ISRAELA taudia edia king ginigunana be Saulo. Ena be Dirava ese ia abia hidi, to Saulo be gabeai Dirava ia kamonai henia lasi.

Saulo be dahaka kerere ia karaia? Ia karaia kereredia ia hanaia diba, a? Iena sivarai amo dahaka ita dibaia?

Iehova ese Ia Abia Hidi King Ia Hedinarai

Saulo be king ai ia do lao lasi neganai, Samuela be Dirava ena gwaukau tauna. To, Samuela be ia buruka vadaeni bona ena natudia be Iehova idia badinaia lasi. Unai nega ai, Israela taudia be edia inai taudia ese idia tuari henidia. Israela ena tatau badadia ese Samuela idia noia king ta do ia abia hidi hahemaoro gaukarana do ia karaia bona tuari do ia gunalaia totona. Unai dainai, Iehova ese Samuela ia hamaoroa Saulo do ia horoa. Iehova ia gwau: “Ia ese lauegu bese Pilistia taudia edia siahu dekena amo do ia hamauria.”​—⁠1 Sam. 8:​4-7, 20; 9:⁠16.

Saulo be tau matamata bona mai ena hairai, unai sibona lasi, ia be manau tauna danu. Hegeregere, Samuela ia nanadaia ia gwau: “Lau be Beniamina iduhu tauna, iduhu maragi herea Israela besena ena huanai, bona lauegu famili be maragi herea, Beniamina iduhu lalonai. Badina dahaka inai bamona lau dekenai oi hereva noho?” Ena be Saulo ena tamana, Kisa, be “kohu momo” tauna, to unai ia heagilaia lasi.​—⁠1 Sam. 9:​1, 2, 21.

Samuela ese Israela taudia vairanai Iehova ese ia abia hidi king ia gwauraia hedinarai neganai, ia vara gauna mani ita itaia. Samuela ese Saulo be idia ruaosi sibona idia noho neganai, ia horoa bona ia gwau: “Inai bamona gaukara oi davaria neganai, do oi karaia namonamo, badina Dirava be oi danu ia noho.” Unai murinai, Samuela ese taunimanima ibounai ia haboua bona Iehova ese ia abia hidi king ia gwauraia hedinarai. To, Saulo be ia hemarai dainai ia komu. Iehova ese ena komu gabuna ia gwauraia hedinarai, bena idia hakaua mai neganai, Samuela ese taunimanima ibounai ia hamaoroa: “Lohiabada ese ia abia hidi tauna umui itaia, a? Taunimanima ibounai edia huanai ia be namo herea momokani, ani?”​—⁠1 Sam. 10:​7, 20-24.

Tuari Negadiai

Matamanai Israela taudia haida idia laloa Saulo be hegeregere lasi edia king ai ia lao totona. Amono taudia ese Israela ena taoni ta idia tuari henia gwauraia neganai, Saulo be “Dirava ena Lauma ese ia hasiahua.” Ia ese Israela ena tuari taudia ia haboua, Amono taudia idia tuari henidia bona idia kwalimu. Idia kwalimu  dainai, Saulo ese Iehova ia hanamoa, ia gwau: “Hari dina dekenai Lohiabada ese Israela ia hamauria vadaeni.” Unai neganai, Saulo ese Israela taudia edia lalohadai kereredia ia hamaoromaoroa.​—⁠1 Sam. 11:​1-13.

Saulo be kara namo tauna dainai Iehova ese ia hanamoa. Danu, ia diba Iehova be siahu ibounai Diravana. To, Israela taudia bona edia king idia kwalimu totona, mai anina bada gauna ta idia karaia be namo. Samuela ese Israela taudia ia hamaoroa: “Bema Lohiabada dekenai umui gari, iena hesiai gaukara umui karaia, ia dekenai do umui kamonai, bona iena oda hereva do umui kamonai henia, bona bema umui bona emui king ese Lohiabada emui Dirava ena murinai umui raka neganai, emui noho be do ia namo.” Bema Israela taudia be Iehova idia badinaia, dahaka hahenamo do idia abia? Samuela ia gwau: “Lohiabada ese gwauhamata metauna ia karaia vadaeni, ia ese umui do ia rakatania lasi, badina ia ura umui be iena bese korikori umui do ia halaoa.”​—⁠1 Sam. 12:​14, 22.

