Ruma Bese Ena Tomadiho mai Anina Bada Roho Mauri Totona!

“SIAHU Ibounai Diravana ena Dina Badana” tuarina mani oi laloa! (Apok. 16:14) Laulau dalanai, peroveta tauna Mika ia gwau: “Ororo be . . . do idia veve, bona ranu bamona do idia lao, digara be lahi lalonai ia veve bamona. Inai ororo be koura dekenai do idia veve diho. Idia be ranu ese ataiai gabuna, dekena amo ia bubua diho lao bamona.” (Mika 1:⁠4) Iehova idia hesiai henia lasi taudia be dahaka dika do idia davaria? Baibel ia gwau: “Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho.”​​—⁠Ier. 25:⁠33.

Unai dainai, namona be ruma bese kwaradia​​—⁠momo be adavana lasi tama o sina​​—⁠be edia bada vadaeni natudia dainai inai henanadai do idia laloa, ‘Egu natudia be Aramagedono amo do idia roho mauri, a?’ Baibel ese ia hahedinaraia, natudia do idia roho mauri, bema edia mauri lagani ena bada hegeregerena ai Iehova idia tura henia namonamo.​​—⁠Mat. 24:⁠21.

Ruma Bese Ena Tomadiho Negana be mai Anina Bada

Oi be tama o sina ta dainai, namona be oi gaukara goada emu natudia be “Iehova ena matahakani bona sisiba amo” oi hadibaia totona. (Efe. 6:⁠4, NW ) Emu natudia ida Baibel umui stadilaia be mai anina bada. Ita ura iseda matamata taudia be Filipi Keristani taudia bamona idia kara, Paulo ese unai taudia ia hanamoa badina mai edia ura ida Iehova idia badinaia. Paulo ia gwau: “Lauegu lalokau taudia e, umui dekenai lau noho neganai lau umui kamonai henia. Vadaeni harihari umui dekenai lau noho lasi neganai danu lau do umui kamonai henia, inai be gau badana. Mai gari bona mai heudeheude danu emui hamauria do umui tahua noho.”​​—⁠Fili. 2:​12.

Oi noho lasi negadiai emu natudia ese Iehova ena taravatu idia badinaia, a? Sikuli dekenai idia noho neganai Iehova ena taravatu idia badinaia, a? Edena dala ai emu natudia oi durua idia abia dae momokani Iehova ena taravatu idia badinaia be aonega karana, bona unai ese idia do ia gimaia, herevana oi noho lasi?

Ruma bese ena tomadiho ese emu natuna ena abidadama ia hagoadaia diba Iehova ia badinaia totona. Unai dainai, emui ruma bese ena tomadiho umui moalelaia totona, mai anina bada gaudia toi ita herevalaia.

Ruma Bese Ena Tomadiho Karaia Hanaihanai

Baibel ese ia hahedinaraia Dirava be dina ta ia abia hidi bona unai dina ai Iena aneru ia boiridia idia hebou totona. (Iobu 1:⁠6) Emui natudia dekenai unai bamona umui karaia diba. Ruma Bese Ena Tomadiho negana ena dina bona taim ta umui abia hidi bona unai umui badinaia be gau badana. To taim ma ta umui abia hidi danu, bema gau haida idia vara dainai umui hegeregere lasi umui makaia taim ginigunana ai stadi umui karaia totona, vadaeni taim iharuana ai umui stadi diba.

Namo lasi umui laloa Ruma Bese Ena Tomadiho be nega ta ta sibona umui karaia. Namona be umui laloatao, emui natudia be emui Baibel stiuden taudia ginigunadia. To, Satani ia ura idia ia hamorua. (1 Pet. 5:⁠8) Bema Ruma Bese Ena Tomadiho negana ai TV umui itaia o anina lasi gaudia ma haida umui karaia, vadaeni Satani do ia kwalimu.​​—⁠Efe. 5:​15, 16; 6:​12; Fili. 1:​10.

