1, 2. Hari, Iesu be daika amo ita ia ubua noho? Dahaka dainai unai ita diba be mai anina bada?

 TAIHU ta be eda hedikwota ai idia gaukara tadikakadia dekenai revareva ta ia torea, ia gwau: “Tadikaka e, hanaihanai magasin be nega korikori ai lau abia, bona umui torea atikol namodia ese lau idia durua bada.” Emu hemami be unai taihu bamona, a? Momokani, ita momo be unai bamona hemami ita abia, ani?

²  aDirava ena hereva be nega korikori ai ita abia karana ese ia hamomokania Iesu, kongrigeisen ena Kwarana, be ena gwauhamata hegeregerena ita ia ubua noho. Iesu be daika amo ita ia ubua noho? Iesu be ena “mai” negana ena toana ia herevalaia neganai, ia gwau ia ese “igui hesiai tauna mai ena kamonai bona mai ena kara maoromaoro” do ia gaukaralaia, Biaguna ena hesiai taudia dekenai “nega korikori ai edia aniani” do ia henia. (Maua ai futnout 1 itaia.) (Mataio 24:45-47 duahia.) Inai nega dokonai, Iesu be unai igui hesiai tauna mai ena kamonai amo ena murinai idia raka taudia momokanidia ia ubua noho. Unai dainai, igui hesiai tauna mai ena kamonai ita diba be mai anina bada. Badina unai igui hesiai tauna amo ita abia herevadia ese ita do ia durua Dirava ita tura henia noho totona.—Mat. 4:4; Ioa. 17:3.

3. Guna eda pablikeisen haida ese igui hesiai tauna mai ena kamonai ena parabole be edena bamona idia herevalaia?

³ Iesu ese ia herevalaia igui hesiai tauna mai ena kamonai ena parabole ena anina be dahaka? Guna eda pablikeisen haida idia gwau: Pentekoste 33 C.E. ai, Iesu ese igui hesiai tauna mai ena kamonai ia abia hidi Biaguna ena hesiai taudia ia naria totona. Bona ita laloa, unai nega amo igui hesiai tauna be horoa Keristani taudia ibounai ia laulaulaia, herevana tanobada ai idia be edena negai bona edeseniai idia noho. Danu ita laloa, Biaguna ena hesiai taudia be unai horoa  taudia ta ta. Ma danu ita laloa, lagani 1919 ai, Iesu ese igui hesiai tauna mai ena kamonai ia abia hidi, tanobada ai idia noho Basileia “ena kohu ibounai” do ia naria. To, tadikaka ese Iesu ena parabole idia stadilaia namonamo, idia gurigurilaia, bona idia laloa dobu murinai, idia laloa Iesu ese ia herevalaia igui hesiai tauna mai ena kamonai dekenai lalohadai maorona ita abia be namo. (Aon. 4:18) Namona be parabole ita herevalaia, bona ita tahua edena dala ai guba o tanobada helarona idia abia taudia dekenai unai parabole be mai anina bada.

4-6. Dahaka dainai ita gwau, igui hesiai tauna mai ena kamonai ena parabole be lagani 1914 murinai ia guguru matamaia?

⁴ Mataio karoa 24 ena siri haida ese idia hahedinaraia, igui hesiai tauna mai ena kamonai ena parabole be hari nega dokonai ia guguru matamaia, to Pentekoste 33 C.E. ai lasi. Baibel ese unai ia herevalaia namonamo dalana mani ita itaia.

⁵ Iesu ese “[ena] noho negana bona inai nega oromana ena dokona ena toana” ia perovetalaia neganai, igui hesiai tauna mai ena kamonai ena parabole ia herevalaia danu. (Mat. 24:3) Unai peroveta herevana, Mataio 24:4-22 ai, ena kahana ginigunana ena guguru negadia rua be inai: Ginigunana be, lagani 33 C.E. ia lao lagani 70 C.E. dekenai, bona iharuana be, eda nega dekenai. Anina be Iesu ena hereva (igui hesiai tauna mai ena kamonai) ena guguru negadia danu be rua, a? Lasi.

