‘Satani Do Ita Tuari Henia,’ Iesu Ia Karaia Bamona

“Satani do umui tuari henia, vadaeni umui dekena amo do ia heau boio.”​​—⁠IAM. 4:⁠7.

1. Iesu ia diba tanobada ai dahaka do ia davaria, bona dahaka do ia vara?

IESU KERISO ia diba Diabolo be ia do ia tuari henia. Momokani, Dirava ese gaigai, gwau-edeede aneru dikana unai, ia hamaoroa: “Lau ese badu oi bona hahine [Iehova ena guba oreana be iena adavana bamona] ihuanai do lau atoa bona oiemu garana bona iena garana ihuanai. Ia [Iesu Keriso] ese emu kwarana do ia haberoa bona oi ese iena aena geduna do oi haberoa.” (Gen. 3:​14, 15, NW; Apok. 12:⁠9) Iesu ena aena haberoa ena anina be inai: Tanobada taudia ese Iesu idia hamasea neganai, daudau lasi murinai Iehova be mase amo ia do ia hatorea isi lou bona guba ai king dagina do ia henia. To, gaigai ena kwarana haberoa ena anina be inai: Diabolo ia mase neganai, ta ese do ia hatorea isi lou lasi.​​—⁠Kara 2:​31, 32; Heberu 2:14 duahia.

2. Dahaka dainai Iehova ia diba Iesu be Diabolo ena hahetoho do ia hanaia?

² Iehova ia diba momokani Iesu be tanobada ai ena gaukara do ia hagugurua bona Diabolo ena hahetoho do ia hanaia. Dahaka dainai Iehova ia diba Iesu be do ia kwalimu? Badina idaunegai, guba dekenai Iehova be Iesu ia havaraia, Iesu ena kara ia itaia, bona Ia diba unai “gaukara karaia namonamo tauna” bona “vara guna Natuna” be ia kamonai bona abidadama. (Aon. 8:​22-​31, NW; Kol. 1:​15) Dirava ia diba Iesu do ia kwalimu dainai, Iena Natuna tamona sibona be tanobada dekenai ia siaia bona Diabolo be Iesu ia tohoa ela bona ia mase.​​—⁠Ioa. 3:​16.

Iehova ese Ena Hesiai Taudia Ia Hamauria

3. Diabolo be Iehova ena hesiai taudia dekenai dahaka ia karaia?

³ Iesu ia gwau, Diabolo be “inai tanobada ena lohia.” Danu, Iesu ese ena aposetolo taudia ia hamaoroa idia be dagedage do idia davaria, ia dekenai ia vara hegeregerena. (Ioa. 12:31; 15:20) Keristani taudia momokanidia be Iehova idia hesiai henia bona kara maoromaoro idia harorolaia dainai, Satani Diabolo ena taunimanima ese do idia inai henidia. (Mat. 24:9; 1 Ioa. 5:​19) Diabolo be horoa orena taudia ia tuari henia, badina idia be Keriso ida guba Basileiana lalonai do idia lohia. Danu, Satani be Iehova ena hesiai taudia momo ia tuari henia,  badina ia ura lasi idia be tanobada paradaisona dekenai mauri hanaihanai do idia abia. Baibel be ita ia hadibaia: “Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.”​​—⁠1 Pet. 5:⁠8.

4. Dahaka ese ia hamomokania, hari Dirava ena hesiai taudia be Diabolo idia tuari henia bona idia kwalimu?

⁴ Ita be Iehova Dirava ese ia gimaia oreana lalonai ita noho dainai, ita be Diabolo ita tuari henia bona ita kwalimu. Mani oi laloa: Lagani 100 lalodiai, dagedage lohia taudia momo be dala idauidau idia gaukaralaia Iehova ena Witnes taudia idia hadikaia ore totona. To idia hegeregere lasi idia haorea totona, badina Witnes taudia edia namba ia bada ia lao, bona hari, tanobada ibounai, kongrigeisen 100,000 lalodiai, Witnes taudia ibounai be kahirakahira 7 milioni bamona. To, Iehova ena taunimanima idia dagedage henia lohia taudia be hari idia noho lasi!

