Inai Kara Namodia Do Ita Tahua

“Kara maoromaoro, Dirava badinaia kara, abidadama, lalokau, haheauka, laloa manau, inai gaudia do oi tahua be namo.”​​—⁠1 TIM. 6:​11.

1. Taunimanima be dahaka gaudia idia tahua momo?

HARI inai negai, taunimanima be edia mauri lalonai dahaka gaudia idia tahua momo? Baibel ia hahedinaraia hegeregerena, momo be “anina lasi” gaudia idia tahua noho. Haida be anina lasi karadia hegeregere “kohu momo” idia tahua badina idia laloa unai kara ese moale do ia havaraia. (1 Tim. 6:⁠9) Haida be moale karadia idia ura henia bada. (2 Tim. 3:⁠4) Ena be taunimanima idia hekwarahi bada unai gaudia idia tahua totona, to unai be “lai do idia lulua kava hegeregerena.”​​—⁠Had. 1:⁠14.

2. (a) Dirava ese Keristani taudia haida ia boiria dahaka idia tahua totona? (b) Keristani taudia momo dekenai Iehova be dahaka helaro ia henia?

² To, aposetolo Paulo be Keristani taudia ia hagoadaia mai anina bada karadia idia tahua totona, badina ia gwau: “Heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.” (Fili. 3:​14) Baibel ia hahedinaraia, horoa taudia 144,000​​—⁠Paulo danu​​—⁠be unai guba ahuna do idia abia.  Idia be Iesu Keriso ida Lagani 1,000 Lohia Negana ai tanobada do idia lohiaia. Dirava ese idia ia boiria unai ahuna namona do idia tahua totona! To, hari idia noho Keristani taudia momokanidia edia helaro eiava tahua gauna be idau. Iehova be mai lalokau ida idia dekenai Adamu bona Heva ese idia haboioa gauna do ia henia, unai be tanobada ai gorere lasi maurina do idia noholaia ela bona hanaihanai.​​—⁠Apok. 7:​4, 9; 21:​1-4.

3. Edena dala ai ita hahedinaraia diba Dirava ena hebogahisi karana ita laloa bada?

³ Ena be goevadae lasi taudia idia hekwarahi kara namodia idia karaia mauri hanaihanai idia abia totona, to unai be hegeregere lasi. (Isa. 64:⁠6) Mauri hanaihanai abia dalana tamona be, Dirava ese Iesu Keriso amo ia karaia mauri davalaia boubouna do idia abidadama henia. Edena dala ai ita hahedinaraia diba Dirava ena hebogahisi ita laloa bada? Dala ta be inai hahegani do ita badinaia: “Kara maoromaoro, Dirava badinaia kara, abidadama, lalokau, haheauka, laloa manau, inai gaudia do oi tahua be namo.” * (1 Tim. 6:​11) Unai kara namodia do ita herevalaia bena unai ese ita ta ta do ia hagoadaia unai kara namodia be iseda mauri lalonai ita “habadaia” noho totona.​​—⁠1 Tes. 4:⁠1.

“Kara Maoromaoro . . . Tahua”

4. Dahaka dainai kara maoromaoro ita tahua be mai anina bada, bona ta be kara maoromaoro ia tahua totona dahaka ia karaia be namo?

⁴ Aposetolo Paulo ese Timoteo dekenai revareva rua ia torea bona ia sisiba henia kara namodia do ia tahua. Unai revareva rua lalonai Paulo be “kara maoromaoro” ia torea guna. (1 Tim. 6:​11; 2 Tim. 2:​22) Danu, Baibel ena siri momo ese ita idia hagoadaia kara maoromaoro do ita tahua totona. (Aon. 15:9; 21:21; Isa. 51:⁠1) Unai ita karaia totona gau ginigunana be, ‘Dirava momokani tamona do ita diba bona Iesu Keriso, ia ese ia siaia tauna danu do ita diba.’ (Ioa. 17:⁠3) Ta be kara maoromaoro ia tahua neganai, unai ese do ia durua ena kara dika gunadia amo do ia helalo-kerehai bona ‘ena lalona ia giroa,’ unai amo Dirava ena ura do ia karaia.​​—⁠Kara 3:​19.

