1, 2. Taunimanima haida be Dirava dekenai dahaka idia laloa?

 TAUNIMANIMA momo idia laloa idia karaia karadia be Dirava ese ia laloa lasi. Bona haida idia laloa taunimanima dekenai idia vara gaudia be Dirava ese ia laloa bada lasi. November 2013 ai, lai gubana ladana Haiyan ese Philipines ena kahana haida ia hadikaia neganai, siti badana ta ia naria tauna ta ia gwau: “Reana Dirava be gabu ta dekenai ia lao.”

² Ma haida idia laloa idia karaia kara dikadia be Dirava ese ia itaia lasi. (Isa. 26:10, 11; 3 Ioa. 11) Aposetolo Paulo be unai bamona taudia ia herevalaia, ia gwau: “Idia ura lasi Dirava dekenai diba maoromaoro idia abia.” Idia be “inai kara idauidau ibounai amo idia honu, kara kerere, kara dika, mataganigani, dika idauidau.”—Roma 1:28, 29.

 3. (a) Dirava ita laloa neganai, edena bamona henanadai be sibona dekenai ita henia diba? (b) Baibel be Iehova ena “imana” ia herevalaia neganai, ena anina be dahaka?

³ To, ita be unai bamona lasi, badina ita diba ita karaia karadia ibounai be Iehova ese ia itaia. To, iseda mauri lalonai Dirava ese ita laloa bona ita ia durua dalana ita itaia danu, a? Danu, ita be Iesu ese ia gwauraia ‘Dirava do idia itaia’ taudia huanai ita noho,  a? (Mat. 5:8) Unai ena anina ita diba totona, namona be Baibel ena haheitalai haida ita itaia. Unai taudia haida be Dirava ese idia ia durua daladia idia itaia, to ma haida be Dirava ena heduru daladia idia itaia lasi. Edia sivarai ese ita do ia durua diba iseda mauri ai Iehova ena heduru daladia be eda abidadama ena matana amo ita itaia totona. Unai gaudia ita stadilaia neganai, namona be ita laloatao Baibel ese Dirava ena “imana” ia herevalaia neganai, ia be Dirava ena siahu ia herevalaia. Ia be unai ia gaukaralaia ena hesiai taudia ia durua bona ena inai taudia ia halusia totona.—Deuteronomi 26:8 duahia.

 4. Dahaka dainai Israela ena tuari taudia idia laloparara lasi Dirava ese ena taunimanima ia durua?

⁴ Idaunegai Israela ai, taunimanima be Dirava ese Israela taudia ia durua dalana idia itaia bona ena sivarai idia kamonai. Iehova ese hoa dalanai ena taunimanima be Aigupito amo ia hamauria, bona king momo ia halusia. (Ios. 9:3, 9, 10) Ena be Ioridane ena west kahana idia noho king ibounai be Dirava ese ena taunimanima ia durua daladia idia itaia diba, to “idia ibounai ese idia haboua, mai lalona tamona, Iosua bona Israela taudia do idia tuari henia totona.” (Ios. 9:1, 2) Danu, tuari lalonai unai king taudia idia itaia diba Dirava ese ena taunimanima ia durua noho. Iehova ena ura hegeregerena “dina be ia gini noho, bona hua be iena gabu dekenai ia noho, ela bona Israela taudia ese idia dekenai idia tuari henia taudia idia halusia momokani.” (Ios. 10:13) To Iehova ese “unai taudia edia kudouna ia ha-aukaia, Israela taudia do idia tuari henia totona.” (Ios. 11:20) Israela idia tuari henia taudia idia ura lasi abia dae Dirava be Israela totona ia tuari noho, unai dainai tuari ai idia kwalimu lasi.