5. Edena dala ai Isaia 54:17 ena hereva be Iehova ena Witnes taudia dekenai ia guguru noho?

⁵ Dirava ese idaunegai Israela taudia dekenai ia gwauraia gwauhamatana be inai: “Tuari gauna ta ese oi do ia hadikaia diba lasi. Bona oi idia samania gwauraia taudia, be oi ese idia edia hereva ibounai do oi koua diba. Lau ese egu hesiai taudia do lau naria namonamo, bona kwalimu idia dekenai do lau henia.” (Isa. 54:17) Inai nega dokona lalonai, unai gwauhamata herevana be tanobada hegegemadai, Iehova ena Witnes taudia dekenai ia guguru noho. (2 Tim. 3:​1-5, 13) Ita be Diabolo ita tuari henia noho, bona ena tuari kohuna ta be hegeregere lasi Dirava ena taunimanima ia haorea totona, badina Iehova be ena taunimanima edia kahana dekenai ia gini.​​—⁠Sal. 118:​6, 7.

6. Daniela ia gwau vaira negana ai dahaka do ia vara Diabolo ena lohia dalana dekenai?

⁶ Inai nega dikana ena dokona ia ginidae neganai, Satani ena lohia dalana ibounai be do ia ore. Peroveta tauna Daniela ia gwau: “Unai basileia namba 4 [hari idia lohia gavamani] ena nega lalonai, guba ena Dirava ese basileia ta [guba dekenai] do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia [hari idia lohia gavamani] ibounai do ia hamakohia, bona haorea momokani, bona ia sibona do ia noho ela bona hanaihanai.” (Dan. 2:​44) Unai siri ena anina ia guguru neganai, Satani ena lohia dalana bona goevadae lasi taudia edia gavamani be do ia boio vaitani. Diabolo ena nega oromana ibounai be do ia boio vaitani, bona Dirava ena Basileia be tanobada ibounai ia lohiaia neganai, ta ese do ia tuari henia diba lasi.​​—⁠2 Petero 3:​7, 13 duahia.

7. Edena bamona ita diba Iehova ena hesiai taudia be Diabolo idia tuari henia bona idia kwalimu diba?

⁷ Ita diba Iehova be ena orea do ia hamauria bona hanamoa. (Salamo 125:​1, 2 duahia.) Ita be edena bamona? Baibel be ita ia hamaoroa Satani do ita tuari henia, Iesu ia karaia bamona. Momokani, aposetolo Ioane ena peroveta herevana ese ia hahedinaraia, herevana Satani be dahaka hahetoho do ia havaraia, to tanobada helarona idia abia hutuma bada taudia be inai nega dikana ena dokonai do idia roho mauri. Baibel ia gwau, unai taudia be do idia boiboi: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna [Iesu Keriso] ena danu.” (Apok. 7:​9-​14) Baibel ia gwau, horoa taudia bona mamoe idaudia be Satani idia tuari henia bona idia kwalimu. (Ioa. 10:16; Apok. 12:​10, 11) To unai ia vara diba, bema Dirava ita noia goadagoada ‘Satani ena imana dekena amo ita ia hamauria’ totona.​​—⁠Mat. 6:​13.

Diabolo Tuari Henia Dalana Hereadaena

8. Taunimanima idia noho lasi gabunai, Diabolo ese Iesu dekenai ia gaukaralaia hahetoho ginigunana be dahaka? Bona Keriso be dahaka ia gwau?