⁶  bIesu be Mataio 24:29 ena hereva ia gwauraia murinai, eda nega dekenai do idia vara gaudia ia herevalaia. (Mataio 24:30, 42, 44 duahia.) Iesu be hisihisi badana lalonai do idia vara gaudia ia herevalaia murinai, ia gwau taunimanima “do idia itaia taunimanima ena Natuna be . . . guba ena ori latanai do ia mai.” Bena dina gabediai do idia noho taudia idia gima noho totona, ia hagoadadia, ia gwau: “Emui Lohiabada ia mai dinana be umui diba lasi” bona, “Umui laloa lasi horana ai, taunimanima ena Natuna do ia mai.” (Maua ai futnout 2 itaia.) Iesu be dina gabediai do idia vara gaudia ia herevalaia murinai, igui hesiai tauna mai ena kamonai ena parabole ia herevalaia. Ita gwau diba, lagani 1914 ai dina gabedia ia matamaia murinai, Iesu ena hereva (igui hesiai tauna mai ena kamonai) ena anina ia guguru matamaia. Unai be lalohadai maorona. Dahaka dainai?

7. Gogoa gaukarana ia matamaia neganai, edena henanadai badana ta ia vara, bona dahaka dainai?

⁷ Inai henanadai mani oi laloa: “Igui hesiai tauna mai ena kamonai bona mai ena kara maoromaoro . . . be daika?” Aposetolo edia negai, unai henanadai idia gwauraia be anina lasi. Badina vanegai stadi ai ita itaia, aposetolo taudia be hoa karadia idia karaia bona idia ese ma haida dekenai siahu idia henia hoa karadia idia karaia totona. Unai ese ia hamomokania Dirava be aposetolo taudia ia gaukaralaia. (Kara 5:12) Unai dainai, unai negai ta ia henanadai lasi: ‘Keriso ese daika ia abia hidi ena gaukara ia hakaua totona?’ To, lagani 1914 be ia idau. Unai lagani ai gogoa gaukarana ia matamaia. Oibe, witi bona ava dikadia hapararaia negana ia ginidae. (Mat. 13:36-43) Unai negai, Keristani taudia koikoidia momo idia gwau, idia be Keriso murinai idia raka taudia momokanidia. To, henanadai badana be, witi—horoa Keristani taudia—edia toana be edena bamona do ita diba? Igui hesiai tauna mai ena kamonai ena parabole be unai ia haerelaia. Keriso ena murinai idia raka horoa taudia be Dirava amo hereva momokani idia abia noho.

8. Dahaka dainai ita gwau igui hesiai tauna mai ena kamonai be, tanobada ai idia do noho horoa Keristani taudia ia herevalaia?

⁸ Igui hesiai tauna mai ena kamonai be, tanobada ai idia do noho horoa Keristani taudia ia herevalaia. Baibel ese idia ia gwauraia, “king gaukara [idia] karaia hahelaga taudia” bona edia maduna be “dibura amo ena diari namo herea  dekenai [idia] ia boiria tauna ena ‘kara hereadaedia be gabu ibounai dekenai [idia] gwauraia hedinarai.’” (1 Pet. 2:9) Unai dainai, unai “hahelaga taudia” sibona ese edia tadikaka taihu dekenai hereva momokani idia hadibaia be maoro.—Mal. 2:7; Apok. 12:17.

