“Taravatu amo oi be diba bona hereva momokani edia toana oi diba.”​—⁠ROMA 2:20.

1. Dahaka dainai Mose ena Taravatu ita lalopararalaia be mai anina bada?

 APOSETOLO Paulo ena revareva ese ita idia durua Mose ena Taravatu ita lalopararalaia totona. Hegeregere, Heberu taudia ia tore henidia neganai, ia hahedinaraia Iesu be “hahelaga tauna badana” bona nega tamona sibona boubou gauna ia henia. Bona ia idia abidadama henia taudia be Dirava ida maino ai do idia noho bona idia do ia “hamauria ela bona hanaihanai.” (Heb. 2:17; 9:11, 12) Paulo ma ia gwau palai dubu be “guba gaudia edia toana bona edia laulau sibona.” Bona Iesu be Taravatu ia hereaia kontraka matamata ena Medieita. (Heb. 7:22; 8:1-5) Paulo ese ena negai idia noho Keristani taudia dekenai Taravatu ese ia laulaulaia gaudia haida edia anina ia hahedinaraia. Ia herevalaia gaudia ese ita ia durua Dirava ena kara namodia ita laloa bada totona.

2. Dahaka dainai Iuda Keristani taudia be Dirava bona ena taravatu idia diba namonamo, to Idau Bese taudia be unai bamona lasi?

² Paulo be Roma bukana ia torea neganai, ia be Roma ai idia noho Iuda taudia ia hereva henidia, badina idia be Taravatu idia diba vadaeni. Idia be Iehova bona ena kara maoromaoro hakaua herevadia edia toana idia lalopararalaia bona laloa bada. Unai dainai, idaunegai Iuda taudia bamona, idia ese ma haida dekenai Iehova ena hereva momokani idia hadibaia.​—⁠Roma 2:17-20 duahia.

IESU ENA BOUBOU IDIA LAULAULAIA

3. Israela taudia edia boubou gaudia ita stadilaia ena namo be dahaka?

³ Iehova ena ura ita diba namonamo totona, Paulo ese ia herevalaia hereva momokani ena toana ita lalopararalaia be mai anina bada. Iehova ese Taravatu amo Israela taudia dekenai ia hadibaia gaudia be mai anina bada ita dekenai danu. Unai boubou gaudia ese kamonai Iuda taudia ia durua Keriso bona Dirava ena ura idia lalopararalaia totona.  Iseda negai danu, Iehova ia ura iena hesiai taudia ese boubou gaudia do idia henia. Unai dainai, Israela taudia ese idia karaia boubou gaudia edia anina ita diba neganai, unai ese ita do ia durua eda hesiai gaukara ita karaia namonamo totona. Taravatu henunai idia karaia boubou gaudia haida mani ita herevalaia.

4, 5. (a) Taravatu ese Iuda taudia dekenai dahaka ia hadibaia? (b) Unai boubou gaudia ese dahaka idia laulaulaia?

⁴ Taravatu ese Iuda taudia ia hadibaia idia be goevadae lasi taudia. Hegeregere, mase tauanina ia dogoatao tauna be sibona ia hagoevaia be namo. Iena “miro hagoevaia” totona, hahelaga tauna ese boromakau kakakakana ia alaia, gabua, bona ena kahu be ranu ida ia mikisi. Dina namba 3 bona namba 7 ai, hahelaga tauna ese unai ranu amo miro tauna ena kwarana ia haparia, ia goeva totona. (Num. 19:1-13) Danu, sina ta be beibi ia havaraia neganai, ia be nega sisina lalonai ia “miro.” Ia goeva totona kara dika boubouna ta ia henia be namo. Unai boubou karadia ese Iuda taudia idia hadibaia idia vara negana amo idia be goevadae lasi taudia.​—⁠Lev. 12:1-8.

⁵ Badina ma haida dainai Iuda taudia ese kara dika gwauatao boubouna idia karaia. Unai nega ai Israela taudia idia laloparara eiava lasi, to palai dubu bona dubu helaga ai idia karaia bouboudia be Iesu ena boubou goevadaena “edia laulau sibona.”​—⁠Heb. 10:1-10.

