Hekwakwanai idauidau ese iseda mauri idia hadikaia diba. Bema unai gaudia ita laloa momo, do ita lalomanoka bona moale lasi. King Davida, be hekwakwanai momo ia davaria danu. Edena bamona unai hekwakwanai ia hanaidia? Davida ia haere: “Durua totona lau ese Lohiabada dekenai lau boiboi. Ia dekenai lau noinoi goada, lau do ia durua totona. Egu lalohisihisi bona hekwarahi gaudia, be iena vairana dekenai lau gwauraia noho. Egu lalona ia metau momokani, bona lau laloa be dika do lau davaria neganai, Lohiabada be ia diba edena kara ese egu dala do ia hanamoa.” Oibe, Davida be mai manau ida Iehova amo heduru ia noia.​—⁠Sal. 142:1-3.

Davida ma ia gwau: “Gau tamona sibona Iehova dekena amo do lau noia, unai gau sibona do lau tahua. Iehova ena ruma ai do lau noho, egu mauri dinadia ibounai; Iehova ena hairai do lau itaia, bona ena dubu do lau laloa bada.” (Sal. 27:4, NW) Mani oi laloa, Davida be Levi tauna lasi, to ia be dubu helaga, tomadiho momokani idia karaia gabuna, ena ariara dekenai ia gini. Davida ena kudouna ia moale bada dainai, ia ura ena mauri ibounai lalonai Dubu Helaga ai do ia noho bona ‘Iehova ena hairai do ia itaia.’

Davida be hanaihanai Dirava ese ia hegaegaelaia tomadiho dalana ia laloa bada dainai, ia gwau ia be mai ena hairai. Namona be sibona ita nanadaia, ‘Lau be Davida ia mamia bamona lau mamia, a?’

Hari, Iehova tomadiho henia totona, ita be dubu helaga ta dekenai ita lao lasi. To, Dirava ena lauma dubu helaga badana, o Dirava ese ia hegaegaelaia tomadiho momokani dalana ai ia ita tomadiho henia. a Bema unai dala ita “laloa bada,” ita danu be ‘Iehova ena hairai do ita itaia.’

Palai Dubu ena vairanai ia gini kopa amo idia karaia gabua boubou patana mani ita laloa. (Eso. 38:1, 2; 40:6) Unai boubou patana be Dirava ese mai ena ura ida Iesu Keriso ena boubou gauna ia abia dae karana ia laulaulaia. (Heb. 10:5-10) Ita dekenai unai boubou gauna be mai anina bada! Aposetolo Paulo ia gwau: “Guna ita be Dirava ena inai taudia, to iena Natuna ena mase amo ita be ia ida maino ai ita noho.” (Roma 5:10) Iesu Keriso ena boubou rarana ita abidadama henia neganai, Iehova ese ita do ia lalonamo bona abidadama henia. Unai amo ita be “Iehova ita tura henia” diba.​—⁠Sal. 25:14, BHḡ.

Iehova ese iseda ‘kara dika ia kokia’ dainai, “goada matamata” ita abia diba. (Kara 3:19) Ita be dibura ai ia noho tauna bamona. Do idia hamasea negana ia naria lalonai, ia helalo-kerehai bona ena kara ia haidaua. Vadaeni, mai ena hebogahisi diadi be unai ia itaia dainai, gwaumaoro ia henia unai tauna do idia hamasea lasi. Dibura tauna be ia moale bada herea! Unai diadi hegeregerena, Iehova be idia helalo-kerehai taudia do ia lalonamo henidia, bona mase amo do ia hamauridia.

Davida ia itaia Iehova ena ruma ai idia karaia tomadiho momokani karadia be inai: Israela taudia hutuma idia hebou, Taravatu idia duahia bona ena anina idia gwauraia hedinarai, bonana namo muramurana idia gabua, bona hahelaga taudia bona Levi taudia ese hesiai gaukara helagana idia karaia. (Eso. 30:34-38; Num. 3:5-8; Deu. 31:9-12)  Idaunegai Israela ai idia karaia tomadiho karadia haida be hari ita karaia gaudia bamona.

Guna bamona, hari iseda negai ‘Dirava ena taunimanima be idia noho hebou, mai edia laloa tamona neganai, unai be namo herea bona mai ena moale danu!’ (Sal. 133:1) Tanobada hegegemadai iseda “tadikaka oreana” be ia bada ia lao noho. (1 Pet. 2:17) Eda hebou ai Baibel idia duahia bona anina idia gwauraia hedinarai. Iehova ese ena orea amo, hebou idauidau ia hegaegaelaia ita ia hadibaia totona. Danu, buka bona magasin idauidau momo idia halasia, sibona eda stadi bona ruma bese ena tomadiho ita karaia totona. Hakaua Oreana ena memba ta ia gwau: “Hanuaboi ai lau do mahuta lasi neganai, lau be Iehova ena hereva lau laloa dobu, ena anina lau lalopararalaia, ena aonega herevadia lau tahua bona stadilaia. Unai ese egu diba Dirava dekenai ia habadaia bona lau moale.” Oibe, ‘aonega ese oi do ia hamoalea.’​—⁠Aon. 2:10.

Hari, Dirava ena hesiai taudia be dina ta ta ai ia idia guriguri henia. Iehova dekenai unai guriguri be “muramura mai bonana namona bamona.” (Sal. 141:2) Ita moale badina ita laloparara mai manau ida ita guriguri neganai, Iehova Dirava be ita dekenai ia moale!

Mose ia guriguri, ia gwau: “Lohiabada e, oi be aiemai Dirava. Ai ura oiemu bogahisihisi bona hanamoa, be ai dekenai do idia noho, vadaeni . . . aiemai gaukara ena anina do ai davaria.” (Sal. 90:17) Mai eda goada ibounai ida hesiai gaukara ita karaia neganai, Iehova ese iseda gaukara do ia hanamoa. (Aon. 10:22) Reana haida ita durua vadaeni hereva momokani idia dibaia totona. Ena be taunimanima idia ura lasi kamonai, ita idia dagedage henia, ita gorere o lalometau, to lagani momo lalonai ita haroro noho. (1 Tes. 2:2) Oibe, ita ese ‘Iehova ena hairai ita itaia,’ bona ita laloparara iseda guba Tamana be eda hekwarahi ia laloa bada.

Davida ia gwau: “Lau be Iehova lau abia hidi, ia be lau egu ahuna bona egu kapusi; Oi ese egu ahuna oi gimaia noho. Egu dala be gabu namodia dekenai idia lao. Oibe, egu ahuna be namo herea.” (Sal. 16:5, 6, BHḡ) Davida ia moale badina ena “ahuna” be Iehova ia tura henia bona ia hesiai henia diba. Davida bamona reana ita be hekwakwanai haida ita davaria, to Dirava amo hahenamo idauidau ita davaria danu! Unai dainai, namona be tomadiho momokani ita badinaia, bona hanaihanai Iehova ena lauma dubuna ‘ena hairai do ita itaia noho.’