5. Bema ita ura Dirava vairanai ita be kara maoromaoro taudia, dahaka ita karaia be namo?

⁵ Mai momokani ida kara maoromaoro idia tahua taudia milioni momo be Iehova dekenai edia mauri idia gwauhamatalaia vadaeni bona ranu bapatiso amo unai idia hamomokania. Bema oi bapatiso vadaeni, emu mauri lalonai kara maoromaoro oi badinaia noho karana oi lalohadailaia vadaeni, a? Eiava, hari emu mauri dalana amo oi hahedinaraia oi be kara maoromaoro oi badinaia noho, a? Unai oi karaia dalana ta be: Baibel amo oi dibaia dahaka be “maoro bona kerere” bona emu mauri lalonai oi ura abia hidi ta oi karaia neganai, Baibel ena hakaua dalana oi badinaia. (Heberu 5:​14 duahia.) Hegeregere, bema oi be bapatiso vadaeni mero o kekeni ta bona oiemu mauri lagani be ia hegeregere headava totona, emu lalona oi hadaia vadaeni ia bapatiso lasi mero o kekeni do oi tura henia lasi, a? Bema emu lalona be unai bamona oi hadaia vadaeni, oi be kara maoromaoro oi tahua noho.​​—⁠1 Kor. 7:​39.

6. Mai momokani ida kara maoromaoro ita tahua anina be dahaka?

 ⁶ Kara maoromaoro tauna be ia “kara maoromaoro auka herea lasi” bona ia laloa lasi iena kara maoromaoro be haida edia ia hereaia. (Had. 7:​16) Iesu ia gwau namo lasi taunimanima ese ita idia itaia totona, unai bamona ita karaia. (Mat. 6:⁠1) Mai momokani ida kara maoromaoro ita tahua karana be iseda kudouna amo ia vara gauna​​—⁠anina be iseda lalohadai, kara, bona ura kereredia do ita hamaoromaoroa. Bema unai bamona ita karaia, kara dika badadia do ita karaia lasi. (Aonega Herevadia 4:​23 duahia; Iamesi 1:​14, 15 hahegeregerea.) Danu, Iehova ese ita do ia hanamoa bona ita do ia durua mai anina bada Keristani kara namodia ma haida do ita tahua noho totona.

“Dirava Badinaia Kara . . . Tahua”

7. “Dirava badinaia kara” ena anina be dahaka?

⁷ Badinaia karana ena anina be mai iseda ura ibounai ida iseda nega bona goada ita henia gau ta ita karaia totona. Baibel ena diksenari ta ia gwau, “Dirava badinaia kara” ena anina be ‘Dirava ita gari henia bada, bona ita ura lasi gau ta ese unai ia hadikaia.’ Nega momo Israela taudia be Dirava idia badinaia lasi, hegeregere Dirava ese Aigupito amo ia ruhadia murinai idia ese Ia idia gwau-edeede henia.

8. (a) Adamu ena kara dika ese edena henanadai ia havaraia? (b) Edena dala ai Dirava ese “hunia gauna” ena haere ia hahedinaraia?

⁸ Goevadae tauna Adamu ia kara dika murinai, lagani tausen momo lalonai taunimanima be inai henanadai ena haere idia davaria lasi: “Tau ta be Dirava ia badinaia goevagoeva diba, a?” Idia hanaia lagani momo lalodiai, goevadae lasi tauna ta be Dirava ia badinaia goevagoeva lasi. To, Iehova be ena nega korikori ai, unai “hunia gauna” ena haere ia hahedinaraia. Dirava ese sibona ia havaraia Natuna tamona ena mauri be guba amo ia kokia bona Maria ena bogana lalonai ia atoa, unai amo Iesu be goevadae tauna ai ia vara diba. Iesu be tanobada ai ena mauri ibounai lalonai bona ia mase neganai, ia hahedinaraia ia ura dikadika Dirava sibona do ia badinaia bona ena ura do ia karaia goadagoada. Ena guriguri amo ia hahedinaraia ia ura iena lalokau guba Tamana sibona do ia tomadiho henia. (Mat. 11:25; Ioa. 12:​27, 28) Unai dainai, Iehova ena siahu ese Paulo ia doria bona “Dirava badinaia karana” ia herevalaia neganai, Iesu ena haheitalai namona ia gwauraia.​​—⁠1 Timoteo 3:​16 duahia.

