“Maino ia henia Diravana be umui ibounai ida ia noho be namo.”​—⁠ROMA 15:⁠33.

1, 2. Genese karoa 32 bona 33 ai daidia edia sivarai ia noho? Bona dahaka ia vara?

 IORIDANE SINAVAINA ena ist kahana dekenai, Iaboka kourana ai ia noho Penuela hanuana kahirakahira ai tadikaka rua do idia hedavari. Idia be Esau bona Iakobo, bona nega daudau ta ta idia itaia lasi. Lagani 20 gunanai, Esau ese iena vara guna ahuna be ena tadina Iakobo dekenai ia hoihoilaia. Esau ia kamonai Iakobo be do ia lou mai, vadaeni tatau 400 ia abia bona ia lao Iakobo ia hedavari henia totona. Iakobo be unai ia kamonai neganai ia gari bada. Ia laloa ena kakana ese ia do badu henia noho bona do ia alaia. Unai dainai Iakobo ese Esau dekenai harihari gaudia ia siaia. Iena hesiai taudia ta ta be animal momo ida ia siaia guna, bona Esau idia hamaoroa, unai animal be harihari gaudia iena tadina amo. Iakobo ese animal ibounai 550 be Esau dekenai ia siaia.

² Idia hedavari neganai dahaka ia vara? Iakobo be manau bona gari lasi karana ia hahedinaraia. Esau ia raka henia bona nega seven iena kakana vairanai ia igo diho! To, idia do hedavari lasi neganai, Iakobo be mai anina bada gauna ta ia karaia. Ia ese Iehova ia guriguri henia bona ia noia Esau amo do ia gimaia. Iehova ese iena guriguri ia haerelaia. Baibel ia gwau Esau ia heau lao, Iakobo ia rosia bona ia kisi henia.​—⁠Gen. 32:​11-20; 33:​1-4.

3. Iakobo bona Esau edia sivarai amo dahaka ita dibaia?

³ Unai sivarai amo ita dibaia gauna be, bema kongrigeisen lalonai hekwakwanai idia vara, namona be gau haida ita karaia ita hamaoromaoroa totona. Bema lasi, kongrigeisen lalonai maino bona lalotamona ia hadikaia diba. Iakobo be kerere ta ia karaia lasi dainai,  iena kakana ia sori henia be anina lasi. Kerere be Esau ena, badina iena vara guna ahuna ia laloa bada lasi bona aniani totona Iakobo dekenai ia hoihoilaia. To, Iakobo be unai ia laloa lasi, iena ura badana be ena tadikaka ida maino ia karaia. (Gen. 25:​31-34; Heb. 12:16) Iakobo ena kara ese ia hahedinaraia do ita gaukara goada iseda Keristani tadikaka taihu ida maino ita karaia totona. Danu, Iehova ena heduru ita noia neganai, ia ese ita do ia durua. Baibel lalonai haheitalai momo ese ita idia durua ma haida ida maino ita karaia totona. Hari ita ese haida do ita herevalaia.

Iehova Ena Haheitalai Namona

4. Dirava be kara dika bona mase amo ita ia hamauria totona, dahaka ia karaia?

⁴ Maino karaia karana dekenai Iehova be haheitalai namona. Baibel ia gwau ia be “maino ia henia Diravana.” (Roma 15:33) Iehova ena turana ai ita lao totona, ia karaia gaudia mani ita laloa. Ita be Adamu bona Heva edia natudia dainai, ita be mai eda kara dika, bona kara dika ena davana be mase. (Roma 6:23) To, Dirava be ita ia lalokau henia bada dainai, ia ura kara dika bona mase amo ita ia ruhaia. Unai dainai, iena lalokau Natuna, Iesu, be guba amo ia siaia diho bona ena mauri goevadaena ia bouboulaia iseda kara dika kokia totona. Iesu be mai moale ida iena Tamana ena ura ia hagugurua. (Ioa. 10:​17, 18) Bena Iehova ese Iesu ia hatorea isi lou bona guba dekenai ia giroa, bona Iehova dekenai iena boubou gauna ia henia. Unai boubou gauna ese kara dika amo idia helalo-kerehai taudia ibounai be mase amo ia hamauria.​—⁠Heberu 9:​14, 24 duahia.

5, 6. Edena dala ai Iesu ena boubou gauna ese taunimanima ia durua Dirava ena turana ai idia lao totona?

