Manoka Taudia Durua Haraga Idia Giroa Lou Totona!

“Ai be daika dekenai do ai lao? Mauri hanaihanai herevadia be oi dekenai idia noho.”​​—⁠IOA. 6:​68.

1. Hahediba taudia momo be Iesu idia rakatania neganai, Petero be dahaka ia gwau?

IESU KERISO be nega ta iena hahediba herevana ta dainai, iena hahediba taudia momo ese ia idia rakatania. To, Iesu be iena aposetolo taudia ia nanadaia: “Umui danu do umui raka siri, a?” Petero ia haere: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.” (Ioa. 6:​51-​69) Aposetolo taudia idia ura lasi Iesu idia rakatania. Badina unai negai, Iuda tomadiho lalonai “mauri hanaihanai herevadia” be lasi, bona unai bamona hereva be hari tanobada ena tomadiho koikoi ibounai lalonai oi davaria diba lasi. Bema haida be Iehova ena orea idia rakatania to idia ura Iehova idia hamoalea, hari ‘mahuta dekena amo do idia toreisi negana be ia ginidae vadaeni’ bona orea dekenai idia giroa lou haraga be namo.​​—⁠Roma 13:⁠11.

2. Bema gau ta be hahemaoro komiti gauna o hehuni gauna, dahaka ita karaia be namo?

² Iehova be Israela besena ena boio mamoe ia lalodia bada. (Esekiela 34:​15, 16 duahia.) Unai hegeregerena, elda taudia idia ura orea amo idia boio mamoe bamona taudia idia durua, bona unai be edia maduna. Nega haida, manoka pablisa idia ura stadi idia abia be namo, unai dainai elda taudia be lo pablisa ta idia makaia ia manoka pablisa ta ia stadi henia totona. To, unai stadi naria tauna be dahaka do ia karaia bema ia kamonai manoka pablisa be kerere badana ta ia karaia? Unai be hahemaoro komiti gauna o hehuni gauna dainai, namona be manoka pablisa oi hamaoroa elda taudia ia itaia totona. Bema ia ura lasi, oi ese elda taudia oi hamaoroa be namo.​​—⁠Lev. 5:1; Gal. 6:⁠1.

3. Mamoe naria tauna be boio mamoe ia davaria neganai, edena bamona ia kara?

³ Stadi gunanai, ita be Iesu ena parabole ta ita herevalaia. Hegeregere, tau ta ena mamoe be 100, ta ia boio neganai, ia be mamoe 99 ia rakatania bona ia boio mamoena ia tahua. Unai mamoe ia davaria neganai, ia moale bada herea! (Luka 15:​4-7) Dirava ena mamoe ta be ia giroa lou neganai, ita danu be unai bamona do ita moale bada herea. Bona lalokau dainai elda bona kongrigeisen taudia ma haida be manoka  pablisa idia vadivadi henia. Idia danu idia ura unai manoka pablisa be orea dekenai do ia giroa lou, unai amo Dirava ese do ia durua, ia gimaia bona ia hanamoa. (Deu. 33:27; Sal. 91:14; Aon. 10:22) Bema idia ura manoka pablisa idia durua, dahaka idia karaia diba?

4. Galatia 6:​2, 5 amo dahaka ita dibaia?

⁴ Reana elda bona ma haida ese manoka tauna idia hagoadaia kongrigeisen dekenai ia giroa lou totona, namona be mai manau ida manoka pablisa dekenai idia hahedinaraia Iehova be ena mamoe ia lalokau henia bona idia karaia diba gaukaradia sibona ia henia. Idia gwau Iehova ia ura Baibel ita stadilaia, Keristani heboudia ita lao henia, bona Basileia ena sivarai namona ita harorolaia. Idia ese unai manoka tauna dekenai Galatia 6:​2, 5 idia duahia bona idia hadibaia Keristani taudia be ta ta dekenai heduru idia henia diba, to Iehova vairanai “ibounai ta ta sibona ena metau, ena metau do idia huaia.” Momokani, namona be ita sibona ita hekwarahi Dirava ita abidadama henia totona.

