“Israela ena Dirava . . . ese iena kara ita dekenai do ia hadibaia, bona ita ese unai Dirava ena dala dekenai do ita raka.”​—⁠ISA. 2:⁠3.

1, 2. Edena dala ai Baibel lalonai idia noho sivarai ese oi idia durua diba?

 ITA diba Baibel lalonai idia torea herevadia be iseda namo totona. Abidadama tatau bona hahine edia sivarai oi duahia neganai, do oi ura edia kara oi tohotohoa. (Heb. 11:​32-34) To, tatau bona hahine ma haida edia sivarai oi duahia neganai, do oi ura lasi edia kara oi tohotohoa. Bona edia sivarai be sisiba bamona ita dekenai.

² Davida mani ita laloa. Ia be mamoe naria tauna namona bona gabeai king ai ia lao. Danu, ia be hereva momokani ia ura henia bona Iehova ia abidadama henia. To, kara dika badadia haida ia karaia hegeregere, Bataseba ida ia heudahanai bona Uria ia hamasea. Bona Davida ese taunimanima ia duahia karana be Dirava ese ia moalelaia lasi. To inai stadi lalonai, Davida ena natuna, Solomona do ita herevalaia, ia be king ta bona Baibel ena buka haida ia torea danu. Mani ena kara namodia rua ita herevalaia guna.

“Solomona Ena Aonega Herevadia”

3. Dahaka dainai Solomona ita tohotohoa be namo?

³ Solomona Badana, Iesu Keriso, ia gwau King Solomona be haheitalai namona bona ita tohotohoa be namo. Iesu ese Iuda taudia haida ia hamaoroa: “Hahemaoro dinana ai, saut ena kwini be inai uru ida do ia toreisi lou bona inai uru do ia gwauraia dika, badina ia be tanobada ena dokona amo ia mai Solomona ena aonega herevadia ia kamonai totona, to Solomona ia hereaia tauna be iniseniai.” (Mat. 12:42) Taunimanima momo idia diba Solomona be aonega tauna, bona ita ia hagoadaia ita aonega totona.

4, 5. Solomona be edena dala ai ia aonega? Solomona bamona hoa dalanai do ita aonega, a?

⁴ Solomona ia lohia matamaia neganai, Dirava be nihi ta amo ia hamaoroa iena ura gauna do ia gwauraia. Solomona ena diba be bada lasi dainai, aonega totona ia noinoi. (1 King Taudia 3:​5-9 duahia.) Dirava be king ena noinoi gauna dekenai ia moale dainai, “aonega bona diba bada” sibona ia henia lasi, to “kohu momo bona hemataurai” ia henia danu. (1 Kin. 3:​10-14) Iesu ia gwau Solomona ena aonega be bada dainai, Sieba ena Kwini be gabu daudau amo ia mai iena aonega herevadia ia kamonai totona.​—⁠1 Kin. 10:​1, 4-9.

⁵ Dirava ese hoa dalanai Solomona dekenai aonega ia henia. To hari inai negai, ita be hoa dalanai do ita aonega lasi. Solomona ia gwau Iehova ese “aonega” ia henia, to ma ia gwau namona be ita gaukara goada unai aonega ita abia totona. Ia gwau: “Aonega herevadia do oi kamonai, bona oiemu kudouna ese laloa kehoa do ia ura henia.” Danu, namona be aonega totona ita “noinoi” bona ita “tahua goada.” (Aon. 2:​1-6) Unai ese ia hahedinaraia, bema ita gaukara goada ita aonega diba.

6. Edena dala ai Solomona ena haheitalai ita tohotohoa diba?

⁶ Namona be sibona ita nanadaia: ‘Lau be Solomona bamona, Dirava amo ia mai aonegana lau ura henia, a?’ Momo edia mauri be  ia auka dainai, edia gaukara bona moni sibona idia laloa bada. Bona haida be gaukara namona idia abia totona sikuli badadia dekenai idia lao. To oi bona emu ruma bese be edena bamona? Umui abia hidi gaudia ese idia hahedinaraia Dirava ena aonega umui “tahua goada,” dava bada kohu umui tahua bamona, a? Emu lalohadai moni bona edukeisen dekenai oi haidaua, unai amo oi gaukara goada Dirava ena aonega oi abia totona, a? Momokani, ita abia aonega ese hari bona nega vaira ai ita do ia durua. Solomona ia gwau: “Bema oi ese lau, aonega, dekenai oi kamonai henia neganai, oi be kara maoromaoro, kota maorona, bona davana korikori henia dalana do oi diba. Dala namodia ibounai karaia dalana danu do oi diba.”​—⁠Aon. 2:⁠9.