9. Edena dala ai Dirava ita badinaia diba?

⁹ Ita be mai eda kara dika dainai, Dirava ita badinaia goevagoeva diba lasi. To, Dirava badinaia karana ita tahua diba. Unai ita karaia totona, Keriso ena kara do ita tohotohoa be namo. (1 Pet. 2:​21) Koikoi taudia ese “Dirava badinaia kara be toana sibona do idia hedinaraia, to iena anina momokani do idia negea.” (2 Tim. 3:⁠5) To, Keristani taudia momokanidia be idau, idia ese Dirava badinaia karana be edia kudouna bona toana amo idia hahedinaraia. Hegeregere, headava dabua eiava loaloa dabua ita hahedokilaia neganai, namona be iseda toana ese ia hahedinaraia ita be ‘Dirava ita matauraia’ taudia. (1 Tim. 2:​9, 10) Oibe, Dirava badinaia karana anina be iseda mauri dinadia ta ta lalonai Dirava ena kara maoromaoro taravatudia do ita laloa bada.

“Abidadama . . . Tahua”

10. Iseda abidadama ia goada noho totona, dahaka ita karaia be namo?

¹⁰ Roma 10:17 duahia. Keristani tauna ena abidadama ia goada noho totona, Baibel lalonai idia noho hereva momokani do ia laloa dobu be namo. “Hesiai tauna mai ena kamonai, bona mai ena kara maoromaoro” ese buka bona magasin namodia momo ia halasia. Tau Hereadaena, Hadibaia Tauna Badana amo Diba Ita Abia bona “Come be My Follower” be buka namodia toi. Idia  ese ita idia durua Keriso ita dibaia namonamo bena ia ita tohotohoa totona. (Mat. 24:​45-​47) Hesiai oreana ese kongrigeisen hebou, sekit hebouhebou; dina tamona hebouhebou bona distrik hebouhebou ia hegaegaelaia bona unai hebou momo ai “Keriso ena hereva idia harorolaia.” Unai heduru gaudia be dala idauidau ai oi gaukaralaia, bena unai amo Dirava ese ia hegaegaelaia gaudia ‘do oi dogoatao bona badinaia’ diba, a?​​—⁠Heb. 2:⁠1.

11. Edena dala ai guriguri bona kamonai karana ese ita idia durua abidadama ita habadaia totona?

¹¹ Iseda abidadama do ia hagoadaia gauna ta be guriguri karana. Nega ta Iesu ena hahediba taudia ese Iesu idia noia: “Aiemai abidadama oi habadaia.” Mai manau ida ita danu be Dirava dekenai unai bamona ita noia diba. (Luka 17:⁠5) Iseda abidadama ita habadaia totona, namona be Dirava ena lauma helaga ena heduru totona ita noinoi badina abidadama be lauma helaga ena huahua ta. (Gal. 5:​22) Unai sibona lasi, to Dirava ena oda herevadia kamonai henia karana ese eda abidadama ia hagoadaia danu. Hegeregere, do ita hekwarahi iseda haroro gaukarana ita habadaia totona. Unai bamona ita karaia neganai, moale bada do ita davaria. Danu, ‘Dirava ena Basileia bona iena kara maoromaoro ita tahua guna’ dainai, ita abia hahenamo idauidau ita laloa dobu karana ese iseda abidadama do ia habadaia.​​—⁠Mat. 6:​33.

“Lalokau . . . Tahua”

12, 13. (a) Iesu ena taravatu matamatana be dahaka? (b) Edena dala ai Keriso bamona lalokau ita hahedinaraia be mai anina bada?

