Ai Gari Lasi​​—Iehova be Ai Dekenai Ia Noho

Egyptia Petridou ena sivarai

Lagani 1972 ai, Cyprus dekenai, Iehova ena Witnes taudia be Nicosia dekenai idia hebou, Nathan H. Knorr ena spesel tok ta idia kamonai totona​​—ia be lagani momo Iehova ena Witnes taudia edia haroro gaukara ia naria. Ia be lau ia diba dainai, lauegu ladana lau do gwauraia lasi neganai, maoromaoro ia henanadai: “Egypt dekenai tadikaka be edena bamona?” Lagani 20 gunanai, Tadikaka Knorr be egu hanua Alexandria, Egypt dekenai, lau hedavari henia.

LAU be January 23, 1914 ai, Alexandria dekenai lau vara. Ai ibounai foa amo, lau be natuna roboana. Ai be davara badinai ai noho. Unai nega lalonai, Alexandria be siti mai hairaina bona taunimanima idauidau idia noho; unai siti dekenai gau badadia momo idia vara bona ruma mai edia sitaelo idauidau idia noho. Europe taudia be Arab taudia ida idia hebamo momo dainai, ai be Greek gado sibona lasi to Arab gado, English gado, French gado, bona Italy gado ai diba bona ai herevalaia.

Sikuli lau haorea neganai, lau be French ena sitoa ta ai lau gaukara, unuseniai bisinesi hahine edia dabua idauidau lau turia. Danu, egu tomadiho lau goadalaia bona lau ura dikadika Baibel lau duahia, herevana lau duahia gaudia lau lalopararalaia sisina.

Unai nega dekenai​​—lagani 1930 murinai​—​Cyprus tauna ta ladana, Theodotos Petrides lau hedavari henia. Ia be reslin gadara ia diba momo, bona danu, ia be keke idauidau ia karaia diba bona keke idia hoihoilaia sitoa ta dekenai ia gaukara. Theodotos be lau ia ura henia. Lau be kwadogi bona egu huina be korema. Nega momo, ia be egu uindo ena henunai ia gini bona Greek edia lalokau anedia ia abia. Ai be June 30, 1940 dekenai ai headava. Unai be moale negadia. Ai ruaosi be egu sinana ena ruma henunai ia noho ruma ta dekenai ai noho. Emai natuna roboana, John, be lagani 1941 ai ia vara.

Hereva Momokani Ai Dibaia

Theodotos be emai tomadiho dekenai ia moale lasi, bona Baibel lalonai gau momo ia henanadailaia. Iehova ena Witnes taudia be ia ida Baibel idia stadilaia, to lau be unai lau diba lasi. Nega ta ai, ruma dekenai beibi lau naria noho lalonai, hahine ta be iduara dekenai ia pidipidi bona kadi ta mai ena Baibel hereva haida ia henia. Lau ese unai kadi lau abia, bona lau duahia. Bena, ia ese Baibel idia herevalaia bukadia haida ia hahedinaraia. Lau itaia, unai buka be Theodotos ese ruma dekenai ia mailaia bukadia bamona!

Lau gwau: “Lau dekenai unai buka idia noho. Mani oi vareai.” Ia vareai neganai, lau be maoromaoro  unai Witnes hahine ladana, Eleni Nicolaou, dekenai henanadai momo lau henia. Ia be Baibel amo egu henanadai ia haerelaia. Unai be kara namona. Nega sisina murinai, lau be Baibel ena hereva lau lalopararalaia matamaia. Eleni be foto ta dekenai egu adavana ena laulau ia itaia neganai, ia gwau: “Unai tau lau diba!” Hari lau diba Theodotos be dahaka ia karaia. Lau hoa gauna be, ia be Keristani heboudia dekenai ia lao to lau ia hadibaia lasi! Unai dina ai, Theodotos be ruma dekenai ia mai neganai, lau gwau: “Inai wiki lalonai, lau ura vanegai Sunday ai oi lao gabuna ita lao!”

