“Inai hereva lau gwauraia . . . lau ura kara maorona umui laloa. Vadaeni hanaihanai Lohiabada do umui hesiai henia bona gau ta ese emui lalona do ia veria lasi.”​—⁠1 KOR. 7:⁠35.

1, 2. Dahaka dainai singul bona headava taudia ese Baibel ena sisiba idia tahua be namo?

 HEADAVA taudia eiava mero bona kekeni idia hetura neganai idia moale, to nega haida lalohisihisi o lalohekwarahi gaudia idia davaria danu. Unai dainai Dirava amo heduru ita abia be namo. To iena heduru ita abia ena badina ma haida be inai: Idia headava lasi o singul Keristani taudia haida be edia varavara o turadia ese idia fosia idia headava totona; haida be idia ura headava, to tura namona ta idia do davaria lasi; haida be tau bona hahine edia maduna headava lalonai idia diba namonamo lasi; bona singul bona headava taudia be heudahanai ena hahetoho idia davaria danu.

² Unai gaudia ese ita idia hahisia bona iseda hetura karana Iehova ida idia hadikaia diba. Korinto Ginigunana karoa 7 ai, aposetolo Paulo ese sisiba namona ia torea singul bona headava taudia totona. Ia ura ena revareva idia duahia taudia ese kara maoromaoro idia badinaia bona gau ta ese edia lalona do ia veria lasi, unai amo mai kudouna ibounai ida Dirava idia hesiai henia diba. (1 Kor. 7:35) Paulo ena sisiba ese ita ibounai ia durua diba. Ia ura ita ese Iehova ena hesiai gaukara do ita karaia namonamo.

Ta Sibona ese Ia Karaia Abia Hidi

3, 4. (a) Bema ta be ena turadia o varavara ese idia fosia ia headava totona, dahaka ia vara diba? (b) Edena dala ai Paulo ena sisiba ese ita ia durua lalohadai maorona ita abia totona?

³ Aposetolo edia negai, Iuda taudia idia laloa headava be gau badana. Hari inai negai, momo be unai bamona idia laloa danu. Bema ta ena mauri lagani be bada to ia do headava lasi, ena turadia o varavara be do idia lalohekwarahi bona idia durua adavana ta ia davaria totona. Reana do idia hamaoroa namona be ia hekwarahi do ia adavaia kekeni o mero ia tahua totona. Eiava ia totona kekeni o mero ta idia abia hidi bona palani idia karaia idia hedavari totona, badina idia laloa ia ese ia adavaia be namo. To unai idia karaia neganai, badu ia havaraia diba, bona mero bona kekeni idia hahemaraia danu.

⁴ Paulo be ma haida ia doria lasi idia headava totona. (1 Kor. 7:⁠7) Ena be ia headava lasi to Iehova ena hesiai gaukara ia moalelaia, bona idia ura headava taudia ia gwauraia dika lasi. Hari inai negai, Keristani taudia ta ta be mai edia maoro abia hidi idia karaia totona, namo lasi ma haida ese idia doridia idia headava o headava lasi totona.

Singul Taudia ese Idia Karaia Diba Gaudia

5, 6. Dahaka dainai Paulo ia gwau headava lasi maurina be mai ena namo?

⁵ Paulo ena hereva Korinto taudia dekenai ese ia hahedinaraia singul Keristani taudia be Dirava idia hesiai henia namonamo diba. (1 Korinto 7:8 duahia.) Kerisendom dubu gunalaia taudia haida be idia headava lasi dainai, idia laloa idia ese headava taudia idia hereaia. To, ena be Paulo ia headava lasi, ia be sibona ena ladana ia abia isi lasi. To  ia hahedinaraia, headava lasi Keristani taudia be hesiai gaukara idauidau idia karaia diba. Edena dala ai?

⁶ Singul Keristani tauna be Iehova ena hesiai gaukara lalonai maduna idauidau ia abia dae diba, to headava Keristani tauna be reana maduna haida sibona do ia abia dae. Hegeregere, Iesu ese Paulo ia abia hidi “idau bese taudia edia aposetolo tauna” ena gaukara ia karaia totona. (Roma 11:13) Kara karoa 13 ia lao 20 lalonai Paulo ena sivarai ia noho. Ia bona misinari taudia ma haida be tano idauidau dekenai idia haroro bona kongrigeisen matamatadia idia haginia. Danu, iena hesiai gaukara lalonai dagedage momo ia davaria, to hari ita be unai ita davaria lasi. (2 Kor. 11:​23-27, 32, 33) To, Paulo be unai ibounai ia haheaukalaia bona ia moale, badina momo ia durua hahediba taudia ai idia lao totona. (1 Tes. 1:​2-7, 9; 2:19) Bema Paulo be headava tauna, reana unai ia hagugurua diba lasi.