LALOHADAI MAORONA IDA BOUBOU HENIA

6, 7. (a) Israela taudia be boubou gaudia idia abia hidi neganai, dahaka idia laloatao be namo, bona unai ese dahaka ia laulaulaia? (b) Ita ta ta ese edena henanadai ita lalodia be namo?

⁶ Iehova ia ura Israela taudia be “bero ta lasi bona toto ta lasi” animal sibona do idia bouboulaia. To, matakepulu, aena dikana, eiava ia gorere animal ta do idia bouboulaia lasi. (Lev. 22:20-22) Israela taudia be Iehova dekenai huahua, witi, o uma aniani idia henia neganai, namona be ia be “vara guna” bona “namo herea.” Badina boubou gaudia dikadia be Iehova ese ia abia dae lasi. (Num. 18:12, 29) Israela taudia be bero lasi bona toto lasi animal idia bouboulaia neganai, unai ese Iesu ena boubou goevadaena ia laulaulaia. Unai hegeregerena, Iehova be ena lalokau Natuna, boubou gauna namo hereana unai, ia henia taunimanima be kara dika bona mase amo ia hamauria totona.​—⁠1 Pet. 1:18, 19.

⁷ Bema tau ta be Iehova ese ia totona ia karaia kara namodia ia laloa bada, boubou gaudia namodia do ia henia. Ia sibona ese do ia bouboulaia gauna ia abia hidi diba. To, ia diba bema boubou gauna dikana ia henia, Dirava be ia dekenai do ia moale lasi, bona unai ese do ia hahedinaraia ia be boubou karadia ia hesikulaia bona ia laloa bada lasi. (Malaki 1:6-8, 13 duahia.) Unai ese ita ia durua iseda hesiai gaukara Dirava dekenai ita laloa namonamo totona. Namona be sibona ita nanadaia: Dahaka dainai Iehova lau hesiai henia? Lau be mai egu lalona ibounai ida ia lau hesiai henia, a? Egu hesiai gaukara lau hanamoa diba, a?

8, 9. Israela taudia ese boubou gaudia henia karana be edena bamona idia laloa, bona unai amo dahaka ita dibaia?

 ⁸ Israela tauna ta be Iehova dekenai ena tanikiu karana ia hahedinaraia totona, mai ena lalona ibounai ida harihari gaudia ia henia diba. Eiava Iehova ena lalonamo ia abia totona, gabua ore boubouna ia karaia diba. Unai dainai, mai moale ida animal namo hereana ta be Iehova dekenai ia henia. Hari inai negai, ita be Mose ena Taravatu ese ia herevalaia boubou gaudia ita henia lasi, to eda nega, goada, moni, bona kohu ita henia Iehova hesiai henia totona. Danu, ma haida dekenai iseda helaro ita gwauraia karana be “boubou gauna bamona Dirava dekenai.” Bona aposetolo Paulo ia gwau ‘kara namodia ita karaia, bona ma haida ida eda kohu ita haria’ karana be Dirava ese ia moalelaia boubou karadia. (Heb. 13:15, 16) Iehova ita hesiai henia lalonai, iseda lalohadai bona kara ese do idia hahedinaraia bema ita be iena kara namodia ita laloa bada o lasi. Unai dainai Israela taudia bamona, namona be Dirava ita hesiai henia ena badina ita tahua namonamo.

⁹ Taravatu ia gwau, bema Israela tauna be kerere ta ia karaia, kara dika gwauatao boubouna ia henia be namo. Israela taudia ese unai taravatu idia badinaia be mai anina bada. To, reana Israela tauna be unai ia karaia loulou dainai, ia hesiku diba. (Lev. 4:27, 28) To, bema ia ura Iehova ida maino ai ia noho, mai ena lalona ibounai bona mai moale ida unai boubou gauna ia henia be namo.