⁸ Taunimanima idia noho lasi gabunai, Diabolo be Iesu ia tohoa Iehova ia dadaraia totona. To, Iesu be Diabolo ia tuari henia​—⁠unai be haheitalai namona. Dina 40 bona hanuaboi 40 lalonai Iesu be ia aniani lasi dainai, ia hitolo  bada herea. Satani ia gwau: “Bema oi be Dirava ena Natuna neganai, inai nadi dekenai oi oda henia, vadaeni aniani gaudia dekenai do oi halaoa.” To Iesu be Satani ia dadaraia, bona ia ura lasi Dirava ese ia henia siahuna ia gaukaralaia kerere. Iesu ese Satani ia hamaoroa: “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.’ ”​​—⁠Mat. 4:​1-4; Deu. 8:⁠3.

9. Diabolo ese iseda tauanina ena ura gaudia ia gaukaralaia ita ia tohoa totona, to dahaka dainai unai hahetoho ta ita dadaraia be namo?

⁹ Hari inai negai, Diabolo ese iseda tauanina ena ura gaudia ia gaukaralaia ita ia tohoa totona. Unai dainai, ena be taunimanima ibounai be matabodaga karadia idia karaia, to namona be ita hekwarahi matabodaga karadia ita dadaraia totona. Baibel ia gwau: “Umui diba lasi, a, kara dika taudia be Dirava ena Basileia do idia davaria lasi? Umui sibona do umui koia lasi: Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. . . . Inai bamona taudia ta lasi be Dirava ena Basileia do ia davaria diba.” (1 Kor. 6:​9, 10) Unai siri ese ia hahedinaraia goevagoeva, matabodaga karadia idia karaia bona edia mauri o kara idia senisia lasi taudia be Dirava ena tanobada matamatana lalonai do idia vareai lasi.

10. Mataio 4:​5, 6 ena hereva hegeregerena, Diabolo be dahaka hahetoho amo Iesu ia tohoa Iehova ia dadaraia totona?

¹⁰ Taunimanima idia noho lasi gabunai, Diabolo ese Iesu ia tohoa gauna ma ta be Baibel ese inai bamona ia herevalaia: “Vadaeni Satani ese Hanua Helaga dekenai Iesu ia hakaua lao, Dubu Helaga ena atai dekenai ia haginia. Vadaeni ia gwau, ‘Bema oi be Dirava ena Natuna neganai, inai gabu dekena amo oi roho diho, badina be Buka Helaga ia gwau: “Dirava ese iena aneru dekenai do ia hereva henidia, vadaeni edia imana dekenai do idia abia isi oi, oiemu aena be nadi dekenai do oi botaia garina.” ’ ” (Mat. 4:​5, 6) Toana be, Satani ese Iesu ia hamaoroa namona be kara ta amo do ia hamomokania ia be Mesia. Bema Iesu be unai bamona ia karaia do ia kerere, badina Iehova be heduru do ia henia lasi. To, Iesu be unai bamona ia karaia lasi, bona Iehova ia badinaia bona Buka Helaga ena siri ta ia gwauraia. Ia gwau: “Inai hereva danu Buka Helaga dekenai ia torea, ia gwau, ‘Lohiabada oiemu Dirava dekenai do oi dibagania lasi.’ ”​​—⁠Mat. 4:7; Deu. 6:​16.

11. Edena dala ai Satani be ita ia tohoa, bona dahaka ia vara diba?

¹¹ Satani be ita ia tohoa dala idauidau ai ladana bada ita tahua totona. Reana ita do ia tohoa tanobada taudia edia dabua hahedokilaia bona tauanina ena toana hanamoa dalana ita tohotohoa totona. Eiava ita do ia tohoa maoro lasi moale karadia ita karaia totona. Bema ita be  mai eda ura ida Baibel ena sisiba ta ita dadaraia bona tanobada taudia ita tohotohoa, ita gwau diba aneru haida be ita do idia gimaia dika ta ita davaria lasi totona, a? Ena be King Davida be Bataseba ida ia kara dika bona gabeai ia helalo-kerehai, to ia be ena kara ena ahuna ia abia. (2 Sam. 12:​9-​12) Namo lasi dala kereredia amo Iehova ita tohoa, o namo lasi tanobada taudia danu ita turana karaia.​​—⁠Iamesi 4:4; 1 Ioane 2:​15-​17 duahia.