“Tanobada Ena Laloa Metau Momo Gaudia” ese Idia Hametaua, A?

5, 6. (a) Dahaka dainai manoka pablisa be ena hemami ia herevalaia neganai, ita kamonai namonamo be gau badana? (b) Edena dala ai manoka pablisa taudia do oi durua, unai amo do idia itaia Dirava amo idia daudau taudia be idia moale lasi?

⁵ Elda bona lo pablisa ma haida be manoka pablisa taudia idia durua totona, namona be edia hemami idia herevalaia neganai, idia kamonai namonamo. Reana oi be elda tauna bona tadikaka ta mai ena adavana ida oi vadivadi henia neganai, idia gwau idia be “tanobada ena laloa metau momo gaudia” dainai hebou idia mai lasi. (Luka 21:34) Reana moni ena hekwakwanai eiava ruma bese ena maduna momo dainai, metairametaira edia Keristani hesiai gaukara idia rakatania. Reana idia gwau gaukara momo idia karaia dainai idia laga-ani be namo, to idia dekenai oi gwau diba ta sibona ia noho o tadikaka taihu amo idia daudau be namo lasi. (Aonega Herevadia 18:1 duahia.) Reana idia oi nanadaia: “Hebou lao henia karana umui hadokoa dainai, hari umui moale, a? Hari emui ruma bese maurina be ia namo, a? Guna umui be Iehova umui hesiai henia dainai umui moale, to hari be edena bamona?”​​—⁠Neh. 8:​10.

⁶ Unai bamona henanadai ita henia neganai, manoka pablisa do ia itaia ia be kongrigeisen heboudia ia reaia dainai, Iehova kahirakahira ia noho lasi bona ia moale lasi. (Mat. 5:3; Heb. 10:​24, 25) Eiava unai henanadai ese ia durua ia laloparara sivarai namona ia harorolaia lasi tauna be ia moale lasi. (Mat. 28:​19, 20) Vadaeni, manoka pablisa be dahaka ia karaia be namo?

7. Orea idia rakatania taudia be edena bamona ita durudia diba?

⁷ Iesu ia gwau: “Do umui naria namonamo,  aniani bona kekero muramura bona tanobada ena laloa metau momo gaudia ese emui lalona do idia guia garina . . . Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui heau mauri.” (Luka 21:​34-​36) Bema haida be orea idia rakatania to idia ura guna idia mamia moalena idia abia lou, vadaeni idia ita hagoadaia diba Dirava ena lauma helaga bona heduru totona Dirava idia guriguri henia bona edia guriguri hegeregerena kara ta idia karaia be namo.​​—⁠Luka 11:⁠13.

Dahaka ese Idia Ia Hahekwakwanaia?

8, 9. Elda tauna ese ta ena kara o hereva ese ia hahekwakwanaia tauna be edena bamona ia durua diba?

⁸ Ita be goevadae lasi taudia dainai, nega momo ma haida edia kara o hereva ese ita ia hahekwakwanaia diba. Kongrigeisen lalonai idia matauraia tadikaka ta be ia maoro lasi karana ta ia karaia neganai, unai ese haida ia hahekwakwanaia diba. Bema pablisa ta be unai bamona tadikaka ena kara dainai orea ia rakatania, vadaeni ia vadivadi elda tauna ese unai manoka pablisa ia hamaoroa diba Iehova be ta ia hahekwakwanaia lasi. Unai dainai ita ura lasi eda hetura karana Iehova bona Iena taunimanima ida ita hadikaia, to namona be Dirava ita hesiai henia noho. Ita abia dae momokani “tanobada ena kota biaguna” be ia diba dahaka ia vara bona dala maorona ai do ia hamaoromaoroa. (Gen. 18:25; Kol. 3:​23-​25) Bema tau ta be gau ta dekenai ia bampa bona ia moru, ia be tano dekenai do ia hekure sibona, a?

