1. Gwauhamata karana dekenai Iesu be dahaka sisiba ia henia, bona dahaka dainai?

 KERISTANI taudia momokanidia ese edia hereva hamomokania totona, hereva helagadia eiava gwauhamata idia karaia be anina lasi. Badina idia ese Iesu ena sisiba idia badinaia, ia gwau: “Namona be emui ‘oibe’ be oibe.” Iena hereva anina be, ita ese hereva momokani ita gwauraia bona ita gwauraia gauna ita karaia be namo. Matamanai Iesu be inai hereva ia gwauraia: “Gwauhamata umui karaia lasi.” Unai bamona ia hereva badina taunimanima momo be gwauhamata idia karaia, to idia ura lasi idia badinaia. Dahaka ia vara bema tau ta ia gwau gau ta do ia karaia, to ia karaia lasi? Unai ese ia hahedinaraia ia be koikoi tauna bona “Dika Tauna” ese ia biagua.​—Mataio 5:33-37 duahia.

2. Dahaka dainai gwauhamata ita karaia be kerere lasi?

² Iesu ia hahedinaraia gwauhamata ita karaia be kerere lasi. Vanegai stadi ese ia hahedinaraia, Iehova Dirava bona Aberahamo be mai anina bada gaudia dekenai gwauhamata idia karaia. Danu, Dirava ena Taravatu ia gwau Israela tauna ta be hekwakwanai haida ia hamaoromaoroa totona, gwauhamata ia karaia be maoro. (Eso. 22:10, 11; Num. 5:21, 22) Unai hegeregerena, hari bema Keristani tauna ta be kota vairanai ia gini hereva momokani ia gwauraia totona, gwauhamata ia karaia be namo. Eiava nega haida bema Keristani tauna ta ia ura hahedinaraia, ia be gau ta do ia karaia momokani o ena hereva be momokani, gwauhamata ia karaia be namo. Iesu be Iuda ena Kota Badana taudia ese idia oda henia Dirava ladanai hereva momokani do ia gwauraia neganai, Iesu be unai bamona ia karaia. (Mat. 26:63, 64) Iesu ese gwauhamata ia karaia be anina lasi, badina ia be hanaihanai hereva momokani sibona ia gwauraia. Nega momo ia hereva neganai ia gwau: “Umui lau hamaoroa momokani.” Unai amo ma haida dekenai ia hahedinaraia, iena hereva idia  abidadama henia diba. (Ioa. 1:51; 13:16, 20, 21, 38) Inai stadi amo do ita dibaia Iesu, Paulo, bona ma haida be haheitalai namodia, badina edia “Oibe” be Oibe.

3. Iesu ena guriguri lalonai dahaka gwauhamata ia karaia? Iena guba Tamana ena haere be dahaka?

³ “Lau gwau, ‘Dirava e, lau mai oiemu ura lau karaia totona. Toretore Helagadia lalonai lau idia sivarailaia hegeregerena.’” (Heb. 10:7) Unai guriguri lalonai, Iesu ia gwauhamata Dirava ena ura do ia karaia. Anina be gwauhamata Garana dekenai idia perovetalaia herevadia ibounai do ia karaia. Hegeregere, Iesu be Satani ese ena ‘aena geduna ia haberoa’ karana ia koua lasi. (Gen. 3:15, BHğ) Ma tau ta be unai maduna badana ia huaia lasi. Iehova ese Iesu ena guriguri ia abia dae, bona ia gwau ena Natuna ia abidadama henia. Iehova ese Iesu ia noia lasi gwauhamata ta do ia karaia ena hereva ia hamomokania totona.​—Luka 3:21, 22.

