Gorere Hanamoa Daladia Dekenai Baibel Ena Hereva Badinaia

“Lohiabada oiemu Dirava oi ura henia . . . mai oiemu lalona ibounai, bona mai oiemu goada ibounai.”​​—⁠MAR. 12:⁠30.

1. Dirava ena ura taunimanima totona be dahaka?

IEHOVA DIRAVA ia ura lasi taunimanima idia gorere bona idia mase. Ia ese Adamu bona Heva be Eden umana lalonai ia atodia, uma ‘do idia biru henia bona naria’ ela bona lagani 70 eiava 80 sibona lasi, to ela bona hanaihanai. (Gen. 2:​8, 15; BHğ; Sal. 90:10) Bema idia ese Iehova idia abidadama henia bona Iena lohia siahuna idia badinaia, taunimanima be do idia gorere lasi bona mase lasi.

2, 3. (a) Hadibaia Tauna bukana ese buruka taudia be edena bamona ia herevalaia? (b) Daika ena kerere dainai taunimanima idia mase, bona daika ese unai dika do ia haorea?

² Hadibaia Tauna karoa 12 be buruka taudia edia “nega dika” o idia dekenai idia vara gaudia ia herevalaia. (Hadibaia Tauna 12:​1-7 duahia.) Ia gwau, edia “huina be do idia kurokuro.” Edia ‘aena be unai negai do idia manoka.’ Edia matana be gau idauidau do idia itaia namonamo lasi. Bona edia ‘isena be tamona tamona sibona dainai, aniani do idia ania namonamo diba lasi.’

³ To, Dirava ia ura lasi taunimanima idia buruka. Danu, Diabolo ena “kara dika” ta be inai: Adamu dainai taunimanima idia mase, bona Dirava ena Natuna be ena Mesia Basileiana amo unai kara dika do ia haorea. Ioane ia gwau: “Dirava ena Natuna ia hedinarai ena badina korikori be inai: Satani ena kara dika do ia haorea momokani totona.”​​—⁠1 Ioa. 3:8

Lalohadai Maorona Ita Abia be Namo

4. Dahaka dainai ita ura lasi ita gorere, bona dahaka ita laloatao be namo?

⁴ Hari, goevadae lasi taudia ibounai hegeregerena, ita danu ita gorere bona buruka. Unai dainai, ita gorere neganai ita lalohekwarahi be vaia taunimanima edia kara. Momokani, ita ura lasi ita gorere badina ita ura ‘mai iseda goada ibounai’ ida Iehova ita hesiai henia. (Mar. 12:30) To namona be inai ita laloatao: Ena be dala idauidau ai iseda tauanina ita naria namonamo, to nega ta ai ita be do ita gorere o do ita buruka.

5. Dirava ena hesiai taudia edia gorere ena sivarai amo dahaka ita dibaia?

⁵ Iehova ena abidadama hesiai taudia momo idia gorere danu. Idia ta be Epafrodito. (Fili. 2:​25-​27) Timoteo ena bogana ia hisihisi momo dainai, Paulo ese ia hamaoroa ‘uaina sisina do ia inua.’ (1 Tim. 5: 23) Paulo be “ginigini ta” dainai ia hisihisi, reana unai be ena matana ia dika bona hanamoa muramura be lasi. (2 Kor. 12:7; Gal. 4:15; 6:11) Unai dainai, ia be Iehova dekenai ia guriguri goadagoada. (2 Korinto 12:​8-​10 duahia.) Dirava be hoa dalanai unai “ginigini” ia kokia lasi. To, Ia ese Paulo ia hagoadaia unai hisihisi ia haheaukalaia totona. Paulo ia goada lou karana ese ia hahedinaraia, ia be Iehova ena hereva ia abia dae. Unai sivarai ese ita dekenai gau ta ia hadibaia, a?

 Iseda Gorere Ita Laloa Momo Lasi

6, 7. Dahaka dainai iseda gorere ita laloa momo lasi be namo?

