Tanobada hegegemadai, ena be tadikaka taihu haida be idia gorere bada, to nega ibounai idia haroro. Haheitalai ta be Dalia, ia be Lithuania ena taoni badana Vilnius dekenai ia noho.

Dalia ena mauri lagani be 35 bamona. Dalia ia vara neganai, ena harana dekenai celebral apoplexy gorere ia abia. Unai dainai, ia paralais bona ia hereva namonamo lasi. Iena famili taudia sibona ese ena hereva idia lalopararalaia diba. Dalia be ena sinana Galina ese ia naria. Ena be Dalia ena mauri be ia auka bona hekwakwanai momo ia davaria, to ia moale noho. Dahaka dainai ia moale noho?

Galina ia gwau: “Lagani 1999 ai, egu kasin Apolonija be ai ia vadivadi. Ia be Iehova ena Witnes hahinena ta bona Baibel ia diba namonamo dainai, Dalia ese ia dekenai henanadai momo ia henia. Daudau lasi murinai, Apolonija ese Dalia ia stadi henia. Bona nega haida stadi lalonai lau helai, Dalia ena hereva lau hahedinaraia namonamo totona. Gabeai, lau danu lau ura Baibel lau stadilaia.”

Dalia be Baibel ena hereva momokani ia laloparalaia neganai, gau ta ia laloa momo. Dina ta ia ese Apolonija ia nanadaia: “Ena be lau paralais, to lau haroro diba, a?” (Mat. 28:19, 20) Apolonija ese Dalia ia hagoadaia: “Oi gari lasi. Iehova ese oi do ia durua.” Unai be momokani, Iehova ese ia durua noho.

Dalia be edena dala ai ia haroro? Dala idauidau ai ia haroro. Keristani taihu haida ese idia durua. Hegeregere, Dalia ese ena lalohadai ia gwauraia, bena taihu ese ena lalohadai be revareva ta ai idia torea. Danu, Dalia ese Baibel ena siri ta be teks mesiji bamona ena mobael fon amo haida dekenai ia siaia. Nega namodia ai, kongrigeisen taudia ese loaloa umadia dekenai idia abia lao, unai amo taunimanima ia hereva henidia diba.

Dalia bona ena sinana be hereva momokani lalonai idia goada idia lao. Edia mauri be Iehova dekenai idia gwauhamatalaia bona November 2004 ai idia bapatiso. September 2008 ai, Polish gado ena grup ta be Vilnius ai idia hamatamaia. Unai grup dekenai pablsia taudia be momo lasi dainai, Dalia bona ena sinana be unai grup idia bamoa. Dalia ia gwau: “Hua haida lalonai lau haroro lasi neganai, lau lalohisihisi. To, Iehova lau guriguri henia murinai, tadikaka o taihu ta ese lau ia hadibaia ia ida do lau haroro.” Eda taihu namona Dalia ese ena gorere be edena bamona ia laloa? Ia gwau: “Celebral apoplexy gorere dainai egu tauanina ia paralais, to egu lalona ia paralais lasi. Unai dainai lau moale ma haida dekenai Iehova lau herevalaia totona!”