7. Singul taihu rua edia ekspiriens mani oi gwauraia.

⁷ Singul Keristani taudia momo be edia haroro gaukara idia habadaia. Hegeregere, Bolivia dekenai singul painia taihu rua, Sara bona Limbania edia sivarai mani ita laloa. Idia ruaosi be hanua ta dekenai idia lao, lagani momo lalodiai Witnes taudia be unuseni idia haroro lasi. Idia gwau: “Unai hanua dekenai paua be lasi dainai, taunimanima be TV idia itaia lasi bona reidio idia kamonai lasi, to buka duahia karana idia moalelaia.” Idia davaria haida be Iehova ena Witnes taudia edia magasin bona buka gunadia idia do duahia noho. Ruma ta ta ai momo idia ura Baibel idia dibaia dainai, hora momo lalonai idia haroro. Unai murinai, kongrigeisen heboudia dekenai hanua taudia momo idia lao. Hahine buruka ta ia gwau: “Iehova ena Witnes taudia ese ai idia vadivadi henia dainai, reana tanobada dokona be ia kahirakahira vadaeni.”

8, 9. (a) Dahaka dainai Paulo ia gwau singul taudia ese Iehova idia hesiai henia be mai ena namo? (b) Singul taudia edia hahenamo haida be dahaka?

⁸ Headava Keristani taudia danu be teritori aukadia ai haroro gaukara namona idia karaia diba. To, teritori aukadia ma haida dekenai singul painia taudia sibona idia lao diba, badina headava taudia o mai edia natudia taudia dekenai unai teritori be do ia auka. Paulo be Korinto kongrigeisen ia tore henia  neganai, ia diba sivarai namona harorolaia gaukara bada herea ia do noho. Bona ia ura unai gaukara amo ia abia moalena be idia ese do idia mamia danu. Unai dainai, Paulo ia gwau singul taudia ese Iehova idia hesiai henia be mai ena namo.

⁹ United States dekenai singul painia taihu ta ese ena lalohadai ia gwauraia. Ia gwau: “Haida idia laloa singul taudia be idia moale diba lasi. To, lau diba Iehova tura henia karana ese moale korikorina ia havaraia. Ena be singul tauna ese headava maurina ena moale ia reaia, to bema ena mauri ia gaukaralaia namonamo do ia moale. Lau diba Iehova ese taunimanima ibounai, singul o headava taudia, ia lalokau henidia.” Unai taihu be hari haroro taudia be momo lasi tanona ai Iehova ia hesiai henia noho. Bema oi do headava lasi, emu haroro gaukara oi habadaia bona hereva momokani be ma haida dekenai oi hadibaia diba, a? Bema unai oi karaia diba, emu headava lasi maurina be harihari gauna ta Iehova amo.

Idia Ura Headava Taudia

10, 11. Edena dala Iehova ese singul taudia ia durua?

¹⁰ Nega daudau lalonai ia headava lasi tadikaka o taihu be reana gabeai ia ura do ia headava. Ia diba Iehova ena heduru ia abia be namo, unai dainai Iehova ia noia adavana namona ta ia davaria totona.​—⁠1 Korinto 7:36 duahia.

¹¹ Bema oi ura Iehova ia hesiai henia tadikaka o taihu goadana ta oi adavaia, namona be nega ibounai Iehova dekenai unai oi gurigurilaia. (Fili. 4:​6, 7) Herevana nega daudau oi naria, to oi lalohisihisi lasi be namo. Iehova be emu ura ia diba, unai dainai oi abidadama henia neganai, oi do ia durua oi haheauka noho totona.​—⁠Heb. 13:⁠6.

