“DO OI noho negana bona inai nega oromana ena dokona ena toana be dahaka?” (Mat. 24:⁠3) Iesu be ena hahediba taudia edia henanadai haerelaia totona, taunimanima ese idia itaia diba toa haida ia herevalaia. Mataio karoa 24, Mareko karoa 13, bona Luka karoa 21 ese unai toa idauidau idia herevalaia. Iesu ma ia gwau: “Umui gima noho.”​—⁠Mat. 24:⁠42.

Bema unai toa be ita itaia diba, dahaka dainai Iesu ia gwau do ita gima noho? Mani badina rua ita herevalaia: (1) Keristani taudia edia lalona ia veria gaudia be momo bona haida be dina gabedia ena toana idia lalopararalaia lasi dainai idia manoka bona idia gima lasi. (2) Keristani tauna ese dina gabedia ena toa haida ia itaia, to ia dekenai ia vara lasi dainai, ia gima lasi. Reana, ia laloa Iesu ese ia perovetalaia “hisihisi badana” be do daudau dainai ia gima noho be anina lasi.​—⁠Mat. 24:⁠21.

“Idia Laloa Lasi”

Iesu ese iena hahediba taudia dekenai Noa ena negai idia noho taudia edia sivarai ia gwauraia. Unai taudia idia itaia dagedage karadia idia vara, Noa be lagatoi badana ia haginia, bona ia haroro, to unai “idia laloa lasi.” (Mat. 24:​37-39) Hari danu, taunimanima be hadibaia herevadia idia laloa lasi. Hegeregere, dala dekenai motuka ena speed-limit saini idia noho, to momo ese idia badinaia lasi. Unai dainai motuka ia sipidi lasi totona taravatu karaia taudia ese dala dekenai hampa idia atoa. Unai hegeregerena, reana Keristani tauna ta be dina gabedia ena toa haida ia itaia, to ia karaia karadia amo ia hahedinaraia ia be dina gabedia ia laloa bada lasi. West Africa taihu matamata, Arielle ena sivarai mani ita laloa.

Arielle be nega momo TV dekenai hahine edia handball gadara ia itaia. Team Handball ena taravatu haida be basketbol bona soka gadara bamona. Tim ta lalonai gadara taudia be seven, bona mai edia goal keeper. Arielle be sikuli ena tim lalonai ia vareai bona ia be goal keeper. Ia ura dikadika ia gadara dainai, iena hetura karana Dirava ida idia hadikaia gaudia ia laloa lasi. Vadaeni, dahaka ia vara? Ia gwau: “Egu tim kekeni haida be mai edia mero bona drag dikadia bona kuku idia ania. Lau be unai gaudia lau dadaraia dainai lau idia kirikirilaia, to unai lau laloa lasi. To, metairametaira unai gadara ese egu tomadiho karana ia hadikaia. Lau be handball sibona lau laloa dainai, Keristani hebou negadiai lau kamonai namonamo lasi. Lau gadara neganai kara namodia lau hahedinaraia lasi, badina lau ura lau wini sibona. Unai dainai, hanaihanai lau treinini goadagoada bona egu turadia lau laloa bada lasi.

 “To nega ta, ai gadara neganai referi ese kahana tim dekenai free kick ia henia. Lau be golo dekenai lau gini bona Iehova lau noia lau do ia durua unai bolo lau koua totona! Unai nega ai lau laloparara egu hetura karana Iehova ida be ia dika. Edena dala ai Iehova lau tura henia lou?

“DVD ladana Young People Ask​—⁠What Will I Do With My Life? a be lau itaia vadaeni. To, lau ura do lau itaia lou bona lau laloa dobu. Unai DVD lalonai André ese ia davaria hekwakwanai be lau ese lau davaria hekwakwanai bamona. Elda ta ese André ia hamaoroa Filipi 3:8 do ia duahia bona laloa dobu. Unai sisiba lau badinaia dainai, egu tim lau rakatania.

“Unai ese egu lalohadai ia haidaua! Hari, wini lalohadaina bona lalohekwarahi gaudia ma haida lau laloa lou lasi. Egu Keristani turadia lau bamodia momo bona lau moale. Haroro bona hebou lao henia karana lau moalelaia. Keristani hebou dekenai lau kamonai namonamo bona egu haroro gaukara lau hanamoa danu. Nega momo heduru painia gaukara lau karaia.”

