Makedonia Dekenai Oi Lao Diba, A?

APOSETOLO Paulo be Asia Minor ai, davara badinai ia noho siti ladana Troa dekenai ia noho neganai, matahanai ta ia abia. Makedonia tauna ta be Paulo ia noia, ia gwau: “Makedonia kahana dekenai oi mai, oi durua ai.” Paulo be unai matahanai ia itaia neganai, ia bona ena bamoa taudia idia “laloa Dirava ese [idia] ia boiria [Makedonia taudia] dekenai sivarai namona do [idia] harorolaia.” Dahaka ia vara? Makedonia ena siti badana Filipi ai, Lidia mai ena ruma bese ida be abidadama taudia ai idia lao. Unai hanua taudia ma haida danu be abidadama taudia ai idia lao.​​—⁠Kara 16:​9-​15; NW.

Hari inai negai Iehova ena Witnes taudia danu be unai bamona ura idia hahedinaraia. Idia momo be mai edia ura ida edia moni idia gaukaralaia pablisa be momo lasi gabudia dekenai idia lao totona. Hegeregere, Lisa ia ura ena mauri lalonai ena haroro gaukara ia habadaia. Unai dainai ia be Canada amo Kenya dekenai ia lao. Canada taudia Trevor bona Emily danu be edia haroro gaukara idia habadaia totona Malawi dekenai idia lao. England taudia Paul bona Maggie be moni gaukara amo idia doko neganai, idia laloa unai be nega namona edia haroro gaukara idia habadaia totona, unai dainai East Africa dekenai idia lao. Oi be sibona emu ura oi dadaraia, a? Pablisa momo lasi gabudia dekenai oi lao diba, a? Bema oibe, oi laloa edena Baibel hakaua herevadia bona lalohadai maorodia ese oi idia durua diba oi kwalimu totona?

Emu Mauri Oi Lalohadailaia

Namona be emu kara edia badina oi laloa namonamo. Iesu ia gwau taravatu hereadaena be inai: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” Unai  dainai inai oi laloa be namo: Idau tano ai oi haroro ena badina be Iehova oi lalokau henia bona oi ura hahediba taudia halaoa gaukarana oi hagugurua. Iesu ma ia gwau: “Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ ” Dekena taudia dekenai lalokau ita hahedinaraia dalana ta be mai eda ura ida idia ita durua. (Mat. 22:​36-​39; 28:​19, 20) Idau tano dekenai haroro gaukara oi karaia totona, oi gaukara goada bona sibona emu ura oi dadaraia be namo. Namo lasi oi laloa idau tano ta dekenai oi lao be loaloa kava o holide totona. Namona be lalokau dainai emu hesiai gaukara oi karaia. Netherlands taudia Remco bona Suzanne, hari Namibia dekenai hesiai gaukara idia karaia noho, idia gwau: “Lalokau dainai ai ura iniseniai ai noho.”

Namibia dekenai sekit naria gaukara ia karaia tauna Willie, ia gwau: “Idau tano amo idia mai taudia be idia laloa lasi unai gabu ai idia noho tadikaka taihu ese idia do idia naria. To idia mai badina idia ura unai gabu ai idia noho tadikaka ida do idia gaukara hebou, bona haroro gaukara do idia durua.”

Emu kara edia badina oi laloa namonamo murinai, sibona oi nanadaia: ‘Dahaka gaukara dekenai lau be mai egu diba, bona idau tano dekenai unai diba do lau gaukaralaia? Lau be haroro tauna namona, a? Edena gado lau herevalaia? Lau ura gado matamata ma ta lau dibaia, a?’ Namona be emu ruma bese taudia ida unai umui herevalaia. Kongrigeisen elda taudia edia heduru oi tahua. Bona Iehova dekenai unai oi gurigurilaia. Unai dala idauidau amo sibona emu kara oi tahua neganai, unai ese oi do ia durua bena do oi itaia oi be hegeregere tano ma ta dekenai haroro gaukara oi karaia totona o lasi.​​—⁠Maua ladana “Sibona Oi Tahua Namonamo” itaia.

