1, 2. (a) Iehova ena “kamonai bona witnes tauna momokanina” be daika? (b) Inai ladana Iesu ena anina be dahaka, bona edena dala ai Iesu be ena ladana hegeregerena ia karaia?

 “HEREVA MOMOKANI gwauraia hedinarai totona lau vara bona tanobada dekenai lau mai.” (Ioane 18:33-37 duahia.) Iesu Keriso idia kota henia neganai, ia ese unai hereva be Iudea ena gavana, Pilato dekenai ia gwauraia. Iesu ia hahedinaraia ia be king ta. Lagani haida murinai, aposetolo Paulo ese Iesu ena gari lasi karana ia herevalaia ia gwau, Iesu be “taunimanima vairanai Pontio Pilato dekenai ena abidadama ia gwauraia hedinarai.” (1 Tim. 6:13) Oibe, Satani ena dagedage tanobadana lalonai, “kamonai bona witnes tauna momokanina” ai ita lao totona, gau badana be do ita gari lasi!—Apok. 3:14.

² Iesu be Iuda tauna dainai, ia vara neganai ia be Iehova ena witnes tauna ta. (Isa. 43:10, NW) Momokani, Iesu be Dirava ena ladana ia abia isi witnes tauna hereadaena. Iesu be Dirava ese ia henia ladana ena anina ia laloa bada. Aneru ta ese Iesu ena ubua tamana Iosepa ia hamaoroa, Maria ena bogana lalonai ia noho beibi be lauma helaga amo murinai, aneru ma ia gwau: “[Maria] be natuna mero ta do ia havaraia, bona iena ladana do oi hatoa Iesu, badina ia  ese ena taunimanima be kara dika amo do ia hamauria.” (Mat. 1:20, 21) Baibel idia diba bada taudia momo idia gwau inai ladana Iesu be Heberu ladana Iesua amo idia abia, bona unai ladana lalonai Dirava ena ladana kwadogina ia noho danu; Iesu ena anina be “Iehova be Hahemauri Tauna.” Unai hegeregerena, Iesu ese “Israela besena ena boio mamoe” ia durua edia kara dika amo do idia helalo-kerehai, unai amo Iehova ena lalonamo do idia abia. (Mat. 10:6; 15:24; Luka 19:10) Unai ia hagugurua totona, Iesu be mai gari lasi ida Dirava ena Basileia ia harorolaia. Mareko ia gwau: “Iesu be Galilea dekenai ia lao, Dirava ena sivarai namona ia harorolaia, bona ia gwau: ‘Nega be ia ginidae vadaeni bona Dirava ena Basileia be ia kahirakahira. Umui helalo-kerehai bona sivarai namona umui abidadama henia.’” (Mar. 1:14, 15) Danu, Iesu be mai gari lasi ida Iuda tomadiho gunalaia taudia ia gwau henidia dainai, idia ese au dekenai idia hamasea.—Mar. 11:17, 18; 15:1-15.

3. Iesu ia mase bona dina toi murinai, dahaka ia vara?

³ Iesu ia mase bona dina toi murinai, hoa gauna ta ia vara. Iehova ese Iesu ia hatorea isi lou, bona mase diba lasi lauma tauanina ia henia. (1 Pet. 3:18) Unai ia hamomokania totona, Lohiabada Iesu be aposetolo taudia dekenai ia hedinarai, bona ia hahedinaraia ia be mase amo ia toreisi lou vadaeni. Iesu ia toreisi lou dinana ai, ia be nega faiv ena aposetolo taudia idauidau dekenai ia hedinarai.—Mat. 28:8-10; Luka 24:13-16, 30-36; Ioa. 20:11-18.

4. Iesu be nega namba faiv ena aposetolo taudia vairanai ia hedinarai neganai, dahaka ia vara bona dahaka gaukara ia henidia?