Tomadiho Momokani Ia Badinaia

7. Dubu helaga hairaina haginia gaukarana be edena bamona ia matamaia?

⁷ Solomona ia lohia neganai, Mose ena nega amo idia gaukaralaia palai dubu ia kokia bona dubu helaga hairaina ia haginia. (1 Kin. 6:⁠1) Unai dainai, ita gwau ia be Solomona ena dubu helaga, to sibona ena ladana abia isi totona unai ia haginia lasi. Dubu helaga haginia gaukarana be Solomona ese ia laloa lasi, to iena Tamana Davida ese ia laloa guna. Bona Dirava ese dubu haginia palani be Davida dekenai ia henia. Danu, Davida ese moni bada ia henia unai gaukara durua totona. (2 Sam. 7:​2, 12, 13; 1 Siv. 22:​14-16) To Solomona ese unai haginia gaukarana ia naria, bona lagani 7 mai kahana lalonai idia haorea.​—⁠1 Kin. 6:​37, 38; 7:⁠51.

8, 9. (a) Edena dala ai Solomona be haheitalai namona? (b) Solomona be tomadiho momokani ia laloa bada neganai, dahaka ia vara?

⁸ Solomona be haheitalai namona, badina dubu haginia gaukarana ia naria bona Iehova tomadiho henia karana ia laloa bada. Dubu helaga idia haorea bona taravatu mauana be ena gabu korikorina ai idia atoa neganai, Solomona be taunimanima vairadiai ia guriguri. Iehova ia noia iena hesiai taudia be dubu helaga idia vaira henia bona idia guriguri neganai, do ia kamonai. (1 Kin. 8:​6, 29) Dirava ena ladana be unuseniai ia noho dainai, Israela taudia bona idau bese taudia be dubu helaga idia vaira henia bona guriguri diba.​—⁠1 Kin. 8:​30, 41-43, 60.

⁹ Solomona be tomadiho momokani ia  laloa bada neganai, dahaka ia vara? Dubu helaga idia hahelagaia murinai, taunimanima idia moale bada badina “Lohiabada ese iena hanamoa ibounai, be iena hesiai tauna Davida, bona iena bese Israela dekenai ia hedinaraia.” (1 Kin. 8:​65, 66) Solomona ena lohia lagani 40 lalonai, taunimanima be idia moale bona maino ai idia noho. (1 King Taudia 4:​20, 21, 25 duahia.) Salamo 72 ese unai ia herevalaia bona ita ia durua Solomona Badana, Iesu Keriso, ena lohia henunai do idia vara hahenamo idauidau ita lalopararalaia totona.​—⁠Sal. 72:​6-8, 16.

Haheitalai Dikana

10. Solomona be dahaka kerere badana ia karaia?

¹⁰ To, dahaka dainai ita gwau diba Solomona ena kara haida be sisiba bamona ita dekenai? Reana ita laloa gauna ginigunana be, ia ese idau bese hahine momo ia adavaia. Baibel ia gwau: “Solomona ia buruka vadaeni neganai, iena adavana ese iena lalona idia veria, dirava idaudia dekenai, bona ia ese Lohiabada, iena Dirava, ia badinaia momokani lasi.” (1 Kin. 11:​1-6) Momokani, ita ura lasi iena kavakava karana ita tohotohoa. To, Solomona ese ia karaia gaudia ma haida be sisiba bamona ita dekenai. Mani unai gaudia ita herevalaia.

11. Solomona ena adavana ginigunana be edena hanua hahinena?

¹¹ King Taudia Ginigunadia 14:21 duahia. Unai siri amo dahaka ita dibaia? Ita diba Solomona be lagani 40 ia lohia, bona ia mase murinai, iena natuna Rehoboama ena mauri lagani 41 be king ai ia lao. (2 Siv. 9:30) Iena sinana be “Namaha, Amono hahine.” Anina be Solomona be king ai ia do lao lasi neganai, dirava koikoidia idia tomadiho henia besena amo hahine ta ia adavaia. (Gun. 10:6; 2 Sam. 10:⁠6) Ita diba lasi bema unai hahine be Rahaba bona Ruta bamona tomadiho momokani ia abia dae. (Ruta 1:16; 4:​13-17; Mat. 1:​5, 6) To, ita diba gauna be Solomona ena ravana bona nakimi taudia be Iehova idia tomadiho henia lasi.

12, 13. Solomona ia lohia neganai dahaka kerere badana ia karaia? Bona reana dahaka lalohadai kererena ia abia?