 Edeseniai Do Oi Haroro

Iehova ese Paulo be matahanai amo ia hadibaia Makedonia dekenai ia lao totona. Hari Iehova be hoa karadia amo ita ia hakaua lasi. To inai bamona magasin bona buka ma haida amo ita diba tano momo ai pablisa be momo lasi. Bema oi ura unai bamona gabudia dekenai oi lao, vadaeni unai gabu edia lista ta oi karaia be namo. Bema oi be hegeregere lasi gado matamata ta oi dibaia o idau tano dekenai oi noho daudau diba lasi, vadaeni emu tano dekenai idia noho gabu haida dekenai oi lao diba. Bena inai gaudia oi tahua, hegeregere visa, motuka, noho dalana, kohu edia davana, bona unai gabu be siahu o keru momo gabuna. Reana unai bamona idia karaia vadaeni taudia oi hereva henia, unai amo heduru oi abia diba. Iehova oi guriguri henia oi do ia durua abia hidi maorona oi karaia totona. Inai oi laloaboio lasi: Guna Paulo bona ena bamoa taudia danu “be Lauma Helaga ese edia dala ia koua, ia gwau, ‘Asia tano dekenai Sivarai Namona umui harorolaia lasi.’ ” Ena be idia ura Bitunia dekenai idia vareai, “to Iesu ena Lauma ese edia dala ia koua.” Unai hegeregerena, reana haroro gaukara oi karaia diba gabuna be do oi davaria haraga lasi.​​—⁠Kara 16:​6-​10.

Reana hari oi karaia diba gaudia haida oi laloa vadaeni. Bema oi ura tano ma ta ai haroro gaukara oi karaia, unai tano ai idia noho Iehova ena Witnes taudia edia brens opesi oi tore henia diba. Emu revareva lalonai guna eiava hari oi karaia noho hesiai gaukara oi torea hedinarai, bona oi laloa henanadai haida, hegeregere unai gabu dekenai kohu edia davana be edena bamona, noho rumadia o hospital idia noho o lasi, bona moni gaukara oi davaria diba o lasi, oi torea diba. Unai gaudia oi torea murinai emu revareva be emu kongrigeisen hesiai komiti dekenai oi henia. Bena idia ese emu revareva bona idia edia hanamoa hereva idia torea revareva be oi ura emu hesiai gaukara do oi karaia tanona ena brens opesi dekenai do idia siaia. Brens amo do oi abia revarevana ese oi do ia durua edena gabu dekenai oi lao haroro totona.

Matamanai ita herevalaia tauna Willie, ia gwau: “Unai bamona idia karaia taudia be idia ura lao tanona idia vadivadi henia guna, unai amo idia itaia bema unai be gabu namona bona do idia moale. Tadikaka ta bona ena adavana idia itaia gunika gabuna ta dekenai idia lao be auka. Unai dainai pablisa be momo lasi taoni maragina ta dekenai idia lao bona unuseniai edia hesiai gaukara idia karaia mai moale ida.”

Hahetoho Matamatadia

Emu tano oi rakatania bona tano ma ta dekenai oi lao neganai, hahetoho haida do oi davaria. Matamanai ita herevalaia taihu, Lisa ia gwau: “Sibona lau noho hemamina lau haheaukalaia be auka.” Dahaka ese Lisa ia durua? Ena kongrigeisen matamatana ai idia noho tadikaka taihu ia bamoa momo. Ena tahua gauna ta ia atoa tadikaka taihu ibounai edia ladana ia dibaia totona. Unai ia karaia totona ia be hebou ia do matamaia lasi neganai ia ginidae, bona hebou murinai tadikaka taihu ida ia herevahereva. Danu, Lisa be haroro gaukara ai ma haida ida ia gaukara hebou, momo ia boiria ena ruma dekenai bona turadia momo ia davaria. Ia gwau: “Egu tano lau rakatania bona  iniseniai lau mai dainai lau laloa momo lasi, to lau moale badina Iehova ese lau ia hanamoa bada.”

Edia ruma bese idia naria murinai, Paul bona Maggie be lagani 30 lalonai idia noholaia rumana idia rakatania. Paul ia gwau: “Momokani, emai kohu ai rakatania be auka. Ai dekenai ia auka momokani gauna be emai ruma bese ai rakatania; matamanai ai laloa unai bamona do ai karaia be auka lasi. Peleini lalonai ai tai. Inai bamona ai laloa diba, ‘Inai ita karaia diba lasi.’ To Iehova dekenai ai tabekau. Tura matamatadia oi davaria neganai, unai ese oi dekenai goada ia henia emu hesiai gaukara oi karaia noho totona.”