⁶ Iehova ena Witnes taudia be medikol heduru o gorere hanamoa daladia momo idia abia dae danu. Nega momo iseda Awake! lalonai be gorere haida edia sivarai idia kikilaia. Ena be unai magasin be muramura o gorere hanamoa dalana hereadaena ta idia kikilaia lasi, to ita moale badina unai magasin be doketa o nesi edia heduru herevadia bona idia ida ita gaukara hebou daladia idia herevalaia. Ita diba hari inai negai, ita gorere diba. Unai dainai, namo lasi gorere hanamoa karana be gau badana ai ita halaoa o nega ibounai ita laloa momo. Ita be Keristani taudia dainai ita be mai iseda helaro, to tanobada taudia be helaro lasi. Tanobada taudia idia laloa mauri be inai sibona o gabeai mauri ta be lasi dainai, edia gorere hanamoa daladia idauidau idia tahua. (Efe. 2:​2, 12) Namo lasi hari iseda gorere ita laloa momo dainai, Iehova ena taravatu ita utua bena Iena lalonamo ita haboioa. To gau badana be ita abia dae bema nega ibounai Dirava ita abidadama henia, vadaeni vaira neganai tanobada matamatana ai “mauri hanaihanai” do ita abia.​—⁠1 Tim. 6:​12, 19; 2 Pet. 3:⁠13.

⁷ Tano haida dekenai, taunimanima be edia gorere idia laloa momo. To, unai bamona ia karaia tauna be sibona ena namo ia laloa bada. Paulo be Filipi taudia ia tore henia neganai, ia ese unai dika be inai bamona ia herevalaia: “Umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.” (Fili. 2:⁠4) Eda tauanina ita naria namonamo be namo, to eda tadikaka bona ita haroro henia taudia ita laloa bada neganai, unai ese ita do ia durua eda gorere ita laloa momo lasi totona.​​—⁠Mat. 24:⁠14.

8. Bema eda gorere ita laloa momo, dahaka ia vara diba?

⁸ Bema Keristani tauna ta be ena gorere ia laloa momo, ena mauri lalonai Basileia do ia tahua guna lasi. Danu, bema iseda gorere ita laloa momo, reana ma haida do ita doria, iseda lalohadai muramura o aniani haida dekenai idia abia dae totona. To, Paulo ena hakaua herevana mani ita laloa, ia gwau: “Gau namodia [“mai anina bada gaudia,” NW ] edia toana do umui diba. Vadaeni mai goeva danu, bona kerere lasi do umui noho, ela bona Keriso do ia giroa mai dinana.”​​—⁠Fili. 1:​10.

Mai Anina Bada Gaudia be Dahaka?

9. “Mai anina bada gaudia” ta be dahaka, bona dahaka dainai ita rakatania lasi?

⁹ “Mai anina bada gaudia” ta be inai: Taunimanima ita durua Iehova idia tura henia totona. Anina be Baibel amo taunimanima ita haroro henia bona hadibaia. Unai gaukara ese ita bona ita hadibaia taudia dekenai namo bona moale ia mailaia. (Aon. 17:22; 1 Tim. 4: 15, 16) Nega haida ai, eda Gima Kohorona bona Awake! magasin lalodiai be gorere badadia idia davaria tadikaka bona taihu edia sivarai idia noho. Nega haida unai sivarai ese idia hahedinaraia edena dala ai edia gorere idia haheaukalaia o edia gorere idia laloaboio totona ma haida idia durua Iehova bona ena gwauhamata idia dibaia totona. *[6]

10. Dahaka dainai ita abia hidi medikol heduruna be mai anina?

¹⁰ Keristani taudia idia gorere neganai, ‘ibounai ta ta sibona ena metau, ena metau do ia huaia’ bena medikol heduru maorona ia abia hidi. (Gal. 6:⁠5) To, namona be ita laloatao: Ita abia hidi medikol heduruna be mai anina Iehova dekenai. Baibel ena taravatu ita badinaia dainai “rara” ita dadaraia hegeregerena, Dirava ena Hereva ita laloa bada dainai medikol heduru maorona ita abia hidi be namo. Unai amo Iehova ena taravatu do ita utua lasi bona eda hetura karana Iehova ida do ita hadikaia lasi. (Kara 15:20) Doketa haida be ta ena gorere idia tahua o hanamoa gwauraia neganai, meamea gaudia idia gaukaralaia. Iehova be Israela taudia ia dadaraia badina meamea gaudia idia gaukaralaia. Ia gwau: “Harihari gaudia, anina lasi  gaudia haida ma, do umui mailaia lasi, badina be emui muramura mai bonana, be gau dikana lau dekenai. Emui Hua Matamata Aria, emui Sabati, bona emui guriguri hebou, be emui kara dika [“meamea,” NW ] ese ia hamiroa vadaeni.” (Isa. 1:​13) Ita gorere neganai, namo lasi unai nega ai gau ta ita karaia, vadaeni unai ese iseda guriguri dalana ia koua diba.​​—⁠Lal. 3:​44.

“Laloa Namonamo” be Namo

11, 12. Dahaka dainai gorere hanamoa daladia abia hidi karana dekenai “laloa namonamo” karana be mai anina bada?