12. Mataio 4:​8, 9 be dahaka hahetoho ia kikilaia, bona Dirava ena Natuna ena haere be dahaka?

¹² Taunimanima idia noho lasi gabunai, Diabolo ese Iesu ia tohoa gauna ma ta be inai: Politikol siahuna. Satani ese Iesu dekenai tanobada edia basileia ibounai mai edia hairai ia hahedinaraia bona Iesu dekenai ia gwau: “Bema oiemu kwarana oi atoa diho, bona bema lau dekenai oi tomadiho, vadaeni inai ibounai be oi dekenai do lau henia.” (Mat. 4:​8, 9) Satani be kavakava badina ia ura Iehova tomadiho henia karana ia henaoa, bona Iesu ia tohoa Dirava ia dadaraia totona! Guna Satani be aneru namona neganai, ia be Iehova ia badinaia. To gabeai, ia ura dikadika taunimanima be ia idia tomadiho henia dainai, ia be Satani Diabolo ai ia lao, kara dika ia karaia bona ia mama momo. (Iam. 1:​14, 15) Herevana Satani be dahaka ia karaia, to Iesu be ena guba Tamana ia badinaia noho dainai ia gwau: “Satani e, idau gabu dekenai oi lao, badina be Buka Helaga lalonai ia torea, ia gwau, ‘Lohiabada oiemu Dirava do oi tomadiho henia, ia sibona dekenai hesiai gaukara do ia karaia.’ ” Momokani, Iesu be Diabolo ia tuari henia. Dirava ena Natuna be Satani ena tanobada amo ia gini siri bona unai dika tauna ia tomadiho henia lasi!​​—⁠Mat. 4:10; Deu. 6:​13; 10:⁠20.

“Satani Do Umui Tuari Henia, Vadaeni Umui Dekena amo Do Ia Heau Boio”

13, 14. (a) Diabolo be tanobada ena basileia ibounai ia hahedinaraia neganai, ia be Iesu dekenai dahaka ia henia gwauraia unai? (b) Satani be edena dala ai ita ia tohoa?

¹³ Diabolo be Iesu dekenai tanobada ena basileia ibounai ia hahedinaraia​—⁠tanobada hegegemadai, Satani be tau ta dekenai unai bamona dagi ia henia lasi. Reana Satani ia laloa, Iesu be unai gaudia ia itaia neganai, unai ese ena lalona do ia veria bona tanobada gavamani ena lohia tauna hereadaena bona siahu bada tauna ai do ia lao. Hari, reana Diabolo be ita dekenai basileia do ia henia lasi, to ia hekwarahi eda matana, taiana, bona lalona veria gaudia amo iseda kudouna ia hamiroa totona.

¹⁴ Diabolo be inai tanobada taudia ibounai ia biagua. Momokani, ia ese TV, reidio bona unai bamona gaudia ia biagua. Unai dainai, ita itaia gaudia, ita kamonai gaudia, bona ita duahia gaudia momo be matabodaga bona dagedage karadia amo idia honu. Kampani o bisinesi momo be iseda lalona veria gaudia momo idia hahedinaraia, to unai gau momo be ita do idia durua lasi. Hanaihanai Diabolo be ita ia tohoa kohu bona moni ita laloa bada totona, unai dainai iseda matana, taiana, bona lalona veria gaudia ia gaukaralaia. Bema ita itaia gaudia, ita kamonai gaudia, bona ita duahia gaudia be Baibel ena taravatu idia utua dainai ita dadaraia, unai be hegeregere ita gwau: “Satani e, idau gabu dekenai oi lao.” Momokani, Iesu ita tohotohoa, ita gini goada bona Satani ena tanobada mirona ita dadaraia. Danu, bema sikuli turadia, gaukara turadia, dekena taudia, bona varavara dekenai ita gari lasi to ita gwau ita be Iehova ena Witnes taudia bona Keriso ena hahediba taudia, anina be ita hahedinaraia ita be Satani ena tanobada amo ita gini siri unai.​​—⁠Mareko 8:​38 duahia.

