1. Iehova ena lalohadai gaukara dekenai be dahaka? Bona unai dainai dahaka ia karaia?

IEHOVA be hanaihanai ena gaukara ia moalelaia. (Sal. 135:6; Ioa. 5:17) Iehova ia ura taunimanima bona aneru ese edia gaukara do idia moalelaia danu, unai dainai idia dekenai gaukara namodia ia henia. Hegeregere, ia ese gau ibounai ia havaraia neganai, ena vara guna Natuna be ia ida ia gaukara. (Kolose 1:15, 16 duahia.) Baibel ia gwau Iesu be tanobada ia do mai lasi neganai, ia be guba dekenai Dirava ida ia noho bona ia be “gaukara karaia [“namonamo,” NW] tauna.”—Aon. 8:30.

2. Edena bamona ita diba, aneru be hanaihanai mai anina bada gaukara idia karaia?

² Baibel bukadia Genese amo ela bona Apokalupo ese idia hahedinaraia, Iehova be nega ibounai aneru dekenai gaukara ia henia. Adamu bona Heva idia kara dika bona Iehova ese Paradaiso amo ia luludia murinai, Dirava ese “Eden uma gabu ena dina ia daekau kahana dekenai kerubi aneru ia haginidia, uma gabu gimaia totona. Bona lahi kaia danu ia atoa. Unai kaia be ia giroagiroa kahana ibounai dekenai. Inai aneru bona kaia ese mauri auna dekenai lao dalana ia koua momokani.” (Gen. 3:24) Bona Apokalupo 22:6 ese ia hahedinaraia, Iehova “ese iena aneru ia  siaia ena igui hesiai taudia dekenai kahirakahira do idia vara gaudia ia hahedinaraia totona.”

3. Iesu be tanobada ai ia noho neganai, edena dala ai ena Tamana ia tohotohoa?

³ Iesu be tanobada ai ia noho neganai, Iehova ese ia henia gaukara be mai moale ida ia karaia. Ena Tamana bamona, Iesu ese iena hahediba taudia dekenai mai anina bada gaukara ia henia. Iesu ese idia ia hagoadaia gaukara namona idia karaia totona, ia gwau: “Umui lau hamaoroa momokani, lau ia abidadama henia tauna be lau karaia gaukaradia do ia karaia danu, bona ia karaia gaukaradia ese lau karaia gaukaradia do idia hereaia, badina lau be Tamana dekenai do lau lao.” (Ioa. 14:12) Iesu ese ia hamaorodia unai gaukara do idia karaia haraga, ia gwau: “Namona be lau ia siaia tauna ena gaukara be dina lalonai ita karaia. Hanuaboi be ia mai noho bona unai negai, tau ta do ia gaukara lasi.”—Ioa. 9:4.

4-6. (a) Dahaka dainai Noa bona Mose ese edia gaukara idia hagugurua dainai ita moale? (b) Dirava ese ena hesiai taudia dekenai ia henia gaukara ibounai ese dahaka namo idia havaraia?

⁴ Iesu be tanobada ia do mai lasi neganai, Iehova ese taunimanima dekenai gaukara namodia ia henia. Ena be Adamu bona Heva be Dirava ese ia henia gaukara idia hagugurua lasi, to taunimanima haida ese Dirava ena hereva idia badinaia. (Gen. 1:28) Iehova ese Noa ia hadibaia lagatoi ia haginia totona, unai amo ia bona ena famili idia roho mauri diba. Ia be Iehova ese ia hamaoroa hegeregerena ia karaia. Oibe, Noa ese Iehova ena hereva ia badinaia namonamo dainai, hari ita mauri noho!—Gen. 6:14-16, 22; 2 Pet. 2:5.