¹¹ Ita gorere neganai, ita gwau lasi Iehova be hoa dalanai eda gorere do ia hanamoa. To, namona be ita guriguri Iehova ese aonega ia henia, medikol heduru maorona ita abia hidi totona. Ma danu, namona be Baibel ena hakaua herevadia bona laloa namonamo karana ese ita ia durua abia hidi maorona ita karaia totona. Gorere ia bada neganai, aonega karana be doketa ma rua o toi edia lalohadai ita tahua, badina Aonega Herevadia 15:22 ia gwau: “Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.” Paulo ese ita ia hagoadaia, inai nega dikana lalonai “do ita noho namonamo [“laloa namonamo,” NW ], do ita kara maoromaoro, bona Dirava do ita matauraia.”​​—⁠Tito 2:​12.

¹² Hari, taunimanima momo be Iesu ena negai ia noho gorere hahinena ta bamona. Mareko 5:​25, 26 ia gwau: “Taunimanima edia huanai be hahine ta. Inai hahine ia gorere lagani 12, iena gorere be rara moru. Muramura taudia momo ese iena gorere idia hanamoa gwauraia, to idia be hegeregere lasi. Iena moni bona kohu ia negea ore, to iena gorere be ia bada noho.” Iesu be unai hahine ia hebogahisi henia bona ena gorere ia hanamoa. (Mar. 5:​27-​34) Keristani taudia haida be idia ura dikadika edia gorere idia hanamoa haraga dainai, Baibel ena taravatu idia utua daladia, hegeregere meamea o babalau taudia edia heduru idia tahua diba.

13, 14. (a) Edena dala ai Satani be gorere hanamoa daladia ia gaukaralaia iseda abidadama ia hadikaia totona? (b) Dahaka dainai meamea o babalau taudia dekenai ita lao be namo lasi?

¹³ Satani be dala idauidau do ia gaukaralaia, tomadiho momokani amo ita ia hakaua siri totona. Ia ese matabodaga karadia bona kohu momo tahua karana amo haida ia hamorua hegeregerena, ia be ita do ia veria meamea o babalau karadia amo gorere ita hanamoa totona, bona unai amo eda abidadama ia hadikaia diba. Ita be Iehova ita noia “Satani ena imana” bona “kara dika ibounai” amo ita ia hamauria totona. Unai dainai, namo lasi Satani be ita ia biagua, o namo lasi meamea o babalau taudia dekenai ita lao eda gorere idia hanamoa totona.​​—⁠Mat. 6:13; Tito 2:⁠14.

¹⁴ Iehova be Israela taudia ia hamaoroa, meamea karadia be taravatu. (Deu. 18:​10-​12) Paulo ia hahedinaraia, “meamea” karana be “tauanina ena kara” ta. (Gal. 5:​19, 20) Ma danu, Baibel ia gwau “meamea taudia” be Iehova ena tanobada matamatana lalonai do idia noho lasi. (Apok. 21:⁠8) Momokani, meamea eiava babalau gaudia​—⁠herevana maragi o bada⁠​—⁠​be gau dikadia Iehova ena matana dekenai.

 Taunimanima ese Iseda Laloa Namonamo Karana Idia Itaia

15, 16. Dahaka dainai gorere tahua eiava hanamoa dalana ta dekenai aonega ita gaukaralaia be mai anina bada? Aposetolo edia negai, hakaua oreana be dahaka sisiba namona ia henia?

¹⁵ Unai dainai, bema gorere tahua o hanamoa dalana ta dekenai ita daradara, aonega karana be unai dala ita dadaraia vaitani. To, bema ta be gorere hanamoa dalana ta ia gwauraia hedinarai diba lasi, vadaeni ita gwau lasi reana meamea karana amo unai gorere ita hanamoa diba. Lasi, Dirava amo ia mai aonega ita abia bona ita laloa namonamo be namo, unai ese ita do ia durua Dirava ena lalohadai, gorere hanamoa karana dekenai ita badinaia totona. Aonega Herevadia karoa 3 ena sisiba be inai: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia. . . . Aonega namona, bona laloa kehoa do oi dogoatao noho. Idia do oi naria namonamo, idia ese oi do idia rakatania garina. Idia ese oiemu lauma do idia hamauria.”​​—⁠Aon. 3:​5, 6, 21, 22.