Hebou ginigunana lau lao neganai, taunimanima ten bamona be Baibel bukana Mika idia herevalaia. Unai hereva ibounai lau kamonai namonamo! Unai nega amo, Friday hanuaboi ta ta ai, George bona Katerini Petraki be ai idia stadi henia. Egu tamana bona tadidia idia ura lasi Witnes taudia ida lau stadi, to egu tadina kekeni ta be lau ia koua lasi, ena be Witnes kekeni ta ai ia lao lasi. To, egu sinana be hereva momokani ia abia dae. Lagani 1942 ai, lau, Theodotos, bona egu Sinana be Alexandria ena davara dekenai bapatiso ai abia, Iehova dekenai emai mauri ai gwauhamatalaia unai.

Hekwakwanai Idia Vara

Lagani 1939 ai, Tanobada Tuarina Iharuana ia matamaia, bona unai dika ia bada ia lao haraga. Lagani 1940 murinai, German ena ami Jeneral Erwin Rommel bona ena ami taudia be El Alamein kahirakahira idia noho, bona Britain ena tuari taudia momo herea be Alexandria ai idia noho. Ai be ruma dekenai aniani ai haboua. Stoa biaguna be Theodotos ia noia, Port Taufiq ai, Suez kahirakahira dekenai, ena bisinesi matamata ta ia naria be namo​​—unai dainai, ai be unai gabu dekenai ai lao. Greek gado idia herevalaia Witnes taudia rua be ai idia tahua. Ena be emai adres idia diba lasi, to ruma-ta-ruma-ta ai idia haroro ela bona ai idia davaria.

Port Taufiq dekenai, ai be Stavros bona Giula Kypraios mai edia natudia, Totos bona Georgia, ai stadi henidia, bona idia be emai tura namodia ai idia lao. Stavros be stadi ia moalelaia dikadika dainai, nega momo ena ruma ai idia noho klok ibounai edia imana badana ia giroa lao ela bona hora tamona bamona​​—unai amo trein do ai abia lasi bona ena ruma dekenai ai mahuta totona. Nega momo, ai be ia danu ai herevahereva ela bona hanuaboi.

Hua 18 murinai, Port Taufiq ai rakatania bona Alexandria dekenai ai giroa lou neganai, egu sinana ia gorere. Ia be Iehova ia abidadama henia ela bona lagani 1947 ai ia mase. Unai nega ai danu, ai mamia Iehova be lo Keristani tadikaka taihu amo ai ia hagoadaia. Danu, tano ma ta ai haroro gaukara do idia karaia misinari taudia edia bouti be nega sisina Alexandria  dekenai ia noho neganai, misinari taudia be emai ruma dekenai idia mahuta.

Moale Bona Hekwakwanai Negadia

Lagani 1952 ai, emai natuna iharuana, James ia vara. Ai ura bada, emai natuna memerodia be tomadiho momokani lalonai idia tubu daekau dainai, tadikaka ai noidia emai ruma dekenai Baibel stadi heboudia idia karaia totona, bona nega momo ful-taim hesiai taudia ai abidia dae emai ruma ai idia mahuta totona. Unai dainai, emai natuna roboana, John, be hereva momokani ia ura henia bada, bona ena mauri lagani be 16 bamona neganai, painia gaukara ia karaia. Danu, ia be hanuaboi ena sikuli ia lao iena edukeisen ia hagugurua totona.

Daudau lasi murinai, Theodotos be kudou gorere badana ta ia davaria dainai, doketa ese ia idia hamaoroa moni gaukara ia karaia lasi totona. Emai natuna James ena mauri lagani be foa sibona. Dahaka ai karaia be namo? Iehova ena gwauhamata be inai: “Umui gari lasi, lau be umui dekenai lau noho!” (Isa. 41:10) Ai moale bona ai hoa badina lagani 1956 ai, brens be ai idia noia Ismailia ai, Suez Canal badinai, painia gaukara ai karaia totona! Lagani 1957 ai, Egypt dekenai dika badadia idia vara dainai, tadikaka ese hagoadaia hereva idia abia be namo.