⁵ Kara dika dainai taunimanima be Dirava idia tura henia diba lasi. To, edena dala ai Iesu ena boubou gauna ese taunimanima ia durua? Isaia 53:5 ia gwau: “Idia dadabaia dainai, ita ese maino ita abia noho, bona idia haberoa dainai, mauri ita davaria noho.” Iesu ena boubou gauna ese dala ia kehoa kamonai taudia ese Dirava idia tura henia totona. Baibel ma ia gwau: “Unai lalokau natuna ese mauri davana ia karaia bona ena rara amo ita ia ruhaia. Unai dainai Dirava ese iseda kerere ia gwauatao.”​—⁠Efe. 1:⁠7.

⁶ Baibel ia gwau: “Dirava ia ura gau ibounai be Keriso lalonai ia honu momokani.” Dirava ese Iesu ia gaukaralaia iena ura ia hagugurua totona. To, Dirava ena ura be dahaka? Ia ura Iesu Keriso ese ia bubua rarana amo “Dirava ese ia sibona bona ma gau ibounai huanai maino ia karaia.” Dirava ese iena turana ai ia halaoa gaudia be “guba gaudia” bona “tanobada gaudia.” Idia be daidia?​—⁠Kolose 1:​19, 20 duahia.

7. “Guba gaudia” bona “tanobada gaudia” be dahaka?

⁷ Iesu ena boubou gauna dainai, horoa Keristani taudia be ‘Dirava ese ia gwauraia maoromaoro’ bona ena natudia ai idia lao bona “Dirava ida maino ai [idia] noho.” (Roma 5:1 duahia.) Baibel ese idia ia gwauraia “guba gaudia,” badina Dirava ese idia ia hatorea isi lou bona Iesu Keriso ida guba ai do idia noho. Unuseniai, “tanobada do idia lohiaia” bona hahelaga gaukarana do idia karaia. (Apok. 5:10) “Tanobada gaudia” be kara dika amo idia helalo-kerehai taudia bona tanobada dekenai do idia noho hanaihanai.​—⁠Sal. 37:⁠29.

8. Kongrigeisen ai hekwakwanai idia vara neganai, edena dala ai Iehova ita tohotohoa diba?

⁸ Paulo be Efeso horoa Keristani taudia ia tore henia neganai, ia hahedinaraia Iesu ena boubou gauna ia laloa bada. Ia gwau, Dirava ena “hebogahisi hereadaena” dainai, ia ese “Keriso ida ita ia hamauria hebou, ena be ita be kerere lalonai ita mase.” (Efe. 2:​4, 5) Ita ibounai, guba lao taudia bona tanobada ai do ita noho taudia be Dirava ena hebogahisi hereadaena dainai, ita tanikiu henia be namo. Danu, ia ita tanikiu henia badina dala ia karaia taunimanima be ia ida maino ai idia noho totona.  Nega haida, hekwakwanai haida ese kongrigeisen ena lalotamona ia hadikaia diba. Unai bamona negadia ai, namona be Dirava ena kara ita tohotohoa bona iseda tadikaka taihu ida maino ita karaia.

Aberahamo Bona Isako amo Ita Dibaia Gaudia

9, 10. Edena dala ai Aberahamo ia hahedinaraia ia ura ma haida ida maino ia karaia?

⁹ Baibel ia gwau: “ ‘Aberahamo ese Iehova ia abidadama henia, bona ia ese ia gwauraia maoromaoro,’ bona ia idia gwauraia ‘Iehova ena turana.’ ” (Iam. 2:23) Aberahamo ena abidadama ia hahedinaraia dalana ta be ia ese maino ai ma haida ia kara henidia. Hegeregere, Aberahamo ena hesiai taudia bona iena vavana, Lota ena hesiai taudia huanai hepapahuahu ia vara. (Gen. 12:5; 13:⁠7) Aberahamo bona Lota idia laloa edia hekwakwanai hamaoromaoroa totona, idia parara be namo. Mani Aberahamo ena kara ita laloa. Ia laloa lasi ia be Iehova ena turana bona iena mauri lagani be bada dainai, ia ese abia hidi do ia karaia guna. To, ia laloa bada gauna be ia bona Lota huanai maino ia noho be namo.

¹⁰ Aberahamo ese Lota ia hamaoroa: “Ita be varavara, oiemu taudia bona lauegu taudia idia heai be dika.” Bona ma ia gwau: “Ita parara be namo. Oiemu ura tano mani oi abia hidi, vadaeni oi ese lau oi rakatania. Oi be kahana oi lao, lau be kahana do lau lao.” Ena be Lota ese tano namona ia abia hidi, to Aberahamo ia badu lasi. (Gen. 13:​8-11) Unai ita diba badina tuari taudia ese Lota idia abia neganai, Aberahamo be karaharaga ia lao Lota ia hamauria totona.​—⁠Gen. 14:​14-16.