¹² Timoteo Ginigunana 5:​1, 2 duahia. Paulo ese Keristani taudia ia sisiba henia ta ta do idia lalokau henia totona. Dirava badinaia karana ta be Iesu ese ia gwauraia taravatu matamatana, “ta ta dekenai do umui lalokau henia” taravatuna unai, do ita badinaia. (Ioa. 13:34) Aposetolo Ioane ia gwau: “Bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, ‘Lau ese Dirava lau lalokau henia?’ ” (1 Ioa. 3:​17) Oi be ma ta dekenai lalokau oi hahedinaraia karana ta oi laloatao, a?

¹³ Lalokau ita hahedinaraia dalana ta be, ita idia kara dika henia taudia edia dika do ita gwauatao bona iseda tadikaka be nega daudau lalonai do ita badu henia noho lasi. (1 Ioane 4:​20 duahia.) To, namona be inai sisiba ita badinaia: “Umui haheauka heheni bona emui dika umui gwauatao heheni noho mai emui ura ida bema ta be ma ta dekenai mai ena badu herevana ta. Iehova be mai ena ura ida umui emui dika ia gwauatao hegeregerena, umui danu unai bamona umui karaia.” (Kol. 3:​13, NW ) Kongrigeisen lalonai tadikaka o taihu ta dekenai unai sisiba hereva hegeregerena oi kara henia be namo, a? Iena kara dika do oi gwauatao, a?

“Haheauka . . . Tahua”

14. Piladelepia kongrigeisen ena haheitalai amo dahaka ita dibaia?

¹⁴ Bema iseda tahua gauna be nega kwadogina lalonai ita hagugurua diba, unai be auka lasi. To, bema nega daudau lalonai ita hekwarahi iseda tahua gauna ita hagugurua totona, reana do ia auka momokani. Oibe, mauri hanaihanai ita tahua bona abia totona, haheauka karana be mai anina bada. Lohiabada Iesu ese Piladelepia kongrigeisen ia hamaoroa: “Guna lau ese oi lau oda henia do oi haheauka, bona inai oda be oi badinaia vadaeni. Unai dainai, tanobada taudia ibounai . . . do lau tohoa neganai, oi do lau hamauria.” (Apok. 3:​10) Oibe, Iesu ia hadibaia haheauka karana be mai anina bada​​—⁠unai kara ese ita ia durua hekwakwanai eiava hahetoho ita davaria neganai do ita moru lasi totona. Reana, Piladelepia kongrigeisen tadikaka be hahetoho momo idia davaria to idia haheauka. Unai dainai, Iesu ese idia ia hagoadaia, gabeai hahetoho badana ai idia do ia durua.​​—⁠Luka 16:⁠10.

15. Iesu be haheauka karana dekenai dahaka ia hadibaia?

¹⁵ Iesu ia diba ena hahediba taudia be tanobada taudia bona edia varavara haida ese do idia dagedage henidia. Unai dainai nega rua idia dekenai hagoadaia herevana ia henia: “Do ia haheauka lao ela  bona dokona tauna be do ia mauri.” (Mat. 10:22; 24:13) Danu, Iesu be iena hahediba taudia dekenai ia hahedinaraia, unai nega ai idia haheauka totona edena dala ai goada do idia abia. Haheitalai ta amo, ia hahedinaraia “[Dirava ena] hereva idia kamonai, bona idia abia dae, mai moale danu,” to dibagani dainai idia moru taudia be “tano mai nadi momo” bamona. To, iena hahediba taudia be tano namona bamona ia gwauraidia, badina idia ese Dirava ena hereva idia “dogoatao auka momokani” bona “edia huahua idia havaraia.”​​—⁠Luka 8:​13, 15.

16. Dahaka ese taunimanima milioni momo ia durua idia haheauka totona?

¹⁶ Ita haheauka noho totona, dahaka ese ita do ia durua? Namona be Dirava ena hereva “do ita dogoatao auka momokani,” anina be iseda kudouna bona lalona ai do ia mauri noho. Baibel be gado momo ai idia halasia dainai, taunimanima ese Dirava ena hereva idia duahia bona “dogoatao auka” diba. Dina ta ta ai, Dirava ena Hereva ena kahana ta ita laloa dobu karana ese ita dekenai goada do ia henia bena unai amo do ita “hesiku lasi,” to mai haheauka ida do ita gini goada.​​—⁠Sal. 1:​1, 2.

