Duahia Taudia Edia Henanadai

Aposetolo Paulo ia gwau, Dirava ese “Israela ibounai do ia hamauria.” (Roma 11:26) Iena hereva ena anina be nega ta Iuda taudia ibounai be Keristani taudia ai do idia lao, a?

Lasi, Paulo be unai bamona ia hereva lasi. Aberahamo ena tubudia, Israela besena unai, idia abia dae lasi Iesu be Mesia. Iesu ia mase murinai, ia hedinarai goevagoeva Iuda taudia ibounai be Keristani taudia ai do idia lao lasi. To, Paulo ena hereva Dirava ese “Israela ibounai do ia hamauria” be momokani. Edena dala ai?

Iesu be iena negai idia noho Iuda tomadiho gunalaia taudia dekenai ia gwau: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” (Mat. 21:43) Israela besena be Iesu idia dadaraia dainai, Iehova ese bese matamata ta, iena lauma helaga amo ia horoa taudia ia abia hidi. Paulo ese unai bese ia gwauraia “Dirava ena Israela.”​​—⁠Gal. 6:​16.

Keristani Greek Revarevadia ena siri haida ese idia hamomokania, “Dirava ena Israela” be 144,000, lauma helaga amo ia horoa Keristani taudia. (Roma 8:​15-​17; Apok. 7:⁠4) Apokalupo 5:​9, 10, ese ia hamomokania inai orea lalonai Iuda lasi taudia danu idia noho, badina ia gwau horoa Keristani taudia be “bese ibounai, gado ibounai, hanua ibounai, bona kopina idauidau taudia ibounai.” Dirava ese ena lauma helaga amo ia horoa lauma Israela taudia be ‘Basileia ta bona Dirava ena hahelagaia taudia bona idia ese tanobada do idia gunalaia.’ Ena be Iehova ese Israela besena ia dadaraia, to idia ta ta be Dirava vairanai ladana namona idia abia diba. Aposetolo taudia bona Keristani taudia ginigunadia haida be unai bamona. Oibe, taunimanima ibounai hegeregerena, Iuda taudia danu be Iesu Keriso ena rarana amo ia hoidia.​​—⁠1 Tim. 2:​5, 6; Heb. 2:9; 1 Pet. 1:​17-​19.

Aposetolo edia negai, Iuda taudia be Iesu ida do idia lohia hebou ena hahenamo idia haboioa to unai ese Dirava ena palani ia haidaua lasi. Unai do ia haidaua diba lasi, badina Iehova be Isaia amo ia gwau: “Lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”​​—⁠Isa. 55:⁠11.

Inai hereva be momokani: Dirava ena ura be 144,000 taudia be iena Natuna ida guba dekenai do idia lohia. Baibel ese ia hahedinaraia goevagoeva Dirava be 144,000 taudia ia abia hidi, ta do ia boio lasi!​​—⁠Apok. 14:​1-5.

Unai dainai, Paulo be inai hereva, Dirava ese “Israela ibounai do ia hamauria” ia gwauraia neganai, Iuda taudia ibounai be Keristani taudia ai do idia lao ia herevalaia lasi. To, ia gwau Dirava ena ura be lauma Israela 144,000 taudia unai, be Iena Natuna, Iesu Keriso ida guba dekenai do idia lohia hebou. Dirava ese idia ia abia hidi neganai​​—⁠“Israela taudia ibounai”​​—⁠144, 000 taudia unai, be Dirava ese do ia hamauridia bona Mesia Basileia lalonai king bona hahelaga taudia edia gaukara do idia karaia.​​—⁠Efe. 2:⁠8.

[Pictures on page 28]

Horoa taudia be “bese ibounai, gado ibounai, hanua ibounai, bona kopina idauidau taudia ibounai”