Bema gau ta ese emu lalona ia veria dainai, Iesu ese ia herevalaia toa oi laloaboio, namona be Arielle ena haheitalai oi tohotohoa. Eiava, inai oi karaia diba: Watch Tower Publications Index lalonai heduru hereva namodia oi tahua, ia be “mapu ta bamona, ita ia durua idia hunia dava bada gaudia ita davaria totona.” Unuseniai sisiba namodia bona haida ese hahetoho idia hanaia edia ekspiriens idia noho. Keristani heboudia oi moalelaia totona, oi hegaegae namonamo bona point badadia oi torea. Haida idia davaria vaira kahanai idia helai neganai, idia kamonai namonamo diba. Henanadai bona haere kahana dekenai, oi hegaegae haere oi henia guna totona. Oi gima noho dalana ma ta be, nius dekenai oi itaia gaudia be Baibel ese ia gwauraia “dina gabediai” ena toa ida oi hahegeregerea.​—⁠2 Tim. 3:​1-5; 2 Pet. 3:​3, 4; Apok. 6:​1-8.

“Do Umui Noho Hegaegae”

Dina gabedia ena toa be “tanobada ibounai dekenai” ia vara noho. (Mat. 24:​7, 14) Gabu momo ai, taunimanima milioni momo be idia gorere, idia hitolo bada, tano mareremarere idia mamia, bona Baibel ese ia perovetalaia dika ma haida idia davaria danu. To, gabu ma haida ai momo be maino ai idia noho bona dika ta idia davaria lasi. Oi be dika ta oi do davaria lasi dainai, oi laloa hisihisi badana be do ia mai haraga lasi, a? Unai be lalohadai kererena.

Hegeregere, Iesu ena hereva mani oi laloa, ia gwau “daihanai goreredia, bona hitolo bada do idia vara.” (Luka 21:11) Namo lasi ita gwau unai gaudia be gabu idauidau ai nega tamona do idia vara hebou. Lasi, to “gabu idauidau ai” bona nega idauidau ai do idia vara. Danu, Iesu ese hitolo bada ia herevalaia murinai, ena hahediba taudia ia hamaoroa idia aniani momo lasi totona. Ia gwau: “Do umui naria namonamo, aniani momo . . . amo emui lalohadai maorona umui hadikaia  garina.” (Luka 21:34) Keristani taudia ibounai be dina gabedia ena toa o dika ibounai do idia mamia lasi. To, Iesu ia gwau: “Unai gaudia idia vara umui itaia neganai, umui diba Dirava ena Basileia be ia kahirakahira.” (Luka 21:31) Unai dainai, ena be eda noho gabuna ai dika ta ita mamia lasi, to dina gabedia ena toa idauidau edia sivarai be TV, niuspepa, bona Intanet dekenai ita itaia.

Laloaboio lasi, Iehova ese hisihisi badana do ia matamaia ena “dina bona hora” ia abia hidi vadaeni. (Mat. 24:36) Tanobada ai idia vara gaudia ese unai dina do idia haidaua lasi.

Iesu ese Keristani taudia ia hagania: “Do umui noho hegaegae.” (Mat. 24:44) Nega ibounai ita noho hegaegae be namo, badina hisihisi badana ia matamaia neganai, ita diba lasi ita be edeseniai do ita noho. Reana, haida be uma gabu dekenai o ruma dekenai gaukara ta idia karaia noho. (Mat. 24:​40, 41) Vadaeni, dahaka ita karaia diba ita noho hegaegae totona?

Emmanuel, Victorine, bona edia natudia kekeni siks be Africa dekenai idia noho. To, edia gabu dekenai dina gabedia ena toa, hegeregere tano mareremarere idia mamia lasi. Unai dainai dina ta ta ai Baibel idia herevalaia hebou, unai ese idia ia durua idia noho hegaegae totona. Emmanuel ia gwau: “Dina ena siri ai duahia totona nega maorona ai abia hidi be ia auka. To, ai ese daba 6 ia lao 6:30 ai abia hidi dina ena siri bona kongrigeisen stadi totona idia makaia bukana ena paragraf haida ai hegaegaelaia totona.” Unai sediual ese idia ia durua idia gima noho totona, a? Oibe! Emmanuel be kongrigeisen ena elda oreana ena kodineita, Victorine be nega momo heduru painia gaukara ia karaia bona momo ia durua hereva momokani idia dibaia totona. Danu, edia natudia kekeni ibounai be idia goada noho.

Iesu ese ita ia hagania: “Umui gima noho bona umui noga noho.” (Mar. 13:33) Gau ta ese emu gima noho karana ia hadikaia lasi be gau badana. Namona be Arielle bamona iseda buka bona magasin bona kongrigeisen heboudia dekenai ita kamonai sisiba namodia ita badinaia. Oibe, Emmanuel ena ruma bese bamona dina ta ta ai oi noho hegaegae bona “gima noho” be gau badana.

[Footnote]

[Picture on page 4]

Dina ta ta Baibel herevalaia karana ese Emmanuel bona ena ruma bese ia durua ‘idia noho hegaegae’ totona