 5. King Ahaba ia ura lasi dahaka ia abia dae?

⁵ Gabeai, King Ahaba ia itaia diba Dirava be ena siahu amo ena hesiai taudia ia durua. Elia ese Ahaba ia hamaoroa: “Paripari bona medu be do ia diho lasi, lagani rua o toi, ela bona ma lau hereva.” (1 Kin. 17:1) Iehova ese unai hereva ia gwauraia, to Ahaba ia ura lasi unai ia abia dae. Gabeai, Elia be ena boubou gauna totona ia guriguri neganai, Ahaba ia itaia guba amo lahi ia diho bona unai boubou gauna ia gabua ore. Bena Elia be Ahaba ia hadibaia Iehova ese medu do ia mailaia. Elia ese Ahaba ia hamaoroa: “Ruma dekenai do ia lao, medu ese do ia koua garina.” (1 Kin. 18:22-45) Ahaba be idia vara gaudia ibounai ia itaia, to ia abia dae lasi unai be Dirava ena siahu bada dainai idia vara. Unai sivarai bona gabeai do ita herevalaia sivarai haida ese ita dekenai mai anina bada gauna ta ia hadibaia. Iehova ese ena siahu amo ita ia durua daladia ita diba be namo.

6, 7. Iosua ena negai, haida be dahaka idia abia dae?

⁶ Herevana haida be unai nega ai idia noho, to idia be unai king dikadia bamona lasi, badina Dirava ese ena taunimanima ia durua dalana idia itaia. Hegeregere, Gibeona taudia be Iosua ena negai Israela idia tuari henia besedia bamona lasi, badina idia be Israela ida maino idia karaia. Dahaka dainai maino idia karaia? Idia gwau: “Ai, oiemu hesiai taudia, . . . Lohiabada, emui Dirava, ena ladana dainai ai mai vadaeni. Badina be Lohiabada ena sivarai ai kamonai vadaeni, bona iena kara.” (Ios. 9:3, 9, 10) Idia laloparara Dirava momokanina be Israela taudia ia durua noho.

⁷ Rahaba danu be ena negai Iehova ena siahu ia itaia. Iehova ese ena taunimanima ia hamauria herevana ia kamonai murinai,  Israela ena spai taudia rua ia hamaoroa: “Lau diba Lohiabada ese inai tano umui dekenai ia henia vadaeni.” Ena be unai ia karaia dainai dika ia davaria diba, to ia abia dae Iehova ese ia bona ena ruma bese do ia hamauria.—Ios. 2:9-13; 4:23, 24.

 8. Edena dala ai Israela taudia haida be Dirava ena siahu idia itaia?

⁸ Israela taudia haida be King Ahaba bamona lasi, badina idia itaia Iehova ese guba amo lahi ia siaia bona Elia ena boubou gauna ia gabua ore. Badina idia gwau: “[Iehova], ia be Dirava.” (1 Kin. 18:39) Idia abia dae momokani Iehova be Elia ia durua.

 9. Edena dala ai hari ita ese Iehova bona ena siahu ita itaia diba?

⁹ Ita herevalaia haheitalai namodia bona dikadia ese ita ia durua Dirava ena heduru daladia ita itaia totona. Dirava ita dibaia neganai, iena siahu ita itaia diba, badina ena kara be eda “kudouna ena matana” amo ita itaia. (Efe. 1:18) Unai ese ita ia hagoadaia idaunegai bona hari idia noho abidadama taudia ita tohotohoa totona, badina Iehova ese ena taunimanima ia durua dalana idia itaia. To, hari inai negai Dirava ese ena taunimanima ia durua dalana ita itaia danu, a?

10. Dahaka ese ia hahedinaraia Iehova ese taunimanima ia durua noho? (Laulau ginigunana herevalaia.)

¹⁰ Hari inai negai, gau momo ese idia hahedinaraia Iehova be ena taunimanima ia durua noho. Nega momo ekspiriens haida ita kamonai, haida be Dirava ena heduru totona idia guriguri neganai, heduru idia abia. (Sal. 53:2) Philippines dekenai, Allan be motumotu ta dekenai ia haroro lalonai, hahine ta ia davaria bona unai hahine ia tai matamaia. Allan ia gwau: “Unai daba ai, unai hahine be Iehova dekenai ia guriguri, bona ia noinoi ena Witnes taudia ese ia do idia davaria. Ia maragi neganai, Witnes taudia ida Baibel ia stadilaia, to ia headava bona unai motumotu dekenai ia mai neganai, Witnes taudia ia itaia lou lasi.” Lagani ta murinai, ena mauri be Iehova dekenai ia gwauhamatalaia.