9. Igui hesiai tauna mai ena kamonai be, tanobada ai idia do noho horoa taudia ibounai ia herevalaia, a? Herevalaia.

⁹ To igui hesiai tauna mai ena kamonai be, tanobada ai idia do noho horoa taudia ibounai ia herevalaia, a? Lasi. Idia momo be tanobada ibounai tadikaka oreana dekenai, Dirava ena hereva momokani halasia ena maduna idia abia lasi. Witi—horoa Keristani taudia—huanai, horoa taudia haida be kongrigeisen ai elda o hesiai tauna ena maduna idia huaia. Ma haida be ruma-ta-ruma-ta bona kongrigeisen ai taunimanima idia hadibaia, bona hedikwota amo idia abia hakaua herevadia idia badinaia. To, idia be tanobada ibounai tadikaka oreana dekenai, Dirava ena hereva momokani halasia ena maduna idia abia lasi. Danu horoa taudia haida be taihu, to idia be kongrigeisen lalonai ma haida hadibaia lalohadaina idia abia lasi.—1 Kor. 11:3; 14:34.

10. Igui hesiai tauna mai ena kamonai bona mai ena kara maoromaoro be daika?

¹⁰ Vadaeni, igui hesiai tauna mai ena kamonai bona mai ena kara maoromaoro be daika? Aposetolo edia negai Iesu ese tatau haida sibona amo hutuma ia ubua hegeregerena, unai igui hesiai tauna mai ena kamonai be horoa tadikaka haida sibona ia herevalaia—hari, Keriso ena noho negana lalonai, idia ese Dirava ena hereva momokani idia hegaegaelaia bona halasia noho. Dina gabediai, unai horoa tadikakadia—igui hesiai tauna mai ena kamonai—be eda hedikwota ai idia gaukara hebou. Unai “igui hesiai tauna” ena ladana be, Iehova ena Witnes taudia edia Hakaua Oreana (Governing Body). To laloatao, Iesu be ena parabole lalonai igui hesiai tauna tamona ia herevalaia. Unai dainai ita gwau diba, Hakaua Oreana sibona be disisen ibounai ia karaia.

11, 12. (a) Igui hesiai tauna mai ena kamonai bona mai ena kara maoromaoro be dahaka gaukara rua ia abia? (b) Edena negai Iesu ese igui hesiai tauna mai ena kamonai ia abia hidi, Biaguna ena hesiai taudia ia naria totona? Daidia ia abia hidi?

¹¹ Iesu ena parabole lalonai, Biaguna ese igui hesiai tauna mai ena kamonai bona mai ena kara maoromaoro ia abia hidi, gaukara rua ia karaia totona. Ginigunana be, Biaguna ena hesiai taudia do ia naria. Iharuana be, Biaguna ena kohu ibounai do ia naria. Unai parabole ena anina be inai nega dokonai do ia guguru dainai, anina be lagani 1914 ai Iesu be king dagina ia abia murinai,  igui hesiai tauna dekenai unai gaukara rua do ia henia.

¹²  cEdena negai Iesu ese igui hesiai tauna mai ena kamonai ia abia hidi, Biaguna ena hesiai taudia ia naria totona? Haere ita diba totona, namona be lagani 1914—witi gogoa gaukarana ia matamaia negana—dekenai idia vara gaudia ita laloa lou. Paragraf 7 ai ita itaia bamona, unai lagani lalonai grup momo idia gwau, idia be Keristani taudia. Vadaeni Iesu be edena grup lalonai igui hesiai tauna mai ena kamonai do ia abia hidi? Lagani 1914 ia lao 1919 ena matamana kahanai, Iesu bona ena Tamana be dubu helaga sekea totona idia mai murinai, unai henanadai ena haere ia hedinarai. (Maua ai futnout 3 itaia.) (Mal. 3:1) Idia moale badina idia itaia, grup maragina ta, Bible Student taudia unai, be Iehova bona ena Hereva idia ura henia dikadika. Momokani, unai grup lalonai gau haida idia hagoevaia be namo. To danu, unai grup taudia idia manau bona hahetoho idauidau lalonai idia gini goada. (Mal. 3:2-4) Unai Bible Student taudia be Keristani taudia momokanidia, Iesu ese parabole ai ia gwauraia witi bamona taudia. Lagani 1919 ai, Iesu be unai grup lalonai lo horoa tadikaka haida ia abia hidi, igui hesiai tauna mai ena kamonai bona mai ena kara maoromaoro ai ia halaoa bona Biaguna ena hesiai taudia do ia naria.