⁵ Iehova ese palai dubu haginia bona hahelaga edia gaukara karaia dalana be Mose dekenai ia hadibaia. Mose be Iehova ena hereva hegeregerena ia karaia. (Eso. 39:32; 40:12-16) Mose ese Dirava ia badinaia dainai, hari ita danu be namo ita davaria. Edena dala ai? Aposetolo Paulo ese ia hahedinaraia, unai palai dubu bona hahelaga taudia edia gaukara ese nega vairai “do idia mai gau namodia” idia laulaulaia.—Heb. 9:1-5, 9; 10:1.

⁶ Dirava ese ena ura hegeregerena, ena hesiai taudia dekenai gaukara idauidau ia henia. Ena be idia ese gaukara idauidau idia abia, to idia karaia gaukara ibounai ese Iehova ena ladana ia hanamoa bona taunimanima idia durua. Iesu ese guba ai bona tanobada ai ia karaia gaukara ese unai idia hamomokania. (Ioa. 4:34; 17:4) Unai hegeregerena, hari Iehova ese ita dekenai ia henia gaukara ese iena ladana ia abia isi. (Mat. 5:16; 1 Korinto 15:58 duahia.) Dahaka dainai unai bamona ita hereva?

7, 8. (a) Hari, Keristani taudia ese idia karaia diba gaukara idauidau mani oi herevalaia? (b) Iehova ena hakaua dalana be edena bamona ita laloa be namo?

⁷ Ita moale badina Iehova ese goevadae lasi taudia ia boiria ia ida do idia gaukara hebou totona. (1 Kor. 3:9) Keristani taudia haida be Noa bona Mose bamona, idia ese Assembly Hall, Kingdom Hall bona brens ofesi idia haginia. Herevana oi be emu gabu ai Kingdom Hall ta hanamoa gaukarana oi durua o Warwick, New York ai iseda hedikwota haginia gaukarana oi durua, to namona be emu gaukara oi laloa bada. (Laulau ginigunana itaia.) Unai be hesiai gaukara helagana. To, Keristani taudia ibounai edia gaukara badana be haroro gaukara. Unai gaukara amo Iehova idia hanamoa bona taunimanima idia durua. (Kara 13:47-49) Unai gaukara do ita karaia namonamo totona, Dirava ena orea ese ita ia hadibaia. Reana, nega haida asainmen matamata do ita abia.

 ⁸ Idaunega amo ema bona hari, Iehova ena abidadama hesiai taudia be mai ura ida iena hakaua dalana idia badinaia. (Heberu 13:7, 17 duahia.) Reana, matamanai ita ese asainmen matamata ita abia ena badina, do ita lalopararalaia lasi. To, ita abia dae, badina ita laloparara Iehova ese unai senisi ia karaia bona anina namona do ia havaraia.

9. Elda taudia ese kongrigeisen dekenai dahaka haheitalai namona idia hahedinaraia?

⁹ Elda taudia ese kongrigeisen idia hakaua dalana amo idia hahedinaraia idia ura dikadika Iehova ena ura do idia hagugurua. (2 Kor. 1:24; 1 Tes. 5:12, 13) Idia be mai ura ida haroro gaukara idia karaia, bona idia hekwarahi orea ena hakaua daladia idia abia dae, bona haroro dala matamatadia idia badinaia. Ena be matamanai idia daradara, to telefon haroro, sisima atoa gabudiai bona pablik gabudiai haroro gaukara idia hegaegaelaia neganai, idia itaia anina namona ia vara. Hegeregere, Germany ai painia foa ese edia lalona idia hadaia nega daudau idia haroro lasi bisinesi teritori ta idia karaia totona. Elda painia tadikaka Michael, ia gwau: “Lagani haida lalonai ai be bisinesi teritori ai karaia lasi, unai dainai ai gari sisina. Reana, Iehova be unai ia diba, badina ia ese unai daba kahana ena haroro ia hanamoa bona ai moalelaia bada. Ai moale badina ai ese Iseda Basileia Gaukara pepana lalonai idia noho hakaua hereva ai badinaia, bona Iehova dekenai ai tabekau!” Oi ura emu teritori ai idia karaia haroro dala matamatadia oi tohoa, a?

