Mamoe Orea amo Idia Raka Siri Taudia Durua
Mamoe Orea amo Idia Raka Siri Taudia Durua
“Ita moale hebou, badina be lauegu mamoe, ia boio gauna, lau davaria vadaeni.”—LUKA 15:6.
1. Edena dala ai Iesu ia hahedinaraia ia be mamoe naria tauna mai ena lalokau?
IEHOVA ena Natuna, Iesu Keriso be “Mamoe Naria Tauna Badana.” (Heb. 13:20) Baibel ia peroveta Iesu ia mai neganai, ia be Hakaua Tauna ta o Mamoe Naria Tauna namona ta bamona, Israela ena “boio mamoe” do ia tahua. (Mat. 2:1-6; 15:24) Mamoe naria tauna be ena mamoe gimaia totona ena mauri ia haboioa diba, unai hegeregerena Iesu be ena mauri ia bouboulaia mamoe bamona taudia ese mauri idia abia totona.—Ioa. 10:11, 15; 1 Ioa. 2:1, 2.
2. Dahaka dainai Keristani taudia haida idia manoka?
2 Madi, guna haida be Iesu ena boubou gauna idia laloa bada bona edia mauri be Dirava dekenai idia gwauhamatalaia, to hari idia be Keristani kongrigeisen idia bamoa lasi. Reana lalomanoka, gorere, eiava ma gau haida dainai idia manoka. To, bema idia be Dirava ena orea lalonai idia noho, Davida ese Salamo 23 ai ia herevalaia noho namona bona moale do idia mamia. Hegeregere, Davida ia gwau: “Lohiabada ese lau ia naria noho, mamoe naria tauna ese, iena mamoe ia naria bamona. Unai dainai gau ta do lau dabu lasi.” (Sal. 23:1) Dirava ena orea lalonai idia noho taudia be dala idauidau amo edia hetura karana Dirava ida idia hagoadaia diba. To, orea idia rakatania taudia be unai bamona lasi. Daika ese unai bamona taudia ia durua diba? Edena bamona heduru ita henia diba? Idia be orea dekenai idia giroa lou totona, dahaka ita karaia be namo?
Daika be Heduru Ia Henia Diba?
3. Iesu ese ia hahedinaraia ta ese Dirava ena boio mamoe ia durua totona, dahaka ia karaia be namo?
3 Ta ese Dirava ena boio mamoe ia durua totona, ia hekwarahi be namo. (Sal. 100:3) Iesu ia gwau: “Bema tau ta ena mamoe be 100, to tamona bema ia boio neganai, ia be 99 do ia rakatania lasi, ia boio gauna ororo dekenai do ia tahua lasi, a? Do ia davaria neganai, umui lau hamaoroa momokani, do ia moale bada ia dekenai. To 99 idia boio lasi gaudia dekenai do ia moale bada lasi. Unai bamona, emui Tamana guba dekenai ia noho, be ia ura lasi inai bamona maragina ta do ia mase.” (Mat. 18:12-14) Daika ese orea amo idia raka siri mamoe bamona taudia ia durua diba?
4, 5. Elda taudia ese Dirava ena mamoe dekenai dahaka lalohadai idia abia be namo?
4 Elda taudia be boio mamoe idia durua neganai, namona be idia laloatao unai mamoe be Dirava ena orea tauna ta o Iehova dekenai ena mauri ia gwauhamatalaia tauna. (Sal. 79:13) Unai dainai mamoe naria taudia ese unai bamona mamoe edia namo idia tahua be gau badana. Edia mamoe vadivadi karana ese unai bamona taudia ia durua diba. Mamoe naria taudia edia hagoadaia herevadia be manoka taudia edia abidadama ia hagoadaia, bona ia durudia mamoe orea dekenai idia giroa lou totona.—1 Kor. 8:1.
5 Dirava ena mamoe naria taudia edia maduna be inai: Orea idia rakatania taudia do idia tahua bona idia durudia. Aposetolo Paulo ese Efeso ena elda taudia ia hagoadaia edia mamoe naria gaukara idia karaia be namo, ia gwau: “Umui sibona do umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana dekena amo ia hoia orea taudia, do umui ubua.” (Kara 20:28) Unai hegeregerena, aposetolo Petero ese horoa tadikaka ia hamaoroa: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi. Lohia mai hekokoroku danu bamona emui orea do umui gunalaia lasi, to emui kara namodia do umui hedinaraia, vadaeni emui kara bamona do idia karaia.”—1 Pet. 5:1-3.