13. Biaguna ena hesiai taudia be daidia, bona dahaka dainai?

¹³ Biaguna ena hesiai taudia be daidia? Idia be igui hesiai tauna mai ena kamonai ese ia ubua taudia. Dina gabedia ena matamana kahanai, Biaguna ena hesiai taudia be, horoa taudia ibounai. Gabeai, mamoe ma haida, hutuma bada taudia unai, be Biaguna ena hesiai taudia ai idia lao danu. Hari, Keriso ena “mamoe serina tamona” ena kahana badana be hutuma bada taudia. (Ioa. 10:16) Igui hesiai tauna be nega korikori ai Baibel ena hereva momokani amo unai hutuma bada taudia bona horoa taudia ibounai ia ubua hebou. To, Hakaua Oreana ena memba tadikakadia be edena bamona? Idia aniani danu be gau badana. Unai dainai, idia diba idia ta ta be Biaguna ena hesiai taudia danu, Iesu ena murinai idia raka taudia momokanidia ibounai hegeregerena.

14. (a) Igui hesiai tauna mai ena kamonai be dahaka gaukara badana ia abia? (b) Iesu ese igui hesiai tauna mai ena kamonai bona mai ena kara maoromaoro dekenai dahaka hadibaia hereva badana ia henia? (Maua ladana, “Bema Unai Igui Hesiai Tauna be Dika Ia Karaia . . . ” itaia.)

¹⁴ Iesu ese igui hesiai tauna mai ena kamonai bona mai ena kara maoromaoro dekenai gaukara badana ta ia henia. Baibel negadiai, igui hesiai tauna namona ese biaguna ena kohu ia naria. (Luka 12:42) Unai hegeregerena, igui hesiai tauna mai ena kamonai bona mai ena kara  maoromaoro ena gaukara be, Keriso ena tanobada kohudia ibounai ia naria. Iena gaukara haida be moni, brens ofesi, Kingdom Hall, Assembly Hall, haroro gaukara, bona hebouhebou maragidia bona badadia edia program ia naria. Danu, buka idauidau—haroro gaukara, eda stadi, bona kongrigeisen ai ita gaukaralaia gaudia—halasia gaukarana ia naria. Igui hesiai tauna mai ena kamonai ese ia halasia Baibel ena hereva momokani ibounai be mai anina bada Biaguna ena hesiai taudia dekenai.

15, 16. Edena negai Iesu ese igui hesiai tauna ia abia hidi, kohu ibounai ia naria totona?

¹⁵ Edena negai Iesu ese igui hesiai tauna mai ena kamonai ia abia hidi, gaukara iharuana do ia karaia—Biaguna “ena kohu ibounai do ia naria”? Iesu ia gwau: “Bema ena Biaguna ia mai bona ia itaia ia be unai bamona ia karaia, unai igui hesiai tauna do ia moale! Umui lau hamaoroa momokani, Biaguna ese ia do ia abia hidi ena kohu ibounai do ia naria totona.” (Mat. 24:46, 47) Inai siri ai ita itaia bamona, Iesu ia mai bona ia itaia igui hesiai tauna be “unai bamona ia karaia”—nega korikori ai aniani ia henia—neganai, gaukara iharuana ia henia. Unai ese ia hahedinaraia, lagani haida idia ore murinai Iesu ese gaukara iharuana do ia henia. Iesu ese igui hesiai tauna ia abia hidi ena kohu ibounai ia naria dalana bona negana ita diba totona, inai henanadai rua edia haere ita diba be gau badana: (1) Edena negai Iesu ia mai? bona (2) iena kohu be dahaka?

