Iehova be Buruka Taudia Ia Lalokau Henia
Iehova be Buruka Taudia Ia Lalokau Henia
“Dirava ena kara be gagevagageva lasi; emui gaukara bona emui lalokau ia ladana dainai umui hahedinaraia . . . be do ia laloaboio lasi.”—HEB. 6:10, BHğ.
1, 2. (a) Huina kurokuro taudia oi itaia neganai, daika ena hereva oi laloa? (b) Iehova ese Keristani buruka taudia be edena bamona ia lalodia?
KONGRIGEISEN ai buruka taudia mai edia huina kurokuro oi itaia neganai, Baibel bukana Daniela ena hereva oi laloa, a? Matahanai ta lalonai, Daniela ia itaia Iehova Dirava ena huina be kurokuro momokani. Daniela ia gwau: “Lau itaia noho neganai, gabu ta ta dekenai terona idia atoa. Mauri Noho Hanaihanai Tauna ia mai, terona ta dekenai ia helai. Iena dabua be kurokuro momokani sinou bamona, bona iena huina be kurokuro momokani, mamoe huina goevana bamona.”—Dan. 7:9.
2 Mamoe huina be hanaihanai ia kurokuro. Unai dainai, inai hereva “huina be kurokuro” bona inai dagi ladana “Mauri Noho Hanaihanai Tauna” ese ia hahedinaraia, Iehova ena mauri lagani bona aonega be bada herea, bona Ia ita matauraia be maoro. To, Mauri Noho Hanaihanai Tauna Iehova ese kamonai buruka taudia—lagani momo Iehova idia hesiai henia taudia unai—be edena bamona ia lalodia? Baibel ia gwau: “Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.” (Aon. 16:31) Oibe, bema Keristani tauna ta be Iehova ia hesiai henia ela bona ia buruka eiava ena huina ia kurokuro, Dirava dekenai idia be hairai gauna ta bamona. Oi be unai bamona oi laloa danu, a?
Dahaka Dainai Buruka Taudia Ita Laloa Bada?
3. Dahaka dainai tadikaka taihu burukadia ita lalodia bada?
3 Dirava ena hesiai taudia burukadia haida be Iehova ena Witnes taudia edia Hakaua Oreana taudia, loaloa naria taudia, painia taudia, bona lo pablisa taudia—iseda kongrigeisen dekenai hesiai gaukara idia karaia goadagoada tadikaka bona taihu unai. Oi be buruka taudia haida oi diba, a? Reana idia be lagani momo lalonai sivarai namona idia harorolaia goadagoada, bona edia haheitalai namona ese matamata taudia ia hagoadaia edia mauri idia haidaua totona. Eda tadikaka burukadia haida be maduna momo idia huaia bona sivarai namona idia harorolaia totona dagedage idia haheaukalaia. Iehova bona “hesiai tauna mai ena kamonai, bona mai ena kara maoromaoro” oreana be unai taudia ese guna bona hari idia karaia Basileia ena hesiai gaukara ibounai idia moalelaia.—Mat. 24:45.
4. Dahaka dainai buruka taudia ita matauraia bona idia totona ita guriguri be namo?
4 Iehova Dirava ena hesiai taudia ma haida ese buruka taudia idia lalokau henia bona matauraia be namo. Dirava ena Taravatu lalonai, Mose ese buruka taudia matauraia karana be Iehova gari henia karana ida ia hakapua. (Lev. 19:32) Hanaihanai eda guriguri lalonai unai bamona buruka taudia edia ladana ita gwauraia, bona edia gaukara namona dainai Dirava ita tanikiu henia. Aposetolo Paulo be ia idia durua matamata taudia bona buruka taudia totona ia guriguri danu.—1 Tesalonika 1:2, 3 duahia.
5. Iehova idia tomadiho henia buruka taudia ita bamoa ena namo be dahaka?
5 Ita ibounai danu be buruka taudia bamoa karana amo namo ita abia diba. Iehova idia tomadiho henia buruka taudia be edia stadi, idia itaia gaudia, o ekspiriens amo gau momo idia diba dainai, edia aonega be bada herea. Idia be manau bona hebogahisi dalana idia diba sibona lasi, to idia dibaia gaudia be uru gabena dekenai idia henia hanai—unai ese moale ia havaraia. (Sal. 71:18) Matamata taudia e, oi aonega bona buruka taudia amo diba oi abia—guri dobuna amo ranu oi abia bona oi inua bamona.—Aon. 20:5.