¹⁶ Ena be Iehova ita hesiai henia lalonai ita ura iseda tauanina ita naria namonamo, to namo lasi gorere hanamoa o tauanina ia matamata noho totona, Dirava ena taravatu idia utua medikol daladia ita abia dae. Gorere hanamoa daladia bona gau ma haida dekenai, namona be Baibel ena hakaua herevadia ita badinaia, unai amo taunimanima ese iseda laloa namonamo karana do idia itaia. (Fili. 4:​5, NW ) Aposetolo edia negai, hakaua oreana be mai anina bada revareva ta lalonai Keristani taudia ia hadibaia, kaivakuku tomadiho henia karana, rara, bona sihari kava karadia idia dadaraia totona. Unai revareva dekenai be inai hagoadaia herevana ia noho: “Bema inai gaudia umui karaia lasi, namo do umui davaria.” (Kara 15:​28, 29) Edena dala ai?

Tauanina Naria Namonamo Karana Bona Laloa Maoromaoro Karana

17. Baibel ena hakaua herevadia ita badinaia dainai, dahaka namo ita davaria?

¹⁷ Namona be ita sibona ita nanadaia: ‘Baibel ena hakaua herevadia​—⁠rara bona matabodaga dadaraia taravatudia​—⁠lau badinaia neganai, dika ta lau davaria, a?’ Danu, “tauanina bona lauma hamiroa karadia ibounai do ita hadokoa” ena hakaua herevana ita badinaia ena namo idauidau mani ita laloa. (2 Kor. 7:⁠1) Baibel ena taravatu ita badinaia bona goeva karadia ita karaia neganai, gorere momo ita davaria lasi. Kuku bona drag idauidau ita dadaraia neganai, lauma bona tauanina dalanai namo do ita davaria. Danu, bema ita aniani momo lasi o inuinu kekero lasi, tauanina dalanai namo do ita davaria. (Aonega Herevadia 23:20; Tito 2:​2, 3 duahia.) Ena be mahuta namonamo karana bona eksasais be ita idia durua eda tauanina ia goada noho totona, to bema Baibel ena hakaua herevadia ita badinaia, lauma bona tauanina dalanai namo bada do ita davaria.

18. Mai anina bada gauna be dahaka? Edena peroveta herevana be do ia guguru?

¹⁸ Mai anina bada gauna be inai: Iseda hetura karana iseda guba Tamana ida ita hagoadaia bona ita gimaia. Badina Iehova be iseda mauri ena Badina​—⁠“inai tanobada ena mauri dekenai, bona gabeai do ita abia mauri dekenai.” (1 Tim. 4:8; Sal. 36:⁠9) Dirava ena tanobada matamata lalonai, Iesu ena mauri davalaia  boubouna amo eda dika do ia kokia dainai, tauanina bona lauma dalanai namo bada do ita abia. Dirava ena Natuna, Keriso Iesu ese ‘mauri ranuna, ia lohilohi gauna, dekenai ita do ia hakaua lao’ bona ‘Dirava ese iseda taitai ena ranu ibounai eda matana amo do ia dahua ore.’ (Apok. 7:​14-​17; 22:​1, 2) Unai negai, inai peroveta herevana be do ia guguru: “Siona dekenai idia noho taudia ta ese do ia gwau lasi, ‘Lau be gorere,’ bona Lohiabada ese edia kara dika ibounai do ia gwauatao.”​​—⁠Isa. 33:⁠24.

19. Iseda tauanina ita naria namonamo sibona lasi, to dahaka ita diba danu?

¹⁹ Ita diba eda hahemauri negana be kahirakahira, bona Iehova ese gorere bona mase do ia haorea negana be mai moale ida ita naria noho. To hari, ita diba eda lalokau Tamana be ita do ia durua hisihisi bona gorere ita haheaukalaia totona, badina ‘ia be ita ia laloa.’ (1 Pet. 5:​7, NW ) Unai dainai, ena be iseda tauanina ita naria namonamo, to gau badana be hanaihanai Baibel ena hakaua herevadia ita badinaia!

[Footnote]

Riviu

• Daika ese mase ia havaraia, bona daika ese unai dika do ia haorea?

• Ena be iseda gorere ita lalohekwarahilaia karana be vaia taunimanima edia kara, to dahaka ita karaia lasi be namo?

• Dahaka dainai ita abia hidi medikol heduruna be mai anina Iehova dekenai?

• Baibel ena hakaua herevadia ita badinaia dainai, dahaka namo ita davaria?

[Study Questions]

[Picture on page 23]

Iehova ia ura lasi taunimanima idia gorere bona idia mase

[Picture on page 25]

Ena be Iehova ena taunimanima idia gorere danu, to haroro gaukara lalonai idia moale