauridia. (2 Pet. 2:5) Iehova ese inai tanobada dikana do ia hadikaia ore neganai, kara maoromaoro taudia do ia hamauria. Baibel ena sisiba be: “Umui manau taudia ibounai e, . . . Lohiabada do umui tahua mai noinoi danu. Kara maoromaoro do umui karaia, bona Lohiabada ena vairanai do umui manau. Unai neganai sedira iena badu dinana dekenai, Lohiabada ese umui do ia naria.” (Sep. 2:3) Iena hahemaoro karana be tanobada hegegemadai do ia karaia dainai, ‘kara maoromaoro taudia be inai tano dekenai do idia mauri noho, to kara dika taudia be tano dekena amo, Dirava ese do ia abidia siri.’—Aon. 2:21, 22.
13. Idia mase vadaeni Iehova ena hesiai taudia be edena dala ai hahemauri do idia abia?
13 To, Dirava ena hesiai taudia momo be gorere, dagedage eiava ma gau haida dainai idia mase vadaeni. (Mat. 24:9) Unai bamona taudia be edena dala ai hahemauri do idia davaria? Guna ita herevalaia hegeregerena, ‘kara maoromaoro taudia dohore idia toreisi lou.’ (Kara 24:15) Ita diba gau ta ese Iehova do ia koua lasi iena hesiai taudia ia hamauria totona, unai ese ita ia hagoadaia bada!
Kara Maoromaoro Gavamanina
14. Dahaka dainai ita abia dae momokani Dirava ena Basileia be kara maoromaoro gavamanina?
14 Emu haroro gaukara lalonai taunimanima oi hadibaia, Iehova ena guba Basileiana be kara maoromaoro gavamanina ta. Badina unai gavamani ese Dirava ena kara namodia hegeregere hahemaoro maoromaoro, kara maoromaoro bona lalokau ia hahedinaraia. (Deu. 32: 4; 1 Ioa. 4:8) Dirava ese Iesu Keriso dekenai Basileia ia henia, badina ia be hegeregere momokani tanobada ia lohiaia totona. Danu, Iehova ese 144,000 taudia be tanobada amo ia abia hidi, bona idia be guba dekenai Keriso ida do idia lohia bona tanobada do idia naria.—Apok. 14:1-5.
15. Dirava ena Basileia bona taunimanima edia lohia dalana edia idau mani oi gwauraia.
15 Iesu bona 144,000 taudia edia lohia dalana be goevadae lasi taudia edia lohia dalana amo do ia idau vaitani! Inai tanobada ena gavamani idauidau be idia dagedage bona edia taunimanima be tuari dekenai idia siaia dainai, milioni momo idia mase vadaeni. Unai dainai, Baibel ese ita ia sisiba henia king taudia do ita abidadama henia lasi, “badina taunimanima ese [ita] do idia hamauria diba lasi”! (Sal. 146:3) To, Keriso be lalokau dalanai do ia lohia! Ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”—Mat. 11:28-30.
Nega Dokona be Kahirakahira Do Ia Ore!
16. Inai “tanobada dokona” ena nega be edena bamona do ia ore?
16 Lagani 1914 ema bona hari, ita be “tanobada dokona” ena nega ai ita noho. (Mat. 24:3) Kahirakahira, Iesu ese ia gwauraia “hisihisi bada herea” do ia vara. (Mataio 24:21 duahia.) Unai hisihisi badana lalonai Satani ena tanobada ibounai do ia ore vaitani. Hisihisi badana be edena bamona do ia matamaia? Bona ena dokona be edena bamona?
17. Dahaka ese hisihisi badana do ia hamatamaia?
17 Unai hisihisi badana be karaharaga do ia vara. Oibe, ita laloa lasi dinana ai do ia vara, “inai bamona hereva, ‘maino bona gari lasi ita noho inai’ be taunimanima idia gwauraia noho neganai,” “Lohiabada ena dina” do ia ginidae. (1 Tesalonika 5:2, 3 duahia.) Tanobada besedia do idia laloa idia ese edia hekwakwanai badadia idia hamaoromaoroa vadaeni neganai, hisihisi badana do ia matamaia, unai nega ai “Babulonia Badana,” tanobada ena tomadiho koikoi ibounai do ia moru. Tanobada besedia be do idia hoa bada.—Apok. 17:1-6, 18; 18:9, 10, 15, 16, 19.