6. Edena dala ai oi hahedinaraia oi be buruka taudia oi laloa bada?
6 Namona be buruka taudia oi hadibaia idia oi laloa bada, Iehova be idia ia laloa bada hegeregerena. Dala ta be, idia oi hamaoroa edia abidadama dainai idia oi lalokau henia, bona edia heduru oi tahua. Ma danu, edia sisiba oi badinaia neganai, oi hahedinaraia idia oi matauraia bada. Buruka tadikaka taihu momo idia laloatao, guna buruka taudia ma haida amo sisiba idia abia bona idia badinaia neganai namo idia davaria. *
Lalokau Karana Ita Hahedinaraia Daladia
7. Iehova ese buruka taudia naria maduna be daika dekenai ia henia?
7 Dirava ese buruka taudia naria maduna be edia ruma bese dekenai ia henia. (1 Timoteo 5:4, 8 duahia.) Iehova be buruka taudia ia laloa bada dainai, Ia moale bema ruma bese be edia maduna idia huaia—buruka taudia idia naria bona laloa bada. Dirava ese unai bamona ruma bese ia durua bona edia hekwarahi ibounai ia hanamoa. *
8. Dahaka dainai tadikaka taihu ese buruka taudia idia laloa bada be namo?
8 Buruka taudia haida edia ruma bese be Witnes lasi o edia ruma bese idia ura lasi heduru idia henia. To, Iehova ia moale bema tadikaka taihu be unai bamona abidadama buruka taudia idia durua bona naria. (1 Tim. 5:3, 5, 9, 10) Momokani, kongrigeisen ese buruka tadikaka taihu idia “lalokau henia, tadikaka bamona” bona “bogahisihisi henia” be namo. (1 Pet. 3:8) Paulo be haheitalai amo ia hahedinaraia unai be mai anina bada, ia gwau bema tauanina ena kahana ta ia hisihisi, “kahana ibounai ese unai hisihisi ena mamina do idia abia.” (1 Kor. 12:26) Bema buruka taudia ita hebogahisi henia sibona lasi to durua karadia ita karaia, vadaeni ita be Paulo ena sisiba ma ta ita badinaia, ia gwau: “Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia.”—Gal. 6:2.
9. Buruka taudia be dahaka metau idia davaria?
9 Buruka taudia be dahaka metau idia davaria? Momo idia hesiku haraga. Reana idia mamia edia goada be ia hegeregere lasi gau haida idia karaia totona—hegeregere doketa dekenai lao, revareva torea, ruma hagoevaia, bona aniani hegaegaelaia. Hitolo o ranu mase ena mamina idia abia lasi dainai, idia laloa idia aniani o ranu idia inua be anina lasi. Reana edia Baibel stadilaia karana o hebou lao henia karana be unai bamona danu. Reana edia matana bona taiana dainai, idia hekwarahi buka idia duahia o hebou ena hereva idia kamonai totona. Danu, idia hegaegae hebou dekenai idia lao totona be mai ena hekwarahi. Ma haida be edena dala ai unai bamona buruka taudia idia durua diba?
Edena Dala ai Heduru Oi Henia Diba?
10. Elda taudia be edena dala haida ai buruka taudia idia durua diba?
10 Tadikaka taihu momo be buruka taudia idia durua namo herea. Hegeregere buruka taudia edia sopin idia karaia, aniani idia nadua, bona gabu idia hagoevaia. Eiava buruka taudia idia durua idia stadi, hebou totona idia hegaegae, bona nega ibounai idia haroro totona. Witnes matamata taudia be buruka taudia idia bamoa o motuka amo heduru idia henia. Ena be buruka taudia idia hegeregere lasi ruma idia rakatania totona, to telefon o teipi rekoda amo hebou ena hereva idia kamonai diba. Bema mai dalana, reana elda taudia ese dala haida idia karaia diba, kongrigeisen buruka taudia ese heduru idia abia totona. *