6. Dahaka dainai hari elda taudia ese Dirava ena mamoe idia gimaia o durua be namo?
6 Keristani mamoe naria taudia be “mamoe naria tauna namona” Iesu idia tohotohoa be namo. (Ioa. 10:11) Iesu be Dirava ena mamoe ia laloa bada dainai, Simona Petero ia hamaoroa ‘iena mamoe ia naria’ be mai anina bada. (Ioane 21:15-17 duahia.) Hari, Satani ia gaukara goada Dirava dekenai edia mauri idia gwauhamatalaia taudia edia abidadama ia hadikaia totona. Unai dainai mamoe bamona taudia idia naria namonamo be namo. Satani be goevadae lasi tauanina ena ura bona tanobada gaudia amo Iehova ena taunimanima ia veria kara dika idia karaia totona. (1 Ioa. 2:15-17; 5:19) Manoka taudia be idia moru haraga diba. Unai dainai, Dirava ena lauma helaga ese idia ia hakaua bona heduru idia abia be namo. (Gal. 5:16-21, 25) Elda taudia ese unai bamona taudia idia durua totona, namona be Dirava dekenai idia tabekau, lauma helaga ena hakaua dalana idia badinaia, bona Baibel idia gaukaralaia namonamo.—Aon. 3:5, 6; Luka 11:13; Heb. 4:12.
7. Edena dala ai elda taudia ese Dirava ena mamoe idia naria be mai anina bada?
7 Israela taudia edia negai, mamoe naria taudia be itotohi o au latana ta idia gaukaralaia edia mamoe oreana idia hakaua totona. Mamoe be magu ai idia vareai eiava raka-lasi neganai, mamoe naria tauna ena “itotohi henuna amo idia raka hanai,” unai amo ia ese mamoe ibounai ia duahia namonamo diba. (Lev. 27:32, BHğ; Mika 2:12; 7:14) Unai hegeregerena, namona be Keristani naria tauna be Dirava ena mamoe ia diba bona ia naridia. (Aonega Herevadia 27:23 hahegeregerea.) Unai dainai, elda oreana idia hebou neganai, mamoe naria gaukarana idia herevalaia be gau badana. Anina be mamoe oreana amo idia raka siri taudia durua daladia idia herevalaia. Iehova ia gwau: “Lau sibona ese egu mamoe do lau tahua, bona idia do lau naria.” (Ese. 34:11) Iehova bamona, bema elda taudia be orea idia rakatania mamoe bamona taudia idia durua, Dirava ia moale.
8. Edena dala ai elda taudia ese idia hahedinaraia diba, idia be boio mamoe idia laloa bada?
8 Elda tauna ta be gorere tadikaka ta ia vadivadi henia neganai, gorere tadikaka do ia moale bona goada ia abia. Unai hegeregerena, elda tauna ese manoka tadikaka o taihu ia vadivadi henia neganai, manoka tadikaka ia moale bona ia goada lou diba. Elda taudia ese manoka tauna dekenai Baibel siri idia duahia, magasin ena kahana ta idia herevalaia hebou, kongrigeisen hebouna ena hereva badadia haida idia herevalaia, ia ida idia guriguri, bona unai bamona gaudia haida idia karaia diba. Manoka tadikaka o taihu oi hadibaia kongrigeisen heboudia dekenai ia mai neganai, tadikaka taihu do idia moale. (2 Kor. 1:3-7; Iam. 5:13-15) Oi vadivadi henia, telefon amo oi rini henia, eiava revareva ta amo oi tore henia neganai, unai ese ia do ia durua bada! Elda tauna be boio mamoe ta ia durua neganai, unai ese elda tauna ena moale do ia habadaia danu.
Gaukara Hebou
9, 10. Dahaka dainai oi gwau diba kongrigeisen taudia ma haida be orea idia rakatania mamoe bamona taudia idia durua diba?