¹² Solomona ia lohia neganai kerere momo ia karaia. “Solomona ese Farao, Aigupito ena king ena natuna kekeni ia adavaia. Vadaeni Solomona ese Farao ena natuna ia abia, Davida ena Hanua dekenai ia hakaua vareai.” (1 Kin. 3:⁠1) Unai Aigupito hahinena be Ruta bamona Iehova ia tomadiho henia, a? Baibel ese unai ia herevalaia lasi. To, Baibel ia gwau Davida ena Hanua murimurinai, Solomona ese Aigupito hahinena bona ena hesiai kekenidia totona ruma ta ia haginia. Dahaka dainai? Badina ia be dirava koikoidia ia tomadiho henia, bona unai bamona taudia be taravatu maua kahirakahira do idia noho lasi.​—⁠2 Siv. 8:⁠11.

¹³ Reana Solomona ia laloa Aigupito lohia hahinena ia adavaia be kerere lasi, badina unai ese Israela bona Aigupito edia hetura karana do ia hagoadaia. To, unai be lalohadai kererena. Badina idaunegai Dirava be ena taunimanima ia haganidia Kanana taudia do idia adavaia lasi, bona unai bese edia ladadia ia gwauraia danu. (Eso. 34:​11-16) Reana Aigupito be unai lista ai ia noho lasi dainai, Solomona ia laloa unai gabu hahinena ia adavaia be kerere lasi. To Dirava be unai ia abia dae, a? Solomona ia diba Iehova ena taravatu ia gwau, idau bese hahine adavaia karana ese dika ia havaraia diba, to unai ia laloa bada lasi. Oibe, idau bese hahinena ese Israela tauna ta be tomadiho momokani amo ia hakaua siri diba.​—⁠Deuteronomi 7:​1-4 duahia.

14. Edena dala ai Solomona ena kara be sisiba bamona ita dekenai?

¹⁴ Solomona ena kara be sisiba bamona ita dekenai, ani? Reana taihu ta be “Lohiabada lalonai sibona” headava ena hahegani ia laloa bada lasi dainai, ia laloa murimuri merona ia tura henia be kerere lasi. (1 Kor. 7:39)  Eiava ta be ekskius idauidau ia karaia, badina reana ia ura spot ta o klab ta dekenai ia vareai, o takisi monina ia ura lasi henia, o hemarai dainai ena kerere do ia hunia. To namona be ita laloatao, Dirava ena taravatu utua totona ekskius idauidau ita gwauraia neganai, Solomona bamona dika idauidau do ita davaria.

15. Iehova be edena dala ai Solomona ia hebogahisi henia? Dahaka ita laloatao be namo?

¹⁵ Herevana Solomona be idau bese lohia hahinena ia adavaia, to Dirava ese aonega bona kohu momo ia henia. (1 Kin. 3:​10-13) Ena be Solomona ese Dirava ena hahegani ia badinaia lasi, to Iehova ese ia hebogahisi henia bona maoromaoro ia dadaraia o panisia lasi. Dirava ia diba ita be kahu amo ia karaia, bona ita be goevadae lasi taudia. (Sal. 103:​10, 13, 14) To namona be ita laloatao: Reana hari ita karaia karana ta ita moalelaia, to gabeai eda mauri ia hadikaia diba.

Hahine Momo Herea Ia Adavaia!

16. Solomona be hahine momo ia adavaia neganai, edena taravatu ia utua?

¹⁶ Solomona ena Ane lalonai, King Solomona be kwini ibounai 60 mai kahana bona hesiai hahine 80 huanai, rami hebou kekeni hairaina ta ia hanamoa. (Sol. 6:​1, 8-10) Unai ese ia hahedinaraia Solomona be hahine momo herea ia adavaia. Herevana idia ibounai be Iehova idia tomadiho henia, to Solomona be Dirava ena taravatu ia utua. Dirava ia gwau Israela ena king ta be “adavana momo do ia abia lasi, idia ese Lohiabada dekena amo iena lalona do idia veria garina.” (Deu. 17:17) Dirava ese maoromaoro Solomona ia dadaraia lasi. To, ia hanamoa bona Baibel bukana Solomona ena Ane ia torea.

17. Ta be kara dika ia karaia gwauraia neganai, dahaka ia laloatao be namo?

¹⁷ Anina be Solomona be Dirava ena taravatu ia utua to dika ia davaria lasi dainai, ita danu be unai bamona ita karaia diba, a? Lasi. To, unai ese ia hahedinaraia Dirava be haheauka Diravana. Reana ta be Dirava ena taravatu ia utua neganai, matamanai dika ia davaria lasi. To gabeai, ena mauri lalonai hekwakwanai idauidau do ia davaria. Solomona ia gwau: “Kara dika ena davana be idia henia haraga lasi dainai, taunimanima ese, edia kudoudia dekenai kara dika idia ura henia bada noho.” Ma ia gwau: “Lau diba momokani, Dirava idia gari henia taudia be do idia namo, idia ese Dirava idia matauraia noho dainai.”​—⁠Had. 8:​11, 12.