4. Iesu be dahaka ia karaia ena gwauhamata ia hagugurua totona?

⁴ Nega ibounai Iesu ena “Oibe” be Oibe. Gau ta ese ia koua lasi, Tamana ese ia henia gaukarana ia karaia totona. Dirava ena Basileia ena sivarai namona ia harorolaia, bona Dirava ese ia dekenai ia veria mai taudia be hahediba taudia ai ia halaoa. (Ioa. 6:44) Baibel ia hamomokania Iesu ese ena gwauhamata Dirava dekenai ia hagugurua. Ia gwau: “Herevana Dirava ena gwauhamata be momo herea, to Iesu amo idia ibounai be Oibe.” (2 Kor. 1:20) Iesu be haheitalai hereadaena, badina ena Tamana dekenai ia gwauhamatalaia gauna ia karaia momokani. Hari, ita ese Iesu ia tohotohoa tauna ta do ita herevalaia.

5. Dahaka dainai Paulo be haheitalai namona?

⁵ “Lohiabada e, dahaka do lau karaia?” (Kara 22:10) Iesu be matahanai amo Saulo dekenai ia hedinarai neganai, Saulo ese unai hereva ia gwauraia. Iesu ia ura Saulo ese Keristani taudia dagedage henia karana ia hadokoa. Unai dainai Saulo ia helalo-kerehai, ia bapatiso bona bese idauidau dekenai Iesu ena sivarai namona harorolaia gaukarana ia abia dae. Saulo, gabeai ena ladana idia atoa Paulo, be ena mauri ibounai lalonai Iesu ia gwauraia ena “Lohiabada” bona ia kamonai henia. (Kara 22:6-16; 2 Kor. 4:5; 2 Tim. 4:8) Iesu be haida dekenai ia gwau: “Dahaka dainai lau umui gwauraia, Lohiabada, Lohiabada, to lau gwauraia gaudia umui karaia lasi?” To, Paulo be idia bamona lasi. (Luka 6:46) Iesu ena ura be ia idia gwauraia Lohiabada taudia ibounai ese idia gwauhamatalaia gaudia idia karaia momokani, aposetolo Paulo ia karaia hegeregerena.

6, 7. (a) Dahaka dainai Paulo be Korinto dekenai ia lao haraga lasi? Dahaka dainai haida idia gwau Paulo ia koikoi be maoro lasi? (b) Edena dala ai kongrigeisen gunalaia taudia ita kara henidia be namo?

⁶ Paulo be Asia Minor bona Europe tanodia ai,  sivarai namona ia harorolaia goadagoada. Kongrigeisen momo ia haginidia bona ia vadivadi henidia. Nega haida gwauhamata ia karaia, badina ia ura ia hamomokania ena revareva lalodiai ia torea herevadia be momokani. (Gal. 1:20) Korinto ai haida idia gwau Paulo ena hereva be koikoi. Paulo ia ura do idia diba ia gwauraia herevadia be momokani, unai dainai ia gwau: “Dirava umui tabekau henia hegeregerena, umui dekenai ai gwauraia herevana be nega tamona Oibe bona Lasi ai gwauraia lasi.” (2 Kor. 1:18) Paulo be unai revareva ia torea neganai, ia be Efeso ia rakatania bona Makedonia amo ia hanaia lao Korinto dekenai. Matamanai, ia gwau Korinto dekenai do ia lao guna, bena gabeai Makedonia dekenai do ia lao. (2 Kor. 1:15, 16) To, nega haida badina haida dainai iseda palani ita haidaua diba. Hegeregere, nega haida loaloa naria taudia ese kongrigeisen idia vadivadi henia ena deit idia haidaua. Idia be anina lasi gaudia o sibodia edia ura dainai unai bamona idia karaia lasi, to mai anina bada gauna ta dainai edia palani idia haidaua. Paulo be badina namona ta dainai, Korinto kongrigeisen dekenai ia lao haraga lasi, bona unai ese idia ia durua bada. Edena dala ai?