Dirava ese Israela taudia ia lalonamo henidia totona, ia idia kamonai henia be gau badana. Iseda negai danu, kamonai karana be mai anina bada. Iehova ena hesiai taudia be iena oda herevadia idia badinaia neganai, ia hanamodia. To bema Iehova idia kamonai henia lasi, dahaka ia vara diba?

“Oi be Kara Kavakava Oi Karaia”

Saulo ese Pilistia taudia ia habadua dainai, idia ura Israela besena idia tuari henia. Pilistia taudia “edia tuari taudia be momo herea, kone mirina bamona” dainai, Israela taudia idia gari. Baibel ia gwau: “Israela taudia idia itaia, dika bada herea be kahirakahira ia ginidae idia dekenai. Unai dainai nadi matudia dekenai, bona uda lalonai, bona nadi badadia murinai, bona guria gabudia, bona ranu guri lalonai idia hunia.” (1 Sam. 13:​5, 6) Saulo be dahaka do ia karaia?

Samuela ese Saulo ia hamaoroa Gilegala ai do idia hedavari, bona unuseniai Samuela ese gabua boubouna do ia karaia. Saulo ia naria, to Samuela ia ginidae haraga lasi bona ena tuari taudia ese ia idia rakatania matamaia. Unai dainai, Saulo sibona ese gabua boubouna ia karaia. Boubou gauna ia gabua ore murinai, Samuela ia ginidae. Samuela be unai ia kamonai neganai, Saulo ia hamaoroa: “Oi be kara kavakava oi karaia vadaeni. Lohiabada, oiemu Dirava ena oda hereva, oi dekenai ia henia gauna, be oi kamonai henia lasi. Bema Lohiabada ena oda oi kamonai henia neganai, ia ese oiemu basileia Israela dekenai do ia haginia ela bona hanaihanai. To harihari oiemu basileia do ia noho daudau lasi. Lohiabada dekenai oi kamonai henia lasi dainai, ia ese ia ura henia tauna ta do ia davaria, bona unai tau be iena bese taudia edia gunalaia tauna do ia halaoa.”​—⁠1 Sam. 10:8; 13:​8, 13, 14.

Saulo be Dirava ia abidadama henia lasi, bona ia hekokoroku dainai Dirava ena taravatu hegeregerena ia ese Samuela ia naria lasi, to ia sibona ese gabua boubouna ia karaia. Saulo be guna Israela tuari orea ia gunalaia tauna, Gideona bamona lasi! Iehova ese Gideona ia hamaoroa ena tuari taudia edia namba 32,000 be do ia hadihoa ela bona 300. Gideona be unai ia badinaia. Dahaka dainai? Badina Iehova ia abidadama henia bona ena heduru dainai, inai taudia 135,000 ia halusia. (Gun. 7:​1-7, 17-22; 8:10) Iehova ese Saulo ia durua diba, to Dirava ia kamonai henia lasi dainai, Pilistia taudia ese idia halusidia.​—⁠1 Sam. 13:​17, 18.

Hekwakwanai ita davaria neganai, edena bamona abia hidi ita karaia? Dirava idia abidadama henia lasi taudia idia laloa iena taravatu be anina lasi. Samuela ia ginidae haraga lasi dainai, reana Saulo ia laloa ia karaia karana be maoro. Bema Keristani taudia idia ura Dirava ese ia lalonamo henidia, Baibel ena hakaua herevadia hegeregerena abia hidi idia karaia be gau badana.

Iehova ese Saulo Ia Dadaraia

Israela taudia be Amaleka taudia idia tuari henidia neganai, Saulo be kerere badana ma ta ia karaia. Dirava be Amaleka taudia ia badu henidia badina Israela taudia be Aigupito idia rakatania neganai, Amaleka taudia ese idia tuari henidia. (Eso. 17:8; Deu. 25:​17, 18) Danu, Hahemaoro Taudia edia negai, Amaleka taudia be  bese ma haida idia durua Israela taudia idia tuari henia totona. (Gun. 3:​12, 13; 6:​1-3, 33) Unai dainai, Iehova ese Saulo ia oda henia Amaleka taudia do ia tuari henidia totona.​—⁠1 Sam. 15:​1-3.