⁴ Nega namba faiv ai, Iesu be iena aposetolo taudia bona ma haida edia vairanai ia hedinarai. Unai nega ai, ia be idia ida Dirava ena Hereva ia stadilaia bamona. Baibel ia gwau: “Edia lalona ia kehoa momokani, vadaeni Toretore Helagadia edia anina idia lalopararalaia.” Unai amo idia laloparara Iesu be Dirava ena inai taudia ese idia hamasea, bona hoa dalanai ia toreisi lou karana be guna Baibel ese ia perovetalaia. Unai hebou ena dokonai, Iesu ese edia gaukara ia henia. Ia hamaorodia “iena ladana dainai Dirava ese idia helalo-kerehai taudia ibounai edia kara dika do ia gwauatao. Bona unai sivarai be unai bese ibounai huanai do idia harorolaia, Ierusalema dekenai do idia matamaia.” Bena ia haganidia, ia gwau: “Umui ese unai gaudia ibounai do umui gwauraia hedinarai.”—Luka 24:44-48.

5, 6. (a) Dahaka dainai Iesu ia gwau: “Lau do umui gwauraia hedinarai”? (b) Iesu ena hahediba taudia be edena dala matamatana do idia harorolaia?

⁵ Unai hegeregerena, dina 40 murinai, Iesu be nega ginigabena ia hedinarai neganai, toana be iena hahediba taudia ese iena hahegani ena anina idia lalopararalaia. Ia gwau: “Siahu do umui abia, bona Ierusalema, Iudea ibounai, Samaria bona tanobada ena daudau momokani gabudia dekenai, lau do umui gwauraia hedinarai.” (Kara 1:8) Unai hahediba taudia be Israela taudia dainai, idia be Iehova ena witnes taudia vadaeni, ma dahaka dainai Iesu ia gwau: “Lau do umui gwauraia hedinarai”?

⁶ Hari idia be Iehova ese ena ura do ia hagugurua dala matamatana ta do idia harorolaia—unai ese Aigupito bona Babulonia amo Israela taudia ia ruhadia karana ia hereaia. Gauna be inai: Iesu Keriso ia mase bona toreisi lou karana ese dala ia kehoa taunimanima be kara dika bona mase ena igui amo ia ruhadia totona. Pentekoste 33 C.E. ai, lauma helaga ese ia horoa hahediba taudia ese “Dirava ena kara badadia” be taunimanima dekenai idia harorolaia, bona momo ese edia hereva idia abia dae. Hari, Iesu be guba ai ena Tamana ena idibana kahanai ia helai bona ia itaia iena ladana ena anina be dala badana ai ia guguru noho. Oibe, taunimanima tausen momo be idia helalo-kerehai bona idia abia dae Iesu be Iehova ese  ia gaukaralaia idia ia hamauria totona.—Kara 2:5, 11, 37-41.

7. Pentekoste 33 C.E. ai idia vara gaudia ese dahaka idia hamomokania?

⁷ Pentekoste 33 C.E. ai idia vara gaudia ese idia hamomokania, Iehova be Iesu ese taunimanima edia kara dika davana karaia totona ena goevadae tauanina ia bouboulaia karana Ia abia dae. (Heb. 9:11, 12, 24) Iesu ia hereva bamona, “ia mai lasi taunimanima ese ia idia hesiai henia totona, to ma haida hesiai henia totona ia mai, bona ena mauri ia henia, taunimanima momo edia mauri davana karaia totona.” (Mat. 20:28) To, Iuda taudia sibona ese Iesu ena boubou gauna amo namo do idia davaria, a? Lasi. Dirava ena ura be “taunimanima idauidau do ia hamauria,” badina unai mauri davalaia boubouna ese “tanobada taudia edia kara dika [ia] kokia.”—1 Tim. 2:4-6; Ioa. 1:29.

8. Dahaka dainai hahediba taudia ese Iesu ena sivarai idia harorolaia noho diba, bona edia gaukara amo dahaka idia hagugurua?

⁸ Iesu ena hahediba taudia ginigunadia be mai gari lasi ida Iesu ena sivarai idia harorolaia noho, a? Oibe. To, sibona edia goada amo unai idia karaia lasi. Iehova ena lauma helaga ese idia ia hagoadaia Iesu ena sivarai idia harorolaia noho totona. (Kara 5:30-32 duahia.) Pentekoste 33 C.E. ia ore bena lagani 27 bamona murinai, toana be “tanobada hegegemadai” Iuda bona Idau Bese taudia ese “hereva momokani ena sivarai namona” idia kamonai.—Kol. 1:5, 23.