18. Satani ia ura Iehova ena taunimanima ia dagedage henia neganai, Iehova be dahaka do ia karaia?
18 Guba ai “dina, hua, hisiu dekenai toa do idia vara” bona “Taunimanima ena Natuna ena toana guba dekenai do ia hedinarai.” Bena, ita ese ‘eda kwarana do ita abia isi, badina be iseda hamauria be ia kahirakahira vadaeni.’ (Luka 21:25-28; Mat. 24:29, 30) Satani eiava Goga ese iena taunimanima do ia siaia Dirava ena taunimanima do idia tuari henia totona. To, Iehova ese iena abidadama taudia idia ura tuari henia taudia be inai bamona ia gwauraidia: “Umui ia daua toho tauna ese egu matana nadinadina ia daua toho.” (Sek. 2:8, NW ) Oibe, Satani ese idia do ia hadikaia diba lasi. Dahaka dainai? Badina Lohiabada Iehova ese karaharaga iena hesiai taudia do ia hamauridia.—Ese. 38:9, 18.
19. Dahaka dainai ita abia dae momokani, Dirava ena tuari oreana ese Satani, ena demoni bona ena tanobada dikana do ia hadikaia momokani?
19 Dirava ese tanobada besedia ia hadikaia neganai, ‘do idia diba namonamo, ia sibona be Iehova.’ (Ese. 36:23) Iena tuari oreadia—Keriso Iesu ese do ia gunalaia aneru milioni milioni momo—ese Satani ena tanobada oreadia do idia hadikaia momokani. (Apok. 19:11-19) Guna aneru tamona sibona ese Dirava ena inai “taudia 185,000 ia alaia mase.” Unai ita laloatao neganai, iseda abidadama ia hagoadaia bona ita diba momokani Aramagedono ai guba tuari oreana ese Satani ena tanobada dikana ena kahana ibounai do ia hadikaia ore. (2 Kin. 19:35; Apok. 16:14, 16) Satani bona ena demoni be lagani 1,000 lalonai guri dobu masemase lalonai do idia koudia, bena gabeai do idia hamasedia ore.—Apok. 20:1-3.
20. Iehova ese ena Basileia amo dahaka do ia karaia?
20 Tanobada amo kara dika taudia be do idia kokia bona kara maoromaoro taudia sibona be tanobada do idia noholaia ela bona hanaihanai. Oibe, Iehova do ia hamomokania ia be Hahemauri Tauna Badana. (Sal. 145:20) Basileia amo Dirava ese do ia hamomokania iena lohia siahuna be maoro, iena ladana do ia hahelagaia bona iena ura tanobada dekenai do ia hagugurua. Mai moale ida inai sivarai namona oi harorolaia bona “mauri hanaihanai idia ura kudou-maoro taudia” oi durua bena do idia laloparara Dirava ena Basileia ese ita do ia hamauria negana be ia kahirakahira momokani!—Kara 13:48, NW.
Oi Laloatao, A?
• Iesu be edena dala ai ia hahedinaraia Basileia be mai anina bada?
• Dahaka dainai hari iseda nega ai Dirava ese ita ia hamauria be namo?
• Hisihisi badana lalonai dahaka gaudia do idia vara?
• Iehova be edena dala ai ia hamomokania Ia be Hahemauri Tauna Badana?
[Study Questions]
[Pictures on page 12, 13]
Baibel ia hahedinaraia iseda nega lalonai tanobada hegegemadai haroro gaukara be do ia bada
[Picture on page 15]
Iehova ese Noa bona ena famili ia hamauria hegeregerena, Ia ese ita do ia hamauria
[Picture on page 16]
Iehova ese “matana ranu ibounai edia matana dekena amo do ia dahua. Mase . . . be do ia ore momokani.”—Apok. 21:4