1-3. Edena dala ai Baibel ita duahia bona ita dibaia gaudia badinaia karana ese ita do ia durua?

 TAIHU burukana ta ia gwau, “Daba ibounai Iehova lau tanikiu henia, badina ia ese lau ia durua Baibel lau lalopararalaia totona.” Ena be ia ese Baibel be nega 40 ia duahia vadaeni, to Baibel duahia karana ia hadokoa lasi. Taihu matamata ta ia gwau, Baibel duahia karana ese ia ia durua Iehova ia tura henia, bona ia abia dae Dirava be ia noho momokani. Ma ia gwau, “Baibel duahia karana ese egu mauri ia hanamoa!”

² Aposetolo Petero ese ita ia hagoadaia Baibel ena hereva momokani ita ura henia totona. (1 Pet. 2:2) Baibel ita stadilaia bona ena hahediba herevadia ita badinaia neganai, eda lalomamina do ia goeva bona do ita davaria eda mauri be mai ena anina. Baibel ena hahediba herevadia ese ita idia durua, Dirava momokanina idia lalokau bona hesiai henia taudia ma haida ita tura henia totona. Unai badina namodia dainai, ita be “Dirava ena taravatu [ita] moalelaia” diba. (Roma 7:22) Edena dala ma haida ai Baibel stadilaia karana ese ita ia durua diba?

³ Iehova bona iena Natuna oi dibaia neganai, emu lalokau idia bona taunimanima totona be do ia goada ia lao. Danu, Dirava ese kara maoromaoro taudia do ia hamauria, bona kara dika taudia do ia haorea dalana be Baibel amo do oi dibaia. Emu haroro gaukara ai, sivarai namona be taunimanima dekenai oi herevalaia. Bona oi dibaia gaudia be ma haida oi hadibaia neganai, Iehova ese oi do ia hanamoa.

4. Baibel be “gado maragina ai” oi duahia anina be dahaka?

⁴ Iehova ia ura nega ita atoa Baibel amo ita duahia gaudia ita laloa dobu bona lalopararalaia totona.  Dirava ese Iosua ia hamaoroa ia gwau: “Inai taravatu bukana be oiemu uduna amo do ia siri lasi, bona oi ese dina bona hanuaboi ai do oi duahia gado maragina ai.” (Ios. 1:8, NW; Sal. 1:2) Unai ena anina be Baibel ena hereva ta ta be gado maragina ai oi gwauraia, a? Lasi, to anina be metairametaira oi duahia, bona oi duahia herevadia oi laloa dobu. Unai ese oi do ia durua, oi idia hagoadaia siridia oi laloa namonamo totona. Oi ia hagoadaia hereva o sivarai ta oi davaria neganai, unai kahana be metairametaira oi duahia. Unai oi karaia neganai, oi duahia gaudia ese oi idia hagoadaia diba. Dahaka dainai unai be mai anina bada? Badina Dirava ena sisiba oi lalopararalaia neganai, do oi ura oi badinaia.

5-7. Haheitalai ta amo oi hahedinaraia, Baibel duahia namonamo karana ese edena bamona oi ia durua: (a) Dirava ena taravatu oi badinaia? (b) mai hemataurai ida ma haida oi hereva henia? (c) lalohekwarahi negadiai Iehova oi abidadama henia totona?

⁵ Ita laloparara haraga lasi Baibel bukadia be metairametaira ita duahia be namo, unai amo ita duahia herevadia edia anina ita laloa namonamo diba. Mani haheitalai toi ita laloa. Ginigunana be inai: Tadikaka matamata ta be Hosea bukana ia duahia. To karoa 4, siri 11 ia lao 13 ia duahia murinai, ia laloa dobu. (Hosea 4:11-13 duahia.) Dahaka dainai? Badina sikuli gabunai haida ese ia idia dibagania matabodaga karadia ia karaia totona. To unai siri ia lalodia dobu neganai, ia gwau: ‘Ena be ta ese hehuni dalanai kara dikadia ia karaia, to Iehova ese unai ia itaia danu. Lau ura lasi Iehova ena lalona lau hahisia.’ Tadikaka be ena lalona ia hadaia, Iehova ena kara maoromaoro taravatudia ia badinaia totona.