10. Vanegai lagani lalodiai, Iehova ena orea ese dahaka senisi haida ia karaia?

¹⁰ Nega haida, orea ese senisi haida ia karaia. Vanegai lagani lalodiai, brens ofesi haida be brens ofesi ma haida ida idia hatamonaia. Unai senisi ese Betele taudia edia noho dalana ia haidaua, to gabeai idia laloparara unai be mai ena namo. (Had. 7:8) Idia moale badina hari Iehova ena orea lalonai idia vara senisi idia durua!

11-13. Orea ese gau haida ia haidaua dainai, haida dekenai dahaka ia vara?

¹¹ Brens ofesi ta be brens ofesi ma ta danu idia hatamonaia neganai, unuseniai idia gaukara Betele taudia amo dahaka ita dibaia? Idia haida be unai Brens ofesi ai lagani momo herea idia gaukara vadaeni. Hegeregere, Central America ena Brens ofesi maragina ai idia gaukara tadikaka ta bona ena adavana idia siaia Mexico ena Brens ofesi badana ai idia gaukara totona. Rogelio ia gwau: “Egu famili bona turadia lau rakatania be auka.” Tadikaka ma ta, Juan idia noia Mexico ena Brens ofesi dekenai ia lao totona. Ia gwau: “Unai be hegeregere do lau vara lou bamona, badina do lau hekwarahi tura matamatadia lau diba totona. Danu egu laloa dalana do lau haidaua bona kastom matamatadia do lau dibaia.”

¹² Europe tanodia edia brens ofesi haida idia koua neganai, Betele taudia momo idia noia Germany ena brens ofesi dekenai idia lao totona. Idia lalohisihisi badina edia hanua idia rakatania be auka. Hegeregere, Switzerland amo idia mai taudia be edia hanua ena Alpine ororo badadia idia rakatania dainai idia lalohisihisi. Bona Austria amo idia mai taudia idia lalohisihisi, badina edia hanua ai idia moalelaia mauri namona idia rakatania.

¹³ Tano ma ta ena brens ofesi dekenai idia lao tadikaka taihu ese gau momo do idia haidaua. Hegeregere, noho gabu matamatana do idia manadalaia, guna idia diba lasi tadikaka taihu ida do idia gaukara, bona reana gaukara matamata do idia dibaia. Unai sibona lasi, to kongrigeisen matamata do idia bamoa, teritori matamata ta ai do idia haroro, bona reana gado matamata do idia dibaia. Unai senisi idia karaia be mai ena hekwarahi, to Betele taudia momo be unai idia karaia. Dahaka dainai?

14, 15. (a) Edena dala ai momo ese idia hahedinaraia, herevana edeseniai idia gaukara, to Iehova ida idia gaukara hebou ena hahenamo idia laloa bada? (b) Edena dala ai ita dekenai idia be haheitalai namona?

 ¹⁴ Taihu ta ladana Grethel, ia gwau: “Unai gaukara lau abia dae badina lau ura Iehova ia diba lau be tano ta, ruma ta, o hahenamo ta dainai lasi, to ia lau lalokau henia dainai lau hesiai henia.” Dayska ia gwau: “Lau diba unai invateisen be Iehova amo ia mai, unai dainai lau abia dae.” André bona Gabriela danu idia lalotamona, idia gwau: “Ai itaia unai ese dala ia kehoa Iehova ai hesiai henia totona, bona sibona emai ura gaudia do ai atoa guna lasi.” Idia laloa bema Iehova ena orea ese gau haida ia haidaua, namo lasi idia gwau-edeede to mai moale ida idia badinaia.