Maino Bona “Laloa Manau . . . Tahua”

17. (a) Dahaka dainai “laloa manau” karana be mai anina bada? (b) Edena dala ai Iesu ia hahedinaraia ia be manau tauna?

¹⁷ Bema ta be ia kerere lasi, to haida ese idia samania koikoi, unai tauna be do ia moale lasi, ani? Vaia, taunimanima edia kara, unai tauna be mai badu ida do ia gwau: “Unai be lauegu kerere lasi!” Namona be “laloa manau” karana ia hahedinaraia! (Aonega Herevadia 15:1 duahia.) Bema haida ese tau ta idia samania koikoi, to ia be manau karana ia hahedinaraia, unai tau be goada tauna. Iesu Keriso be haheitalai namona unai kara dekenai. “Idia hereva dika henia, to ia hereva dika henia lou lasi. Hisihisi ia abia neganai, ia dagedage lasi. To mai abidadama danu, sibona ena mauri be Dirava ena imana dekenai ia henia. Badina Keriso ia diba Dirava be Kota Biaguna maoromaorona.” (1 Pet. 2:​23) Reana, Iesu do ita tohotohoa goevagoeva diba lasi, to ita hekwarahi bada iseda manau karana ita habadaia totona, a?

18. (a) Manau karana ese dahaka namo ia havaraia? (b) Edena kara namona ma ta do ita tahua danu?

¹⁸ Iesu hegeregerena, haida be iseda abidadama dainai idia henanadai neganai, ‘nega ibounai do ita naria hegaegae noho, idia do ita haere henia totona, to mai matauraia bona manau danu do ita haere.’ (1 Pet. 3:​15) Manau karana ese ita ia durua iseda tadikaka taihu bona haroro gaukara lalonai ita davaria taudia ida do ita hepapahuahu lasi totona. (2 Tim. 2:​24, 25) Oibe, manau ita hahedinaraia neganai, maino do ita havaraia. Unai dainai, Paulo be Timoteo dekenai ena revareva iharuana ia torea neganai, ia gwau “maino” do ita tahua be namo. (2 Tim. 2:​22; 1 Timoteo 6:​11 hahegeregerea.) Oibe, Baibel ese ita ia sisiba henia “maino” do ita tahua totona.​​—⁠Sal. 34:14; Heb. 12:⁠14.

19. Keristani karadia 7 ita herevalaia murinai, emu lalona oi hadaia edena kara do oi tahua totona? Dahaka dainai?

¹⁹ Do ita tahua Keristani karadia 7 ita herevalaia vadaeni, idia be: Kara maoromaoro, Dirava badinaia karana, abidadama, lalokau, haheauka, laloa manau bona maino. Kongrigeisen iboudiai dekenai, tadikaka bona taihu be idia gaukara goada unai bamona kara namodia idia hahedinaraia totona be hahenamo badana! Unai ese Iehova do ia hanamoa bona Ia ese ita ta ta do ia durua bena iseda kara namodia amo Iena ladana do ita abia isi.

[Footnote]

Ita Laloa Dobu Gaudia

• Kara maoromaoro bona Dirava badinaia karana be edena bamona ita tahua diba?

• Dahaka ese ita do ia durua abidadama bona haheauka karana ita habadaia totona?

• Ta ta ita kara henia neganai, edena dala ai lalokau ita hahedinaraia diba?

• Dahaka dainai laloa manau bona maino ita tahua be namo?

[Study Questions]

[Picture on page 12]

Iesu ia gwau namo lasi kara maoromaoro karadia ita karaia taunimanima ese idia itaia totona

[Picture on page 13]

Baibel ena hereva momokanidia ita laloa dobu karana ese iseda abidadama do ia hagoadaia

[Picture on page 15]

Lalokau bona laloa manau karana ita tahua diba