11. Aberahamo be edena dala ai Pilistia taudia ia kara henia?

¹¹ Aberahamo be Kanana tanona ai ia noho neganai, mai maino ida Pilistia taudia ia kara henia dalana mani ita laloa. Aberahamo ena hesiai taudia ese Bere-sieba dekenai ranu guri ta idia geia, bona Pilistia taudia be mai dagedage ida unai ranu guri idia abia. Unai nega ai, Aberahamo be gau ta ia gwauraia lasi bona gau ta ia karaia lasi. Gabeai, Pilistia taudia edia king ese Aberahamo ia vadivadi henia, maino gwauhamatana karaia totona. Aberahamo ia gwauhamata king ena natudia bona tubudia do ia kara namo henidia. Unai murinai, idia henaoa ranu guri be Aberahamo ese king dekenai ia gwauraia. King be unai sivarai dekenai ia hoa, bona Aberahamo dekenai ranu guri ia henia lou. Bena Aberahamo be idia ida maino ai ia noho.​—⁠Gen. 21:​22-31, 34.

12, 13. (a) Isako be edena dala ai iena tamana ena kara ia tohotohoa? (b) Isako be maino ia laloa bada dainai, dahaka hahenamo ia abia?

¹² Aberahamo ena natuna Isako danu be maino ia laloa bada tauna. Unai dainai gau haida ia karaia Pilistia taudia ida maino ai ia noho totona. Doe ia vara dainai, Isako bona iena ruma bese be tano kaukauna, Bere-lahai-roi idia rakatania bona tano namona Gerara dekenai idia lao. Unai be Pilistia taudia edia tano. Iehova ese Isako ia hanamoa bona aniani bona animal momo ia henia. Pilistia taudia be ia dekenai idia mama. Idia ura lasi Isako ena kohu ia bada ia lao dainai, iena ranu guri be tano dekenai idia koua. Pilistia ena king ese Isako ia hamaoroa, ia gwau: “Ai dekena amo oi raka siri.” Idia huanai maino ia noho totona, Isako ese Pilistia tanona ia rakatania.​—⁠Gen. 24:62; 26:​1, 12-17.

¹³ Gabu ma ta dekenai idia lao murinai, Isako ena mamoe naria taudia ese ranu guri ma ta idia geia. Pilistia mamoe naria taudia be Isako ena mamoe naria taudia ida idia hepapahuahu, idia gwau unai ranu guri be idia edia. Iena tamana hegeregerena, Isako ia ura lasi ia heai. To, iena hesiai taudia ia hamaoroa ranu guri ma ta do idia geia. To, Pilistia taudia be unai ranu guri dainai idia maumau lou. Pilistia taudia ida maino karaia totona, Isako ese iena ruma bese bona ena kohu ibounai ia abia bona gabu ma ta dekenai idia lao. Unuseniai ena hesiai taudia ese ranu guri ma ta idia geia, bona Isako ese ena ladana ia atoa Rehoboto.  Gabeai, ia be Bere-sieba dekenai ia lao. Iehova ese ia hanamoa bona ia hamaoroa: “Oi gari lasi, badina be lau ese lau durua noho oi, do lau hanamoa oi dekenai bona oiemu natuna bona oiemu tubuna dohore idia momo herea, lauegu hesiai tauna Aberahamo dainai.”​—⁠Gen. 26:​17-25.

14. Pilistia ena king be maino gwauhamatana karaia totona ia lao neganai, Isako be dahaka ia karaia?

¹⁴ Momokani, Isako be mai ena maoro ena ranu guri totona do ia heai, to unai bamona ia karaia lasi. Pilistia ena king ia diba Iehova ese Isako ena gaukara ibounai ia hanamoa. Unai dainai king be ena turadia ida Bere-sieba dekenai Isako idia vadivadi henia bona gwauhamata idia karaia neganai, king ia gwau: “Aiemai lalona ia kehoa vadaeni, Lohiabada ese ia durua vadaeni oi.” Unai negai danu Isako ia ura maino ia karaia. Baibel ia gwau: “Isako ese aria ia karaia, ibounai idia aniani hebou, bona idia inuinu hebou. Dabai idia toreisi, idia ta ta dekenai idia gwauhamata, vadaeni Isako ese ia siaidia lao, mai maino danu idia lao.” Isako ia ura lasi heai ia vara dainai, unai gabu ma ia rakatania.​—⁠Gen. 26:​26-31.