Saulo be Iehova ena hahegani ia badinaia lasi, to Amaleka edia king bona edia animal namodia ia abidia mauri. Samuela ese Saulo ia gwau henia neganai, Saulo be dahaka ia gwau? Ia gwau: “Lauegu tuari taudia ese Amaleka taudia dekena amo idia abia. Mamoe bona boromakau namodia sibona idia alaia lasi, Lohiabada, oiemu Dirava dekenai boubou gauna do idia henia totona.” Ita diba lasi bema Saulo ese unai animal ia bouboulaidia, to ia be kamonai lasi karana ia hahedinaraia. Oibe, Saulo be hekokoroku tauna ai ia lao bona Dirava ia kamonai henia lasi. Samuela ese ia hamaoroa: “Edena kara be Lohiabada ia ura henia bada, a? Idia gabua boubou, bona boubou idauidau ia ura henia, a? Lasi, Lohiabada ena hereva idia kamonai henia taudia, be ia ura henia, ani? Oi laloa namonamo: Lohiabada kamonai henia kara, ese boubou karadia ia hereaia, . . . Oi ese Lohiabada ena hereva oi negea dainai, ia ese danu oiemu king dagi ia negea vadaeni.”​—⁠1 Sam. 15:​15, 17, 22, 23.

Iehova ese lauma helaga bona hahenamo be Saulo amo ia kokia, bena “lauma dikana ta” ese Saulo ia hahisia. Saulo be Davida​—⁠gabeai Iehova ese ia abia hidi king​—⁠ia lalodika henia bona mama henia. Nega momo Saulo ia ura Davida ia hamasea. Baibel ia gwau: “Saulo ese ia itaia bona ia diba, Lohiabada be momokani Davida dekenai ia noho,” unai dainai, “Davida dekenai ia dagedage henia gwauraia, nega ibounai.” Saulo ese Davida ia tahua loaloa ia hamasea totona, bona iena tuari taudia ia oda henidia hahelagaia taudia 85 do idia hamasea totona. Unai dainai, Iehova ese Saulo ia dadaraia!​—⁠1 Sam. 16:14; 18:​11, 25, 28, 29; 19:​10, 11; 20:​32, 33; 22:​16-19.

Pilistia taudia ese Israela taudia idia tuari henia lou neganai, Saulo be babalau hahinena ta amo heduru ia tahua. Bena murina dinana ai, tuari lalonai ia bero bona sibona ia hamasea. (1 Sam. 28:​4-8; 31:​3, 4) Israela edia kamonai lasi king ginigunana be Baibel ese inai bamona ia gwauraia: “Vadaeni Saulo be ia mase. Ia be momokani lasi dainai ia mase. Ia be Lohiabada dekenai ia momokani lasi. Ia ese Lohiabada ena oda ia kamonai henia lasi. Bona ia ese mase taudia edia lauma dekena amo, edena kara do ia karaia ena dala ia tahua, to ia ese do ia karaia ena dala be Lohiabada dekena amo ia tahua lasi.”​—⁠1 Siv. 10:​13, 14.

Saulo ena sivarai amo ita dibaia gauna be, Iehova kamonai henia karana ese boubou karana ia hereaia. Aposetolo Ioane ia gwau: “Dirava ita lalokau henia ena anina be inai, iena taravatu ita badinaia, bona iena taravatu be idia metau lasi.” (1 Ioa. 5:⁠3) Dirava ita tura henia hanaihanai totona, gau badana be ia ita kamonai henia.

[Picture on page 21]

Matamanai, Saulo be manau tauna

[Picture on page 23]

Dahaka dainai Samuela ese Saulo ia hamaoroa, “Lohiabada kamonai henia kara, ese boubou karadia ia hereaia”?