Iesu be Hel Ia Herevalaia, A?
Iesu be Hel Ia Herevalaia, A?
HEL lahina ena hahediba herevana idia abia dae taudia idia gwau Iesu ena hereva Mareko 9:48 (o Mark karoa 9 siri 44, 46) ai be hel lahina ia herevalaia. Ia be mase diba lasi gaigai maragidia (o biluga) bona ia bodo lasi lahina ia herevalaia. Bema ta be oi dekenai Mareko 9:48 ia henanadailaia, edena bamona ia oi haere henia diba?
Reana unai henanadai ia gwauraia tauna be Mark karoa 9 siri 44, 46, o Mark karoa 9 siri 48 ia duahia, badina Baibel haida ai Mark karoa 9 siri 44, 46, o 48 be idia hegeregere. * New World Translation Baibel be inai bamona ia gwau: “Bona bema emu matana ese oi ia hahekwakwanaia, kokia. Do ia namo bema matana tamona sibona Dirava ena basileia lalonai oi vareai, to namo lasi matana rua ida Gehena dekenai oi idia negea. Unuseniai gaigai maragi idia mase diba lasi bona lahi be ia bodo diba lasi.”—Mar. 9:47, 48.
Unai dainai, haida idia laloa Iesu ena hereva ena anina be kara dika tauna be ia mase murinai ena souli be hisihisi hanaihanai gabuna dekenai ia lao. Hegeregere, University of Navarre ena Spanish gado Baibel ta (Sagrada Biblia) ia gwau: “Lohiabada ese ia gwauraia herevadia be hel lahina ena hisihisi ia gwauraia. Idia “mase lasi” biluga be hel lahina dekenai idia lao taudia edia lalohisihisi ia laulaulaia; bona “ia bodo lasi” lahi be kara dika tauna ese ia abia panisi ena hisihisi ia laulaulaia.”
To, mani Iesu ena hereva be Isaia 66:24 ena peroveta herevana ida ita hahegeregerea. * Ia hedinarai goevagoeva Iesu be Isaia karoa 66 ena hereva ia gwauraia, ani? Buka ta (The Jerome Biblical Commentary) ia gwau, peroveta tauna Isaia be “Ierusalema murimurinai ia noho Hinoma Kourana (Gehena) ia herevalaia. Unuseniai taunimanima idia bouboulaia bona unai hanua ena momoru idia negea gabuna.” (Ier. 7:31) Isaia 66:24 ese ia hahedinaraia unai be taunimanima idia hahisia gabuna lasi, to ia be taunimanima edia mase tauanidia ia herevalaia. Idia mase diba lasi gaudia be gaigai maragidia to mauri taudia ia herevalaia lasi. Vadaeni, Iesu ena hereva ena anina be dahaka?
Katolik bukana ta (El evangelio de Marcos. Análisis lingüístico y comentario exegético, Volume II) ese Mareko 9:48 be inai bamona ia herevalaia, “Unai hereva be Isaia (66:24) amo idia abia. Unai siri lalonai peroveta tauna Isaia ese mase tauanidia hadikaia ore daladia rua ia herevalaia: Ta be do ia bodaga bona ma ta be do idia gabua . . . “biluga” bona “lahi” idia gaukaralaia hebou ese ia hahedinaraia idia hadikaia gauna be ia ore vaitani. . . . Biluga idia (“mase lasi”) bona lahi (“ia bodo lasi”) ese gau ta idia hadikaia neganai, do ia ore vaitani: Idia amo heau mauri dalana be lasi. Unai siri lalonai idia mauri noho gaudia be taunimanima lasi to biluga bona lahi sibona—bona idia ese gau ibounai idia hadikaia ore. Unai dainai, unai siri be hisihisi ania hanaihanai karana lasi, to hadikaia ore vaitani karana—toreisi lou lasi ena mase unai—ia herevalaia. [Lahi] be gau ta ia hadikaia ore vaitani karana ia laulaulaia.”
Momo idia diba Dirava momokanina be lalokau bona ena kara be maoromaoro, unai dainai Iesu ena hereva idia lalopararalaia. Ia gwau lasi kara dika taudia be do idia hisihisi ela bona hanaihanai. To, Iesu ena hereva ena anina be kara dika taudia idia mase neganai, reana idia toreisi lou diba lasi.
[Footnotes]
^ par. 3 Baibel ena toretore maorodia lalonai Mark karoa 9 siri 44 bona 46 be lasi. Diba bada taudia haida idia gwau unai siri rua be gabeai idia torea. Profesa Archibald T. Robertson ia gwau: “Baibel toretore gunadia bona maorodia lalonai unai siri rua idia noho lasi. Unai siri rua be Western bona Syrian (Byzantine) Baibel toretoredia lalonai idia atoa. Unai siri rua edia hereva be Mark karoa 9 siri 48 ena hereva ida ia hegeregere. Unai dainai ai ese Mark karoa 9 siri 44 bona 46 be emai Baibel lalonai ai torea lasi badina idia be maoro lasi.”
^ par. 5 “Unuseni dekena amo idia raka lao neganai, idia ese lau dekenai idia dagedage henia taudia edia mase tauanidia do idia itaia. Badina be biluga be do idia mase lasi, bona unai tauanidia ia gabua noho lahi be do ia bodo lasi. Bona taunimanima ibounai ese do idia itadia neganai, mai badu danu do idia lalodia.”—Isa. 66:24.