9. Iesu ena peroveta herevana hegeregerena, Keristani kongrigeisen ginigunana dekenai dahaka ia vara?

⁹ To madi, unai Keristani kongrigeisen ginigunana be metairametaira ia miro ia lao. (Kara 20:29, 30; 2 Pet. 2:2, 3; Iuda 3, 4) Iesu ena peroveta herevana hegeregerena, “Dika Tauna,” Satani ese aposteit karadia do ia habadaia bona Keristani tomadiho momokani do idia hadikaia ela bona inai “nega oromana ena dokona.” (Mat. 13:37-43) October 1914 ai, Iehova ese Iesu be taunimanima edia King ai ia halaoa. Unai negai, Satani ena tanobada ena dokona o ‘dina gabedia’ idia matamaia.—2 Tim. 3:1.

10. (a) October 1914 be do lasi neganai, horoa taudia be lagani 30 lalodiai edena mai anina bada deit idia harorolaia? (b) October 1914 ai dahaka ia vara, bona edena dala ai unai ita diba?

¹⁰ October 1914 be do lasi neganai, horoa  taudia be lagani 30 lalodiai idia gwau unai deit ai mai anina bada karana ta do ia vara. Idia abia dae unai be Daniela ena peroveta herevana ta ia hagugurua. Daniela ia gwau, au badana ta be idia utua diho bona “lagani 7” murinai do ia tubu lou. (Dan. 4:16) Iesu ese toa ta ia herevalaia, unai amo ena murinai idia raka taudia do idia laloparara ia be King ai ia lao, bona dina gabedia be idia matamaia vadaeni. Lagani 1914 amo ema bona hari, idia vara gaudia ese idia hamomokania Iesu be King. (Mat. 24:3, 7, 14; Luka 21:24) Unai nega amo, ita harorolaia “Dirava ena kara badadia” ta be, Iehova ese lagani 1914 ai Iesu be Basileia ena King ai ia halaoa.

11, 12. (a) Lagani 1919 ai dahaka ia vara? (b) Lagani 1935 ai, dahaka ia hedinarai goevagoeva? (Laulau ginigunana itaia.)

¹¹ Unai negai Iesu Keriso be King matamatana ai ia lao, bona maoromaoro ia ese iena horoa tadikaka be “Babulonia Badana” ena igui amo ia ruhaia matamaia. (Apok. 18:2, 4) Lagani 1919, Tanobada Ibounai Tuarina Ginigunana murinai, dala ia kehoa horoa taudia be Dirava ese taunimanima ia hamauria dalana, bona iena Basileia be guba ai ia lohia vadaeni ena sivarai namona be tanobada hegegemadai idia harorolaia totona. Horoa taudia be idia haroro goadagoada, unai amo momo be hereva momokani idia diba bona lauma helaga ese ia horodia Keriso ida guba ai idia lohia totona.

¹² Lagani 1935 ai, ia hedinarai goevagoeva Keriso be ena “mamoe ma haida” ia gogoa matamaia; idia be tano idauidau amo idia mai “hutuma bada” taudia. Idia be horoa Keristani taudia edia gunalaia henunai, Iesu bamona mai gari lasi ida ma haida dekenai idia hahedinaraia Dirava bona Keriso be edia hahemauri taudia. Idia diba bema unai haroro gaukarana lalonai idia haheauka bona Keriso ena mauri davalaia boubouna idia abidadama henia ela bona dokona, “hisihisi badana” amo do idia roho mauri, bona Dirava ena tanobada matamatana ai do idia vareai.—Ioa. 10:16; Apok. 7:9, 10, 14.

13. Ita be Iehova ena Witnes taudia dainai, eda lalona ita hadaia dahaka do ita karaia totona, bona edena bamona ita diba do ita kwalimu?

¹³ “Dirava ena kara badadia” bona iena gwauhamata namodia vaira negana totona ita harorolaia gaukarana ita laloa bada be namo. Momokani, haroro gaukara be mai ena hekwarahi. Teritori momo ai, taunimanima idia ura lasi sivarai namona idia kamonai, ita idia kirikirilaia eiava ita idia dagedage henia. To, aposetolo Paulo bona ena bamodia edia haheitalai ita tohotohoa be namo. Paulo ia gwau: “Emai Dirava dainai mai gari lasi ida umui dekenai Dirava ena sivarai namona ai gwauraia, mai hekwarahi bada ida.” (1 Tes. 2:2) Unai dainai, namo lasi ita hesiku. To, eda lalona do ita hadaia eda gwauhamata Dirava dekenai do ita badinaia ela bona Satani ena tanobada ia ore.  (Isa. 6:11) To, ita sibona eda goada amo unai ita karaia diba lasi. Unai dainai namona be Keristani ginigunadia bamona, Iehova do ita noia ena lauma helaga amo “taunimanima edia siahu ia hereaia” siahuna be ita dekenai do ia henia.—2 Korinto 4:1, 7 duahia; Luka 11:13.