Iosepa amo Ita Dibaia Gaudia

15. Dahaka dainai Iosepa ena kakadia be maino dalanai ia idia hereva henia lasi?

¹⁵ Baibel ia gwau Isako ena natuna Iakobo be kara maoromaoro tauna. (Gen. 25:27) Matamanai ita herevalaia hegeregerena, Iakobo be iena kakana Esau ida maino ia karaia totona, ia hekwarahi bada. Iakobo ese iena tamana Isako ena haheitalai namona ia tohotohoa. To, Iakobo ena natudia be edena bamona? Iena natudia memero 12 amo, Iakobo ese Iosepa ia lalokau henia bada, badina Iosepa ese ia kamonai henia bona matauraia. (Gen. 37:​2, 14) To, Baibel ia gwau Iosepa ena kakadia ese ia idia mama henia, bona maino dalanai idia hereva henia lasi. Iosepa idia inai henia dainai, hesiai tauna bamona idia hoihoilaia, bona edia tamana idia koia idia gwau uda boroma ta ese ia koria mase.​—⁠Gen. 37:​4, 28, 31-33.

16, 17. Iosepa be edena dala ai ia hahedinaraia ia ura ena tadikaka ida maino ia karaia?

¹⁶ Iehova ese Iosepa ia hanamoa. Gabeai, Iosepa be Aigupito ena praiminista ai ia lao, bona Farao ena henunai ia gaukara. Kanana ai doe ia vara neganai, Iosepa ena kakadia be Aigupito dekenai idia lao aniani idia hoia totona. Iosepa idia itaia neganai, idia diba lasi ia be daika badina Aigupito taudia edia dabua ia hahedokilaia. (Gen. 42:​5-7) Bema Iosepa ia ura, ia bona ena tamana dekenai idia karaia kara dika ena davana ia haloua diba. To, Iosepa ia hahedinaraia ia ura idia ida maino ia karaia. Unai dainai, ena kakadia be edia sori karana idia hahedinaraia neganai, Iosepa ia gwau: “Emui lalona do idia hisihisi lasi, umui sibona ta ta dekenai badu henia lasi, lau umui hoia vadaeni, lau mai iniseni dainai. Badina be Dirava ese lau ia siaia guna, umui emui vairana dekenai, umui do lau hamauria totona.” Bena “iena kakana ibounai dekenai ia kisi henia, bona ia rosia idia dekenai mai tai danu.”​—⁠Gen. 45:​1, 5, 15.

¹⁷ Edia tamana Iakobo ia mase murinai, Iosepa ena kakadia idia laloa edia kara dika davana do ia henia. Iosepa idia hereva henia neganai, “ia tai” bona ia gwau: “Umui gari lasi. Dohore lau naria umui, bona umui emui natuna danu dohore lau naridia.” Iosepa ia hahedinaraia ia be maino ia laloa bada tauna. Vadaeni “hereva namo dekenai edia gari ia kokia, bona edia lalodia be maino idia abia.”​—⁠Gen. 50:​15-21.

“Ita Hadibaia Totona Idia Torea”

18, 19. (a) Inai stadi lalonai ita herevalaia haheitalai amo dahaka oi dibaia? (b) Stadi gabena ai dahaka do ita herevalaia?

¹⁸ Paulo ia gwau: “Guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:⁠4) Iehova ena haheitalai hereadaena, bona Aberahamo,  Isako, Iakobo, bona Iosepa edia haheitalai amo dahaka ita dibaia?

¹⁹ Iehova bona taunimanima huanai maino ia vara totona, Iehova ese ia karaia gaudia ita laloa neganai, ita danu do ita ura gau haida ita karaia, ma haida ida maino ai ita noho totona. Aberahamo, Isako, Iakobo, bona Iosepa edia sivarai ese tama sina ia durua edia natudia dekenai haheitalai namona idia hahedinaraia, bona idia hadibaia ma haida ida maino idia karaia totona. Danu, ita dibaia gauna ta be idia ura maino idia karaia taudia be Iehova ese ia hanamodia. Unai amo Paulo ena hereva ita lalopararalaia, ia gwau, Iehova be “maino ia henia Diravana.” (Roma 15:33; 16:20 duahia.) Maino ita karaia ena badina bona maino ita havaraia diba daladia be Paulo ese ia herevalaia. Stadi gabena ai unai gaudia do ita herevalaia.

Dahaka Oi Dibaia?

• Iakobo be Esau ida maino ia karaia totona, dahaka ia karaia?

• Iehova ena turana ai ita lao totona, ia be gau momo ia karaia. Unai oi diba dainai, dahaka do oi karaia?

• Aberahamo, Isako, Iakobo, bona Iosepa edia sivarai amo dahaka oi dibaia?

[Study Questions]

[Pictures on page 23]

Iakobo be Esau ida maino ia karaia totona, dahaka mai anina bada karana ta ia karaia?