⁷ Paulo be Efeso ai ia noho neganai, ia kamonai Korinto kongrigeisen dekenai hekwakwanai haida idia vara. Tadikaka be idia lalotamona lasi, bona kongrigeisen lalonai matabodaga karadia ia karaia tauna ta idia abia dae. (1 Kor. 1:11; 5:1) Korinto kongrigeisen dekenai revareva ginigunana ia torea neganai, unai hekwakwanai hamaoromaoroa totona sisiba aukana ia henia. Unai dainai, Paulo be maoromaoro Efeso amo Korinto dekenai ia lao lasi, badina ia ura tadikaka dekenai nega ia henia ena sisiba idia badinaia totona. Unai amo ia vadivadi henidia neganai, idia ia hagoadaia diba. Paulo ena revareva iharuana lalonai ia hahedinaraia, iena palani ia haidaua ena badina be unai. Ia gwau: “Dirava vairanai egu mauri dekenai inai gwauhamata lau karaia, lau be Korinto dekenai lau do mai lasi, badina lau ura lasi umui lalometau.” (2 Kor. 1:23) Namo lasi ita be Paulo idia gwauraia dika taudia bamona. To, namona be kongrigeisen idia gunalaia taudia ita matauraia. Paulo be ena gwauhamata hegeregerena ia kara, unai dainai ena haheitalai ita tohotohoa be namo, ia ese Keriso ia tohotohoa hegeregerena.​—1 Kor. 11:1; Heb. 13:7.

8. Dahaka dainai Rebeka be haheitalai namona?

⁸ “Lau ura lau lao.” (Gen. 24:58) Rebeka be ena sinana bona taihuna ese idia nanadaia, bema ia ura Aberahamo ena natuna Isako do ia adavaia neganai, Rebeka be unai bamona ia haere. Unai dina ai ena ruma bese ia rakatania, bona ia diba lasi tauna ida kilomita 800 ia lao Isako do ia adavaia totona. (Gen. 24:50-58) Rebeka ena “Oibe” be Oibe. Danu, ia be adavana namona ai ia lao bona Dirava ia abidadama henia. Anina be ena mauri ibounai lalonai, Gwauhamata Tanona ai palai rumadia dekenai idau bese hahinena bamona ia noho. Dirava ese ia hanamoa, badina ia gwauhamata do ia karaia gauna ia karaia. Bona ia be gwauhamata Garana, Iesu Keriso ena tubuna ta ai ia lao.​—Heb. 11:9, 13.

9. Edena dala ai Ruta be ena gwauhamata ia hagugurua?

⁹ “Lasi, ai ese oi do ai bamoa, oiemu bese dekenai do ita lao.” (Ruta 1:10) Moaba hahinedia Ruta bona Oropa be edia ravana hahine, Naomi dekenai unai hereva idia gwauraia. Naomi be vabu hahinena bona ia ura Moaba ia rakatania, bona Betelehema dekenai do ia giroa lou. Unai dainai, ena ravana hahinedia ia hamaoroa edia hanua dekenai do idia giroa lou. Oropa be ia giroa, to Ruta ena “Lasi” be Lasi. (Ruta 1:16, 17 duahia.) Ena be Ruta be ena ruma bese do ia itaia lou lasi, bona Moaba ena tomadiho koikoi do ia rakatania, to ia be Naomi ia badinaia bona ia ida ia noho. Oibe, iena mauri ibounai lalonai, Iehova ia tomadiho henia bona Ia ese ia hanamoa. Mataio ese Keriso ena bese taudia ia herevalaidia neganai, hahine faiv sibodia edia ladana ia gwauraia, bona Ruta be idia ta.​—Mat. 1:1, 3, 5, 6, 16.

10. Dahaka dainai Isaia be haheitalai namona?

¹⁰ “Lau be inai, do lau lao! Lau do oi siaia!” (Isa. 6:8) Isaia be unai ia do gwauraia lasi  neganai, matahanai ta amo ia itaia Israela ena dubu helaga ataiai, Iehova be mai ena hairai bada ida ena terona dekenai ia helai. Unai matahanai lalonai Isaia ia kamonai, Iehova ia gwau: “Daika do lau siaia? Daika be ai totona do ia lao?” Iehova ia noinoi ta ese ena hereva be gwau-edeede Israela taudia dekenai ia harorolaia totona. Isaia ia gwau, “Lau be inai, do lau lao! Lau do oi siaia!” neganai, unai be hegeregere ia gwau, “Oibe, do lau lao bona oi henia gaukara do lau karaia.” Isaia ena “Oibe” be Oibe. Lagani 46 mai kahana lalonai, Isaia be Israela taudia dekenai Dirava ena hahemaoro herevadia ia harorolaia. Ia gwau Dirava ese do ia panisidia, to gabeai do ia hamauridia bena tomadiho momokani do idia haginia lou.

