LAU bona Gwen emai mauri lagani be faiv neganai, mavaru ai dibaia matamaia. To, ai ruaosi be ai do hedavari lasi. Ai tubu daekau lalonai emai tahua gauna be balerina mavaru do ai karaia. Unai ai karaia ela bona ai be ladana bada taudia ai ai lao, to gabeai unai ibounai ai rakatania. Dahaka dainai unai abia hidi ai karaia?

David: Lau be lagani 1945 ai, England, Shropshire ai lau vara. Egu tamana be taoni ena murimuri tano ta dekenai animal fam ta ia naria. Sikuli murinai, lau ese kokoroku lau ubua, edia gatoi lau haboua, bona boromakau bona mamoe lau naria. Sikuli ena holidei negadiai, uma aniani gogoa gaukarana lau karaia bona nega haida trakta lau taria.

To, egu mauri ai lau be gau ta lau ura henia matamaia. Lau maragi neganai, egu tamana ia itaia hanaihanai miusiki lau kamonai neganai lau mavaru. Unai dainai egu mauri lagani be faiv neganai, egu sinana ia hamaoroa mavaru sikulina ta dekenai lau ia atoa, unai amo tap dance lau dibaia. Egu tisa ia laloa lau be balerina mavaru lau karaia diba, unai dainai lau ia treinini henia matamaia. Egu mauri lagani be 15 neganai, skolasip ta idia henia Royal Ballet School, London dekenai, lau lao totona. Unuseniai lau ese Gwen lau davaria, bona ia be egu mavaru hebou tauna ai ia lao.

Gwen: Lau be lagani 1944 ai, London ena siti dekenai lau vara. Lau maragi neganai, lau be Dirava lau abidadama henia. Ena be Baibel lau duahia, to lau lalopararalaia be auka. Egu mauri lagani be faiv neganai, mavaru idia hadibaia klas ta dekenai lau lao. Lagani siks murinai, Britain ena mavaru kompetisen ta dekenai lau kwalimu dainai, lau idia siaia Royal Ballet School dekenai lau lao totona. Unai sikuli be ruma badana mai hairaina White Lodge lalonai, unai be London ai, gabu ladana Richmond Park dekenai idia haginia. Lau be unuseni lau sikuli bona ladana bada tisa haida ese balerina mavaru idia hadibaia danu. Egu mauri lagani be 16 neganai, Royal Ballet School ena haisikuli dekenai lau lao bona unuseniai David lau davaria. Hua haida lalonai, ai ruaosi be London ena Royal Opera House, Covent Garden ai, balerina mavarudia lalonai ai mavaru hebou.

David: Oibe, Gwen ena hereva bamona, ai be Royal Opera House dekenai ai mavaru bona London Festival Ballet (hari idia gwauraia, English National Ballet) dekenai ai mavaru danu.Royal Opera House ai mavaru hadibaia tisa ta be Wuppertal, Germany ai, mavaru kampani ta ia haginia, bona ai ruaosi ia abia hidi ia ida ai gaukara totona. Unai neganai, ai be tanobada ibounai dekenai ai loaloa, mavaru idia hahedinaraia gabudia dekenai ai mavaru, bona ladana bada taudia hegeregere, Margot Fonteyn bona Rudolf Nureyev ida ai mavaru danu. Unai mauri dalana ese ta dekenai hekokoroku karana ia havaraia diba, bona ai be unai mavaru totona emai nega, goada bona kohu ibounai ai gaukaralaia.

Gwen: Lau ese unai mavaru dekenai egu lalona  bona goada ibounai lau gaukaralaia. Lau bona David ai ura ladana bada taudia ai do ai lao. Buka o unai bamona gaudia ai egu ladana lau sainia, flaoa lau abia, bona helai taudia ese lau idia hanamoa karana lau moalelaia. Lau itaia egu turadia momo be matabodaga, kuku ania bona inuinu kekero karadia idia karaia. Haida idia karaia bamona lau ura kwalimu dainai, egu laki gaudia dekenai lau tabekau.

David: Lagani momo lalonai lau be mavaru gaukarana lau karaia, bona ai loaloa momo dainai lau hesiku. Lau be fam ai lau tubu daekau dainai, egu lalona lau hadaia kohu momo lasi maurina lau noholaia totona. Unai dainai lagani 1967 ai, egu mavaru gaukarana lau rakatania bona egu tama sina edia gabu kahirakahira ia noho fam badana ta dekenai lau gaukara matamaia. Unai fam biaguna ese gwaumaoro ia henia ruma maragina ta lau rentaia totona. Bena lau ese Gwen lau rini henia lau ia adavaia totona. Unai neganai, ia be ladana bada bona moni bada ia abia, unai dainai disisen ia karaia be auka. To, egu ura ia abia dae bona ia mai lau ida ia noho, ena be unai mauri dalana ia do manadalaia lasi.