15. Dahaka dainai hanaihanai ita naria namonamo bona Satani tuari henia karana ita hadokoa lasi?

¹⁵ Nega ihatoina ai Iesu be Dirava ia badinaia noho dainai, “Satani ese ia rakatania.” (Mat. 4:​11) To, ia be Iesu tohoa karana ia hadokoa lasi, badina Baibel ia gwau: “Satani ena dibagani ibounai [taunimanima idia noho lasi gabunai] ia haorea, vadaeni ia rakatania, ela bona ma nega ta.” (Luka 4:​13) Diabolo ita halusia neganai, Iehova ita tanikiu henia be namo. To hanaihanai heduru ita tahua be namo, badina  ita diba Diabolo be ita ia tohoa totona ita dekenai do ia giroa loulou. Momokani, nega ibounai ita naria namonamo, bona ita hegaegae Iehova ena hesiai gaukara helagana ita karaia noho totona, herevana dahaka hahetoho do ita davaria.

16. Iehova be dahaka do ia henia? Dahaka dainai lauma helaga abia totona ita guriguri be namo?

¹⁶ Diabolo ita tuari henia bona ita kwalimu totona, namona be ita guriguri Dirava ena lauma helaga​—⁠gau ta ese do ia koua diba lasi siahuna​—⁠ita abia totona. Lauma helaga ese ita do ia durua iseda goada amo do ita koua diba lasi gaudia ita koua o hanaia totona. Iesu be ia murinai idia raka taudia ia hamaoroa Dirava be lauma helaga do ia henia, badina ia gwau: “Umui laloa, umui [goevadae lasi taudia] be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?” (Luka 11:13) Namona be Iehova ena lauma helaga ita abia totona, ita guriguri loulou. Bema lauma helaga ena heduru ita abia bona Diabolo ita tuari henia, ita be do ita kwalimu momokani. Ma danu, guriguri karana ita hadokoa lasi bona Dirava ese ia henia tuari dabua ibounai ita atoa, ‘vadaeni do ita goada, Satani ena koikoi karadia do ita koua.’​​—⁠Efe. 6:​11-​18.

17. Dahaka moale gauna ese Iesu ia durua Diabolo ia dadaraia totona?

¹⁷ Gau ma ta ese Iesu ia durua Diabolo ia halusia totona, bona unai gauna be ita ia durua diba danu. Baibel ia gwau: “[Iesu] ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” (Heb. 12:⁠2) Iesu bamona, namona be mai moale ida Iehova ena lohia siahuna ita abia isi, Iena ladana ita hahelagaia, bona mauri hanaihanai ita laloatao. Moale gauna be inai: Dirava be Satani bona ena gaukara ibounai do ia haorea bona “manau taudia ese noho gabuna tano do idia abia, do idia helai namonamo, mai moale bona mai maino danu”! (Sal. 37:11) Unai dainai, ‘Satani do ita tuari henia’ noho, Iesu ia karaia bamona.​​—⁠Iamesi 4:​7, 8 duahia.

Edena Bamona Do Oi Haere?

• Dahaka ese ia hamomokania Iehova be ena taunimanima ia gimaia?

• Edena dala ai Iesu ese Satani ia tuari henia be haheitalai namona?

• Edena dala haida ai Diabolo ita tuari henia diba?

[Study Questions]

[Picture on page 29]

Tanobada tura henia karana be Dirava inai henia karana

[Picture on page 31]

Satani ese tanobada basileia ibounai ia hahedinaraia neganai, Iesu be unai ia dadaraia