⁶ Haheitalai iharuana be inai: Taihu ta be Ioela bukana ia duahia, bona karoa 2 siri 13 dekenai ia ginidae. (Ioela 2:13 duahia.) Unai siri ia duahia neganai ia laloparara Iehova ena kara ia tohotohoa be namo, badina Iehova ‘be mai ena hebogahisi bada, mai ena hariharibada bona ia badu haraga lasi.’ Unai taihu be nega haida mai badu ida ena adavana bona ma haida ia hereva henia dainai, ia laloparara ena kara ia haidaua be namo.

⁷ Haheitalai ihatoina ai tadikaka ta mai ena adavana bona natudia mani ita laloa. Ia be ena moni gaukara ia haboioa dainai, ia lalohekwarahi edena bamona ena famili do ia naria. Ia ese Nahumu bukana ia duahia. Nahumu 1:7 ia duahia neganai, ia itaia Iehova be ia idia abidadama henia taudia ia diba, bona “edia hekwarahi bona hisihisi dinana” ai ia ese ia gimadia. Tadikaka be unai siri ese ia durua dainai, ia laloparara Iehova ese ia bona ena famili ia lalokau henidia, bona hari ia lalohekwarahi momo lasi. Bena metairametaira siri 15 ia duahia. (Nahumu 1:15 duahia.) Ia laloparara bema hekwakwanai negadiai danu, sivarai namona ia harorolaia noho, unai ese ia hamomokania ia be Iehova ia abidadama henia. Unai dainai, moni gaukara ta ia tahua noho lalonai, ena nega bada be haroro gaukara ia karaia.

8. Emu Baibel duahiduahi amo oi dibaia gauna ta mani oi gwauraia.

⁸ Unai haheitalai ta ta amo ita ese Hosea, Ioela bona Nahumu edia siri haida ita herevalaia, bona haida idia laloa unai buka toi idia lalopararalaia be auka. To unai buka ta ta amo hagoadaia siridia oi davaria neganai, do oi ura unai Baibel bukadia oi duahia noho. Ita idia hagoadaia bona durua abia hidi maorodia ita karaia totona. Baibel ena buka ibounai ese unai dala ai ita idia durua diba. Dirava ena Hereva be maini ta bamona, tano henunai daimon momo idia noho. Baibel ibounai oi duahia lalonai, unai “daimon” o dava bada hahediba bona hagoadaia herevadia oi tahua be namo!

9. Baibel ita lalopararalaia namonamo totona dahaka ita karaia diba?

⁹ Dina ta ta ai Baibel oi duahia be gau badana. To, oi duahia gauna oi lalopararalaia be namo. Unai dainai, Baibel ese ia herevalaia taudia, gabudia, bona sivarai oi diba namonamo totona, iseda buka bona magasin amo tahua gaukara oi karaia. Bema oi diba lasi, oi duahia gauna be edena dala ai do oi badinaia, elda eiava lo tadikaka o taihu ta oi nanadaia diba. Aposetolo edia negai ia noho Keristani tauna ta ladana, Apolo be unai bamona ia karaia. Mani ena sivarai ita itaia.

10, 11. (a) Edena dala ai Apolo be heduru ia abia ena haroro gaukara ia hanamoa totona? (b) Apolo ena haheitalai amo dahaka ita dibaia? (Maua ladana, “Idia Halasia Diba Matamatadia Oi Gaukaralaia, A?” itaia.)

¹⁰ Apolo be Iuda Keristani tauna ta, “Toretore Helagadia ia diba momo” bona ia be haroro goadagoada tauna. Kara bukana ia gwau, ia be Iesu ena sivarai ia harorolaia. To Apolo ia diba lasi, Iesu ese bapatiso karana dekenai hahediba hereva matamatana ta ia gwauraia. Keristani tauna, Akwila bona ena adavana Prisikila be Efeso dekenai Apolo ena haroro herevana idia kamonai murinai, idia ese “Dirava ena dala be ia dekenai idia herevalaia maoromaoro.” (Kara 18:24-26) Edena dala ai unai ese Apolo ia durua?