Gwen: Oibe, lau be fam ena mauri dalana lau manada lasi. Boromakau amo milika abia, bona nega idauidau ai boroma bona kokoroku ubua karana lau diba lasi. Hua nain lalonai, David be fam ena kosi ta ia karaia, unai amo animal naria ena dala matamatadia haida ia diba totona. Ia be hanuaboi ai ruma dekenai ia ginidae dainai, nega momo lau mamia lau be sibona lau noho. Unai negai emai natuna kekeni ginigunana, Gilly ia vara. David ese lau ia hamaoroa namona be motuka taria dalana do lau diba. Dina ta taoni lau lao bona unuseniai Gael lau hedavari henia. Ia lau diba badina guna ia be taoni ena stoa ta dekenai ia gaukara.

Gael ese lau ia boiria ena ruma ai ti ai inua totona.Ai ruaosi be ta ta emai wedin foto ai itaia lalonai, iena foto ta dekenai lau itaia taunimanima haida be ruma ta ladana Kingdom Hall badinai idia gini. Lau nanadaia unai be edena dubu. Lau ia hamaoroa ia bona ena adavana be Iehova ena Witnes taudia neganai, lau moale bada. Lau laloatao egu anti ta be Witnes hahine ta. Danu, lau laloatao guna egu tamana ese egu anti ena buka be rabisi lalonai ia negedia, badina ia ese unai orea ia ura henia lasi. Lau daradaralaia gauna be, ena be egu tamana be heabidae tauna, to dahaka dainai ia ese unai kara namo hahine ia badu henia.

To, hari dala ia kehoa lau diba, edena dala ai egu anti ese ia abia dae gaudia be dubu ma haida edia amo ia idau. Gael ese Baibel ena hadibaia herevadia be lau dekenai ia hahedinaraia. Lau hoa badina  lau itaia hahediba herevadia momo hegeregere, Toi Tamona bona mase diba lasi souli be Baibel amo lasi. (Had. 9:5, 10; Ioa. 14:28; 17:3) Bona unai be egu nega ginigunana Dirava ena ladana, Iehova, be Baibel ai lau itaia.​—Eso. 6:3.

David: Gwen ese ia dibaia gaudia be lau dekenai ia hadibaia. Lau laloatao lau maragi neganai, egu tamana be lau ia hamaoroa Baibel lau duahia totona. Unai dainai, lau bona Gwen ai lalotamona Gael bona ena adavana Derrick ida Baibel ai stadilaia totona. Hua siks murinai, ai be Shropshire ena provinsi Oswestry dekenai ai lao, badina unuseniai fam maragina ta ai rentaia diba. Unuseniai ia noho Witnes hahinena ta, Deirdre, ese ai ida Baibel stadi ia karaia. Matamanai emai stadi ai karaia namonamo lasi, badina fam ai animal naria gaukara dekenai ai bisi bada. To, metairametaira hereva momokani ese aiemai mauri ia haidaua.

Gwen: Lau ese do lau hanaia koua gauna badana ta be lau gaukaralaia laki gaudia. Isaia 65:11 ese lau ia durua “laki ena dirava” idia tomadiho henia taudia dekenai Iehova ena lalohadai lau dibaia totona. Unai lau gurigurilaia bona nega daudau ia hanaia murinai, lau ese egu laki gaudia ibounai lau negedia. Lau laloparara “sibona ena ladana ia habadaia tauna ese ladana maragina do ia abia. To sibona ia hamanaua tauna ese ladana badana do ia abia.” Unai ese lau ia durua lau laloparara Iehova be edena bamona taudia ia ura henia. (Mat. 23:12) Dirava be ita ia laloa bada dainai ena lalokau Natuna be mauri davalaia boubouna bamona ia henia, bona lau ura unai bamona Dirava lau hesiai henia. Unai neganai, emai natuna kekeni iharuana ia vara bona ai moale badina ai diba emai famili ibounai be tanobada paradaisona lalonai ai noho diba.

