Arona ena natudia Nadaba bona Abihu idia mase murinai, dahaka dainai Mose be Eleasara bona Itamara dekenai ia badu, bona edena dala ai ena badu ia ore?​—⁠Lev. 10:​16-20.

Iehova ese hahelaga taudia ia abia hidi murinai ia ese Arona ena natudia Nadaba bona Abihu ia hamasedia, badina idia karaia lahi be Iehova ena oda hegeregerena lasi. (Lev. 10:​1, 2) Mose ese Eleasara bona Itamara ia hamaorodia edia kakadia totona do idia taitai lasi. Gabeai, Mose be Eleasara bona Itamara ia badu henidia badina kara dika ena boubou ena nanigosi idia ania lasi. (Lev. 9:⁠3) To, dahaka dainai Mose be unai bamona ia karaia?

Iehova ese Mose ia henia taravatu ia gwau, kara dika ena boubou ia henia hahelaga tauna be Lohiabada ena Palai Dubu ena ariara ai unai boubou gauna do ia ania. Unai ese ia hahedinaraia Israela tauna ese ia henia boubou gauna be Iehova ese ia abia dae. To, bema idia bouboulaia gauna ena rara be Helaga Gabuna ena daiutu ginigunana ai idia abia vareai, unai boubou gauna be do idia ania lasi, to do idia gabua ore.​—⁠Lev. 6:​24-26, 30.

Unai dina ai idia vara gaudia dainai, Mose ena ura be Iehova ese ia henia taravatu ibounai idia badinaia be namo. Eleasara bona Itamara be taravatu hegeregerena kara dika boubouna ena nanigosi idia gabua, to ena rara be Helaga Gabuna ai Iehova idia henia lasi bona idia ania lasi dainai, Mose ia badu.​—⁠Lev. 10:​17, 18.

Arona ese Mose ia haere henia badina Eleasara bona Itamara be Arona ese ia koudia boubou gauna do idia ania lasi. Arona ena natudia memero rua idia mase dainai, reana ia laloa hahelaga taudia ma haida be unai dina ai kara dika boubouna do idia ania be maoro lasi. Ena be idia ese Nadaba bona Abihu edia kara dika idia durua lasi, to reana idia laloa boubou gauna idia ania neganai, Iehova be idia dekenai do ia moale lasi.​—⁠Lev. 10:⁠19.

Reana Arona ia laloa unai be nega ginigunana iena bese taudia ese hahelaga gaukara idia karaia matamaia dainai, Dirava ena ura hegeregerena gau ibounai idia karaia namonamo be gau badana. To, Nadaba bona Abihu ese Iehova ena ladana idia hadikaia dainai Dirava ese ia hamasedia. Unai dainai, reana Arona ia laloa bema hahelaga tauna ta be kerere ta ia karaia, iena bese lalonai hahelaga taudia ma haida ese boubou gauna helagana idia ania be maoro lasi.

Mose ese ena kakana ena hereva ia abia dae, badina Levitiko 10:20 ia gwau: “Mose ese inai hereva ia kamonai, vadaeni iena badu ia keru.” Toana be Iehova ese Arona ena hereva ia abia dae danu.