⁹ Manoka pablisa ia giroa lou totona, reana elda tauna be inai bamona ia gwau diba: ‘Haida be gabeai idia laloparara idia ia hahekwakwanaia gauna be gau maragina sibona bona ia ore vadaeni.’ Bema ta be elda edia sisiba ese ia hahekwakwanaia, namona be unai ia laloa dobu bona gurigurilaia. Unai amo do ia laloparara sisiba ia abia be maoro, bona sisiba ese ia hahekwakwanaia be anina lasi.​​—⁠Sal. 119:165; Heb. 12:​5-​13.

Hahediba Herevana ta Dainai ta Ia Manoka, A?

10, 11. Baibel ena hahediba hereva ta dekenai ia moale lasi manoka pablisa be edena lalohadai kereredia ia gwauraia diba?

¹⁰ Haida be reana orea idia rakatania badina Baibel ena hahediba hereva ta dekenai idia moale lasi. Dirava ese Aigupito amo ia ruhaia Israela taudia be Dirava ese idia totona ia karaia hoa karadia “idia laloaboio” bona Iehova ena “sisiba kamonai totona idia naria lasi.” (Sal. 106:13) Namona be manoka pablisa oi hadibaia “hesiai tauna mai ena kamonai, bona mai ena kara maoromaoro” be hereva namodia momo ia hegaegaelaia. (Mat. 24:45) Unai pablisa be guna unai dala amo hereva momokani ia dibaia. Unai dainai unai hereva ia badinaia noho be namo.​​—⁠2 Ioa. 4.

¹¹ Elda ese manoka pablisa idia durua ia giroa lou totona, reana elda ese Iesu ena hadibaia herevana ta dainai Iesu idia rakatania hahediba taudia edia sivarai ia gwauraia diba. (Ioa. 6:​53, 66) Keriso bona iena aposetolo taudia idia rakatania taudia be Iehova ese ia henia gaudia idia laloa bada lasi bona idia moale lasi. Keristani kongrigeisen idia rakatania taudia be orea ma ta amo hadibaia hereva namodia idia davaria diba, a? Lasi!

Ta be Kara Dika Badana ta Ia Karaia, A?

12, 13. Bema manoka pablisa ta ia gwau ia kerere badana ta ia karaia, edena dala ai ia ita durua diba?

¹² Haida be kara dika badana ta idia karaia dainai, hebou dekenai idia lao lasi bona idia haroro lasi. Idia laloa bema elda taudia dekenai edia kerere idia gwauraia hedinarai, reana kongrigeisen amo do idia atoa siri. To, bema kerere karaia tauna be unai kara ia rakatania momokani bona ia helalo-kerehai, ia be kongrigeisen amo do idia atoa siri lasi. (2 Kor. 7:​10, 11) Reana kongrigeisen elda taudia ese ia do idia abia dae lou bona do idia durua ena hetura karana Iehova ida ia goada lou totona.

¹³ Bema oi be lo pablisa, bona elda taudia be oi idia abia hidi manoka pablisa oi durua totona, dahaka do oi karaia bema manoka pablisa ia gwau ia be kerere badana ta ia karaia? Paragraf  2 ai ita herevalaia bamona, namona be manoka pablisa oi hamaoroa elda taudia ia itaia totona. Bema ia ura lasi, oi ese elda taudia oi hamaoroa be namo, unai amo oi hahedinaraia oi be Iehova ena ladana bona kongrigeisen ena namo oi laloa bada. (Levitiko 5:1 duahia.) Elda taudia idia diba edena dala ai ta idia durua ia ura giroa lou bona Dirava ena ura hegeregerena ia noho totona. Hegeregere, nega haida matahakani idia henia. (Heb. 12:​7-​11) Bema ta ia gwau ia be Dirava vairanai ia kerere, unai kara dika ia karaia lou lasi, bona ia helalo-kerehai momokani, elda taudia ese ia do idia durua, bona Iehova ese ena dika ia gwauatao diba.​​—⁠Isa. 1:​18; 55:7; Iam. 5:​13-​16.