¹⁶  dEdena negai Iesu ia mai? Mataio karoa 24 ena siri haida lalonai haere do ita davaria. Laloatao, matamana siridia ese idia hahedinaraia Iesu do ia “mai” neganai, ia ese inai nega oromana ena dokonai kara dika taudia do ia hadikaia. (Maua ai futnout 4 itaia.) (Mat. 24:30, 42, 44) Unai dainai, igui hesiai tauna mai ena kamonai ena parabole ese ia herevalaia Iesu ena “mai” negana be hisihisi badana lalonai do ia guguru.

17. Iesu ena kohu ibounai be dahaka?

 ¹⁷ Iesu ena “kohu ibounai” be dahaka? Iesu ena kohu be tanobada dekenai bona guba dekenai. Ia gwau: “Dirava ese lau dekenai siahu ia henia, gau ibounai guba ai bona tanobada ai lau naria totona.” (Mat. 28:18; Efe. 1:20-23) Iesu ena kohu ta be Mesia Basileiana. Lagani 1914 amo ia ese unai Basileia ia lohiaia matamaia, bona gabeai horoa taudia ida unai do idia lohiaia.—Apok. 11:15.

18. Dahaka dainai Iesu be mai moale ida ena kohu ibounai naria gaukarana be igui hesiai tauna dekenai do ia henia?

¹⁸ Unai amo dahaka ita dibaia? Hisihisi badana lalonai Iesu be kara dika taudia hadikaia totona ia mai neganai, do ia davaria igui hesiai tauna mai ena kamonai be nega korikori ai Biaguna ena hesiai taudia ia ubua noho. Unai neganai, Iesu be mai moale ida gaukara iharuana—kohu ibounai naria gaukarana—do ia henia. Igui hesiai tauna mai ena kamonai ese ena guba ahuna ia abia o Keriso ida ia lohia hebou neganai, unai gaukara iharuana do ia karaia.

19. Igui hesiai tauna mai ena kamonai ese guba ai ia abia ahuna be horoa taudia ma haida edia ahuna ia hereaia, a? Herevalaia.

¹⁹ Igui hesiai tauna mai ena kamonai ese guba ai ia abia ahuna be horoa taudia ma haida edia ahuna ia hereaia, a? Lasi. Ta ese nega ta grup maragina dekenai ia gwauhamatalaia ahuna be gabeai ma haida ese idia abia danu. Hegeregere hanuaboi ginigabena ai, Iesu ese ena aposetolo taudia 11 dekenai ia gwauraia herevana mani oi laloa. (Luka 22:28-30 duahia.) Iesu ia gwauhamata unai aposetolo taudia be edia abidadama dainai ahuna namona ta do idia abia. Anina be guba ai Iesu ida king gaukara do idia karaia. To lagani momo murinai, Iesu ese ia hahedinaraia 144,000 taudia ibounai be ia ida guba ai do idia lohia. (Apok. 1:1; 3:21) Unai hegeregerena, Mataio 24:47 ai, Iesu ia gwauhamata horoa tadikaka haida o grup maragina—igui hesiai tauna mai ena kamonai—do ia abia hidi, ena kohu ibounai ia naria totona. To unai ena anina be, 144,000 taudia ibounai be Keriso ida guba ai do idia lohia.—Apok. 20:4, 6.

20. Dahaka dainai Iesu ese igui hesiai tauna mai ena kamonai ia abia hidi, bona dahaka ita karaia be namo?

²⁰ Aposetolo edia negai, Iesu ese tatau haida sibona amo hutuma ia ubua. Unai hegeregerena, dina gabediai, Iesu be igui hesiai tauna mai ena kamonai ia gaukaralaia, badina ia ura horoa taudia ibounai bona hutuma bada taudia be nega korikori ai ia ubudia noho. Namona be nega ibounai unai igui hesiai tauna mai ena kamonai o horoa tadikakadia ita badinadia bona durudia. Unai amo ita hahedinaraia edia gaukara namona ita laloa bada.—Heb. 13:7, 17.