¹⁵ Brens ofesi haida edia gaukara idia hatamonaia dainai, Betele taudia haida idia siaia painia gaukara idia karaia totona. Hegeregere, Denmark, Norway, bona Sweden edia brens ofesi idia hatamonaia bona Scandinavia brens ofesi idia hamatamaia neganai, Betele taudia momo dekenai unai ia vara. Florian bona ena adavana Anja idia gwau: “Emai asainmen matamatana ai moalelaia. Ai laloa, Iehova ai hesiai henia be hahenamo badana, herevana edeseniai ai ia siaia. Ai gwau diba, Ia ese ai ia hanamoa bada!” Reana ita momo dekenai unai bamona do ia vara lasi, to unai tadikaka taihu bamona ita ese Basileia ita atoa guna diba, a? (Isa. 6:8) Herevana edeseniai Iehova idia hesiai henia, to hanaihanai Ia ida idia gaukara hebou ena hahenamo idia laloa bada taudia, be Ia ese do ia hanamodia.

16. (a) Galatia 6:4 ese ita ia hagoadaia dahaka ita karaia totona? (b) Ita ibounai ese ita abia diba hahenamo hereadaena be dahaka?

¹⁶ Ita be goevadae lasi taudia dainai, nega haida ma haida ida sibona ita hahegeregerea. To, Dirava ena Hereva ese ita ia hadibaia namona be ita sibona ese ita karaia diba gaudia do ita laloa. (Galatia 6:4 duahia.) Ita haida be elda, painia, misinari  o Betele gaukara ita karaia diba lasi. Ena be unai be hahenamo namodia, to hahenamo hereadaena ma ta be ita ibounai ese ita abia diba. Unai be haroro gaukara ai Iehova ida ita gaukara hebou ena hahenamo. Unai hahenamo ita laloa bada be gau badana!

17. Satani ena tanobada ai ita noho dainai dahaka do ia vara? To dahaka dainai ita lalomanoka lasi be namo?

¹⁷ Satani ena tanobada ai ita noho dainai, gau haida ese eda ful-taim hesiai gaukara idia hadikaia diba. Hegeregere, famili ena maduna idauidau, gorere, o hekwakwanai ma haida idia vara diba. To, namo lasi ita lalomanoka. Herevana ita dekenai dahaka hekwakwanai idia vara, ita ese hanaihanai Iehova ena ladana bona Basileia ita harorolaia diba. Mai anina bada gauna be: emu goada hegeregerena Iehova ida oi gaukara hebou noho, bona oi guriguri Ia ese ia idia hesiai henia goadagoada tadikaka taihu edia gaukara do ia hanamoa. Laloatao, Iehova ese iena ladana idia hanamoa taudia ia laloa bada!

18. Dahaka do ita dadaraia be namo, bona dahaka dainai?

¹⁸ Ena be ita goevadae lasi bona mai eda manoka gaudia, to Iehova ia ura ia ida do ita gaukara hebou. Oibe, ita moale badina inai nega dokona ai Dirava ida ita gaukara hebou! Unai dainai namona be ita sibona eda ura do ita dadaraia, badina ita diba Paradaiso ai Iehova ese ita dekenai “mauri korikorina” do ia henia—mauri hanaihanai mai maino danu.—1 Tim. 6:18, 19.

19. Iehova ena gwauhamata hegeregerena, vaira negana ai dahaka hahenamo do ita davaria?

¹⁹ Ita be kahirakahira tanobada matamatana lalonai do ita vareai. Unai dainai, Israela taudia be kahirakahira Gwauhamata Tanona ai do idia vareai neganai, Mose ese ia hamaorodia herevana ita laloatao be namo. Ia gwau: “Lohiabada, emui Dirava ese umui do ia hanamoa, emui gaukara ena anina do ia habadaia.” (Deu. 30:9) Aramagedono murinai, Iehova ena gwauhamata hegeregerena hari Dirava ida idia gaukara hebou taudia ese tano do idia abia. Bena ita ese gaukara ma ta do ita hamatamaia—tanobada be paradaiso ai do ita halaoa!