Lagani 1960 ai, ai ta ta be baege ta ta sibona ai huaia bona Egypt ai rakatania. Ai be Cyprus dekenai ai lao, unai be egu adavana ena gabu. Unai nega lalonai, Theodotos ena gorere ia bada dainai, moni gaukara ia karaia be auka. To, tadikaka ta bona ena adavana be ai idia abia dae bona edia gabu dekenai ai noho. Lagani rua murinai egu adavana ia mase neganai, lau bona egu natuna James sibona ai noho. John be Cyprus dekenai ia noho danu, to ia be ena adavana bona natuna ia naria.

Metau Negadiai Ai Idia Naria

Stavros bona Dora Kairis be ai idia boiria edia ruma dekenai ai noho totona. Lau tui diho bona Iehova lau tanikiu henia, badina Ia be ai ia naria namo herea. (Sal. 145:16) Gabeai, Stavros bona Dora be edia ruma idia hoihoilaia bona ruma matamata ta idia haginia neganai, ena henunai be Kingdom Hall ta idia karaia​​—unai sibona lasi, to idia ese ruma maragina mai ena daiutu rua idia karaia, lau bona James totona.

James ia headava neganai, ia bona ena adavana be painia gaukara idia karaia ela bona edia natuna roboana ia vara​​—hari edia natudia ibounai be foa. Tadikaka Knorr be lagani 1972 dekenai  ai ia vadivadi henia, to lagani 1974 ai Cyprus ai be politikol hepapahuahu ia vara. * Taunimanima momo, Iehova ena Witnes taudia danu, be edia ruma idia heautania bona tano ma haida dekenai idia lao. Egu natuna John danu be unai bamona ia karaia. Ia bona ena adavana bona natudia toi be Canada dekenai idia lao. To moale gauna be, Cyprus ai, Iehova ena Witnes taudia edia namba be ia bada daekau.

Gavamani amo heduru monina lau abia matamaia neganai, egu haroro gaukara lau habadaia. To lagani haida gunanai, lau be stroke gorerena lau davaria bona lau lao egu natuna James mai ena famili ida lau noho. Gabeai, egu gorere ia bada bona wiki haida lalonai hospital dekenai lau noho murinai, buruka taudia naria rumana dekenai lau idia abia lao. Herevana hisihisi lau abia momo, to nesi, gorere taudia, bona vadivadi taudia lau haroro henia. Danu, lau sibona lau noho dainai, hora momo lalodiai Baibel lau stadilaia bona egu tadikaka taihu ese lau idia durua Kongrigeisen Buka Stadi dekenai lau lao totona.

Lau Moale

Lau bona Theodotos ese ai durua taudia amo sivarai lau kamonai neganai, lau moale. Idia momo bona edia natudia bona tubudia be ful-taim haroro gaukara idia karaia​​—haida be Australia, Canada, England, Greece, bona Switzerland ai hesiai gaukara idia karaia. Hari, egu natuna John, ena adavana, bona edia natuna mero be Canada dekenai idia noho. Edia kekeni roboana bona ena adavana be painia gaukara idia karaia. Edia natuna Linda bona ena adavana Joshua Snape be Gilead Sikuli ena klas namba 124 dekenai idia lao.

Egu natuna James bona adavana be Germany ai idia noho. Edia memero rua be Betele dekenai idia gaukara​​—ta be Athens, Greece dekenai, bona ma ta be Selters, Germany dekenai. Edia natuna mero ihatoina, bona edia natuna kekeni bona ena adavana, be Germany ai painia gaukara idia karaia.

Egu sinana bona egu adavana idia toreisi lou neganai, lau be idia dekenai sivarai momo do lau gwauraia! Do idia moale badina idia be gau namona idia rakatania edia famili totona. *

[Footnotes]

[Blurb on page 24]

Unai nega ai danu, ai mamia Iehova be lo Keristani tadikaka amo ai ia hagoadaia.

[Map on page 24]

(For fully formatted text, see publication)

CYPRUS

NICOSIA

MEDITEREINIEN DAVARANA

EGYPT

CAIRO

El Alamein

Alexandria

Ismailia

Suez

Port Taufiq

Suez Canal

[Credit Line]

Based on NASA/Visible Earth imagery

[Picture on page 23]

Lau bona Theodotos, lagani 1938 ai

[Picture on page 25]

James bona adavana

[Picture on page 25]

John bona adavana