11. (a) Dahaka dainai gwauhamata ita karaia neganai, ita hagugurua be mai anina bada? (b) Baibel lalonai daidia be edia gwauhamata idia hamomokania lasi?

¹¹ Dahaka dainai Iehova ia ura unai haheitalai namodia be Baibel lalonai idia torea? Bona dahaka dainai gwauhamata ita karaia neganai, ita hagugurua be mai anina bada? Baibel ia gwau “edia gwauhamata idia badinadia lasi” taudia, o unai bamona idia karaia taudia idia “mase be maoro.” (Roma 1:31, 32) Aigupito ena King, Iuda ena King Sedekaia, Anania bona Sapira be idia gwau “Oibe,” to idia hamomokania lasi dainai, dika bada idia davaria. Edia sivarai ese ita ia hadibaia unai bamona koikoi karadia ita karaia lasi totona.​—Eso. 9:27, 28, 34, 35; Ese. 17:13-15, 19, 20; Kara 5:1-10.

12. Dahaka ese ita ia durua eda gwauhamata ita hagugurua totona?

¹² Ita be “dina gabediai” ita noho dainai, ‘ma haida idia badinaia lasi’ taudia be momo, bona idia ese ‘Dirava badinaia karana be toana sibona idia hahedinaraia, to ena siahu idia abia dae lasi.’ (2 Tim. 3:1-5) Namona be unai bamona taudia ita bamoa lasi, to hanaihanai edia gwauhamata idia hagugurua taudia ita bamoa.​—Heb. 10:24, 25.

13. Iesu Keriso murinai ia raka tauna ese edena mai anina bada gwauhamata ia karaia?

¹³ Ta ena mauri lalonai Dirava dekenai ia karaia gwauhamata be mai anina bada. Iesu ena hahediba taudia ai idia ura lao taudia be elda taudia ese nega toi idia nanadaia, bema idia ura momokani unai gwauhamata do idia badinaia. (Mat. 16:24) Elda rua ese bapatiso lasi pablisa ai ia ura lao tauna idia intaviu henia neganai, idia nanadaia, “Oi ura momokani Iehova ena Witnes tauna ta ai oi lao, a?” Gabeai, ia goada ia lao bona ia ura bapatiso neganai, elda taudia ese ia idia intaviu henia lou bona idia nanadaia, “Oi be Iehova dekenai oi guriguri bona emu mauri oi gwauhamatalaia vadaeni, a?” Bena bapatiso dinana ai, tok ia henia tadikaka ese bapatiso do idia abia taudia ia nanadaia, “Iesu Keriso ena boubou karana dainai, emu kara dika amo oi helalo-kerehai vadaeni, bona Iehova dekenai sibona oi henia vadaeni, iena ura do oi karaia totona, a?” Bapatiso do idia abia taudia be hutuma vairadiai idia haere, idia gwau “Oibe.”  Anina be idia gwauhamata Dirava do idia hesiai henia ela bona hanaihanai.

14. Edena henanadai ita lalodia dobu be namo?

¹⁴ Herevana oi be vanegai sibona oi bapatiso, eiava lagani momo lalonai Dirava oi hesiai henia, to namona be nega ta ta ai sibona oi nanadaia: ‘Lau be Iesu lau tohotohoa bona egu “Oibe” be Oibe, a? Iehova dekenai lau karaia gwauhamata lau badinaia noho, a? Iesu ena hereva bamona, egu mauri lalonai haroro bona hahediba taudia halaoa gaukarana lau atoa guna, a?’​—2 Korinto 13:5 duahia.