¹¹ Apolo be Akaia dekenai ia lao bona unuseniai ia haroro. Sivarai namona idia abia dae taudia ia durudia, bona Toretore Helagadia amo taunimanima vairanai ia hahedinaraia goevagoeva, Iuda taudia idia kerere bona Iesu be Keriso. (Kara 18:27, 28) Unai negai, Apolo be Keristani bapatiso karana ena hahediba herevana ia diba namonamo dainai, kamonai matamata taudia ia “durua bada” hereva momokani lalonai idia goada totona. Iena sivarai amo dahaka ita dibaia? Apolo bamona, namona be ita hekwarahi Baibel  ai ita duahia gaudia ita lalopararalaia totona. To, danu mai manau ida ma haida edia heduru ita abia dae, unai amo hadibaia taudia namodia ai ita lao diba.

12, 13. Edena dala ai aonega dalanai Baibel ita gaukaralaia, stadi tauna ita durua ia goada ia lao totona?

¹² Prisikila, Akwila, bona Apolo idia karaia bamona, ita ese ma haida ita durua diba. Kamonai tauna ta oi durua ena mauri ia haidaua, bona hereva momokani lalonai ia goada ia lao neganai, emu hemami be edena bamona? Eiava bema oi be elda ta, bona Keristani tauna ta be hekwakwanai ta dainai Baibel amo oi durua, bena ia ese oi ia tanikiu henia neganai emu hemami be edena bamona? Oibe, Baibel amo ma haida ita durua edia mauri idia haidaua karana be moale gauna. a Edena dala ai unai ita karaia diba?

¹³ Elia ena negai, Israela taudia momo be idia daradara, tomadiho momokani o tomadiho koikoi do idia badinaia. Bema stadi tauna ta be ia daradara, Iehova do ia hesiai henia o lasi, reana Elia ena hereva ese ia hagoadaia diba. (1 King Taudia 18:21 duahia.) Eiava reana kamonai tauna ta be ia ura lasi Baibel stadi ia abia dae, badina ena turadia o famili ese idia gwau henia garina. Reana Isaia 51:12, 13 (duahia) ena hereva amo ia oi durua diba Iehova ia tomadiho henia totona.

14. Dahaka ese oi do ia durua Baibel siridia oi laloatao bona ma haida oi durua totona?

¹⁴ Baibel lalonai idia noho herevadia ese ita idia durua, eda lalohadai idia hamaoromaoroa bona ita idia hagoadaia. To reana sibona do oi nanadaia, ‘Edena dala ai do lau diba edena siri do lau gaukaralaia?’ Dina ta ta ai Baibel oi duahia bona laloa dobu. Unai dala amo Baibel do oi diba namonamo, bona Iehova ese ena lauma helaga amo oi do ia durua Baibel siridia oi laloatao totona.​—⁠Mar. 13:11; Ioane 14:26 duahia. b

15. Dahaka ese oi do ia durua Baibel ena hereva oi lalopararalaia namonamo totona?

¹⁵ King Solomona bamona Dirava ita noia aonega do ia henia, eda haroro gaukara bona kongrigeisen ai maduna ita huaia namonamo totona. (2 Siv. 1:7-10) Peroveta taudia bamona Baibel oi stadilaia namonamo. Unai ese oi do ia durua, Iehova ena sivarai momokanina bona ena ura oi dibaia totona. (1 Pet. 1:10-12) Aposetolo Paulo ese Timoteo ia hamaoroa, “abidadama herevadia bona hadibaia hereva namodia” do ia stadilaia. (1 Tim. 4:6) Bema Baibel oi stadilaia noho, ena hereva do oi lalopararalaia namonamo bona ma haida oi durua dalana do oi dibaia. Unai bamona oi karaia neganai emu abidadama do ia goada.