Natuna Ia Giroa Mai Neganai Ia Moale

14. Iesu ese ia gwauraia parabolena be sibona emu hereva amo oi gwauraia.

¹⁴ Bema ta be ia ura boio mamoe do ia durua, reana Iesu ena parabole Luka 15:​11-​24 ai ia herevalaia diba. Iesu ia gwau, tau matamata ta be ena tamana amo ia abia ahuna ibounai ia haorea kava. Gabeai, ia be ia badinaia matabodaga maurina ia dadaraia, ia hitolo bada, ia ura ena hanua dekenai ia giroa. Vadaeni, ena lalona ia hadaia ena tamana ena ruma dekenai ia giroa lou totona! Ia be daudau dekenai amo ia raka mai lalonai, iena tamana ese ia itaia, vadaeni mai moale ida ia heau bona ena natuna ia rosia bona ia kisi henia. Manoka pablisa be unai parabole ia laloa neganai, reana unai ese do ia hagoadaia orea dekenai ia giroa lou totona. Inai tanobada dikana be kahirakahira do ia ore dainai, namona be manoka taudia be Iehova ena orea dekenai idia giroa lou haraga.

15. Dahaka dainai haida be kongrigeisen amo idia hure oho?

¹⁵ Kongrigeisen amo idia hure oho taudia momo edia kara be boio natuna ena kara bamona lasi. Haida be metairametaira idia hure oho, bouti be metairametaira kone dekena amo ia hure oho bamona. Ma haida be tanobada ena laloa metau momo gaudia dainai, Iehova idia rakatania. Haida be tadikaka haida edia kara o hereva ese idia ia hahekwakwanaia. Haida be reana orea idia rakatania badina Baibel ena hahediba hereva ta dekenai idia moale lasi. Haida sibona be reana Baibel ena taravatu ia utua karadia idia karaia. To, inai stadi ese oi do ia durua orea idia rakatania taudia oi durua nega bada lalonai idia giroa lou totona.

“Natugu E, Oi Giroa Mai Dainai Lau Moale!”

16-18. (a) Edena dala ai elda ta ese lagani momo lalonai ia manoka tadikaka ia durua? (b) Dahaka dainai unai tadikaka ia manoka, bona edena bamona heduru ia abia? Kongrigeisen ese edena bamona ia idia abia dae?

¹⁶ Elda ta ia gwau: “Aiemai elda oreana idia ura bada manoka pablisa taudia ai vadivadi henia. Guna, tadikaka ta lau stadi henia ela bona bapatiso ia abia. Gabeai, ia be lagani 25 bamona lalonai ia manoka bona hekwakwanai momo ia davaria. Ia lau hamaoroa Baibel ena hakaua herevadia ia badinaia neganai, unai ese do ia durua unai hekwakwanai ia hanaia totona.  Gabeai, Kingdom Hall dekenai ia mai matamaia bona ia ura Baibel ia stadilaia lou, unai ese ena lalona ia hagoadaia orea ia badinaia lou totona.”

¹⁷ Dahaka dainai unai tadikaka ia manoka? Ia gwau: “Lau be tanobada gaudia lau laloa bada matamaia, to egu hetura karana Iehova ida lau laloa bada lasi. Egu stadi karana lau hadokoa, lau haroro lasi, bona hebou lao henia karana lau hadokoa. Gabeai, lau be Keristani kongrigeisen lau bamoa lasi. To, elda ta ese lau ia laloa bada bona lau ia durua dainai lau giroa mai.” Unai tadikaka be stadi ia hamatamaia lou dainai, iena hekwakwanai idia maragi idia lao. Ia gwau, “Lau laloparara egu mauri lalonai Iehova bona ena orea ena lalokau karadia bona hakaua herevadia be lasi.”