15. Edena nega idauidau ai do ita hamomokania eda “Oibe” be Oibe?

¹⁵ Iehova dekenai ita karaia gwauhamata ita hagugurua totona, mai anina bada gaudia ma haida dekenai kara momokani ita badinaia be namo. Hegeregere, bema oi be headava tau o hahine, oi gwauhamata vadaeni emu adavana do oi lalokau henia bona naria, bona unai gwauhamata oi badinaia be namo. Danu, bema oi be bisinesi kontraka ta oi sainia, eiava kongrigeisen o orea ena gaukara idauidau karaia totona aplikeisen fom oi atoa, namona be emu gwauhamata oi badinaia. Eiava, reana oi be ogogami tadikaka ta ese ia boiria iena ruma ai do umui aniani totona, bona unai oi abia dae. To, dahaka do oi karaia, bema gabeai taga tadikaka ta ese oi ia boiria danu,? Namona be ogogami tadikaka ida oi karaia gwauhamatana oi badinaia. Bema ruma-ta-ruma-ta haroro gaukara ai, kamonai tauna ta oi hamaoroa do oi lou henia, emu gwauhamata oi hagugurua be namo. Iehova ese emu haroro gaukara do ia hanamoa.​—Luka 16:10 duahia.

16. Bema ita karaia gwauhamata ta ita hagugurua lasi, dahaka ita karaia be namo?

¹⁶ Baibel ia gwau ita be goevadae lasi taudia dainai, “nega momo ita kerere.” Hegeregere, eda hereva amo ita ese kerere ita havaraia. (Iam. 3:2) Bema eda gwauhamata ta ita hagugurua lasi, dahaka ita karaia be namo? Dirava ese Israela taudia dekenai ia henia Taravatu hegeregerena, bema tau ta “ia laloa namonamo lasi” to gwauhamata ia karaia kava, Dirava ese ena kerere ia gwauatao diba. (Lev. 5:4-7, 11) Hari danu, Keristani taudia ese gwauhamata idia hamomokania lasi neganai, edia kerere gwauatao dalana ta ia noho. Bema ita karaia gwauhamatana ta ita makohia bona Iehova dekenai ita gwauraia hedinarai, ia ese ita do ia hebogahisi henia bona eda kerere do ia gwauatao. Hahelaga Tauna Badana, Iesu Keriso ese ita ia durua dainai, Dirava ena lalonamo ita abia lou diba. (1 Ioa. 2:1, 2) To, Dirava ena lalonamo lalonai ita noho totona, namona be ita helalo-kerehai momokani. Hegeregere, namona be iseda gwauhamata ita makohia loulou lasi. Danu, eda gwauhamata ita makohia dainai, ita havaraia hekwakwanai ita hamaoromaoroa haraga be namo. (Aon. 6:2, 3) To, gau badana be gwauhamata ita do karaia lasi neganai, ita laloa namonamo guna be namo. Ita ura lasi gwauhamata ita karaia haraga, to ita hamomokania lasi.​—Hadibaia Tauna 5:2 duahia.

17, 18. Edia gwauhamata idia hagugurua taudia be vaira negana ai, dahaka hahenamo do idia davaria?

¹⁷ Edia gwauhamata idia hamomokania Keristani taudia ibounai, be vaira negana ai hahenamo idauidau do idia davaria. Horoa taudia be guba ai mase diba lasi maurina do idia abia, bona lagani 1,000 lalonai Iesu ida do idia lohia. (Apok. 20:6) Taunimanima milioni momo be tanobada Paradaisona ai do idia noho. Danu, Keriso be Dirava ena Basileia ai ia lohia neganai, taunimanima do ia durua idia gorere lou lasi, bona edia lalohadai ia goeva totona.​—Apok. 21:3-5.

¹⁸ Keriso ena lohia negana ena dokonai, hahetoho ginigabena do ia vara. Unai hahetoho lalonai idia gini goada taudia sibona be Paradaiso ai do idia noho, bona ta ta edia hereva do idia hamomokania. (Apok. 20:7-10) Unai negai idia noho taudia ibounai edia “Oibe,” be Oibe bona edia “Lasi,” be Lasi. Idia ese iseda lalokau guba Tamana Iehova, “kara momokani ena Dirava,” do idia tohotohoa goevagoeva.​—Sal. 31:5.