Greg bona Crystal be English gado idia diba dainai Canada amo idia lao Namibia dekenai, badina unuseniai momo be English gado idia diba. To gabeai idia laloparara unai gabu taudia edia gado idia dibaia danu be namo. Greg ia gwau: “Nega haida ai lalomanoka. To, unai gabu taudia edia gado ai dibaia murinai edia kara ai diba namonamo. Tadikaka taihu ai bamoa momo karana ese ai ia durua edia noho dalana hegeregerena emai noho dalana ai haidaua totona.”

Unai bamona manau bona ura bada hahedinaraia karana ese tadikaka taihu ia durua diba. Jenny be Ireland dekenai ia tubu daekau bona ia laloatao ruma bese haida be guna unuseniai idia lao. Ia gwau: “Idia be heabidae karana idia hahedinaraia. Idia mai lasi tadikaka ese do idia hesiai henia totona, to idia mai edia tadikaka idia hesiai henia totona. Idia be mai edia ura ida idia gaukara bona idia moale dainai, unai ese lau ia durua idia karaia gaukarana lau tohoa totona.” Hari, Jenny bona ena adavana be Gambia dekenai misinari gaukara idia karaia noho.

Iehova ena Hahenamo ese “Kohu Momo ia Henia”

Paulo be Makedonia ai ia karaia gaukara idauidau ese idia hagoadaia bada! Lagani 10 bamona murinai, Paulo be Filipi ai idia noho tadikaka ia tore henia ia gwau: “Umui lau laloa negadia ibounai lalonai, egu Dirava lau tanikiu henia.”​​—⁠Fili. 1:⁠3.

Trevor bona Emily be unai bamona hemami idia abia. Idia be Malawi ai hesiai gaukara idia karaia bena gabeai Gilead sikuli dekenai idia lao. Idia gwau: “Nega haida ai laloa ai karaia gauna be maoro eiava lasi, to ai moale. Ai hetura namonamo bona ai mamia Iehova be ai ia hanamoa.” Matamanai ita herevalaia taudia Greg bona Crystal, idia gwau, “Inai gaukara ese gaukara ibounai ia hereaia.”

Momokani, haida sibona be tano ma ta dekenai idia lao diba hesiai gaukara idia karaia totona. Haida be edia tano dekenai pablisa be momo lasi gabudia dekenai idia lao haroro diba. Ma haida be idia gaukara goada edia gabu kahirakahira ai idia noho kongrigeisen dekenai idia lao diba hesiai gaukara idia karaia totona. Mai anina bada gauna be inai: Mai emu kudouna bona goada ibounai ida oi gaukara goada Iehova oi hanamoa totona. (Kol. 3:​23) Unai neganai, oi dekenai inai hereva be do ia guguru: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”​​—⁠Aon. 10:⁠22.

[Box/Picture on page 5]

Sibona Oi Tahua Namonamo

Tano ma ta dekenai hesiai gaukara oi karaia totona henunai idia noho henanadai oi laloa bona mai momokani ida unai oi gurigurilaia, unai amo do oi diba bema oi be hegeregere tano ma ta dekenai oi lao totona eiava lasi. Gima Kohorona gunadia haida ai idia noho hereva ese oi do idia durua unai bamona oi karaia totona.

• Egu hetura karana Iehova ida ia goada, a?​​—⁠“Kara Haida Moale Davaria Totona” (October 15, 1997, rau 6)

• Lau be haroro gaukara lau karaia namonamo, a?​​—⁠“Painia Gaukara ai Oi Kwalimu Diba Dalana.” (May 15, 1989, rau 21)

• Egu ruma bese bona turadia lau rakatania diba, a?​​—⁠“Emu Hanua Lalohadailaia Momo Karana Hanaia Dalana Dirava Ena Hesiai Gaukara Ai” (May 15, 1994, rau 28)

• Moni dalanai lau be hegeregere, a?​​—⁠“Tano Idauna ai Hesiai Gaukara Oi Karaia Diba, A?” (October 15, 1999, rau 23)

[Picture on page 6]

Manau bona ura bada hahedinaraia karana ese tadikaka taihu ia durua diba

[Picture on page 7]

Idau tanodia dekenai idia lao bona edia hesiai gaukara idia karaia taudia be idia kwalimu momokani