18. Edena dala ai Solomona ena sivarai ese Galatia 6:7 ena hereva ia hamomokania?

¹⁸ To, Solomona be Dirava ena taravatu ia badinaia lasi. Matamanai, gau namodia ia karaia bona Iehova amo hahenamo momo ia abia. To, gabeai kerere momo ia karaia, bona Dirava ena taravatu utua karana ia manadalaia. Aposetolo Paulo ese unai ia hamomokania, ia gwau: “Umui laloa kerere lasi, Dirava ita koia diba lasi. Tau ta ese ia hadoa gauna, unai gauna sibona do ia abia.” (Gal. 6:⁠7) Solomona ia buruka neganai, Dirava ena hahenamo ia haboioa bona hekwakwanai momo ia davaria. Baibel ia gwau: “Solomona ese idau bese hahine momo herea ia ura henia. Ia ese Aigupito ena king ena natuna hahine sibona ia adavaia lasi, to Moaba, bona Amono bona Edoma bona Sidono bona Hiti hahine danu.” (1 Kin. 11:⁠1) Unai hahine momo be reana edia dirava koikoidia idia do tomadiho henia, unai dainai Solomona be tomadiho momokani amo idia hakaua siri. “Lohiabada ena vairanai ia kara dika” dainai, iseda haheauka Diravana ena lalonamo ia haboioa.​—⁠1 King Taudia 11:​4-8 duahia.

Iena Kara Namodia Bona Dikadia amo Ita Dibaia Gaudia

19. Baibel ese ia herevalaia haheitalai namodia be daidia?

¹⁹ Paulo amo Iehova ia gwau: “Guna Toretore Helagadia dekenai idia torea herevadia ibounai be ita hadibaia totona idia torea.  Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:⁠4) Abidadama tatau bona hahine edia sivarai be Baibel lalonai idia torea ‘ita idia hadibaia totona.’ Paulo ese idia ia herevalaia neganai, ia gwau: “Ma dahaka do lau gwau? Nega do ia ore bema lau ese Gideona, Baraki, Samson, Iepeta, Davida, Samuela, bona peroveta taudia ma haida lau herevalaia. Unai taudia be idia abidadama dainai, basileia idauidau idia halusidia, kara maoromaoro idia hahedinaraia, Dirava amo gwauhamata herevadia idia abia, laiona edia uduna idia koua, lahi ena siahu idia koua, tuari kaia amo idia heau mauri, idia manoka to ma idia goada.” (Heb. 11:​32-34) Namona be Baibel ese ia herevalaia taudia edia haheitalai namodia ita stadilaia bona edia kara ita tohotohoa.

20, 21. Dahaka dainai Baibel ese ia herevalaia taudia edia sivarai oi stadilaia be namo?

²⁰ To, Baibel lalonai idia noho sivarai haida be sisiba bamona ita dekenai. Idia haida be guna Iehova idia tomadiho henia, bona ia lalonamo henidia. Idia karaia kara kereredia be Baibel lalonai ita duahia diba, bona ita ia durua edia kara ita tohotohoa lasi totona. Inai stadi amo ita itaia haida be lalohadai kererena idia abia dainai, abia hidi kereredia idia karaia bona hekwakwanai momo idia davaria. Edia sivarai ita duahia neganai, namona be sibona ita nanadaia: Dahaka dainai inai tau o hahine be lalohadai kereredia ia abia? Lau dekenai unai ia vara diba, a? Dahaka lau karaia diba iena kara lau tohotohoa lasi totona?

²¹ Namona be Baibel ese ia herevalaia taudia  edia sivarai ita stadilaia namonamo. Paulo ia gwau: “Unai gaudia be idia dekenai idia vara bona idia be haheitalai bamona, bona unai gaudia idia torea, inai nega oromana ena dokona ai ita noho taudia idia hadibaia totona.”​—⁠1 Kor. 10:⁠11.

Dahaka Oi Diba?

• Dahaka dainai Baibel lalonai haheitalai namodia bona dikadia idia noho?

• Edena dala ai Solomona ese kara dika ia manadalaia?

• Solomona ena kara kereredia amo dahaka oi dibaia?

[Study Questions]

[Picture on page 9]

Solomona be Dirava amo ia abia aonega ia gaukaralaia

[Pictures on page 12]

Solomona ena sivarai amo dahaka oi dibaia?