16. (a) Berea taudia be dina ta ta ai Baibel idia duahia dainai, dahaka namo idia davaria? (b) Dahaka dainai dina ta ta ai Baibel ita duahia be gau badana?

¹⁶ Berea dekenai idia noho Iuda taudia be dina ta ta ai Baibel idia duahia namonamo. Paulo ese ia haroro henidia neganai, ia herevalaia gaudia be Toretore Helagadia ida idia hahegeregerea. Unai dainai idia laloparara ia be hereva momokani ia hadibaia, bona momo be “abidadama taudia ai idia lao.” (Kara 17:10-12) Unai ese ia hahedinaraia, dina ta ta ai Baibel duahia karana ese ita ia durua diba,  eda abidadama Iehova dekenai ia goada totona. Dirava ena tanobada matamatana lalonai ita vareai totona, eda abidadama ia goada be gau badana.​—⁠Heb. 11:1.

17, 18. (a) Edena dala ai abidadama bona lalokau ese eda kudouna idia gimaia? (b) Edena dala ai eda helaro ese ita ia gimaia?

¹⁷ Paulo ia gwau: “Ita be dina taudia dainai, namona be iseda laloa maoromaoro karana ita dogoatao noho bona abidadama bona lalokau be iseda kemena ena auri dabua bamona ita hahedokilaia. Bona hahemauri helarona be kwara gauna bamona ita atoa.” (1 Tes. 5:8) Kemena ena auri dabua be tuari tauna ese ia hahedokilaia, ena kudouna ia gimaia totona. Unai hegeregerena iseda kudouna, anina be iseda lalohadai, ura, bona hemami ita gimaia be namo. Keristani tauna ese Dirava ena gwauhamata ia abidadama henidia, bona Dirava bona taunimanima ma haida ia lalokau henidia neganai, ena kudouna ia gimaia unai. Ia be gau ibounai do ia karaia Dirava ena lalonamo ia haboioa lasi totona.

¹⁸ Paulo ese kwara gauna ta, “hahemauri helarona” unai, ia herevalaia. (1 Tes. 5:8) Baibel negadiai, tuari taudia be kwara gauna idia karaia, edia kwarana idia gimaia totona. Ita danu, bema ita abia dae momokani Iehova be ita ia hamauria diba, unai ese iseda lalohadai do ia gimaia. Iseda helaro ia goada neganai, aposteit taudia bona edia “anina lasi herevadia” ita dadaraia diba. (2 Tim. 2:16-19) Danu, iseda helaro ese ita ia hagoadaia dainai, kara dika ita dadaraia diba.

19, 20. Dahaka dainai Dirava ena Hereva ita laloa bada, bona edena dala ai unai ita hahedinaraia? (Maua ladana “Iehova ese Nega Korikori ai Lau Ia Durua” itaia.)

¹⁹ Inai tanobada ena dokona ia kahirakahira lalonai, Iehova ena Hereva dekenai ita tabekau be gau badana. Ita do ia durua kara dikadia bona tauanina ena ura dikadia ita dadaraia totona. Baibel ena hereva ese ita do ia hagoadaia bona durua, Satani bona tanobada amo idia mai hahetoho ita haheaukalaia totona. Baibel ena hahediba herevadia ese ita do idia durua, mauri hanaihanai dalana ita badinaia noho totona.

²⁰ Dirava ena ura be “taunimanima idauidau do ia hamauria.” Unai “taunimanima idauidau” be Dirava ena hesiai taudia bona sivarai namona idia kamonai, bona abia dae taudia ibounai. To, inai tanobada ena dokona amo idia ura roho mauri taudia ese “hereva momokani ena diba maoromaoro” idia abia be namo. (1 Tim. 2:4) Bema ita ura ita roho mauri, namona be Baibel ita duahia bona ena hereva ita badinaia. Dina ta ta ai Baibel ita duahia neganai, ita hahedinaraia ita be Iehova ena Hereva ita laloa bada.​—⁠Ioa. 17:17.