11, 12. (a) Edena dala ai Iehova be ena hesiai taudia ia durua noho? (b) Dirava ena heduru ia abia taihu ta ena ekspiriens ta herevalaia.

¹¹ Dirava ena hesiai taudia momo idia itaia Iehova ese idia ia durua. Badina edia kara gunadia hegeregere kuku ania karana, drag ania karana, eiava matabodaga laulaudia itaia karana idia rakatania. Haida idia gwau idia ura sibona edia goada amo unai kara idia rakatania, to idia kwalimu lasi. To, Iehova ena heduru idia tahua neganai, ia ese “taunimanima edia siahu ia hereaia gauna” ia henia, bona edia kara gunadia idia rakatania.—Sal. 37:23, 24; 2 Kor. 4:7.

¹² Iehova ese ena hesiai taudia momo ia durua edia mauri ena hekwakwanai idia hanaia totona. Hegeregere, Amy dekenai unai ia vara, ia be Kingdom Hall bona Misinari ruma haginia totona Pacific motumotu ta dekenai idia siaia. Ia gwau: “Hotel maragina dekenai ai noho, bona konstraksen gabuna dekenai ai lao totona nega momo dala be ia abata.” Unai hanua taudia edia noho dalana ia manadalaia be namo, danu unai gabu dekenai nega momo ranu bona paua be lasi. Amy ma ia gwau: “Bona unai hekwakwanai ia habadaia gauna ta be, taihu ta dekenai lau hereva auka. Ruma dekenai lau giroa neganai, lau laloa lau hegeregere lasi. Egu daiutu maragina lalonai, Iehova dekenai egu lalohekwarahi ibounai lau gwauraia, bona ena heduru lau noia.” Paua ia mai neganai, Amy be Gilead gradueisen ia herevalaia Gima Kohorona ta ia abia. Ami ia hekwarahilaia gaudia be unai magasin ese ia herevalaia, hegeregere kastom matamata, ruma bese laloa momo, bona taunimanima idauidau  manada henia karana. Ia gwau: “Lau mamia unai hanuaboi ai Iehova be lau dekenai ia hereva noho. Unai ese lau ia hagoadaia egu asainmen lau karaia noho totona.”—Sal. 44:25, 26; Isa. 41:10, 13.

13. Dahaka ese ia hamomokania Iehova be ena taunimanima ia durua kota vairanai sivarai namona ena maoro idia gwauraia totona?

¹³ Iehova ena Witnes taudia ese kota vairanai sivarai namona ena maoro idia gwauraia karana ese ia hamomokania Iehova ese idia ia durua. (Fili. 1:7) Gavamani haida be Dirava ena taunimanima edia gaukara idia ura koua. To, ita itaia Iehova ena Witnes taudia be kota badana dekenai keis 268 idia kwalimulaia, bona lagani 2000 amo European Court of Human Rights ai keis 24 idia kwalimulaia. Unai ese ia hahedinaraia ta ese Dirava ena siahu ia koua diba lasi.—Isa. 54:17; Isaia 59:1 duahia.

14. Edena dala ai ita diba Dirava ese ita ia durua iseda haroro gaukara bona ita huanai lalotamona ia noho totona?

¹⁴ Tanobada ibounai haroro gaukarana be Dirava ena heduru amo idia karaia. (Mat. 24:14; Kara 1:8) Ma danu, hari Iehova ena orea lalonai bese idauidau taudia be mai lalotamona ida idia noho. Tanobada taudia be unai bamona idia karaia diba lasi, unai dainai murimuri taudia haida idia gwau: “Momokani, Dirava be umui huanai ia noho.” (1 Kor. 14:25) Unai ibounai ese ia hamomokania Dirava be ena taunimanima ia durua noho. (Isaia 66:14 duahia.) To, oi be edena bamona? Emu mauri lalonai Iehova ese oi ia durua dalana oi itaia, a?