10. Bema kerere ta ita karaia, dahaka ita karaia be namo?

¹⁰ Reana nega haida ita laloa namonamo lasi bona ita hereva haraga dainai, iseda tadikaka ena lalona ita hahisia. Eiava iseda lalomamina ese ita do ia hadibaia ita be kerere ta ita karaia. Vadaeni, bema ita ura Iehova ita hamoalea, kara ta do ita karaia unai kerere ita hamaoromaoroa totona. Namona be unai tadikaka dekenai sori herevana ita gwauraia. Bona bema kerere badana ta ita karaia, elda taudia edia heduru ita tahua be namo. (Mat. 5:23, 24; Iam. 5:14, 15) Eda tadikaka o Dirava ida unai hekwakwanai ita hamaoromaoroa karana be boubou gauna ta bamona. Mai iseda lalona ibounai ida unai ita karaia neganai, Iehova bona iseda tadikaka ida maino ai do ita noho bona iseda lalomamina be do ia goeva. Unai amo ita diba Iehova ena dala badinaia karana be mai ena namo.

11, 12. (a) Maino karaia boubouna be dahaka? (b) Unai boubou karana amo dahaka ita dibaia?

¹¹ Taravatu ese ia gwauraia boubou gauna ta be maino karaia boubouna.  Unai boubou idia henia Iehova ida maino idia karaia totona. Unai boubou ia karaia tauna bona ena ruma bese be dubu helaga ena aniani daiutu ta lalonai idia bouboulaia vamu idia ania hebou. Animal ia bouboulaia hahelaga tauna bona dubu helaga dekenai idia gaukara hahelaga taudia ma haida ese unai vamu taina idia abia danu. (Lev. 3:1; 7:31-33) Israela tauna be unai bamona boubou gauna ia henia badina ia ura Dirava ida maino ai ia noho. Unai be hegeregere ia, ena ruma bese, hahelaga taudia, bona Iehova be mai moale ida idia aniani hebou.

¹² Unai dainai maino karaia boubouna idia karaia neganai, idia be Iehova idia boiria idia ida ia aniani totona. Iehova ese unai boiboi herevana ia abia dae be hahenamo badana. Unai dainai, Israela tauna be Dirava totona animal namo hereana ia hegaegaelaia. Maino karaia boubouna be Taravatu ese ia gwauraia hereva momokani ena kahana ta. Bona ia hahedinaraia Iesu ena boubouna gauna amo, taunimanima ibounai be edia Havaraia Tauna ida maino ai idia noho diba. Hari, bema mai eda lalona ibounai ida eda moni, kohu, bona goada ita gaukaralaia Iehova ita hesiai henia totona, ia ida maino ai ita noho diba.

DIRAVA ESE IA DADARAIA BOUBOUDIA

13, 14. Dahaka dainai Iehova be Saulo ena boubou gauna ia dadaraia?

¹³ Bema ta be lalohadai maorona ida ena boubou gauna ia henia, Iehova ese unai do ia abia dae. To, Baibel ese ia hahedinaraia Dirava be boubou gaudia haida ia dadaraia. Dahaka dainai? Mani sivarai rua ita herevalaia.

¹⁴ Peroveta tauna Samuela ese King Saulo ia hamaoroa Iehova be Amaleka taudia do ia hadikaia ore. Saulo ia hamaoroa Amaleka taudia bona edia animal ibounai do idia hamasedia. To, Saulo be tuari dekenai ia kwalimu murinai, ena tuari taudia ia hamaorodia Amaleka ena king, Agaga do idia abia mauri. Danu, Saulo ese animal namodia ibounai ia abia Iehova dekenai ia bouboulaia totona. (1 Sam. 15:2, 3, 21) Iehova be dahaka ia karaia? Saulo ena gwau-edeede karana dainai, ena king dagina ia kokia. (1 Samuela 15:22, 23 duahia.) Unai sivarai amo dahaka ita dibaia? Bema Dirava ena hahegani ita badinaia, iseda boubou gaudia do ia abia dae.