David: Baibel ena peroveta herevadia hegeregere, Mataio karoa 24 bona Daniela bukana edia peroveta herevadia, edia guguru dalana lau dibaia neganai, lau abia dae unai be hereva momokani. Lau laloparara Iehova tura henia karana ena namo ese hari idia noho gaudia ia hereaia. Unai dainai, lau ese ladana bada abia urana lau dadaraia. Danu lau laloparara egu adavana bona natudia lau laloa be mai anina bada. Filipi 2:4 ese lau ia hagoadaia sibona egu namo lau laloa lasi bona fam badana abia urana lau dadaraia totona. To, namona be egu mauri lalonai Iehova hesiai henia karana do lau atoa guna. Siga ania karana lau hadokoa. Saturday adorahi ena hebou totona kilomita 10 ai raka be auka, badina unai dinai ai ese boromakau ena milika do ai haboua danu. To, Gwen ena heduru dainai ai ese hebou ta ai reaia lasi. Danu Sunday dabai, boromakau ena milika ai haboua murinai, emai natudia kekeni ida haroro gaukara ai lao.

Emai mauri ai haidaua dainai emai varavara be ai dekenai idia moale lasi. Gwen ena tamana be lagani siks lalonai Gwen ia hereva henia lasi. Danu egu tama sina ese ai idia koua Witnes taudia ai bamoa lasi totona.

Gwen: Iehova ese ai ia durua unai hekwakwanai ai  haheaukalaia totona. Unai negadia, Oswestry kongrigeisen ai tadikaka taihu be emai famili matamatana bamona mai lalokau ida ai idia durua. (Luka 18:29, 30) Lagani 1972 ai, Iehova dekenai emai mauri ai gwauhamatalaia bona bapatiso ai abia. Lau ura momo lau durua hereva momokani idia dibaia dainai, painia gaukara lau hamatamaia.

David: Ena be lagani momo fam dekenai ai gaukara be mai ena hekwarahi, to ai ura emai natudia dekenai haheitalai namona ai hahedinaraia dainai Iehova tomadiho henia karana ai atoa guna. Gabeai, gavamani ese fam gaukaradia durua totona idia henia moni idia koua dainai, ai ese emai fam ai rakatania. Ai be ruma bona moni gaukara lasi, bona emai natuna kekeni ihatoina ena mauri lagani be tamona sibona. Unai dainai, Iehova ai guriguri henia ai ia durua bona hakaua totona. Ai be mavaru dalana ai diba dainai, abia hidi ai karaia mavaru sikuli maragina ta do ai haginia, unai amo famili ai durua diba. Iehova ena ura ai atoa guna dainai, anina namona ia havaraia. Ai moale badina emai natudia toi be sikuli idia haorea murinai painia gaukara lalonai idia vareai. Gwen be ia painia dainai, dina ta ta ai emai natudia ia durua diba.

Emai natuna kekeni badadia rua Gilly bona Denise idia headava murinai, emai mavaru sikulina ai koua. Ai ese brens ofesi ai tore henia, unai amo ai diba edena gabu ai heduru do ai henia diba. Bena England ena saut ist ena taoni dekenai ai idia siaia lao. Emai natuna kekeni dokona, Debbie be ai ida ia do noho neganai, lau ese painia gaukara lau hamatamaia. Lagani faiv murinai, brens ese ai ia noia not kahanai ia noho kongrigeisen haida ai durua totona. Debbie ia headava murinai, ai be lagani 10 lalonai Zimbabwe, Moldova, Hungary, bona Côte d’Ivoire dekenai intanesinol konstraksen gaukara ai karaia. Unai murinai, ai giroa England dekenai, London ena Betele ai konstraksen ai durua totona. Fam gaukara lau diba momo dainai, lau idia noia Betele ena fam dekenai lau gaukara totona. Hari, ai be England ena not west kahana dekenai ai painia noho.

Gwen: Guna balerina mavaru dekenai emai mauri ibounai ai henia bona ai moale, to unai moale be ia noho daudau lasi. Gabeai ai gwauhamata Iehova do ai hesiai henia, unai ese noho hanaihanai moalena ia havaraia. Hari lau bona David be ai mavaru hebou lasi, to ai haroro hebou noho. Ai moale bada badina taunimanima momo ai durua diba hahemauri sivarai momokanina idia dibaia totona. Inai “hamomokania revareva” ese tanobada ai ladana bada abia karana ia hereaia. (2 Kor. 3:1, 2) Bema hereva momokani ai diba lasi, reana hari ai dekenai idia noho gaudia be, emai memori sibona, foto gunadia, bona guna ai karaia mavaru edia program haida.

David: Iehova hesiai henia gaukarana ese emai mauri ia haidaua. Lau diba unai ese lau ia durua adavana bona tamana namona ai lau lao totona. Baibel ese ia hahedinaraia, Miriama, King Davida, bona ma haida be idia moale neganai idia mavaru. Ai bona taunimanima momo be Iehova ena tanobada matamata lalonai mai moale bada ida do ai mavaru.​—Eso. 15:20; 2 Sam. 6:14.