Inai atikol lalonai Britain dekenai idia vara ekspiriens haida ese oi do idia durua, oi hesiku haraga lasi totona. Danu, “oiemu [“paraoa,” NW] be davara ena kopina dekenai do oi negea” daladia haida do oi dibaia, bona unai ese oi do idia durua hereva momokani idia do abia dae lasi taudia oi durua totona.​—⁠Had. 11:1, NW.

Mai anina bada gauna ginigunana be, haheauka karana do oi hahedinaraia. Namona be hereva momokani oi dogoatao auka bona Iehova oi badinaia noho. (Deu. 10:20) Georgina be unai bamona ia karaia. Lagani 1970 ai, Iehova ena Witnes taudia ida Baibel ia stadilaia neganai, ena adavana Kyriacos ia badu dikadika. Ia ura Georgina ena stadi ia koua dainai, edia ruma dekenai Witnes taudia ia abia dae lasi, bona Witnes taudia edia buka bona magasin ia negedia.

Georgina be kongrigeisen heboudia ia lao matamaia neganai, Kyriacos ena badu ia bada. Dina ta Kingdom Hall dekenai ia lao Georgina ida ia hepapahuahu totona. Taihu ta ia itaia Kyriacos be Greek gado ia diba, to English gado ia diba namonamo lasi. Unai dainai, kongrigeisen ma ta dekenai Greek tadikaka ta ia rini henia, do ia mai bona Kyriacos do ia durua. Unai tadikaka ena kara namo dainai, Kyriacos ena badu karana ia hadokoa, bona danu hua haida lalonai Baibel idia stadilaia hebou. To daudau lasi murinai, Kyriacos be ena stadi ia rakatania.

Lagani toi lalonai, Kyriacos ese Georgina ia dagedage henia. Kyriacos ia gwau, bema Georgina ia bapatiso, do ia rakatania. Georgina ena bapatiso dinana ai, Iehova ia guriguri henia goadagoada ena adavana ese ia rakatania lasi totona. Witnes taudia be Georgina ena ruma dekenai idia lao, hebouhebou totona idia udaia gwauraia neganai, Kyriacos ia gwau: “Umui lao guna. Ai be emai motuka amo do ai mai.” Daba ena program ia kamonai bona Georgina ia bapatiso ia itaia!

Gabeai, Kyriacos ena dagedage karana ia hamaragia bona ena mauri ia haidaua. Bona Georgina be lagani 40 ia haheauka murinai, Kyriacos ia bapatiso! Dahaka ese Kyriacos ena lalona ia haidaua? Ia gwau: “Lau itaia Georgina ia ura lasi gau ta ese ena tomadiho karana ia hadikaia, bona lau be unai lau ura henia.” Georgina ia gwau: “Ena be egu adavana ese lau ia dagedage henia, to lau ura lasi egu tomadiho karana lau rakatania. Unai dagedage negadia lalonai, hanaihanai Iehova lau guriguri henia bona lau hesiku lasi.”

Emu adavana oi durua dalana ma ta be, Keristani mauri matamatana oi hahedinaraia. Aposetolo Petero ese Keristani hahine ia sisiba henidia, ia gwau: “Emui adavadia henunai do umui noho. Bona bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba.” (1 Pet. 3:1) Christine be unai sisiba ia badinaia. Lagani 20 gunanai, ia be Witnes hahinena ai ia lao neganai, ena adavana John, be hereva momokani ia abia dae lasi. John ia laloa Dirava ia tomadiho henia be anina lasi, to ia itaia Christine be ena tomadiho karana ia laloa bada. Ia gwau: “Lau itaia Christine be Iehova ia tomadiho henia dainai ia moale. Danu, ena maduna ia huaia namonamo, hahine goadana ai ia lao, bona hekwakwanai lau davaria neganai, ia ese lau ia durua.”

Christine be ena adavana ia doria lasi, Witnes tauna ai ia lao totona. John ia gwau: “Matamanai Christine ia laloparara lau dekenai hereva momokani do ia harorolaia lasi, to ia haheauka bona lau ia rakatania, lau sibona ese egu nega bona dala ai hereva momokani do lau dibaia totona.” Christine be Gima Kohorona o Awake! lalonai animal, tubutubu gaudia o saiens gaudia edia sivarai ia itaia neganai, ia diba ena adavana be unai gaudia ia ura henia dainai, John dekenai ia gwau, “Lau laloa inai sivarai do oi moalelaia.”

Lagani haida murinai, John ia ritaea bona uma karaia gaukara haida ia karaia. Ia dekenai nega bada ia noho dainai, mai anina bada gaudia ia laloa. Hegeregere, “Ita, taunimanima be ita vara kava, eiava mai badina ta dainai Dirava ese ita ia havaraia?” Dina ta, tadikaka ta be John ida ia herevahereva lalonai John ia nanadaia, “Oi ura Baibel oi stadilaia, a?” John ia gwau: “Lau ese Dirava lau abia dae matamaia dainai, Baibel stadi lau abia dae.”