15. Dahaka dainai nega haida ita laloparara lasi Dirava ese ita ia durua noho?

¹⁵ Dahaka dainai nega haida Dirava ena heduru ita lalopararalaia lasi? Mauri ena hekwakwanai idauidau ese ita ia hametaua diba. Unai ia vara neganai, Iehova ese ita ia durua dalana do ita laloaboio. Kwini Iesebele ese peroveta tauna Elia ia ura hamasea neganai, Elia be Iehova ese ia durua dalana ia laloaboio. Baibel be Elia ia herevalaia, ia gwau: “Ia noinoi do ia mase.” (1 Kin. 19:1-4) To, Elia be dahaka ia karaia be namo?  Namona be Iehova ena heduru ia tahua goada ia abia totona.—1 Kin. 19:14-18.

16. Iobu bamona, dahaka ita karaia diba Dirava ena heduru ita itaia totona?

¹⁶ Iobu be sibona ena namo ia laloa dainai, Dirava ena lalohadai ia laloa lasi. (Iobu 42:3-6) Ita dekenai unai ia vara diba, unai dainai namona be ita hekwarahi Dirava ena heduru daladia ita itaia totona. Edena bamona unai ita karaia diba? Baibel ese ia hahedinaraia bamona, namona be ita dekenai idia vara gaudia ita laloa dobu. Bena Iehova ena heduru daladia ita dibaia neganai, ia be ita dekenai Dirava korikorina ai do ia lao. Bena Iobu bamona, do ita gwau: “Guna egu taiana sibona dekenai, oiemu sivarai lau kamonai, to harihari egu matana ese, oi idia itaia momokani vadaeni.”

17, 18. (a) Edena dala ai do ita diba Iehova be ita ia durua noho? (b) Ekspiriens ta oi gwauraia, unai ese ia hahedinaraia hari Dirava ese ita ia durua noho?

¹⁷ Iehova ese ita ia durua daladia be edena bamona ita itaia diba? Haheitalai be inai: Reana oi mamia Dirava ena hakaua dainai oi be hereva momokani oi dibaia. Nega ta oi be Keristani hebouna dekenai tok ta oi kamonai bona oi gwau: “Unai hereva be lau totona.” Eiava emu guriguri ena haere ta oi abia. Reana emu lalona oi hadaia emu haroro gaukara oi habadaia, bona oi moale badina Iehova ese oi ia durua. Eiava nega ta moni gaukara oi rakatania badina oi ura Dirava ena hesiai gaukara oi karaia, bona Dirava ena gwauhamata ia momokani oi dekenai: ‘Oi do lau rakatania lasi.’ (Heb. 13:5) Bema Dirava ena hesiai gaukara ita goadalaia, do ita diba Iehova ese dala idauidau ai ita ia durua noho.

¹⁸ Kenya ai, Sarah ia gwau: “Egu stadi hahine ta totona lau guriguri, badina ia be ena Baibel stadi ia laloa bada lasi. Iehova lau noia bema ena stadi lau hadokoa diba. ‘Amen’ lau gwauraia neganai, egu fon ia rini. Egu Baibel stadi hahine be lau ia rini henia bona lau ia noia bema lau ida do ia lao hebou dekenai. Lau hoa bada!” Bema Iehova ena heduru daladia ita laloa bada noho, iseda mauri lalonai Dirava ese ita ia durua daladia do ita itaia. Asia ai, taihu ta ladana Rhonna ia gwau: “Namona be ita diba Iehova be ita ia hakaua noho. Bona unai oi diba neganai, do oi itaia Iehova be ita ia laloa bada!”

19. Dirava idia itaia taudia huanai ita noho totona, dahaka ita karaia be namo?

¹⁹ Iesu ia gwau: “Kudouna idia goeva taudia be idia moale, badina idia ese Dirava do idia itaia.” (Mat. 5:8) Edena dala ai iseda ‘kudouna ia goeva’ diba? Namona be iseda lalona ia goeva bona kara dikadia ita rakatania. (2 Korinto 4:2 duahia.) Iehova ena hesiai gaukara ita goadalaia bona kara namodia ita hahedinaraia neganai, ita be Dirava idia itaia taudia huanai ita noho. Stadi gabena ai ita be abidadama do ita herevalaia, unai ese ita do ia durua iseda mauri lalonai Iehova ese ita ia durua dalana ita itaia totona.