“Ita be tanobada ena laloa dalana ita abia lasi, to Dirava amo ia mai laumana ita abia, unai amo Dirava ese mai moale ida ita dekenai ia henia gaudia do ita diba.”​—⁠1 KOR. 2:⁠12.

1, 2. (a) Edena dala ai Keristani taudia be tuari ta lalonai idia noho? (b) Edena henanadai do ita herevalaidia?

 ITA Keristani taudia be tuari ta lalonai ita noho! Iseda inai tauna be mai ena siahu, ia be koikoi tauna bona tuari ia diba momo. Ia gaukaralaia tulu be mai ena siahu bona momo ia hakaudia kerere vadaeni. To, namo lasi ita laloa do ita kwalimu diba lasi. (Isa. 41:10) Iseda durua tauna ta ia noho, bona iena siahu ese Satani ena siahu ia hereaia.

² Ita be taunimanima ida ita tuari lasi, to lauma dikadia ida ita tuari. Iseda inai tauna be Satani Diabolo, bona ena tulu badana be “tanobada ena laloa dalana.” (1 Kor. 2:12) Satani ena hahetoho idauidau ita koudia totona, Dirava ena lauma ese ita ia durua diba. Unai tuari lalonai ita kwalimu bona eda hetura karana Dirava ida ita gimaia totona, Dirava ena lauma ita noia bona ena huahua be eda mauri lalonai ita hahedinaraia be namo. (Gal. 5:​22, 23) To, “tanobada ena laloa dalana” be dahaka, bona edena dala ai momo ia hakaua kerere? Edena bamona ita diba tanobada ena laloa dalana ese ita ia hakaua kerere eiava lasi? Iesu be Dirava ena lauma ia abia, bona tanobada ena laloa dalana ia dadaraia karana amo dahaka ita dibaia?

“Tanobada Ena Laloa Dalana” ​—⁠mai Ena Siahu, A?

3. Tanobada ena laloa dalana be dahaka?

³ Satani, inai “tanobada ena lohia,” be tanobada ena laloa dalana ena badina. Bona unai laloa dalana ese Dirava ena lauma ia dadaraia. (Ioa. 12:31; 14:30; 1 Ioa. 5:19) Unai laloa dalana ese taunimanima edia lalohadai bona ura ia biagua sibona lasi, to idia ia doria Iehova ena ura bona palani idia dadaraia totona.

4, 5. Satani be edena dala ai taunimanima ia biagua?

⁴ Satani be edena dala ai taunimanima ia biagua? Matamanai, Satani ese Eden umana ai Heva ia koia. Ia gwau bema Heva be Dirava ia dadaraia, ena mauri do ia moalelaia. (Gen. 3:13) Unai nega amo Satani be koikoi tauna badana ai ia lao! (Ioa. 8:44) Bena, Heva amo Adamu ia koia, bona idia be Iehova idia gwau-edeede henia. Adamu ena abia hidi kererena dainai, goevadae lasi taudia ai idia lao. Unai nega amo ema bona hari, taunimanima be Satani  ena gwau-edeede karadia idia hahedinaraia noho.​—⁠Efeso 2:​1-3 duahia.

⁵ Danu, Satani ese aneru momo ia hakaua kerere bona demoni ai idia lao. (Apok. 12:​3, 4) Unai gwau-edeede karana be abata ia do mai lasi neganai ia vara. Demoni idia laloa idia be mai edia maoro guba idia rakatania bona tanobada ai edia ura dikadia idia hagugurua. (Iuda 6) Bona hari demoni ese Satani idia durua tanobada taudia ibounai idia hakaua kerere totona. (Apok. 12:⁠9) Madi, tanobada taudia momo idia diba lasi idia be demoni ese idia biagudia.​—⁠2 Kor. 4:⁠4.

Tanobada Ena Laloa Dalana ese Oi Ia Biagua, A?

6. Edena dala ai tanobada ena laloa dalana ese ita ia biagua diba?

⁶ Keristani taudia be Satani ena koikoi daladia idia diba, to taunimanima momo be unai idia diba lasi. (2 Kor. 2:11) Momokani, bema tanobada ena laloa dalana ita dadaraia, ita do ia biagua lasi. To, bema ita ura henia, ita ia biagua unai. Inai stadi lalonai henanadai foa do ita herevalaia. Ita do idia durua unai amo do ita diba, bema ita be Dirava ena lauma o tanobada ena laloa dalana ese ia biagua.

