LAGANI 1929, August bona September ai, United States dekenai tadikaka taihu 10,000 mai kahana be dina nain lalonai haroro gaukara badana idia karaia. Buka bona buklet 250,000 bamona idia hariharilaia. Idia huanai be kolpota taudia 1,000 bamona idia noho. Gabeai, edia namba be ia bada daekau! Bulletin a ia gwau, unai be “hoa gauna” badina lagani 1929 ai painia taudia edia namba be nega toi lagani 1927 gauna ia hanaia.

Lagani 1929 ena dokonai, moni ena hekwakwanai badana ta ia vara. Tuesday, October 29, 1929 ai, New York Stock Exchange dekenai moni ena siahu ia ore dainai, bisinesi momo idia moru. Unai neganai Great Depression ia vara. Banika ese moni tausen momo idia halusia. Uma naria gaukaradia bona faktori badadia be idia koua. Taunimanima milioni momo ese edia moni gaukara idia haboioa. Lagani 1933 ai, banika be dina ta ta ai taunimanima edia ruma 1,000 bamona idia abia lou.

Edena dala ai ful-taim hesiai taudia be unai nega aukana lalonai idia gini goada? Idia ese motuka mai edia ruma idia karaia. Painia taudia ese unai motuka idia gaukaralaia dainai, edia moni be renta rumadia dekenai idia haorea lasi, bona teritori ai idia mahuta dainai, hora momo idia haroro diba. b Hebouhebou badadia ai, motuka mai edia ruma be davana lasi hotel ruma bamona. Lagani 1934 ai, Bulletin ese palani ta ia hahedinaraia. Unai palani be motuka ai noho gabuna, ranu bona stouv atoa gabuna, lokua diba bedi bona paraka ia koua diba haba karaia daladia ia herevalaia.

Tanobada hegegemadai tadikaka taihu momo be edia motuka ai ruma idia karaia. Victor Blackwell ia gwau: “Noa be lagatoi haginia dalana ia diba lasi. Bona lau danu be motuka mai ena ruma haginia dalana lau diba lasi.” To gabeai, Victor be unai ia karaia.

Avery bona Lovenia Bristow danu be motuka mai ena ruma ta idia abia. Avery ia gwau: “Lau be matabudi ena koukouna lalonai ia noho bamona egu ruma ida lau loaloa.” Avery bona Lovenia be Harvey bona Anne Conrow ida idia painia hebou. Harvey bona Anne edia motuka mai ena ruma ai, pepa dekenai pisi (tar) idia atoa bena haba dekenai idia kapaia. Motuka amo idia heau neganai pepa haida be sibona idia moru. Avery ia gwau: “Unai nega amo ema bona hari, ta ese unai bamona motuka ia itaia lasi!” To, Avery ia gwau Harvey, Anne bona natudia memero rua be “hanaihanai idia moale.” Harvey ia gwau: “Ai be gau ta dekenai ai dabu lasi bona Iehova ena hesiai gaukara ai karaia neganai ai mamia, ia ese ai ia gimaia bona naria.” Gabeai, Harvey, Anne bona natudia be Gilead Sikuli idia lao, bena Peru dekenai idia siaia lao misinari gaukara totona.

Giusto, Vincenza bona edia natuna kekeni danu be painia famili ta. Vincenza ia rogorogo murinai, idia ese edia 1929 Model A Ford motuka ai ruma ta idia karaia, bona ena toana be “hotel namona ta  bamona.” Unai ese guna idia noholaia kamepa ia hereaia. Idia bona edia natuna kekeni be idia ura henia bada gaukarana idia karaia, unai be United States ai idia noho Italy taudia idia haroro henia.

Taunimanima momo be sivarai namona idia kamonai, to ogogami bona moni gaukara lasi taudia be Baibel bukadia totona kontribusen idia henia be auka. Unai dainai, idia ese aniani bona kohu idia henia Baibel bukadia idia abia totona. Painia taudia rua ese lista ta lalonai kamonai taudia ese kontribusen totona idia henia gaudia 64 idia torea. Lista ai idia torea gaudia be “stoa ta ai idia noho kohu edia lista ta bamona.”

Fred Anderson ese ia davaria biru tauna ta be ia ura iseda buka haida ia abia dainai, sinana ena galasi be kontribusen totona ia henia. Uma gabu ma ta ai, Fred ese iseda buka ia ura henia tauna ma ta ia davaria, to unai tau ia gwau: “Lau dekenai galasi be lasi buka lau duahia totona.” To iena neiba ena galasi ia karaia neganai, buka ia duahia namonamo diba dainai, mai moale ida kontribusen ia henia.

Herbert Abbott ese ena motuka ai kokoroku edia ruma maragina ta ia atoa. Haroro ai Baibel bukadia ia hariharilaia neganai, ruma taudia ese kokoroku toi o foa be kontribusen totona idia henia. Herbert ese unai kokoroku be maketi ai ia hoihoilaia, unai amo petrol ia hoia diba. Ia gwau: “Ena be nega haida ai be moni lasi, to unai ese ai ia koua lasi. Bema emai motuka dekenai petrol ia noho, ai be do ai haroro noho bona Iehova ai abidadama henia.”

Unai nega aukadia ai, Iehova abidadama henia karana ese Iena taunimanima ia durua idia haheauka noho totona. Medu bona lai bada negana ta ai, Maxwell bona Emmy Lewis be edia motuka mai ena ruma amo idia raka lasi murinai, idia itaia au badana ta ia moru bona edia motuka ia hadikaia. Maxwell ia gwau: “Unai be vaia idia vara gaudia, to unai ese emai hesiai gaukara ia koua lasi. Gaukara bada ia do noho bona ai ura unai do ai karaia.” Maxwell bona Emmy be idia lalomanoka lasi, bona tadikaka taihu ese idia durudia edia motuka idia hanamoa lou totona.

Iseda negai danu, tanobada hegegemadai Iehova ena Witnes taudia milioni momo be unai bamona gini goada karana idia hahedinaraia noho. Unai painia ginigunadia bamona, namona be haroro gaukara ita karaia noho ela bona Iehova ia gwau gaukara ia ore.