Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

• Petero be davara lalonai ia diho matamaia neganai, Iesu ese ia durua karana amo dahaka ita dibaia diba? (Mat. 14:​28-​31)

Bema ita itaia tadikaka ta ena abidadama be ia maragi, namona be ia ita durua, Iesu be ena imana amo Petero ia dogoatao bona ia durua bamona.​​—⁠9/15, rau 8.

• Ena be ita be goevadae lasi taudia, to dahaka ese ita do ia durua Dirava ita badinaia noho totona?

Ura dikadia ita dadaraia totona, iseda ‘kudouna ita hegaegaelaia’ guna be namo. Anina be hekwakwanai o hahetoho ta ia do vara lasi neganai, namona be iseda lalona ita hadaia Iehova do ita badinaia. (Sal. 78:⁠8) Eda kudouna ita hegaegaelaia dalana ta be, Baibel bona iseda buka bona magasin ita stadilaia namonamo.​​—⁠9/15, rau 12-13.

• Iehova be ia hadibaia taudia amo dahaka ia ura?

Gau badana be ita manau bona ma haida ese ita idia hadibaia diba. Salamo torea tauna Davida ia gwau: “Lohiabada be namo bona maoromaoro. . . . Ia ese manau taudia dekenai iena dala ia hadibaia.” (Sal. 25:​8, 9)​​—⁠9/15, rau 21.

• Edena dala ai Iehova be ita ia hamauria?

Taunimanima ese Iehova ena natuna idia hahisia bona kirikirilaia neganai, Iehova be ia haheauka. Danu, Aberahamo ia ura ena natuna ia bouboulaia karana ese ia laulaulaia bamona, taunimanima ese Iehova ena natuna be raskol ta bamona idia hamasea neganai, Iehova ia haheauka.​​—⁠9/15, rau 28-29.

• Aonega Herevadia 24:27 amo dahaka ita dibaia?

Gau badana be ia ura headava tauna be unai maduna totona ia hegaegae namonamo. Unai ena anina be do ia hegaegae namonamo iena ruma bese edia tauanina durua gaudia ia henia, bona ruma bese ena tomadiho karadia ia gunalaia totona.​​—⁠10/15, rau 12.

• Dahaka dainai Ruma Bese Ena Tomadiho karaia hanaihanai karana ese natudia ia durua bada?

Unai ese idia do ia hagoadaia Iehova ese ia karaia gaudia idia laloa bada totona, bona idia do ia durua Iehova tura henia karana idia hagoadaia totona.​​—⁠10/15, rau 30-1.

• Kongrigeisen heboudia o hebouhebou badadia ai tadikaka ese idia henia tok be taihu ta ese sain gado ai ia hahanaia neganai, ena kwarana ia koua be maoro, a?

Bema tadikaka ta ese ia henia tok be taihu ta ese sain gado ai ia hahanaia, helai taudia be hereva henia tadikaka idia raraia bona gado hahanaia tauna idia kamonai henia. Danu, idia herevalaia gado ia hahanaia taihu be helai taudia ese idia raraia momo lasi. Unai dainai edia kwarana idia koua be badina lasi.​​—⁠11/15, rau 12.

• Edena dala ai ma haida dekenai eda lalokau ita habadaia diba?

Kingdom Hall ai, nega ginigunana hebou idia mai taudia ida ita herevahereva bona buruka taudia bona matamata taudia ita hedavari henia. Hebou ai ita itaia momo lasi o ita do hereva henia lasi taudia ida miniti haida lalonai ita herevahereva diba. Hebouhebou ita lao neganai ma haida ita hedavari henia bona idia ida ita herevahereva.​​—⁠11/15, rau 20-2.

• Edena dala ai Iehova bona Iesu be ita dekenai hemataurai karana idia haheitalaia?

Ena be Iehova be guba bona tanobada edia King badana, to taunimanima ia kara namo henia bona matauraia bada. Ia ese Aberahamo bona Mose ia hereva henia neganai, Heberu gado herevana ta idia hahanaia “pilisi” ia gaukaralaia. (Gen. 13:​14, NW; Eso. 4:​6, NW ) Dirava ese taunimanima ia kamonai henia danu. (Gen. 18:​23-​32) Iesu danu be unai bamona ia karaia, bona ia ura bada ma haida ia durua; nega momo edia ladana ia gwauraia danu.​​—⁠11/15, rau 25.