15. Israela taudia be boubou gaudia idia henia to kara dika idia karaia noho ese dahaka ia hahedinaraia?

¹⁵ Isaia bukana lalonai sivarai ma ta ia noho. Isaia ena negai Israela taudia  be Taravatu hegeregerena Iehova dekenai bouboudia gaudia idia henia. To kara dika momo idia karaia danu. Unai dainai Iehova ese edia boubou gaudia ia abia dae lasi. Iehova ia gwau: “Umui laloa lau be emui boubou gaudia lau ura henia, a? Lasi, emui mamoe umui gabua, bona emui boromakau edia digara, umui gabua gaudia lau abia, be ia davana vadaeni lau dekenai. Lau be boromakau, bona mamoe, bona nanigosi edia rarana dekenai lau hesiku vadaeni. . . . Harihari gaudia, anina lasi gaudia haida ma, do umui mailaia lasi, badina be emui muramura mai bonana, be gau dikana lau dekenai.” Dahaka dainai Dirava ese edia boubou gaudia ia ura henidia lasi? Dirava ia gwau: “Guriguri momo do umui gwauraia, to lau be do lau kamonai lasi, badina emui imadia be rara dekenai idia honu vadaeni. Umui sibona do umui huria, do umui goeva totona. Inai umui karaia noho kara dika be do umui hadokoa. Io, inai emui kerere do umui hadokoa.”​—⁠Isa. 1:11-16.

16. Dirava be edena bamona boubou gaudia ia abia dae?

¹⁶ Helalo-kerehai lasi taudia edia boubou gaudia be Iehova ese ia abia dae lasi. To, iena hahegani idia badinaia taudia edia guriguri bona boubou gaudia ia abia dae. Danu, Taravatu ese idia ia hadibaia idia be goevadae lasi taudia bona Iehova ese edia dika ia gwauatao be namo. (Gal. 3:19) Israela tauna be unai ia lalopararalaia neganai, ena kara dika dainai ia sori bona Iehova ia noia ena dika ia gwauatao totona. Namona be ita laloatao, Keriso ena boubou gauna sibona amo Iehova ese iseda kara dika ia gwauatao diba. Bema Keriso ena boubou gauna ena anina ita lalopararalaia bona ita abia dae, Iehova ese iseda hesiai gaukara do ia “moalelaia.”​—⁠Salamo 51:17, 19 duahia.

IESU ENA BOUBOU ABIDADAMA HENIA!

17-19. (a) Edena dala ai ita hahedinaraia Iesu ena mauri davalaia boubouna ita laloa bada? (b) Pura vaira ena stadi ai dahaka do ita herevalaia?

¹⁷ Israela taudia be Dirava ese nega vairai do ia karaia gaudia edia “laulau sibona” idia itaia. To, ita be idia guguru gaudia haida ita itaia. (Heb. 10:1) Taravatu henunai idia henia boubou gaudia ese Israela taudia ia hadibaia, Dirava ida maino ai idia noho totona gau haida idia karaia be namo. Bona edia tanikiu karana idia hahedinaraia totona, mai edia lalona ibounai ida gau namo hereadia do idia bouboulaia, badina idia laloparara Dirava ese edia dika ia gwauatao be namo. Hari inai negai, Keristani Grik Toretoredia ese ita ia hadibaia Iesu ena mauri davalaia boubouna amo Iehova ese mase bona kara dika do ia kokia momokani. Unai boubou gauna dainai, iseda kara dika ia gwauatao bona eda lalomamina ia goeva diba. Momokani, mauri davalaia boubouna be Iehova ese ita ia henia harihari gauna hereadaena!​—⁠Gal. 3:13; Heb. 9:9, 14.

¹⁸ Mauri davalaia boubouna ena namo ita abia totona, ena anina ita lalopararalaia sibona be hegeregere lasi. Paulo ia gwau: “Taravatu be iseda hakaua tauna ai ia lao, bona Keriso dekenai ita ia hakaua lao, unai amo abidadama dainai Dirava ese ita do ia gwauraia maoromaoro.” (Gal. 3:24) Iseda abidadama be kara amo ita hahedinaraia be gau badana. (Iam. 2:26) Iuda Keristani taudia ginigunadia be Taravatu idia laloparara dainai, hereva momokani ena toana idia diba. Paulo ese idia ia hagoadaia, idia dibaia gaudia idia badinaia bona ma haida idia hadibaia be gau badana.​—⁠Roma 2:21-23 duahia.

¹⁹ Ena be Taravatu henunai ita noho lasi, to Iehova ese ia moalelaia boubou gaudia ita henia be namo. Unai ita karaia diba dalana be pura vaira ena stadi ai do ita herevalaia.

[Study Questions]

[Blurb on page 17]

Iehova ena hakaua herevadia be idia idau lasi

[Picture on page 18]

Iehova dekenai edena animal do oi bouboulaia?

[Picture on page 19]

Boubou namo herea idia henia taudia be Iehova ese ia lalonamo henidia