11. Ruma bese ta ese buruka tadikaka ta idia durua dalana ena ekspiriens oi gwauraia.
11 Ita ta ta ese buruka taudia be iseda ruma dekenai ita abia dae bona naria diba. Buruka tadikaka ta ena adavana ia mase neganai, ia be hegeregere lasi ruma ena davana ia karaia totona, badina gavamani amo hahine ena moni ia abia lasi. Ia bona ena adavana ese idia stadi henia ruma bese ta—tamana, sinana, bona natuna kekeni rua—be ruma badana ta dekenai idia noho. Idia ese unai tadikaka dekenai edia ruma ena daiutu rua idia henia. Lagani 15 lalonai, idia aniani hebou, kiri hebou, bona ia idia lalokau henia. Maragidia be unai tadikaka ena abidadama, ekspiriens bona hebamo amo namo bada idia abia. Ia be unai ruma bese ida ia noho ela bona ia mase—iena mauri lagani be 89. Unai ruma bese be unai tadikaka amo gau momo idia diba dainai, nega momo idia be Dirava idia tanikiu henia. Idia be Iesu Keriso ena hesiai tauna idia durua dainai, idia danu be “davana” namona idia abia.—Mat. 10:42. *
12. Edena dala ai oi hahedinaraia oi be buruka taudia oi lalokau henia?
12 Reana oi be unai ruma bese ia karaia bamona oi karaia be hegeregere lasi, to reana oi hegeregere buruka taudia oi durua idia hebou o haroro totona. Eiava emu ruma dekenai oi boiria eiava umui loaloa diba. Eiava idia gorere o idia loaloa diba lasi neganai, oi vadivadi henia diba. Ma danu, nega ibounai idia oi kara o hereva henia neganai, taunimanima badadia bamona oi kara o hereva henidia be namo. Abia hidi umui karaia gwauraia neganai, lalohadai maorodia idia gwauraia diba Keristani buruka taudia edia heduru oi tahua. Herevana buruka taudia haida edia laloatao karana be ia dika ia lao, to idia mamia diba bema haida ese idia matauraia eiava lasi.
Iehova be Emui Gaukara Do Ia Laloaboio Lasi
13. Dahaka dainai buruka taudia edia hemami ita laloa bada be gau badana?
13 Buruka taudia edia hemami ita laloa bada be gau badana. Idia momo idia moale lasi o idia lalohisihisi, badina edia matamata o edia tauanina ia goada neganai idia karaia gaudia momo be hari idia karaia diba lasi. Hegeregere, taihu ta be lagani 50 bamona Iehova ia hesiai henia bona regula painia gaukara ia karaia. To, gorere badana ta ia davaria neganai, ia hegeregere lasi hebou dekenai ia lao totona. Ia ese guna ia karaia hesiai gaukara be hari ena noho dalana ida ia hahegeregerea neganai ia tai. Ia gwau, “Hari, lau be gaukara momo lau karaia diba lasi.”
14. Buruka taudia be salamo torea tauna amo dahaka hagoadaia herevana idia abia?
14 Buruka tauna e, nega momo oi lalohisihisi, a? Eiava nega haida oi mamia Iehova be oi ia rakatania, a? Buruka tauna Davida be unai bamona hemami ia abia badina Iehova ia noia neganai, ia gwau: “Lauegu buruka dinadia neganai lau do oi rakatania lasi. Egu goada be ia ore lao neganai, lau dekena amo do oi siri lasi. Momokani hari lau be buruka, bona egu huina idia kurokuro vadaeni. To Dirava e, lau do oi rakatania lasi.” (Sal. 71:9, 18) Momokani, Iehova be unai salamo torea tauna ia rakatania lasi hegeregerena, Ia be oi do ia rakatania lasi. Danu, Davida ese ia hahedinaraia ia be Dirava ia abidadama henia. (Salamo 68:19 duahia.) Namona be oi diba, Iehova be abidadama buruka taudia kahirakahira ia noho bona dina ta ta ai Ia be idia Ia durua noho.
15. Dahaka ese buruka taudia do ia durua lalohadai maorona idia abia totona?
15 Iehova be buruka Witnes taudia ese guna bona hari idia karaia gaudia ibounai ia laloaboio lasi. Baibel ia gwau: “Dirava ena kara be gagevagageva lasi; emui gaukara bona emui lalokau ia ladana dainai umui hahedinaraia . . . be do ia laloaboio lasi.” (Heb. 6:10, BHğ) Unai dainai, namo lasi lalohadai kererena oi abia bona oi gwau, oi buruka dainai Iehova dekenai oi be anina lasi. Lasi, gau badana be Iehova ese oi totona ia karaia gaudia dainai oi moale! Eda Havaraia Tauna be ita dekenai “nega vaira gaudia bona helaro” ia henia. (Ier. 29:11, 12, BHğ; Kara 17:31; 1 Tim. 6:19) Unai gaudia oi laloa noho, oi gaukara goada unai amo emu kudouna bona lalona be matamata tauna ena bamona, bona oi gwau lasi kongrigeisen lalonai oi be anina lasi! *
16. Dahaka dainai buruka tauna ta ia laloa elda gaukara ia rakatania be namo? Elda oreana be dahaka hagoadaia herevana idia henia?