14, 15. (a) Taunimanima ese edena dala ai Keristani ginigunadia idia kara henidia, bona Petero ese edena dala ai idia ia hagoadaia? (b) Iehova ena ladana dainai dagedage ita davaria neganai, dahaka ita laloatao be namo?

¹⁴ Hari, ena be taunimanima milioni momo idia gwau idia be Keristani taudia, “to edia kara amo [Dirava] idia dadaraia, badina idia be dika herea momokani, hereva idia kamonai lasi, bona idia hegeregere lasi gaukara namona ta idia karaia totona.” (Tito 1:16) Laloatao, Keristani taudia ginigunadia danu be momo ese idia inai henia. Unai dainai, aposetolo Petero ia gwau: “Bema Keriso ena ladana dainai umui idia gwauraia dika, umui moale, badina . . . Dirava ena lauma . . . be umui latanai ia noho.”—1 Pet. 4:14.

¹⁵ Hari, Iehova ena Witnes taudia dekenai unai hakaua herevana be mai anina bada, a? Oibe. Badina ita ese Iesu be Dirava ena Basileia ena king ai ia lao karana ita harorolaia. Oibe, Iehova ena ladana dainai ita idia inai henia bona “Keriso ena ladana dainai [ita] idia gwauraia dika” karana be idia hegeregere. Keriso be ena inai taudia dekenai ia gwau: “Lau be egu Tamana ena ladanai lau mai, to lau umui abia dae lasi.” (Ioa. 5:43) Unai dainai, haroro gaukara ai haida ese oi idia dagedage henia neganai, oi gari lasi. Unai bamona kara ese ia hamomokania Dirava be oi ia lalonamo henia, bona iena lauma be “[oiemu] latanai ia noho.”

16, 17. (a) Tanobada hegegemadai Iehova ena taunimanima ese haroro gaukara be edena bamona idia laloa? (b) Emu lalona oi hadaia vadaeni dahaka do oi karaia?

¹⁶ Namona be ita laloatao, tanobada hegegemadai taunimanima momo be hereva momokani lalonai idia vareai noho. Ita karaia momo teritori ai, kamonai taudia momo ita davaria bona idia dekenai hahemauri ena sivarai namona ita harorolaia diba. Namona be idia kamonai taudia ita lou henia, bona bema mai dalana idia ida Baibel stadi ita hamatamaia diba. Unai amo idia ita durua ela bona gwauhamata idia karaia bona idia bapatiso. Reana emu hemami be Sarie bamona. Ia be lagani 60 mai kahana lalonai South Africa ai ia haroro. Ia gwau: “Lau moale bada badina Iesu ena boubou gauna dainai, guba bona tanobada ena Lohiabada, Iehova lau tura henia, bona ma haida dekenai iena ladana hairaina lau harorolaia diba.” Ia bona ena adavana Martinus, be edia natudia toi bona taunimanima ma haida idia durua vadaeni Iehova idia tomadiho henia totona. Sarie ma ia gwau: “Inai gaukara amo moale bada ita davaria bona Iehova ese ena lauma helaga amo ita ibounai dekenai goada ia henia inai hahemauri gaukarana ita karaia noho totona.”

¹⁷ Herevana ita bapatiso vadaeni o kahirakahira do ita bapatiso, to namona be ita moale badina ita ese tanobada hegegemadai Iehova ena Witnes taudia edia orea ita bamoa. Unai dainai, namona be Dirava ena ladana ita gwauraia hedinarai, bona Iena taravatu goevadaedia ita badinaia noho. Unai bamona ita karaia neganai, ita ese iseda lalokau guba Tamana ena ladana do ita hanamoa. Ita moale badina ita be unai ladana ita abia.