12. Bema ta ia ura oi ia adavaia, dahaka oi laloa guna be namo?

¹² To, bema ia goada lasi tadikaka o taihu eiava murimuri tauna ta ia ura oi ia adavaia, dahaka do oi karaia? Reana oi ura bada oi headava, to bema abia hidi kererena oi karaia, gabeai do oi davaria lalohisihisi ese emu singul negana ena lalohisihisi do ia hereaia. Laloatao, oi headava neganai emu adavana ida hanaihanai do oi noho. Unai dainai, oi laloa namonamo guna bena gabeai abia hidi oi karaia. (1 Kor. 7:27) Namo lasi oi ura dikadika headava dainai, abia hidi kererena oi karaia bena gabeai oi lalohisihisi.​—⁠1 Korinto 7:39 duahia.

Headava Totona Hegaegae

13-15. Mero bona kekeni idia hetura neganai, dahaka mai anina bada gaudia idia herevalaia be namo?

¹³ Ena be Paulo ia gwau singul tauna ese Iehova ia hesiai henia be mai ena namo, to idia ura headava taudia ia gwauraia dika lasi. Ia torea sisiba amo ia ura headava taudia ia durua, headava ena mauri bona hekwakwanai idia lalopararalaia totona, unai amo edia headava do ia goada.

¹⁴ Headava taudia haida ese edia lalohadai do idia hamaoromaoroa be namo. Idia hetura lalonai, idia laloa gau ta ese edia lalokau do ia hadikaia diba lasi. To, headava maurina be unai bamona lasi. Momokani, tau bona hahine huanai ia noho lalokauna ese moale ia havaraia diba. To, hekwakwanai idia vara neganai, unai lalokau sibona be hegeregere lasi.​—⁠1 Korinto 7:28 duahia. a

¹⁵ Idia headava murinai, momo idia hoa o idia lalohisihisi badina mai anina bada gaudia dekenai idia lalotamona lasi. Hegeregere, idia hepapahuahulaia gaudia be: Edena bamona moni do idia gaukaralaia, edena moale karadia do idia karaia, edeseni do idia noho bona edena nega ai edia ravadia do idia vadivadi henidia. Danu, idia be goevadae lasi dainai, ta ta edia kara maragimaragidia idia badulaia. Idia hetura lalonai, idia laloa unai gaudia idia herevalaia be anina lasi, to gabeai  unai gaudia dainai hekwakwanai idia vara. Unai dainai namona be idia do headava lasi neganai, unai gaudia idia herevalaia be mai anina bada.

16. Hekwakwanai idia vara neganai, headava taudia be dahaka idia karaia be namo?

¹⁶ Idia moale totona headava taudia be mai lalotamona ida edia maduna idia huaia be namo. Natudia idia matahakani henia dalana dekenai idia lalotamona be namo. Edia tama sina idia buruka neganai, do idia naridia dalana idia herevalaia be namo. Ruma bese ta ta edia hekwakwanai be idauidau. To, namo lasi unai hekwakwanai dainai idia parara. Baibel ena hakaua herevadia ese idia do ia durua edia hekwakwanai idia hamaoromaoroa, idia haheaukalaia, bona mai moale ida idia noho hebou totona.​—⁠1 Kor. 7:​10, 11.

17. Dahaka dainai headava taudia be “tanobada gaudia totona [idia] lalohekwarahi”?

¹⁷ Korinto Ginigunana 7:​32-34 duahia. Paulo ese headava maurina ia herevalaia ia gwau, headava taudia be “tanobada gaudia totona [idia] lalohekwarahi.” Unai gaudia be aniani, dabua, ruma bona ma gau haida. Momokani, tadikaka ta be ia headava lasi neganai, iena nega bona goada ia gaukaralaia ia haroro totona. To ia headava murinai, ena nega bona goada be ia gaukaralaia ena adavana ia naria bona ia hamoalea totona. Hahine danu be unai bamona ia karaia. Iehova be unai ia lalopararalaia, badina ia ura tau bona hahine ese nega do idia atoa edia headava idia hagoadaia totona.

18. Headava tauna be dahaka gau haida ia haidaua be namo?

¹⁸ Ita dibaia gauna be inai: Guna idia headava lasi neganai, tau bona hahine be edia nega bona goada idia gaukaralaia Iehova hesiai henia totona, to idia headava neganai, namona be nega idia atoa edia headava hagoadaia totona. Danu, guna turadia idia bamoa momo to idia headava neganai, namona be nega idia atoa edia adavana ida moale karana  ta idia karaia hebou. Mani ita laloa, bema tau be nega momo ena turadia ida spot gadara ta ia karaia, hahine be dahaka do ia laloa? Eiava bema hahine be nega momo ena turadia ia bamoa, tau be dahaka do ia laloa? Reana do ia laloa ena adavana ese ia lalokau henia lasi bona do ia lalohisihisi. Unai ia vara lasi totona, namona be tau bona hahine idia gaukara hebou edia headava ia goada noho totona.​—⁠Efe. 5:⁠31.