Christine ena haheauka karana ese anina namona ia havaraia! Hanaihanai ia guriguri John ese hereva momokani do ia abia dae, bena lagani 20 murinai, John ia bapatiso. Hari, idia ruaosi be Iehova idia hesiai henia noho. John ia gwau: “Gau rua ese egu lalona idia veria: Witnes taudia be lau idia abia dae bona lau idia kara namo henia. Danu, bema emu adavana be Iehova ena Witnes ta, oi do ia badinaia, ena maduna do ia huaia namonamo, bona emu namo do ia laloa  bada.” Oibe, Christine be 1 Petero 3:1 ena sisiba ia badinaia bona namo ia davaria!

Guna Baibel idia stadilaia, to edia stadi karana idia rakatania taudia be edena bamona? King Solomona ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” (Had. 11:6) Nega haida hereva momokani ena uhe be lagani momo murinai ia tubu. Reana, lagani momo murinai ta ia laloparara Dirava tura henia karana be mai anina bada. (Iam. 4:8) Reana dina ta do oi hoa, badina guna oi stadi henia tauna be do ia bapatiso.

Mani Alice oi laloa, ia be India amo ia lao England dekenai ia noho. Lagani 1974 ai, Baibel stadi ia hamatamaia. Ia be Hindi gado ia herevalaia to ia ura ena English gado ia hanamoa. Lagani haida lalonai ia stadi, bona English kongrigeisen ta ena hebou haida ia lao. Ia diba ia stadilaia gaudia be hereva momokani, to ia laloa bada lasi. Danu, ia be moni ia laloa bada, bona pati lao henia karana ia moalelaia. Unai dainai, gabeai ena stadi ia rakatania.

Lagani 30 murinai, Stella, guna Alice ia stadi henia taihu, be Alice amo revareva ta ia abia. Alice ia gwau: “Lau diba do oi moale, badina guna lagani 1974 ai oi stadi henia hahine be vanegai distrik hebouhebou ai ia bapatiso. Oi ese lau oi durua bada. Egu kudouna ai hereva momokani ena uhe oi hadoa, bona ena be unai negai lau hegeregere lasi Dirava dekenai egu mauri lau gwauhamatalaia, to unai uhe be egu kudouna ai ia do noho.”

Dahaka ia vara? Alice ia gwau, lagani 1997 ai ena adavana ia mase dainai, ia lalohisihisi bada. Ia ese Dirava ia guriguri henia. Miniti 10 lalonai, Punjabi gado idia herevalaia Witnes hahinedia be iena ruma dekenai idia lao bona pepapepa ladana, Helaro Namona Mase Taudia Totona be Ia Noho, A? idia henia. Alice ia mamia Dirava ese ena guriguri ia haerelaia, bona abia hidi ia karaia Iehova ena Witnes taudia do ia bamoa. To, edeseniai Witnes taudia do ia davaria? Ena dairi buka gunana ia davaria, bona guna Stella ese ia henia Punjabi kongrigeisen ena adres ia abia. Kingdom Hall ia lao neganai, Punjabi tadikaka taihu ese ia idia welkam henia. Ia gwau: “Guna lau mamia lalokauna lau mamia lou, bona unai ese lau ia durua egu lalohisihisi lau hanaia totona.”

Alice be hebou ia lao hanaihanai, bona ena stadi ia hamatamaia lou. Danu, Punjabi gado herevalaia bona duahia namonamo dalana ia dibaia. Ia be lagani 2003 ai ia bapatiso. Ena revareva dokonai ia gwau: “Oi lau tanikiu henia bada, badina lagani 29 gunanai hereva momokani ena uhe be egu kudouna lalonai oi hadoa, bona lau dekenai oi be haheitalai namona.”

“Oi lau tanikiu henia bada badina lagani 29 gunanai hereva momokani ena uhe be egu kudouna lalonai oi hadoa, bona lau dekenai oi be haheitalai namona.”​—⁠Alice

Unai ekspiriens amo dahaka oi dibaia? Ena be lagani momo lalonai ta be hereva momokani ia abia dae lasi, to bema ia be kudou-maoro tauna, ia manau bona ia ura Dirava ia dibaia, Iehova ese do ia durua hereva momokani ia lalopararalaia bona ia abia dae totona. Mani Iesu ena haheitalai ta ita laloa, ia gwau: “Uhe ena raurau matamata ia hedinarai bona ia tubu daekau, to edena bamona ia tubu be ia diba lasi. Tano sibona ese unai uhe ia hatubua metairametaira, guna rau ia atoa, gabeai witi kwarana ia hedinarai bena huahua ia mage.” (Mar. 4:27, 28) Unai uhe be ‘tano sibona ese ia hatubua metairametaira.’ Anina be, Basileia harorolaia tauna ia diba lasi edena dala ai unai uhe do ia tubu. Unai dainai, hereva momokani ena uhe momo do oi hadoa noho, badina gabeai anina momo do oi gogoa.

Danu, namona be guriguri karana oi laloa boio lasi. Georgina bona Christine be hanaihanai Iehova idia guriguri henia. Bema ‘guriguri oi hadokoa lasi,’ bona oi hesiku haraga lasi, “dina momo murinai” davara kopina dekenai oi negea “paraoa” do oi davaria lou.​—⁠Roma 12:12; Had. 11:1, NW.