Ruma Bese ese Idia Badinaia Gaudia Herevalaia

Ruma Bese Ena Tomadiho negana be diba abia karana sibona lasi, to edia mauri lalonai do idia davaria gaudia umui herevalaia danu. Edena dala ai? Nega haida, namona be emui natudia ese vaira wiki lalonai do idia davaria hahetoho idia  hanaia daladia umui herevalaia. Hegeregere, stadi lalonai haroro gaukara totona kiki hereva kwadogidia umui tohoa. Matamata taudia be idia diba namonamo gaudia idia karaia neganai idia moale. Haroro gaukara ai hamatamataia herevadia bona taunimanima edia koua herevadia hanaia daladia umui tohoa karana ese emui natudia do ia durua, dala idauidau ai Basileia idia harorolaia totona.​​—⁠2 Tim. 2:​15.

Danu natudia ese turadia edia laloani karadia o herevadia idia hanaia daladia umui tohoa. Memero Kekeni Edia Henanadai​​—⁠Haere Maorodia, Volium 1 bukana ena karoa 9 ai idia noho herevadia be ruma bese ida umui herevalaia hebou diba. Rau 76 bona 77 ai hereva kwara maragina “Edena Bamona Do Lau Kara?” henunai idia noho heduru herevadia bona henanadai haida ese emu natuna do ia durua ena lalohadai ia gwauraia hedinarai totona. Turadia do oi haere henia daladia be emu tama o sina, eiava lo turana ta ida umui tohoa. Nega haida, emu Ruma Bese Ena Tomadiho negana ai haheitalai haida umui karaia diba.

Ruma bese ena tomadiho ese dala ia kehoa tama sina be natudia idia durua, Iehova kahirakahira idia lao bona Iena hesiai gaukara idia goadalaia totona. Unai idia karaia totona, July 2006 ena Awake! magasin ai hereva kwarana ladana, “Young People Ask . . . What Should I Do With My Life?” ai be hereva namodia idia noho. Unai kahana umui herevalaia neganai, emu natuna oi durua ena mauri lalonai Iehova tomadiho henia karana ia laloa bada totona. Emu natuna oi durua painia gaukara, Betele gaukara, Hesiai Gaukara Hadibaia Sikulina ia lao, o ful-taim hesiai gaukara ma haida ia karaia totona.

To inai oi laloa namonamo: Tama sina haida be edia natudia edia vaira nega sibona idia laloa bada, to hari edia natudia ese idia karaia gau namodia idia laloa bada lasi. Momokani, namona be emu natuna oi hagoadaia Betele gaukara bona misinari gaukara be ena tahua gaudia ai ia halaoa. To unai bamona oi karaia neganai, namona be oi naria namonamo, namo lasi emu natuna be oiemu ura gaudia sibona ia karaia dainai do ia badu bona ia hesiku. (Kol. 3:​21) Hanaihanai oi laloatao emu natuna mero o kekeni be sibona ena kudouna amo Iehova ia lalokau henia be namo​​—⁠oiemu ura dainai lasi. (Mat. 22:37) Unai dainai, emu natuna ese hari ia karaia gaukara namona dainai ia oi hanamoa, bona ia karaia diba lasi gaudia oi laloa momo lasi. Ia oi hagoadaia Iehova ese ia karaia gaudia ia laloa bada totona. Unai bamona oi karaia neganai, emu natuna ese Iehova ena kara namodia badinaia diba.

Ruma Bese Ena Tomadiho Moalelaia

Gau ihatoina be, Ruma Bese Ena Tomadiho negana moalelaia. Edena dala ai unai oi karaia diba? Reana nega ta ta ai idia rekodia Baibel drama ta umui kamonai o Iehova ena Witnes taudia ese idia karaia vidio ta umui itaia. Eiava Baibel ena sivarai ta umui duahia hebou neganai, ruma bese taudia ta ta ese unai sivarai lalonai idia noho taudia edia kahana ta ta idia duahia diba.