9 Ita be nega aukadia ai ita noho bona ita bisi momo dainai, reana kongrigeisen amo metairametaira idia boio taudia do ita itaia lasi. (Heb. 2:1) To, Iehova be ena mamoe ia laloa bada. Iseda tauanina ena kahana ta ta be mai anina bada hegeregerena, Iehova dekenai ena mamoe ta ta be mai anina bada. Unai dainai, ita ibounai be iseda tadikaka ita laloa bada bona ta ta ita durua heheni be namo. (1 Kor. 12:25) Oi be emu tadikaka oi laloa bada bona oi durua, a?
10 Ena be elda edia maduna be boio mamoe idia tahua bona idia durua, to kongrigeisen taudia ma haida be unai mamoe idia laloa bada danu be namo. Haida be mamoe naria taudia ida idia gaukara hebou diba. Idia manoka tadikaka bona taihu dekenai hagoadaia hereva ita henia diba bona ita durudia mamoe oreana dekenai idia giroa lou totona. Edena dala ai unai ita karaia diba?
11, 12. Edena dala ai heduru idia ura taudia dekenai heduru ita henia diba?
11 Nega haida, manoka tauna be elda taudia ia noia ta ese ia stadi henia totona. Bena, elda taudia be lo tadikaka ta idia abia hidi unai manoka tauna ia stadi henia totona. Unai ese manoka tauna ia durua diba, guna ia hahedinaraia lalokauna ia hahedinaraia lou totona. (Apok. 2:1, 4) Danu, unai bamona stadi karana ese manoka taudia ia durua ia reaia hadibaia herevadia ia laloa lou, bona ena hetura karana Iehova ida ia hagoadaia lou diba.
12 Bema elda taudia ese oi idia noia ia manoka tauna ta ida oi stadi totona, namona be Iehova oi guriguri henia oi ia durua totona. Momokani, “oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.” (Aon. 16:3) Manoka tauna do ia hagoadaia Baibel siridia bona abidadama hagoadaia hereva badadia oi laloa dobu. Aposetolo Paulo ena haheitalai namona oi laloa. (Roma 1:11, 12 duahia.) Paulo ia ura dikadika Roma ai idia noho Keristani taudia ia itaia, unai amo idia do ia hagoadaia bona idia ese ia do idia hagoadaia danu. Namona be orea idia rakatania taudia ita ura durua neganai, unai ese ita ia hagoadaia danu.
13. Manoka tauna ida dahaka oi herevalaia diba?
13 Emui stadi lalonai, reana oi henanadai, “Hereva momokani be edena bamona oi dibaia?” Oi noia, guna negadiai haroro gaukara ia karaia, hebou maragidia bona badadia dekenai ia davaria ekspiriens namodia ia herevalaia totona. Reana Iehova ena hesiai gaukara lalonai umui moalelaia hebou negadia haida oi herevalaia diba. Iehova kahirakahira oi noho bona oi mamia moalena be ia dekenai oi gwauraia. (Iam. 4:8) Manoka tauna oi hamaoroa: ‘Iehova lau tanikiu henia badina hisihisi bona hekwakwanai negadiai, Iehova ese ita ia durua bona hagoadaia.’—Roma 15:4; 2 Kor. 1:3, 4.
14, 15. Manoka taudia dekenai dahaka ita herevalaia neganai, unai ese idia ia hagoadaia diba?
14 Unai bamona herevadia ese ia manoka tauna do ia durua, guna kongrigeisen ia bamoa neganai ia moalelaia hahenamodia ia laloa lou totona. Hegeregere, guna Dirava ena Hereva bona ura ia dibaia karana be hahenamo badana. (Aon. 4:18) Bona guna lauma helaga ese ena mauri ia biagua dainai, hahetoho ia hanaia be auka lasi. (Gal. 5:22-26) Danu, ena lalomamina goevana dainai Iehova ia guriguri henia bona maino ia davaria. Momokani, ‘Dirava ena maino ese ita laloa gaudia bona eda kudouna ai ita mamia gaudia do ia gimaia namonamo.’ (Fili. 4:6, 7) Namona be unai point namodia oi laloatao, mamoe edia namo oi laloa bada, bona emu tadikaka oi hagoadaia Iehova ena orea dekenai ia giroa lou totona.—Filipi 2:4 duahia.