7. Satani ia ura Iehova ita rakatania dainai, dahaka ia gaukaralaia?

⁷ Lau abia hidi moale karadia ese dahaka idia hahedinaraia? (Iamesi 3:​14-18 duahia.) Satani ia ura dagedage karadia ita ura henia bona Dirava ita rakatania. Badina ia diba Iehova be dagedage karadia idia ura henia taudia ia inai henia. (Sal. 11:⁠5) Unai dainai, Satani ese buka, muvi, miusiki bona vidio gadara ia gaukaralaia taunimanima edia lalona ia veria matabodaga bona dagedage karadia idia ura henia totona. Ena be ita gwau ita be kara maoromaoro ita badinaia, to Satani be unai ia laloa lasi. Ia moale bema nega haida kara dikadia ita ura henia danu.​—⁠Sal. 97:⁠10.

8, 9. Buka, muvi, miusiki o vidio gadara ita abia hidi neganai, edena henanadai ita lalodia be namo?

⁸ Dirava ena lauma ese ia biagua taudia be edia ruma dekenai matabodaga bona dagedage muvi idia itaia lasi, badina edia dekena taudia dekenai kara goevadia bona maino idia harorolaia. Oibe, Dirava amo aonega ia abia tauna be “ia koikoi lasi.” Unai dainai sibona ita nanadaia: ‘Lau abia hidi buka, muvi, miusiki bona vidio gadara ese lau idia durua kara goevadia lau hahedinaraia totona, a?’

⁹ Iehova ia ura ia sibona do ita tomadiho henia. Guna Satani ese Iesu ia tohoa hegeregerena, ia ura ita danu be ia do ita tomadiho henia. (Luka 4:​7, 8) Sibona ita nanadaia: ‘Lau abia hidi buka, muvi, miusiki o vidio gadara ese lau idia durua Dirava lau tomadiho henia totona, a? Lau idia durua tanobada ena laloa dalana lau dadaraia o lau abia dae totona, a? Gau haida lau haidaua be namo, a?’

10, 11. (a) Moni bona kohu dekenai, tanobada ena laloa dalana be dahaka? (b) Baibel ena sisiba be dahaka?

¹⁰ Kohu bona moni dekenai egu lalohadai be dahaka? (Luka 18:​24-30 duahia.) Tanobada ena laloa dalana ese mataganigani bona kohu ura henia karana ia habadaia. (1 Ioa. 2:16) Unai dainai momo idia ura taga taudia ai idia lao. (1 Tim. 6:​9, 10) Unai bamona laloa dalana ese ita ia hakaua kerere bona do ita laloa kohu momo ita haboua neganai, mauri namona do ita davaria. (Aon. 18:11) To, bema moni ita ura henia bada, Dirava do ita dadaraia bona Satani do ia kwalimu. Sibona ita nanadaia: ‘Egu mauri lalonai moni, kohu bona moale karadia sibona lau laloa bada, a?’

¹¹ Baibel ese ita ia sisiba henia moni ita laloa namonamo, bona do ita gaukara goada tauanina dalanai ita bona eda ruma bese ita naria totona. (1 Tim. 5:⁠8) Dirava ena lauma idia abia taudia be Iehova ena hariharibada karana idia tohotohoa. Idia be kohu o moni idia laloa bada lasi, to taunimanima idia laloa bada. Unai dainai, idia dekenai kohu o moni ia hegeregere neganai, mai moale ida haida idia durua. (Aon. 3:​27, 28) Bona idia ura lasi moni o kohu momo tahua karana ese edia hesiai gaukara ia hadikaia.

12, 13. Edena dala ai Dirava ena lauma ese ita ia durua?

 ¹² Egu kara bona lalohadai be Dirava ena lauma o tanobada ena laloa dalana ese idia biagua? (Kolose 3:​8-10, 13 duahia.) Tanobada ena laloa dalana ese ura dikadia ia havaraia. (Gal. 5:​19-21) Hekwakwanai ita davaria neganai, iseda kara amo do ita diba ita be daika ese ia biagua. Hegeregere, reana iseda tadikaka o taihu ta ese ita ia hereva henia lasi, ena kara ese ita ia hahekwakwanaia o kerere ta ia karaia. Ma danu sibona eda ruma dekenai ita karaia gaudia amo do ita diba ita be Dirava ena lauma o tanobada ena laloa dalana ese ia biagua. Namona be sibona eda kara ita tahua namonamo: ‘Idia hanaia hua siks lalonai egu kara bona hereva amo Keriso lau tohotohoa, o egu kara gunadia lau badinaia noho?’