¹⁸ Kongrigeisen ese edena bamona ia idia abia dae? Ia gwau: “Lau mamia lau be Iesu Keriso ese ia gwauraia boio merona bamona. Danu, lagani 30 gunanai ia noho bona orea lalonai ia do goada noho taihu burukana ta ia gwau, ‘Natugu e, oi giroa mai dainai lau moale!’ Unai hereva ese egu kudouna ia hamarerea bada. Lau mamia egu noho gabuna korikorina dekenai lau giroa vadaeni. Elda tauna bona kongrigeisen taudia ese idia hahedinaraia lalokau, haheauka bona lau idia laloa bada dainai, idia lau tanikiu henia. Idia be Iehova bona edia dekena taudia idia lalokau henia dainai, unai ese lau ia durua lau giroa lou totona.”

Manoka Taudia Hagoadaia, Hari Kara ta Idia Karaia Totona!

19, 20. Edena dala ai manoka pablisa oi hagoadaia diba orea dekenai idia giroa lou haraga totona? Bona edena dala ai oi hahedinaraia Dirava be gau momo ita amo ia noia lasi?

¹⁹ Ita be nega dokona ai ita noho bona kahirakahira inai tanobada dikana do ia ore. Unai dainai, manoka taudia oi hagoadaia Keristani heboudia dekenai idia mai totona. Idia oi hagoadaia edia hebou lao henia karana idia hamatamaia lou haraga totona. Oi hadibaia, Satani ia ura edia hetura karana Dirava ida ia hadikaia. Bona Satani ia ura manoka taudia idia laloa tomadiho momokani idia rakatania neganai, namo bada do idia davaria. Manoka taudia oi hadibaia Iesu ena kamonai hesiai taudia sibona be moale korikori idia davaria.​​—⁠Mataio 11:​28-​30 duahia.

²⁰ Manoka taudia oi hadibaia, Dirava be gau momo ita amo ia noia lasi. Lasaro ena taihuna Maria be Iesu ena aena dekenai dava bada dehoro ia bubua neganai, haida ese ia idia gwauraia dika, to Iesu ia gwau: “Umui rakatania. . . . Ia diba gauna ia karaia.” (Mar. 14:​6-8) Iesu ese ogogami vabuna ia hanamoa, badina iena goada hegeregerena dubu dekenai kontribusen maragina ia atoa. (Luka 21:​1-4) Ita momo be Keristani heboudia dekenai ita mai bona Basileia haroro gaukara ita karaia diba. Iehova ena heduru amo hari idia manoka taudia momo be unai bamona do idia karaia danu.

21, 22. Iehova dekenai idia giroa lou taudia dekenai dahaka oi diba?

²¹ Bema mamoe bamona tauna be kongrigeisen ia rakatania bona ia hemarai o gari ena tadikaka ia hedavari henia lou totona, reana boio merona be ena ruma dekenai ia giroa lou ena parabole oi herevalaia diba. Momokani, kongrigeisen dekenai idia giroa lou taudia ese moale bada idia havaraia diba. Idia oi hagoadaia hari Satani idia dadaraia bona Dirava kahirakahira idia lao totona.​​—⁠Iam. 4:​7, 8.

²² Iehova dekenai idia giroa lou taudia be kongrigeisen taudia ese mai moale ida idia abia dae. (Lal. 3:​40) Guna idia ese Dirava ena hesiai gaukara idia karaia neganai, unai ese moale bada ia havaraia. Iehova ena orea dekenai idia giroa lou haraga taudia be vaira negana ai hahenamo momo do idia moalelaia!

Edena Bamona Do Oi Haere?

• Edena dala ai ta ese ia hahekwakwanaia manoka pablisa oi durua diba?

• Baibel ena hahediba hereva ta dekenai ia moale lasi manoka pablisa be edena bamona ita durua diba?

• Edena dala ai kongrigeisen dekenai ia giroa lou totona ia gari tauna ita durua diba?

[Study Questions]

[Picture on page 13]

Manoka pablisa ta be ena hemami ia gwauraia neganai, oi kamonai namonamo

[Picture on page 15]

Haida be boio merona ena parabole idia laloa neganai, unai ese idia ia hagoadaia idia giroa lou totona