15 Elda ta be manoka tadikaka bona ena adavana ia vadivadi henia neganai, reana idia ia hagoadaia hereva momokani idia diba negana ginigunana idia laloa lou totona. Unai nega ai hereva momokani idia dibaia neganai, idia moale, edia noho ia namo, bona hahediba hereva koikoidia idia dadaraia! (Ioa. 8:32) Danu Iehova, Iena lalokau karana, bona iena ura idia dibaia neganai, idia moale bada! (Luka 24:32 hahegeregerea.) Unai amo do idia laloparara Dirava dekenai idia gwauhamata Keristani taudia be Iehova ena turadia bona Ia idia guriguri henia diba. Unai manoka taudia oi hagoadaia ‘moale Diravana Iehova ena sivarai namona mai hairaina’ idia harorolaia matamaia lou totona.—1 Tim. 1:11.
Idia Dekenai Lalokau Oi Hahedinaraia Noho
16. Dahaka dainai ta ita durua ia goada lou totona be namo? Haheitalai ta gwauraia.
16 Ataiai ita herevalaia hakaua herevadia ita badinaia neganai, anina namona idia havaraia diba, a? Oibe. Hegeregere, mero ta ena mauri lagani be 12 neganai, ia be bapatiso pablisa ai ia lao, to ena mauri lagani 15 neganai ia manoka. Gabeai ia goada lou, bona lagani 30 mai kahana lalonai ful-taim hesiai gaukara ia karaia. Momokani, Keristani elda ta ena heduru dainai, tadikaka be ia goada lou. Unai elda ena heduru dainai tadikaka ia moale bada!
17, 18. Edena kara namodia ese oi do idia durua orea idia rakatania taudia oi durua idia giroa lou totona?
17 Keristani taudia be lalokau dainai, manoka taudia idia durua kongrigeisen dekenai idia giroa lou totona. Iesu be ena murinai idia raka taudia ia hamaoroa: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioa. 13:34, 35) Keristani taudia korikoridia edia kara badana be lalokau. Ia manoka tadikaka dekenai lalokau ita hahedinaraia diba, a? Oibe! To, ma haida oi durua totona kara namodia haida oi hahedinaraia be namo.
18 Bema oi be orea ia rakatania tauna ta do oi durua, edena bamona kara namodia oi hahedinaraia be namo? Namona be lalokau, hebogahisi, manau, bona haheauka oi hahedinaraia. Danu nega haida, edia dika oi gwauatao be namo. Paulo ia gwau: “Umui haheauka heheni bona emui dika umui gwauatao heheni noho mai emui ura ida bema ta be ma ta dekenai mai ena badu herevana ta. Iehova be mai ena ura ida umui emui dika ia gwauatao hegeregerena, umui danu unai bamona umui karaia. To, unai sibona lasi, lalokau be dabua bamona do umui atoa, badina ia be hatamonaia gauna hereadaena.”—Kol. 3:12-14.
19. Dahaka dainai mamoe bamona taudia ita durua orea dekenai idia giroa lou totona be mai anina bada?
19 Stadi gabena ai do ita itaia dahaka dainai haida be Dirava ena orea idia rakatania. Danu unai stadi ese do ia hahedinaraia edena dala ai idia giroa lou taudia ita abia dae lou diba. Hari ena stadi bona stadi gabena ese idia hahedinaraia, ena be ita hekwarahi manoka taudia ita durua kongrigeisen dekenai idia giroa lou totona, to gabeai anina namona do ia vara. Hari inai negai, taunimanima momo be edia mauri ibounai lalonai idia ura kohu idia habadaia, to ta ena mauri ese tanobada ena kohu bona moni ibounai ia hereaia. Unai point be Iesu ese boio mamoena ena haheitalai amo ia hahedinaraia. (Mat. 18:12-14) Iehova ena orea idia rakatania mamoe bamona taudia oi durua neganai, namona be unai point oi laloa.
Edena Bamona Do Oi Haere?
• Mamoe bamona taudia be orea idia rakatania neganai, elda taudia edia maduna be dahaka?
• Edena dala ai kongrigeisen idia rakatania taudia oi durua diba?
• Orea idia rakatania taudia durua totona, edena kara namodia oi hahedinaraia be namo?
[Study Questions]
[Picture on page 10]
Elda taudia be mai lalokau ida manoka taudia idia durua kongrigeisen dekenai idia giroa lou totona