¹³ Dirava ena lauma ese ita ia durua diba ‘mauri gunana mai ena kara idauidau do ita kokia bona mauri matamata be dabua bamona do ita hahedokilaia.’ Unai ese ita do ia durua ma haida dekenai lalokau bona hebogahisi ita hahedinaraia totona. Danu, ena be badina maorona ta dainai ita badu, to namona be mai eda kudouna ibounai ida ma haida edia dika ita gwauatao. Bema ita laloa ta ese ita dekenai ia karaia karana be maoro lasi, namo lasi ia dekenai “hereva dika, laloa dika, bona samania koikoi hereva” ita gwauraia. To, ita hekwarahi ia dekenai kara namo bona hebogahisi ita hahedinaraia totona.​—⁠Efe. 4:​31, 32, BH.

14. Momo edia lalohadai Baibel dekenai be dahaka?

¹⁴ Baibel ena kara maoromaoro taravatudia lau matauraia bona ura henia, a? (Aonega Herevadia 3:​5, 6 duahia.) Tanobada ena laloa dalana ese Dirava ena Hereva ia dadaraia. Unai laloa dalana idia badinaia taudia be Baibel ena hereva haida sibona idia abia dae, to taunimanima edia sene karadia bona aonega herevadia idia laloa bada. (2 Tim. 4:​3, 4) Ma haida be Baibel ena hereva idia dadaraia momokani. Idia laloa edia diba be hereadae bona Baibel ena hereva be anina lasi bona koikoi. Baibel ena taravatu goevadia idia mogea bona idia gwau heudahanai, tatau (o hahine) idia sihari heheni bona headava hadokoa karana be kerere lasi. Idia ese ‘dika idia gwauraia namo, bona namo idia gwauraia dika.’ (Isa. 5:20) Ita danu be unai bamona ita laloa, a? Hekwakwanai ita davaria neganai, ita be taunimanima edia aonega herevadia bona sibona eda diba dekenai ita tabekau, a? Eiava ita hekwarahi Baibel ena sisiba ita badinaia totona, a?

15. Sibona eda diba dekenai ita tabekau lasi, to dahaka ita karaia be namo?

¹⁵ Dirava ena lauma ese ita ia durua Baibel ita matauraia totona. Salamo torea tauna ia gwau, Dirava ena hereva be lamepa bamona iseda raka dalana ia hadiaria noho. (Sal. 119:105) Namona be sibona eda diba dekenai ita tabekau lasi, to namo bona dika ita lalopararalaia totona, Baibel ena heduru ita tahua.  Baibel ena hereva ita matauraia sibona lasi, to Dirava ena taravatu ita ura henia danu be gau badana.​—⁠Sal. 119:⁠97.

Iesu amo Ita Dibaia Gaudia

16. “Keriso ena lalohadai” ita abia totona, dahaka ita karaia be namo?

¹⁶ Dirava ena lauma ita abia totona, “Keriso ena lalohadai” ita abia be gau badana. (1 Kor. 2:16) “Keriso Iesu ena laloa dalana” ita abia totona, namona be iena hahediba daladia bona kara ita dibaia bona tohotohoa. (Roma 15:5; 1 Pet. 2:21) Unai ita karaia diba daladia haida mani ita itaia.

17, 18. (a) Guriguri karana dekenai, Iesu amo dahaka ita dibaia? (b) Dahaka dainai ‘do ita noinoi noho’ be namo?

¹⁷ Dirava ena lauma totona guriguri. Iesu be hahetoho ia do davaria lasi neganai, Dirava ena lauma ena heduru ia noia. (Luka 22:​40, 41) Ita danu be unai bamona ita karaia be namo. Mai abidadama ida Iehova ita guriguri henia neganai, mai moale ida ena lauma helaga be ita dekenai do ia henia. (Luka 11:13) Iesu ia gwau: “Do umui noinoi noho, bona umui dekenai do idia henia. Do umui tahua noho, bona do umui davaria, bona iduara dekenai do umui pidipidi noho, bena do idia kehoa. Badina idia noinoi taudia ibounai be do idia abia, bona idia tahua taudia ibounai be do idia davaria, bona iduara dekenai idia pidipidi taudia ibounai dekenai iduara do idia kehoa.”​—⁠Mat. 7:​7, 8.