Matabodaga Karadia Dadaraia

19, 20. (a) Dahaka dainai headava taudia ese edia headava idia gimaia be namo? (b) Bema tau bona hahine be idia noho hebou lasi dahaka dika ia vara diba?

¹⁹ Iehova ena hesiai taudia idia diba matabodaga karadia idia dadaraia be gau badana. Haida be heudahanai karana idia dadaraia totona, idia laloa idia headava be namo. To, headava ese heudahanai karana amo ta ia gimaia lasi. Unai dainai, headava taudia danu do idia naria namonamo be gau badana. Baibel negadiai, hanua badadia be mai edia magu aukadia bona unai ese taunimanima ia gimaia. Bema tau ta be unai hanua ia rakatania, henaohenao bona kara dika taudia ese idia hadikaia diba. Iehova ese headava tau bona hahine dekenai ia henia taravatu be unai magu aukana bamona. Bema unai taravatu idia badinaia, matabodaga karadia amo sibona idia gimaia diba.

²⁰ Korinto Ginigunana 7:​2-5 ai, Paulo ese unai taravatu haida ia herevalaia. Ia gwau, namona be tau ese ena adavana dekenai headava kara do ia henia, bona hahine danu ena adavana dekenai headava kara do ia henia. Ma tau ta o hahine ta ida unai do idia karaia lasi. Bema tau o hahine be daudau gabuna ta dekenai ia noho, unai taravatu idia badinaia be auka. Hegeregere, nega haida tau o hahine be hanua dekenai idia lao bona nega daudau idia noho. Eiava, haida be moni gaukara dainai, edia adavana idia rakatania bona gabu daudau ai idia noho. Satani ese unai bamona negadia ia gaukaralaia diba headava ia hadikaia totona. Bema tau o hahine be ena adavana ese “ia abia be namo gauna” ia henia lasi, idia ta be heudahanai ena hahetoho dekenai ia moru diba. Edia ruma bese idia naria namonamo bona edia headava idia gimaia tatau be Iehova ese do ia hanamodia.​—⁠Sal. 37:⁠25.

Baibel Ena Sisiba Ita Badinaia Ena Namo

21. (a) Dahaka dainai ta ia headava o ia headava lasi be abia hidi badana? (b) Edena dala ai 1 Korinto karoa 7 ese ita ia durua diba?

²¹ Ta do ia headava eiava ia headava lasi be abia hidi badana. Ita ibounai be goevadae lasi taudia dainai, herevana ita headava o lasi hekwakwanai momo do ita davaria. Iehova ese ena taunimanima ia hanamodia, to nega haida edia mauri lalonai sibodia idia karaia abia hidi dainai idia lalohisihisi. To, Paulo ena sisiba 1 Korinto karoa 7 dekenai ese ita do ia durua, ita herevalaia vadaeni hekwakwanai momo ita hanaia totona. Herevana ita be singul o headava taudia, Iehova ita hamoalea diba. (1 Korinto 7:​37, 38 duahia.) Iehova ena lalonamo ita abia be hahenamo badana. Iena lalonamo be hari inai negai bona tanobada matamatana ai ita moalelaia diba. Hari inai negai, tau bona hahine huanai idia vara hekwakwanai be unai nega ai do idia vara lasi.

[Footnote]

Oi Haere Diba, A?

• Dahaka dainai mero o kekeni ta ita fosia lasi ia headava totona?

• Edena dala ai singul Keristani tauna be ena mauri ia gaukaralaia namonamo diba?

• Edena dala ai mero bona kekeni idia hetura neganai, headava totona idia hegaegae diba?

• Dahaka dainai headava ese ta be heudahanai karana amo ia gimaia lasi?

[Study Questions]

[Pictures on page 14]

Singul Keristani taudia be edia haroro gaukara idia habadaia dainai idia moale

[Picture on page 16]

Headava taudia ese dahaka gau haida idia haidaua be namo?