Gima Kohorona bona Awake! magasin ai idia noho kahana idauidau be ruma bese ese idia herevalaia hebou diba. Hegeregere, Awake! magasin ena rau 31 ai, hereva kwarana ladana, “How Would You Answer?” oi gaukaralaia diba. Gima Kohorona haida dekenai matamata taudia ese  idia stadilaia kahana, “Iseda Matamata Taudia Totona” ia noho. Danu kahana ma ta, “Emui Natudia Hadibaia” be tama sina ese edia natudia ida idia kikilaia hebou diba.

Tama sina edia natudia edia mauri lagani 13 ia lao 19 ese Awake! magasin ai “Young People Ask” ena kahana bona Memero Kekeni Edia Henanadai, Volium 1 bukana do idia ura henia. Unai buka umui gaukaralaia neganai, namona be karoa ta ta edia dokonai ia noho maua ladana, “Inai Henanadai Herevalaia” umui itaia danu. Unai maua umui riviulaia sibona lasi, to idia noho henanadai umui gaukaralaia ruma bese ida umui herevahereva hebou totona.

To oi naria namonamo, ruma bese ena tomadiho negana ai henanadai momo oi henia lasi. Hegeregere, tama sina ese edia natuna idia hagoadaia noutbuk ta ia abia, unai amo ruma bese ida idia herevalaia gaudia dekenai ena lalohadai, hemami bona ena mauri lalonai do ia badinaia daladia be unai noutbuk ai ia torea. To, emu natuna oi doria lasi ena noutbuk ai ia torea gaudia ia duahia badabada totona. Unai bamona oi karaia neganai, unai ese emu natuna do ia hagoadaia mai momokani ida ena lalohadai ia torea, badina do ia diba oi be nega oi henia ia sibona ese gau ta ia karaia totona.

Bema emui ruma bese ena tomadiho umui karaia hanaihanai, ruma bese ia durua diba gaudia umui herevalaia bona moalelaia, Iehova ese emui hekwarahi do ia hanamoa. Unai tomadiho negana ese emu natudia do ia durua Iehova tura henia karana idia hagoadaia totona.

[Box on page 31]

Dala Idauidau ai Ruma Bese Ena Tomadiho Karaia

“Lau bona egu tau be emai natudia kekeni ida ai stadi neganai, ai be kongrigeisen hebou ena kahana ta ai hegaegaelaia guna, bona gabeai emai natudia ai noia laulau ta idia torea ai hegaegaelaia kahana idia hahedinaraia totona. Nega haida, Baibel drama ta ai karaia eiava haroro gaukara totona hamatamaia herevadia ai tohoa. Stadi ai karaia neganai emai natudia edia mauri lagani bona diba hegeregerena ai ai karaia, unai amo idia do ai durua stadi idia moalelaia totona.”​​—⁠J.M., United States.

“Egu Baibel stiuden ena natuna mero lau durua Baibel negadiai lokua toretore idia gaukaralaia dalana ia lalopararalaia totona. Ai be Isaia bukana ena karoa bona siri edia namba ai kokia bona ena hereva be pepa ta dekenai ai printaia. Rau ta ta ai hakapua bona varo ta amo ai turia hebou. Bena unai mero be Iesu ese Nasareta ena sinagoga ai ia karaia hegeregerena ia kara. Luka 4:​16-​21 (NW ) ai ia noho sivaraina ia gwau, Iesu be “Isaia ena lokua toretore . . . idia henia” bena ia ura henia kahana ia itaia. (Isa. 61:​1, 2) To, unai mero ia ura Iesu hegeregerena ia kara neganai, Isaia 61 ia davaria be auka, badina iena lokua bukana ai karoa bona siri edia namba idia noho lasi. Unai mero be Iesu ena diba lokua toretoredia ia gaukaralaia dalana ia hoalaia dainai, ia gwau: ‘Iesu be diba momo tauna!’ ”​—⁠Y.T., Japan.

[Picture on page 30]

Natudia ese turadia edia laloani karadia o herevadia idia hanaia daladia umui tohoa

[Picture on page 31]

Umui gaukara goada Ruma Bese Ena Tomadiho negana umui moalelaia totona