16 Johan ena ekspiriens mani ita laloa: Iena mauri lagani be 80 bona iena adavana Sannie—gorere hahinena—ia naria. * Kongrigeisen taihu ta ta be Sannie idia naria danu, unai amo Johan be haroro bona hebou dekenai ia lao diba. To vanegai, Johan ia laloa ia be gaukara momo ia karaia lasi dainai, kongrigeisen elda gaukara ia rakatania be namo. Ia tai bona ia gwau: “Elda gaukara lau karaia be anina lasi. Lau be kongrigeisen durua gaukaradia momo lau karaia namonamo lasi.” To elda oreana be ia idia hamaoroa iena diba bona lalohadai namodia be mai anina bada. Idia hagoadaia elda gaukara ia karaia noho totona, herevana ia be gaukara momo ia karaia lasi. Unai hagoadaia herevadia dainai, Johan be elda gaukara ia karaia bona kongrigeisen ia durua noho.
Iehova be Buruka Taudia Ia Lalokau Henia Noho
17. Baibel ese buruka taudia be edena bamona ia hagoadaia?
17 Baibel ese ia hahedinaraia goevagoeva, buruka taudia be Iehova ena hesiai gaukara idia karaia noho diba, herevana idia buruka dainai hekwakwanai momo idia davaria. Salamo torea tauna ia gwau: “Kara maoromaoro taudia, be Lohiabada ena Ruma dekenai idia hadoa audia bamona. . . . Idia buruka momokani neganai, idia ese huahua do idia atoa noho. Idia be nega ibounai idia goada noho, au raurau matamata idia atoa, bona idia be do idia kakoro diba lasi.” (Sal. 92:13, 14) Aposetolo Paulo be reana gorere ta ia abia dainai, ena goada ia ore ia lao, to ia be Dirava ena hesiai gaukara dekenai ia “hesiku lasi.”—2 Korinto 4:16-18 duahia.
18. Dahaka dainai buruka taudia bona edia ruma bese taudia ita durua be namo?
18 Hari inai negai, buruka taudia momo be ‘huahua idia atoa noho.’ To idia buruka dainai idia davaria hekwakwanai o gorere ese ia hamanokadia noho, bona edia ruma bese namodia be heduru namona idia henia noho. Reana nega haida unai heduru taudia idia hesiku danu. Unai dainai, kongrigeisen taudia edia maduna be unai buruka taudia bona edia ruma bese idia durua be namo, unai be hemataurai bona lalokau karana. (Gal. 6:10) Unai amo ita be hereva sibona dekena amo ita gwau lasi oi lao bona “oiemu kopina do oi hasiahua, bona do oi boga kunu,” lasi, to iseda kara amo heduru ita henia danu.—Iam. 2:15-17.
19. Dahaka dainai abidadama buruka taudia idia diba vaira negana ai do idia noho namonamo?
19 Ena be Keristani tauna ena goada ia ore, to Iehova ese idia ia lalokau henia karana ia ore lasi. Danu, Iehova vairanai kamonai taudia ibounai be dava bada gaudia bamona, bona idia do ia rakatania lasi. (Sal. 37:28; Isa. 46:4) Iehova be buruka taudia do ia naria, durua, bona hakaua ela bona hanaihanai.—Sal. 48:14.
[Footnotes]
^ par. 6 “Burukadia—Hahenamo ta Matamata Taudia Dekenai,” June 1, 2007, Gima Kohorona itaia.
^ par. 7 February 8, 1994 Awake!, rau 3-10 itaia.
^ par. 10 Hegeregere tano haida dekenai, elda taudia be buruka taudia idia durua gavamani ena heduru idia abia totona. “God Cares for the Elderly,” June 1, 2006, The Watchtower itaia.
^ par. 11 “Jehovah Always Cares for Us,” September 1, 2003, The Watchtower itaia.
^ par. 15 “Hui Kurokuro Ena Hairai,” March 15, 1993, Gima Kohorona itaia.
^ par. 16 Ladana ai haidaua.
Edena Bamona Do Oi Haere?
• Dahaka dainai buruka taudia ita laloa bada be namo?
• Edena dala ai buruka taudia dekenai lalokau karana ita hahedinaraia diba?
• Dahaka ese buruka taudia ia durua diba lalohadai maorona idia abia totona?
[Study Questions]
[Pictures on page 18]
Kongrigeisen taudia be buruka taudia idia matauraia bada