Lagani 1886 ai, Millennial Dawn ena volium 1 bukadia ibounai 100 be Bible House Allegheny, Pennsylvania amo Chicago, Illinois dekenai idia siaia lao. Tadikaka Charles Taze Russell ia ura unai buka matamata be buka idia hoihoilaia stoa dekenai ia atodia. United States ai tomadiho bukadia ia hoihoilaia stoa badana ta ena biaguna ese Millennial Dawn bukadia momo ia oda bona ena stoa dekenai ia atoa. To wiki rua murinai, Bible House dekenai unai buka ibounai idia siaia lou.

Ripoti haida idia gwau, pasto tauna ta be ia badu dikadika, badina ia itaia stoa dekenai Millennial Dawn bukadia be ena buka ida idia atoa hebou. Mai badu ida ia gwau, bema unai buka be stoa amo idia kokia lasi, ia bona pasto ma haida be edia buka do idia kokidia bona stoa ma ta dekenai do idia abidia lao. Ena be stoa biaguna ia moale lasi, to Dawn bukadia ia siaia lou. Danu, Society ese niuspepa lalonai Dawn bukana ena hereva ia halasia, to inai taudia ese idia kokia. Vadaeni, edena dala ai hereva momokani idia tahua taudia be Dawn bukadia idia abia diba?

Kolpota taudia ese unai gaukara idia karaia. a Lagani 1881 ai, Zion’s Watch Tower magasin ese haroro taudia 1,000 idia boiria Baibel bukadia hariharilaia gaukarana idia karaia totona. Ena be kolpota taudia be handred haida sibona, to hereva momokani ena uhe be gabu daudaudia dekenai idia abia lao. Lagani 1897 ai, kolpota taudia ese kahirakahira 1 milioni Dawn bukadia idia hariharilaia. Watch Tower sabskripsen o buka idia hariharilaia neganai, idia abia monina amo tauanina durua gaudia idia hoia.

Unai gari lasi kolpota taudia be daidia? Idia haida be matamata taudia bona haida be taunimanima badadia. Momo be idia headava vadaeni to natudia lasi, singul taudia, bona ruma bese momo danu be unai gaukara idia karaia. Regula kolpota taudia be dina ibounai idia haroro, bona heduru kolpota taudia be dina ta ta ai hora ta o rua idia haroro. Haida be idia gorere eiava idia hegeregere lasi kolpota gaukara idia karaia totona. To, lagani 1906 ena hebouhebou ta dekenai idia gwau, “sikuli bada taudia o diba momo taudia o hereva namonamo taudia” sibona ese unai gaukara idia karaia lasi.

Tanobada ibounai dekenai, kolpota taudia ese gaukara badana idia karaia. Tadikaka ta ia gwau, lagani seven lalonai ia ese buka ibounai 15,000 ia hariharilaia. To, ia gwau: “Lau be buka hoihoilaia totona kolpota gaukara lau karaia lasi, to Iehova bona ena hereva momokani harorolaia totona unai gaukara lau karaia.” Kolpota taudia idia lao gabudia ibounai dekenai hereva momokani ena uhe idia hadoa, bona taunimanima momo be Bible Student taudia ai idia lao.

 Dubu gunalaia taudia ese kolpota taudia idia gwau henidia bona idia gwau, idia be buka hoihoilaia taudia sibona. Lagani 1892 Watch Tower ia gwau: “Haida sibona idia laloparara kolpota taudia be Lohiabada ena gwaukau taudia korikoridia, bona idia diba Lohiabada ese kolpota taudia edia manau bona gaukara goadagoada karana ia laloa bada.” Kolpota taudia be hekwakwanai haida idia davaria danu. Haroro totona nega momo idia raka bona basikele idia gaukaralaia. Bema ruma tauna be moni lasi, aniani ia henidia bona buka ia abia. Ena be haroro murinai idia hesiku bada, to mai moale ida edia palai rumadia bona renta rumadia dekenai idia giroa lou. Gabeai, Kolpota Wagen idia gaukaralaia, ia be hosi ese ia veria rumana. b Tadikaka be wagen idia gaukaralaia dainai, edia moni be renta rumadia dekenai idia haorea lasi, bona teritori dekenai idia mahuta dainai nega bada ia noho taunimanima idia haroro henia totona.

Lagani 1893 ai, Chicago hebouhebou dekenai idia henia tok haida be kolpota taudia totona. Unai tok lalonai ekspiriens, haroro daladia, bona heduru hereva idia gwauraia. Nega ta Tadikaka Russell ese haroro goadagoada taudia ia hamaorodia, namona be daba ai idia aniani badabada, hora haida idia haroro murinai milika galasi ta idia inua, bona siahu dinadia ai loliwota mai ena ice-cream idia inua be namo.

Hebouhebou negadiai bema kolpota taudia be gaukara turana ta idia tahua, edia dabua dekenai yelo riben ta idia atoa. Kolpota taudia matamatadia be idia manada kolpota taudia ida idia gaukara hebou. Unai dala amo treinini idia abia badina idia be taunimanima haroro henia dalana idia diba namonamo lasi. Hegeregere, taihu ta be buka ta ia hariharilaia neganai, ruma hahinena dekenai ia gwau, “Oi be inai buka oi ura lasi, ani?” To ita moale badina unai hahine be buka ia abia bona gabeai taihu ta ai ia lao.

Tadikaka ta ia henanadai, ‘Egu bisinesi do lau karaia noho bona lagani ta ta US$1,000 do lau henia unai gaukara lau durua totona, eiava kolpota tauna ai lau lao be namo?’ Tadikaka ese idia hamaoroa Lohiabada ese unai abia hidi rua do ia moalelaia, to bema nega ia henia Lohiabada ena gaukara ia karaia totona, hahenamo momo do ia abia. Taihu Mary Hinds ia gwau kolpota gaukara be “gaukara namo hereana badina taunimanima momo lau durua diba.” Taihu Alberta Crosby be hemarai kekenina, to ia gwau: “Lau be dina ta ta kolpota gaukara lau moalelaia.”

Hari, kolpota gaukara idia karaia taudia edia tubudia o edia stadi taudia be painia gaukara idia karaia danu. Bema emu ruma bese lalonai kolpota o painia tauna be lasi, namona be unai gaukara namona oi hamatamaia. Oi danu be ful-taim haroro gaukara do oi moalelaia.

[Footnotes]

[Blurb on page 32]

“Sikuli bada taudia o diba momo taudia o hereva namonamo taudia” sibona ese unai gaukara idia karaia lasi

[Picture on page 31]

Lagani 1930, kolpota tadikaka Alfred Winfred Osei, Ghana

[Pictures on page 32]

Ataiai: 1918, kolpota taihudia Edith Keen bona Gertrude Morris, England; henunai: tadikaka Stanley Cossaboom bona Henry Nonkes, United States ai, idia hariharilaia ore bukadia edia katen badinai idia gini