¹⁸ Iehova ena lauma bona heduru ita abia totona, nega tamona sibona ita guriguri be hegeregere lasi. Nega ibounai do ita guriguri bona iseda guriguri ita halataia diba. Nega haida Iehova ia ura taunimanima ese edia guriguri amo do idia hahedinaraia, idia gurigurilaia gauna idia laloa bada bona ia idia abidadama henia eiava lasi, bena edia guriguri do ia haerelaia. a

19. Iesu be nega ibounai dahaka ia karaia, bona dahaka dainai ia ita tohotohoa be namo?

¹⁹ Mai lalona ibounai ida Iehova badinaia. Iesu be nega ibounai ena Tamana hamoalea karadia ia karaia. Ena be nega ta Iesu ena hemami be ena Tamana ena ura amo ia idau, to Tamana ia hamaoroa: “Egu ura lasi, oiemu ura do ia vara be namo.” (Luka 22:42) Sibona oi nanadaia: ‘Dirava lau badinaia ena be nega haida unai lau karaia be auka, a?’ Mauri ita abia totona Dirava ita badinaia be mai anina bada. Badina ia be ita ia Havaraia, eda mauri ena Badina bona eda Durua Tauna. (Sal. 95:​6, 7) Iehova ese ita ia lalonamo henia totona ia ita badinaia be gau badana.

20. Iesu ena mauri lalonai dahaka ia laloa bada, bona edena dala ai ia ita tohotohoa diba?

²⁰ Baibel dibaia namonamo. Iesu be Satani ese ena abidadama ia tohoa neganai, Buka Helaga amo Satani ia haere henia. (Luka 4:​1-13) Iesu be tomadiho idia dagedage henia taudia vairadiai Buka Helaga amo ena hereva ia hamomokania. (Mat. 15:​3-6) Ena mauri lalonai Dirava ena taravatu ia dibaia bona hagugurua dalana ia laloa bada. (Mat. 5:17) Ita danu, namona be Baibel ena hereva amo iseda abidadama ita hagoadaia noho. (Fili. 4:​8, 9) Momokani, nega haida ita davaria nega be lasi sibona eda stadi bona ruma bese stadi ita karaia totona. To, namona be sediual dekenai nega ita atoa unai ita karaia totona.​—⁠Efe. 5:​15-17.

21. Dahaka ese ita ia durua Dirava ena Hereva ita diba namonamo bona badinaia totona?

²¹ “Igui hesiai tauna mai ena kamonai bona mai ena kara maoromaoro,” be ita idia hagoadaia wiki ta ta lalonai dina ta ita makaia Ruma  Bese Ena Tomadiho ita karaia totona. (Mat. 24:45) Unai dala oi badinaia, a? Keriso ena kara bona lalohadai oi diba totona, ena hahediba hereva haida oi stadilaia be namo. Hegeregere, Gima Kohorona January-March 2010, rau 14-15, January-March 2009, rau 10-11, July-September 2008, rau 24-25 bona October-December 2008, rau 22-23 ai inai kahana ladana “Iesu amo Ita Dibaia Gaudia” ia noho. Emui Ruma Bese Ena Tomadiho negana ai unai umui stadilaia diba.

Tanobada Ita Halusia Diba

22, 23. Tanobada ita halusia totona, dahaka ita karaia be namo?

²² Dirava ena lauma ese ita ia hakaua totona, inai tanobada ena laloa dalana ita dadaraia be namo. Nega haida unai ita karaia be auka. (Iuda 3) To ita kwalimu diba! Iesu be ena hahediba taudia ia hamaoroa: “Tanobada dekenai umui hisihisi noho, to umui goada! Lau ese tanobada lau halusia vadaeni.”​—⁠Ioa. 16:⁠33.

²³ Bema ita gaukara goada Dirava ena lauma ita badinaia totona, tanobada ita halusia diba. Oibe, “bema Dirava be iseda kahanai, daika ese ita do ia tuari henia?” (Roma 8:31) Dirava ena lauma ita abia, bona Baibel lalonai iena hakaua herevadia ita badinaia neganai, do ita lalohekwarahi lasi, lalomaino do ita abia bona ita moale badina kahirakahira tanobada matamatana ai mauri hanaihanai do ita abia.

[Footnote]

Oi Laloatao, A?

• Dahaka dainai “tanobada ena laloa dalana” be mai ena siahu?

• Ita ta ta be edena henanadai foa ita laloa be namo?

• Dirava ena lauma ita abia totona, Iesu amo dahaka gau toi ita dibaia?

[Study Questions]

[Picture on page 8]

Edena dala ai aneru haida be demoni ai idia lao?

[Picture on page 10]

Bema tanobada ena laloa dalana ita ura henia, ita do ia biagua